Inatsisartut inatsisaat nr. 23, 22 november 2011-meersoq aqqutigalugu kingullermik allanngortinneqartumi Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni nr. 18, 30. oktober 1998-imeersumi § 13, imm. 1, aamma § 28, imm. 2 aamma 4 naapertorlugit aalajangersarneqarpoq:

Kapitali 1
Aallaqqaasiut

§ 1. Ileqqoreqqusaq manna Kommuneqarfik Sermersuumut atuuppoq.

§ 2. Qimuttoqarfiit nassuiaataat inatsisartut inatsisaat aqqutigalugu iluarsineqassaaq.

Kapitali 2
Ataatsimut aalajangersakkat

Qimmiuteqarnissamut qitsuuteqarnissamullu akuersissutit

§ 3. Kommuneqarfik Sermersuumi taamaallaat qimmiuteqarlunilu qitsuuteqartoqarsinnaavoq Kommuneqarfik Sermersuumi kommunalbestyrelsimit allakkatigut akuersissuteqarnikkut.
Imm. 2. Qimmiuteqarnissamut qitsuuteqarnissamullu akuersissut qinnutigineqassaaq Kommuneqarfik Sermersuumi najukkami sullissivimmut imaluunniit immikkoortortat allaffiinut saaffiginninnikkut.
Imm. 3. Qinnuteqaammi uppernarsarneqassaaq uumasunut nakorsaqarnikkut aalajangersakkat atuuttut malinneqarsimanerat.
Imm. 5. Akuersissut nammineq pigisassaavoq allanullu tunniunneqarsinnaanani.
Imm. 6. Inuit ileqqoreqqusamik matumannga annertuumik arlaleriarlutilluunniit unioqqutitsisut qimmiuteqarnissaat qitsuuteqarnissaallu kommunalbestyrelsip itigartissinnaavaa.

§ 4. Qallunaat Nunaanniit nunanilluunniit allanit qimminik qitsunnilluunniit eqqussinermi uppernarsarneqarsinnaasariaqarpoq Danmarkimi Kalaallit Nunaata Sinniisoqarfiata eqqussinissamut akuersissut nalunaarutigisimagaat.

§ 5. Qimmit qitsuillu maleruaqqusat sukkulluunniit atuuttut malillugit akiuussutissalerneqarsimassapput.
Imm. 2. Atorneqarsinnaasumik akiuussutissaliisimanermut uppernarsaatitut pisariaqarpoq akiuussutissaliisimanermut uppernarsaat imaluunniit kommunimit toqqarneqarsimasumit akiuussutissaliisimanermut uppernarsaat.
Imm. 3. Qimmit qitsuillu kingullermik perlerornermut akiuussutissalertinneranni piffissaq uppernarsaataasoq erseqqissumik takussutissanngorlugu meqqilerneqarsimassaoq.

§ 6. Qimmeq qitsulluunniit malittarisassat sukkulluunniit atuuttut naapertorlugit akiuussutissalerneqarsimanngippat pinngitsaaliisumik uumasup akiuussutissalerneqarnissaa kommunalbestyrelsip piumasarisinnaavaa, tamanna ajornarpat uumasoq toqunneqassaaq. Akiuussutissaliinermut aningaasartuutit piginnittup akilissavai.

§ 7. Qimmit qimmiutillu aqqusinernit inuillu aqqutaat minnerpaamik 5 meterit nigorlugit minnerpaamillu inuup allap illua 10 meterinik nigorlugu pitussimaneqassapput.
Imm. 2. Qimmit qimmiutillu illunut iserfissat nigorlugit pitussimaneqassapput.
Imm. 3. Atuarfinnit, paaqqinnittarfinnit, inissiarsuarnit, suliffeqarfinnit inuussutissalerisunit, killeqarfiliussanit assigisaannillu imaluunniit pilersaarutit malillugit periarfissaqarfiusunit minnerpaamik 75 meterit nigorlugit qimmit pitussimaneqassapput.
Imm. 4. Inuup allap illuanut 7,5 meterinit ungasinnerunngitsumik inissiinermi nunaminertamik tunniussisoqannginnerani eqqaamiunit pineqartunit allakkatigut akuersissummik uppernarsaat pissarsiarineqassaaq.

