Kapitali 1
Atuuffia

§ 1.  Naalakkersuisut Kalaallit Nunaanni Nunat Aqqinik Aalajangiisartut (Nunat Aqqinik Aalajangiisartut) pilersissavaat, nunat aqqinik nalunaarsuisarnissaq, siunnersuisarnissaq aamma paasissutissiisarnissaq atuutsitaasussanillu atsersuisarnissaq qulakkeerniarlugit.
  Imm. 2.  Nunat Aqqinik Aalajangiisartut Namminersorlutik Oqartussat ataanni ingerlatsiviupput. Nunat Aqqinik Aalajangiisartut piginnaatitaanerat tamakkiisumik ilaannakuusumilluunniit allanut tunniunneqarsinnaanngilaq.

Kapitali 2
Suliassat

  § 2.  Nunat Aqqinik Aalajangiisartut suliassaraat:
1)  Kalaallit Nunaanni nunat aqqi katersussallugit, nalunaarsussallugit atortussanngortittassallugillu, tak. § 3, aqqusernit illoqannginnersallu aqqi minillugit,
2)  nunat aqqinik atortussanngortitsisarnermut tunngavissanik aalajangersaassalluni taakkulu tamanut saqqummiutissallugit,
3)  kommunalbestyrelsinit oqaaseqarfigineqareernerisigut nunat aqqinik atortussanngortitsinissamut periaatsinik suliaqarnissaq,
4)  nunat aqqinik nalunaarsukkat suliarissallugit, paasisitsiniutigisassallugit tamanullu saqqummiuttassallugit,
5)  apeqqutini nunat aqqinut tunngasuni pisortat inuillu siunnersortassallugit, ilitsersortassallugit paasissutissittassallugillu,
6)  Oqaasiliortut, pisortat, suliffeqarfiit inuillu nunat aqqinik kalaallisuunik atortussanngortitassanik saqqummiussisartut imaluunniit inassuteqartartuusut suleqatigisassallugit, aamma
7)  nunani allani suliffeqarfinnik assingusunik suleqateqartassallutik.
  Imm. 2.  Suliassanut inatsimmi aalajangersarneqarsimasunut atatillugu suliassanik allanik Naalakkersuisut Nunat Aqqinik Aalajangiisartut isumaginneqqusinnaavaat.
  Imm. 3.  Nunat Aqqinik Aalajangiisartut suliassat aalajangersimasut suliarineqarnissaannut aalajangersimasumik suligasuartussanik ataatsimiititalianik, suleqatigiissitalianik komiténilluunniit Nunat Aqqinik Aalajangiisartut ilaasortaannik imaluunniit peqataasussanik avataaneersunik immikkut piginnaasalinnik inuttaqartunik pilersitsisinnaapput.

  § 3.  Nunap aqqanik atortussanngortitsinermi Nunat Aqqinik Aalajangiisartut qulakkiissavaat nunap aqqa taanna pisortatigoortumik kalaallisut allaattaatsimi atuuttumi aalajangersakkanut naapertuuttuunersoq, tassunga ilanngullugit nunat aqqinut tunngavissatut aalajangersakkat aamma nunat aqqinik atortussanngortitsinissamut Nunat Aqqinik Aalajangiisartut tunngavissatut aalajangersagaat.
  Imm. 2.  Nunat Aqqinik Aalajangiisartut isumaqarunik nunap aqqa allattaatsimut sukkulluunniit atuuttumut uniuuttoq, pissutsit immikkut ittut tunngavigalugit atortussanngortinneqartariaqartoq, taava Nunat Aqqinik Aalajangiisartut tamanna Oqaasiliortunut akuerisassanngorlugu saqqummiutissavaat.

Kapitali 3
Nunat Aqqinik Aalajangiisartut katitigaanerat aningaasarsiaqartinneqarnerallu

