§ 1

Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni nr. 18, 30. oktober 1998-imeersumi, Inatsisartut inatsisaatigut nr. 28, 18. november 2010-meersukkut kiisalu Inatsisartut inatsisaatigut nr. 23, 22. november 2011-meersukkut allanngortinneqartumi, uku allannguutaapput:

1. § 4, imm. 1 ima oqaasertaqassaaq:
”  § 4.  Piumasaqaatit §§-ini 8, 12, § 21, imm. 8, §§-ini 22, 23-imi aalajangersarneqartut taakkuluunniit naapertorlugit malittarisassat aalajangersarneqartut malinneqarnissaat qularnaarniarlugu peqqussutit inerteqqutillu pisariaqartutut isigineqartut Naalakkersuinit nalunaarutigineqassapput.”

2. § 5 imatut oqaasertalerneqassaaq:
”  § 5.  Piumasaqaatit §§-ini 7, 9, 10-mi, aamma § 13, imm. 1-mi, §§-ini 15, 16, 19, § 21, imm. 1-3-imi aalajangersarneqartut taakkuluunniit naapertorlugit malittarisassat aalajangersarneqartut malinneqarnissaat qularnaarniarlugu peqqussutit inerteqqutillu pisariaqartutut isigineqartut kommunalbestyrelsinit nalunaarutigineqassapput.”

3. Kapitali 7-mut qulequtaq ima oqaasertalerneqarpoq:

”Nakkutilliineq, nalunaaqutsersuineq akiuussutissalersuinerlu”

4. § 21 ima oqaasertalerneqassaaq:
"  § 21.  Qimmimik tigumminnittoq, tassungalu atatillugu qimuttunik savaatillillu qimmiinik qimmiutillip qimmimut makku isumagisassarai:
1)  qimmit nappaataannut parvovirusimullu piffissami aalajangersimasunik akiuussutissaliinernut Naalakkersuisut aalajangersagaannik malinnissalluni, aamma 
2)  atajuaannartussamik nalunaaqutserneqarlutillu ataasiakkaarlugit nalunaarsorneqassasut, akiuussuserneqannginneranni imaluunniit siullermik akiuussuserneqarnerannut atatillugu.
  Imm. 2.  Qimmeq ukiumi siullermi pingasoriarlugu akiuussuserneqassaaq, tamatumalu kingorna ukiut pingasukkaarlugit akiuussutissaleqqinneqartassalluni.
  Imm. 3.  Imm. 1 malillugu akiuussutissaliinerit nalunaaqutsersuinerilluunniit uumasut nakorsaattut ilinniarnikumit imaluunniit qimminut akiuussutissaliisinnaatitaasumit taamaallaat suliarineqarsinnaapput.
  Imm. 4.  Kommunalbestyrelsip nakkutigissavaa qimminut akiuussutissaliisinnaatitaasut uumasulluunniit nakorsaat pisariaqartitat naapertorlugit amerlassuseqartussat kommunimi atorfinitsinnissaat.
  Imm. 5.  Kommunalbestyrelsip inassuteqaateqarnera naapertorlugu kommunini qimminut akiuussutissiisartussat akuerisaasut Naalakkersuisut ilinniartillugillu akiuussutissaliisinnaatitaasunngorlugit piginnaatissavaat. 
  Imm. 6.  Qimmit kommunimi akiuussutissalerneqartut, nalunaaqutserneqartut nalunaarsorneqartullu pillugit nalunaarutiginninnerit Naalakkersuisut piumasaqarnerisigut kommunalbestyrelsip nassiuttassavai.
  Imm. 7.  Qimmit aamma qimmit qimuttut savaatillillu qimmiisa aamma qitsuit nakkutigineqarnissaat Naalakkersuisut aallartissinnaavaat. Naalakkersuisut nakkutiginninnernut atatillugu misiliutissanik tigooqqaallutillu katersisinnaapput, kiisalu immikkut nalunaaqutsersuillutik nalunaarsuillutillu.
  Imm. 8.  Qimmiutilik aamma qimminik qimuttunik savaatillillu qimmiinik qimmiutilik kiisalu qitsuutilik Naalakkersuisunut kommunalbestyrelsimullu pisuni imm. 7-mi pineqartuni akeqanngitsumik pisariaqarnera naapertorlugu ikiuutissaaq. 
  Imm. 9.  Imm. 6 naapertorlugu nalunaarutiginninnerit pillugit Naalakkersuisut sukumiinerusunik malittarisassiorsinnaapput, aamma ilaatigut kommunalbestyrelsit paasissutissat suut nalunaarutigissaneraat kiisalu qanoq akulikitsigisumik nalunaaruteqartoqartarnersoq ilanngullugu.”