§ 8. Qimmit qitsuillu panertumik innangaffissaqassapput, oqquisimaarfissaqassapput imermillu nutaamik imigassaqassallutik.

Qimmit qitsuillu angalaannartut, inuttaqanngitsut kiisalu unioqqutitsisumik eqqussat uumasuutigineqartullu

§ 9. Qimmit qitsuillu angalaannartut, inuttaqanngitsut kiisalu unioqqutitsisumik eqqussat uumasuutigineqartullu ungoorlugit tigusarineqassapput.
Imm. 2. Qimmit qitsuillu angalaaginnartut toqutsinnagit nal. akunneri 72-it sioqqullugit nalunaaruteqartoqassaaq. Nalunaarut kommunip allaffiani, immikkoortortap allaffiani imaluunniit Kommuneqarfik Sermersuup nittartagaa aqqutigalugu tamanut saqqummiunneqassaaq.
Imm. 3. Qimminik qitsunnillu unioqqutitsisumik uumasuutilik aamma/imaluunniit unioqqutitsisumik eqqussisoq Kommuneqarfik Sermersuumit allakkatigut saaffigineqassaaq qimmiuteqarnissamut qitsuuteqarnissamullu akuersissummik pigisaqannginnera pillugu, tassani inerteqqutaasut iluarsineqarnissaannut ullunik qulinik periarfissinneqassaaq. Tamatuma kingorna qimmit qitsuillu unioqqutitsisumik uumasuutigineqartut unioqqutitsisumillu eqqunneqartut inummit Kommuneqarfik Sermersuumit toqqarneqartumit aaneqassapput, tamatumalu kingorna nalunaaruteqaqqaarani toqunneqassallutik.
Imm. 4. Kommunalbestyrelsip aalajangersinnaavaa, qimmit qitsuillu ungoorlugit tigusat sumiiffinni ataasiakkaani piffissami aalajangersimasumi piginnittunik misissuinermi uninngatinneqarnissaat, sivikinnerpaamilli nal. akunnerini 72-ini.
Imm. 5. Toqutsineq imm. 2 aamma 3 naapertorlugit inuttaanut taarsiissuteqarnissaq eqqarsaatiginagu pissaaq. Uumasup nakorsaa, politiit, kommunimit toqqagaalluni qimminik nakkutilliisoq allaluunniit kommunimit toqqarneqartoq toqutsissaaq.
Imm. 6. Qitsuit inuttaqaratik illuniittut illup piginnittuata akisussaaffigai.

Qimmeqarnermut nakkutilliisoq

§ 10. Kommuneqarfik Sermersuumi kommunalbestyrelsip qimmeqarnermut nakkutilliisutut suliassaq suliariumannittussaarsiuussinnaavaa imaluunniit sulisoq qimmeqarnermut nakkutilliisutut atorfinitsillugu toqqarsinnaavaa, taassumalu suliassat makku isumagineqarnissaat akisussaaffigaa:
1) Qimmit qitsuillu perlerornermut akiussutissalertissimanerannik nakkutilliineq.
2) Qimminik qitsunnillu piginnittuunermik nakkutilliineq.
4) Qimminik angalaannartunik, qitsunnik angalaannartunik, qimminik qitsunnillu inuttaqanngitsunik kiisalu inerteqqutaasumik pigineqartunik eqqussanillu ungoorilluni tigusarinninnissaq toqutsinissarlu.
5) Akiuussutissalertissamasut amerlassusaannik akiuussutissanillu uninngasuutinik nalunaarsuineq kiisalu nalunaarsukkamik uumasut nakorsaattut oqartussaasup akiuussutissalersuinissaaanut tunngatillugu nalunaaruteqarnissaq.