  § 4.  Nunat Aqqinik Aalajangiisartunut ilaasortat Naalakkersuisunit toqqarneqartartut tallimaapput. Ilaasortat toqqarneqartassapput uku inassuteqarnerisigut:
1)  Nunatta Katersugaasivia Allagaateqarfialu.
2)  Ilisimatusarfik.
3)  Kommunit peqatigiillutik.
4)  Aalisartut piniartullu peqatigiiffii.
5)  Asiaq.
  Imm. 2.  Kattuffiit il.il. inassuteqartussat tamarmik qinigassanik marlunnik inassuteqartassapput tak. imm. 1.
  Imm. 3.  Nunat Aqqinik Aalajangiisartut tamarmiullutik ilisimasaqarfigissavaat nunami sumiiffiit, oqaluttuarisaaneq kulturilu, aamma ilaasortat Kalaallit Nunaanni aalajangersimasumik najugaqartuussapput.
  Imm. 4.  Ilaasortat ataasiakkaarlutik tamarmik piginnaaneqarfigissavaat aalajangiisartutut suliassaqarfinni sinniisuuffigisaminni immikkoortoq arlallilluunniit, tak. imm. 3.
  Imm. 5.  Nunat Aqqinik Aalajangiisartut siulittaasussaminnik namminneq toqqaassapput.

  § 5.  Nunat Aqqinik Aalajangiisartunut ilaasortat ukiuni sisamani ilaasortaasartussatut toqqarneqartassapput, siullermik piffissami 1. januar 2018-imit 31. december 2021-mut atuuttussatut toqqaasoqassaaq.
  Imm. 2.  Ilaasortat toqqaqqinneqarsinnaapput.
  Imm. 3.  Ilaasortaq atuuffiup iluani ilaasortaajunnaarpat nutaamik Naalakkersuisut toqqaassapput. Naalakkersuisut toqqaanerminni isiginiartassavaat aalajangiisartut § 4, imm. 2 naapertorlugu aalajangersakkanik naammassinnissinnaanissaat. Ilaasortanngortoq taanna ukiut sisamat atuuffiusussap sinneranut toqqarneqassaaq.
  Imm. 4.  Naalakkersuisut toqqagaaffiup iluani ilaasortamik ilaasortaajunnaarsitsisinnaapput, ilaasortaq pineqartoq ilatsiinnarpallaarpat, imaluunniit suliassaminik isumaginninnissamut allatut piukkunnarunnaarsimappat.

  § 6.  Nunat Aqqinik Aalajangiisartunut ilaasortat Inatsisartuni Naalakkersuisunilu il.il. ilaasortat aningaasarsiaqartitaanerat il.il pillugit Inatsisartut inatsisaanni kapitali 7 naapertorlugu aningaasarsiaqartinneqassapput.  

Kapitali 4
Nunat Aqqinik Aalajangiisartunut aningaasaliisarneq

  § 7.  Nunat Aqqinik Aalajangiisartut suliaat Nunatta karsianit aningaasalersorneqassapput.

  § 8.  Nunat Aqqinik Aalajangiisartut ukiumut aningaasanut inatsiseqarfiusumut tullermut Naalakkersuisunit piffissalerneqartumik missingersuutinut siunnersuummik ukiut tamaasa Naalakkersuisunut tunniussaqartassapput. Peqatigitillugu Nunat Aqqinik Aalajangiisartut ukiumut aningaasanut inatsiseqarfiusumut tullermut Nunatta karsianit aningaasaliissutit annertussusissaannut siunnersuuteqartassapput.

  § 9.  Nunat Aqqinik Aalajangiisartut ukioq naatsorsuusiorfigisassaat tassaavoq ukioq aningaasanut inatsiseqarfiusoq. Missingersuusiortarneq, naatsorsuuserisarneq aamma naatsorsuutinik saqqummiussisarneq pillugit aalajangersakkat Namminersorlutik Oqartussanut sukkulluunniit atuuttut Nunat Aqqinik Aalajangiisartut malissavai.
  Imm. 2.  Ukiumoortumik naatsorsuutit Kalaallit Nunaanni Namminersorlutik Oqartussat kukkunersiuisoqarfiannit kukkunersiorneqassapput.
  Imm. 3.  Ukiumoortumik naatsorsuutit Nunat Aqqinik Aalajangiisartunit akuersissutigineqartut piffissaliussaq Naalakkersuisunit aalajangerneqartoq nallertinnagu Naalakkersuisunut akuerisassanngorlugit Nunat Aqqinik Aalajangiisartut saqqummiutissavaat.
  Imm. 4.  Naatsorsuutit Naalakkersuisunit akuersissutigineqareeraangata Nunat Aqqinik Aalajangiisartut tamanut saqqummiuttassavaat.

Kapitali 5
Nunat Aqqinik Aalajangiisartut sulinerat

  § 10.  Nunat Aqqinik Aalajangiisartut suliaminnut tunngatillugu, tassunga ilanngullugu aningaasaatiminik aqutsinerminnut tunngatillugu Naalakkersuisunut akisussaaffeqarput.