5. § 21-p kingornanut ikkunneqassaaq:
”  § 21 a.  Qimmimik tigumminnittoq,  tassungalu atatillugu qimuttunik savaatillilluunniit qimmiinik qimmiutilik,  akiuussutissaliinermi, qimmit ataasiakkaarlugit atajuaannartussamik nalunaaqutserneqarnissaannik nalunaarsorneqarnissaannullu akerliuppat kommunalbestyrelsip suliniutigissavaa qimmit pinngitsaaliissummik akiussutissalernissaat, nalunaaqutsersornissaat kiisalu  nalunaarsornissaat. 
  Imm. 2.  Imm. 1 naapertorlugu qimmeq pinngitsaaliissummik akiuussutissalerneqarsinnaanngippat>, nalunaaqutsersorneqarsinnaanngippat kiisalu  nalunaarsorneqarsinnaanngippat kommunalbestyrelsip suliniutigissavaa tigumminnittup akiligaanik tigumminnittumullu taarsiinertaqanngitsumik qimmip toqunneqarnissaa.”

  § 21 b.  Qimmit nappaataannik parvovirusimillu annerusumik tuniluuttoqarluni nappaalasoqarnerani akiuussutissanik aaqqissuussineq annertusineqarsinnaavoq taamaallaat Naalakkersuisut innersuippata akuersippatalu.

  § 21 c.  Qimmit qimuttut savaatillillu qimmiisa qimmit nappaataannut parvovirusimullu akiuussutissalernerannut atatillugu aningaasartuutit Nunatta karsiata akilertassavai.
  Imm. 2.  § 21-imi aalajangersakkat avataatigut akiuussutissiinernut nalunaaqutsiinernullu aningaasartuutit kiisalu akiuussutissaliinermut nalunaaqutsersuinernullu imm. 1-imit eqqaaneqartunit uumasut allat tigumminnittup kisimi akilissavai.”

6. § 28, imm. 1 ima oqaasertaqassaaq:
”  § 28. § 7, imm. 1-imi, § 8, imm. 1-imi, § 9, imm. 1-2-mi, § 10, imm. 1-3-mi, § 12, imm. 2-3-mi, § 12 b-mi, §§ 14-18-imi, § 19, imm. 1, 2, 4-imi imaluunniit 5-mi, § 20-mi, aamma § 21, imm. 1, 2, 3-mi imaluunniit imm. 8-mi aalajangersakkanik unioqqutitsinerit akiliisitaanermik kinguneqarsinnaapput.”

§ 2

Inatsisartut inatsisaat atulissaaq ulloq 1. januar 2017, taamaattorli tak. imm. 2.
  Imm. 2.    Qimmimik tigumminnittoq tassungalu atatillugu qimuttunik savaatillilluunniit qimmiinik qimmiutillip,   inatsisip atuutilernerani qimmimi ataatsimik ukioqalereersimappat, atuutilersitsinermiit ukioq ataaseq qaangiutsinnagu qimmini § 21-imi aalajangersakkat naapertorlugit nalunaaqutserlugillu nalunaarsornissaat isumagissavaat.     

Namminersorlutik Oqartussat, 28. november 2016.

Kim Kielsen