Akiuussutissaliisartoq

§ 11. Kommuneqarfik Sermersuumi kommunalbestyrelsip akiuussutissaliisartutut suliassaq suliariumannittussaarsiuussinnaavaa imaluunniit sulisoq qimmit qitsuillu perlerornermut akiuussutissalerneqarnissaannut akisussaasutut toqqarsinnaavaa.
Imm. 2. Inuk perlerornermut akiuussutissalersuisussatut Kommuneqarfik Sermersuumit toqqarneqartoq Kalaallit Nunaanni Uumasut Nakorsaqarfia Inuussutissalerinermullu Oqartussaaffik akuersitinnagu perlerornermut akiuussutissalersuissanngilaq.

Piumasaqaatit

§ 12. Kommuneqarfik Sermersuup qimminik qitsunnillu piginnittut CPR-normui, aqqi, najugaqarfii, oqarasuaataasa normui, suna uumasuunersoq, uumasup suiaassusaa, ukiui, akiuussutissalerneqarneri akuersissutillu normui atorlugit qimmit qitsuillu tamaasa nalunaarsussavai. Allannguisoqartillugu piginnittoq allannguisoqareernerani ullut 30-t qaangiutsinnagit kommunimut allakkatigut nalunaaruteqassaaq. Qimmeq qitsulluunniit toquppat piginnittoq ullut 30-t qaangiutsinnagit Kommuneqarfik Sermersuumut allakkatigut namminerluunniit ornigulluni nalunaaruteqassaaq.
Imm. 2. Qimmimik qitsummilluunniit piginnittup allakkatigut eqqaasinneqareerluni uumasuutini nalunaarsortikkusunngippagu Kommuneqarfik Sermersuup uumasoq aatissinnaavaa toqutsillugulu piginnittumut taarsiinissaq eqqarsaatiginagu.

Qimmiuteqarsinnaanermut qitsuuteqarsinnaanermullu akuersissutinik utertitsineq

§ 13. Qimmit qitsuillu pillugit ileqqoreqqusaq manna annertuumik arlaleriarluniluunniit unioqqqutinneqarpat Kommuneqarfik Sermersuup qimmiuteqarnissamut qitsuuteqarnissamullu akuersissutaasimasoq utertissinnaavaa. Assigisaanillu akuersissut utertinneqarsinnaavoq qinnuteqartoq piaaraluni eqqunngitsunik amigartunilluunniit paasissutissiisimappat imaluunniit pissutsit akuersissuteqarnermut tunngavigineqartut malunnaatilimmik allannguuteqarsimappata.

Kapitali 3
Qimuttoqarfiit avataanni

Qimmiuteqarfiullutillu qitsuuteqarfiusinnaasut

§ 14. Angallammi Kommuneqarfik Sermersuumi najugaqartumi qimmiuteqarnissaq qitsuuteqarnissarluunniit inerteqqutaavoq.
Imm. 2. Qimmit qitsuilluunniit illoqarfiup avataaneersunit angallatiniittut Kommuneqarfik Sermersuumiinnerminni angallammiiginnassapput.
Imm. 3. Qimmit ikiortigisartakkat illoqarfiup avataaneersunit angallatiniittut Kommuneqarfik Sermersuumiinnerminni kommunalbestyrelse akuersissuteqarsimappat nunamukarsinnaapput.
Imm. 4. Qimmeq ikiortigisartagaq Kommuneqarfik Sermersuumiinnermi nunamut ikaaqatiginissaanut akuersissummik qinnuteqaat angallatip tikinnginnerani kingusinnerpaamik ullut 14-it nallertinnagit nassiunneqareersimassaaq.
Imm. 5. Qimmimik ikiortigisartakkamik piginnittup uumasunut nakorsaqarnermi aalajangersakkat sukkulluunniit atuuttut naammassisimallugit uppernarsarsinnaassavaa.