  § 11.  Nunat Aqqinik Aalajangiisartut suliatik pillugit ukiumoortumik Naalakkersuisunut nalunaarusiortassapput. Nalunaarusiaq tamanut saqqummiunneqartassaaq.
  Imm. 2.  Nalunaarutip imarissavai ukiumi qaangiuttumi kingullermi nunat aqqinik aalajangiisartuni suliniutigisimasanut nassuiaatit, tassunga ilanngullugit suliniuteqarfissat aamma ukiup ingerlanerani oqaaseqaatigisimasat aalajangersimasut kiisalu aalajangiisartut taakku siunissamut suliassatut pilersaarutaat. Nalunaarutip aamma imarissavai nalunaarummut kingullermut tunngatillugu malitseqartitsineq.
  Imm. 3.  Naalakkersuisut ukiumoortumik nalunaarutip imarisassai pillugit amerlanerusunik malittarisassiorsinnaapput.

  § 12.  Nunat Aqqinik Aalajangiisartut ukiumut ikinnerpaamik marloriarlutik ataatsimiittassapput.
  Imm. 2.  Nunat Aqqinik Aalajangiisartut ataatsimiinneri tamanut ammasuunngillat.
  Imm. 3.  Ullormut oqaluuserisassat ataatsimiinnermilu imaqarnialiaq tamanut saqqummiunneqartassapput. Ullormut oqaluuserisassat imaqarniliallu imaasa ilai tamanut saqqummiussinermi mininneqarsinnaapput, taamaaliortoqarnissaanut immikkorluinnaq pissutissaqartoqarpat.

  § 13.  Suleriaasissaq Naalakkersuisunit akuersissutigineqartoq Nunat Aqqinik Aalajangiisartut namminneerlutik aalajangersassavaat.
  Imm. 2.  Suleriaasissap imarissavai ataatsimiittarnerit pillugit malittarisassat, taasisarnermut malittarisassat, suliamut attuumassuteqartuunnginneq imaqarniliortarnerlu.

  § 14.  Nunat Aqqinik Aalajangiisartut aalajangigaat pisortaqarnikkut oqartussaasumut allamut suliassanngortinneqarsinnaanngillat.

  § 15.  Nunat Aqqinik Aalajangiisartut allattoqarfimmit sullinneqassapput.
  Imm. 2.  Allattoqarfiup Nunat Aqqinik Aalajangiisartut sulineranni atugassatut suliarissavai allattoqarfittut suliassat nalinginnaasut.
  Imm. 3.  Allattoqarfik Nunat Aqqinik Aalajangiisartunik sullissinermini  ilisimatusarnermik tunngaveqartumik suleriaaseqassaaq.

  § 16.  Nunat Aqqinik Aalajangiisartut allattoqarfeqarnissaat Naalakkersuisunit isumagineqassaaq.
  Imm. 2.  Naalakkersuisut aalajangersinnaavaat allattoqarfiup suliffeqarfinni, Namminersorlutik Oqartussanit tapiissutinik annersumik aningaasalersorneqartuni inissinnissaa.

  § 17.  Naalakkersuisut Nunat Aqqinik Aalajangiisartut suliassaat sulinerallu pillugit malittarisassanik aalajangersaasinnaapput.

Kapitali 6
Misiligummik aaqqissuussinerit

  § 18.  Misiligummik aaqqissuussinerit Inatsisartut inatsisaanni aalajangersakkat naapertorlugit ingerlanneqarnissaannut Naalakkersuisut akuersissuteqarsinnaapput.

Kapitali 7
Atuutilersitsinermut atorunnaarsitsinermullu aalajangersakkat

  § 19.  Inatsisartut inatsisaat ulloq 1. januar 2018 atuutilissaaq.
  Imm. 2.  Peqatigitillugu atorunnaarsinneqarput:
1)  Kalaallit Nunaanni nunat aqqinut aalajangiisartut pillugit Inatsisartut inatsisaat nr. 11, 26. oktober 1989-imeersoq.
2)  Namminersornerullutik Oqartussat nalunaarutaat nr. 22, 15. maj 1990-imeersoq Kalaallit Nunaanni nunat aqqinut aalajangiisartut pillugit.

Namminersorlutik Oqartussat, 1. juni 2017.

Kim Kielsen