§ 15. Savaateqarfinni Kommuneqarfik Sermersuumiittuni qimmit Border Collie-nik, Kelpie-nik taaneqartartut imaluunniit taakku imminnut akutillugit kinguaavi kisimik uumasuutigineqarsinnaapput.

Qimminik qitsunnillu kinguaassiortitsineq

§ 16. Kommuneqarfik Sermersuumi qimminik qitsunnillu kinguaassiortitsisoqarsinnaavoq.
Imm. 2. Qimmit arnavissat Kommuneqarfik Sermersuumut eqqunneqartut tamarmik pilattaanikkut kinguaassiorsinnaajunnaarsinneqarsimassapput. Tamanna savaatillit qimmiinut atuutinngilaq.
Imm. 3. Qitsuit arnavissat Kommuneqarfik Sermersuumut eqqunneqartut tamarmik pilattaanikkut kinguaassiorsinnaajunnaarsinneqarsimassapput.
Imm. 4. Qitsuit ilumeqqasut eqquteqqusaanngillat.
Imm. 5. Qitsuit angutivissat issuersinnikkut kinguaassiorsinnaajunnaarsinneqarsimassapput.
Imm. 6. Pilattaanikkut hormon-init kinguaassiorsinnaajunnaarsitsinernut aningaasartuutit kommunip susassaqarfiginngilai.
Imm. 7. Qimmimik arnavissamik, qitsummik arnavissamik qitsummilluunniit angutivissamik piginnittup kommunimut uppernarsarsinnaasariaqarpaa qimmip qitsuulluunniit imm. 2-mi, imm. 3-mi aamma imm. 5-imi oqaatigineqartut malillugit suliarineqarsimanera.

Eqqissisimaneq toqqissisimanerlu

§ 17. Qimmit tamarmik illoqarfiup iluani najugaqarfinnilu pituutaqartinneqassapput.
Imm. 2. Illumut qaninnerpaamut minnerpaamik 500 meterit ungasitsigigaanni qimmit pituutaqaratik aneeqatigineqarsinnaapput.
Imm. 3. Imm. 1-imi 2-milu aalajangersakkanut savaatillit qimmii sulisullu qimmii naalakkersugaasut ilaatinneqanngillat.
Imm. 4. Qimmimik qitsummilluunniit piginnittoq pisussaavoq qimmeq qitsulluunniit kikkunnilluunniit aqqutigineqarsinnaasumut anarsimappat piissallugu.

Piumasaqaatit

§ 18. Qimmit qitsuillu kingullermik perlerornermut akiuussutissalertinneranni erseqqissumik piffissamik uppernarsaatitalimmik, piginnittumut attaveqarfissamik paasissutissartalimmik kiisalu qimmeqarnissamut akuersissutip normuanik allassimasortalimmik qungasequteqassapput.
Imm. 2. Qungasequtit qimmimut ajoqusiisinnaasut aamma qungasequtit kapinartortallit kiisalu qungasequtit qimitsisinnaasut atorneqarnissaat inerteqqutaavoq.

Qimminik pitussimatitsineq

§ 19. Qimmit pitussimajuartinneqarnissaat inerteqqutaavoq. Qimmeq ullup unnualu ingerlanerani katillugit sivisunerpaamik nal. akunnerini 12-ini pitussimaneqarsinnaavoq.
Imm. 2. Qimmip pituutaa minnerpaamik 5 meteriussaaq, pituutaalu uumasunut allanulluunniit akornutaassanngilaq.

Kapitali 4
Qimuttoqarfiit iluini

Qimmiuteqarnissamut qitsuuteqarnissamullu akuersissutit

§ 20. § 2-mi piumasaqaatit saniatigut qimuttoqarfiit iluini qimmiuteqarnissamut akuersissummik qinnuteqarnermi paasissutissiissutigineqassapput makku amerlassusii:
2) Qimmit inersimasut (ukiumik ataatsimik pisoqaanerusut), kiisalu akiuussutissalerneqarneri.
3) Nutaqqat (4-t 12-illu akornini qaammatillit), kiisalu akiuussutissalerneqarneri.
4) Piaqqat (qaammatit sisamat inorlugit pisoqaassusillit), kiisalu akiuussutissalerneqarneri.
Imm. 2. Allanut tunniussinermi qimmeqarnissamut akuersissut qinnutigineqaqqissaaq nutarterneqarlunilu.

Qimmiuteqarfiullutillu qitsuuteqarfiusinnaasut

§ 21. Qimmiuteqarnissamut Sumiiffinni qimmiuteqarfioqqusaasuni kommunimut pilersaarummut tapiliussami sukkulluunniit atuuttumi nassuiarneqartuni qimmiuteqarnissaq ajornanngilaq.
Imm. 2. Qimmiuteqarnissamut nunaminertamik tunniussinermi uppernarsaatip imarai nunaminertaq tunniunneqartoq pillugu nassuiaat, tassunga ilanngullugu pituutap inissisimaffissaa, qimmip inissaa qimmillu ungalusimaffissaat.

§ 22. Qimmit qeqertanut Kommuneqarfik Sermersuumiittunut akuersissummik tunniussisoqarsimatinnagu nioqqusaanngillat. Akuersissut Kommuneqarfik Sermersuumi najukkami sullissivimmut immikkoortortalluunniit allaffianut saaffiginninnikkut pissarsiarineqarsinnaavoq.
Imm. 2. Qimmit sikuunnginnerata nalaani aamma 1. majimit 1. oktoberimut qeqertanut nioqqusaapput.

Qimmit inissaat

§ 23. Qimmit inissaat taamaallaat pilersinneqassapput nunaminertani Kommuneqarfik Sermersuumi najukkami sullissivinnit immikkoortortalluunniit allaffiinit tunniunneqartuni.
Imm. 2. Ungalut, qimmit inaat karsillu qimmit nerisassaannut atortut teknikkikkut ingerlatsivimmit akuerineqarsimassapput.
Imm. 3. Sumiiffiit ukiup qanoq ilinerani qarsutsinermik nalaanneqartartut nalaanneqartarfiini qimminut ineqarfittut atorneqassanngillat.

§ 24. Pituffilerfissanik qillerineq taamaallaat pisassaaq Kommuneqarfik Sermersuumi najukkami sullissiviup immikkoortortalluunniit allaffiata innersuussineratigut.

§ 25. Nunaminertat tunniunneqartut eqqiluitsuutinneqarlutillu torersuutinneqassapput.
Imm. 2. Nunaminertaq tunniunneqartoq paarinerlunneqarpat arsaarinnissutigineqarsinnaavoq.
Imm. 3. Qimmeqarfissatut akuerisap avataani qimmit inissinneqarpata 72 tiimit iluini inissamut akuerisaasumut qimmit nuutseqquneqassapput, nuunneqanngippata qimmit toqunneqassapput.

Quit, ungaluit qimmillu inaat

§ 26. Illut, init nunaminertalluunniit qimmeqarfiusut imaluunniit qitsuuteqarfiusut aaqqinneqassapput qimmip qitsuulluunniit pisariaqartitai eqqarsaatigalugit, aamma uumasut arlaannut ajoqusinnginnissaat eqqarsaatigalugu.
Imm. 2. Qimmit anorimut silallu pissusaanut illersorneqassapput panertumilu innagaffissaqassallutik.
Imm. 3. Ungalut suliarineqassapput qimmit namminneerlutik anillassinnaajunnaarlugit.
Imm. 4. Imerfiit uppittussaajunnaarlugit inissinneqassapput.

§ 27. Qimmit ilumeqqasut milutsitsisulluunniit inaat aaqqinneqassapput anorimut, sialummut apummullu akiuussinnaasumik. Inaat minnerpaamik 60 cm-isut portutigissaaq qimmimullu ataatsimut minnerpaamik 0,6 kvadratmeterisut nateqassalluni.
Imm. 2. Qimmit ilumeqqasut milutsitsisullu pitunneqassapput qimmip inaanut akornuteqanngitsumik isersinnaajuarnissaat eqqarsaatigalugu.

Qimminik pitussimatitsineq

§ 28. Qimmit inaat aaqqinneqassapput qimmit ataasiakkaat akornini minnerpaamik 3 meterisut takitigisumik pituutaqarfissaqartillugit qimmilluunniit marluk akornini minnerpaamik 1 meterisut pituutaqarfissaqartillugit.
Imm. 2. Qimmit qaammatit arfinillit sinnerlugit pisoqaassusillit tamarmik pitussimassapput.
Imm. 3. Qimmit tamarmik pituutaat minnerpaamik marlunnik qipisartoqassapput.
Imm. 4. Qanoq aputeqartigineranut naapertuuttumik pituuttat iluarsineqarsinnaassapput.

Qitsunnik kinguaassiortitsinerup inerteqqutaanera

§ 29. Qimuttoqarfiit iluini qitsunnik kinguaassiortitsineq inerteqqutaavoq.
Imm. 2. Qitsuit arnavissat Kommuneqarfik Sermersuumut eqqunneqartut tamarmik pilattaanikkut kinguaassiorsinnaajunnaarsinneqarsimassapput.
Imm. 3. Qitsuit angutivissat eqqunneqartut issuersinnikkut kinguaassiorsinnaajunnaarsinneqarsimassapput.
Imm. 4. Qitsummik eqqussamik piginnittup Kommuneqarfik Sermersuumut uppernarsarsinnaasariaqarpaa qitsuup imm. 2-mi imaluunniit imm. 3-mi oqaatigineqartut malillugit suliarineqarsimanera.

Kapitali 5
Naammagittaalliorsinnaaneq

§ 30. Qimmeqarnermut qitsuuteqarnermullu atatillugu ajoqutaasinnaasut kommunalbestyrelsimut naammagittaalliutigineqassapput.
Imm. 2. Aaqqissuussinerup tungaatigut naammagittaalliuutit kiisalu uumasut atugarissaarnissaat pillugu inatsimmik unioqqutitsinerit politiinut tunniunneqassapput.

Kapitali 6
Pineqaatissiissutit

§ 31. Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni § 28, imm. 2 naapertorlugu ileqqoreqqusami matumani § 2-4, § 7-8, § 11, § 13-22 § 24-28 unioqqutinneqarpata akiliisussanngortitsisoqarsinnaavoq.
Imm. 2. Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni § 28, imm. 4 naapertorlugu ileqqoreqqusaq manna annertuumik arlaleriarluniluunniit unioqqutinneqarpat uumasuuteqarnissaq allatulluunniit uumasunik sammisaqarnissaq inerteqqutigineqarsinnaavoq.

Kapitali 7
Atuutilerfia

§ 32. Ileqqoreqqusaq manna atuutilissaaq ulloq 01. marsi 2015.
Imm. 2. Ilutigalugu Nuuk, Paamiut, Ammassalik, Ittoqqortoormiit Ivittuullu pillugit kommuniusimasuni kommunip qimmit qitsuillu pillugit ileqqoreqqusai atuuttut atorunnaarsinneqarput.

Kommuneqarfik Sermersuumi kommunalbestyrelsimit aalajangiunneqarpoq ulloq 02. juuni 2014.

---------------------------------------------
Asii Chemnitz Narup
Borgmesteri

Kommuneqarfik Sermersuumi qimmiuteqarneq qitsuuteqarnelu pillugit ileqqoreqqusaq matumuuna atuuttussanngortinneqarpoq.

Namminersorlutik Oqartussat, ulloq 5. februar 2015

------------------------------------------------
Karl-Kristian Kruse
Aalisarnermut, Piniarnermut Nunalerinermullu Naalakkersuisoq