Tarnimikkut nappaatilinnik nammineersinnaajunnaarsitsineq allatigullu pinngitsaaliissummik iliuuseqarneq pillugu Inatsisartut inatsisaanni nr. 24-mi , 3. december 2012-imeersumi § 8, imm. 3, naapertorlugu aalajangersarneqarput:

Kapitali 1
Nakorsamik aggersaaneq

§ 1.  Napparsimasup tarnimigut nappaateqarsorinartup nammineq katsorsartinnissi isumaginngippagu, tarnimikkut nappaatilinnik nammineersinnaajunnaarsitsineq allatigullu pinngitsaaliissummik iliuuseqarneq pillugu Inatsisartut inatsisaanni § 6, imm 1, naapertorlugu unitsitsinissaq siunertaralugu qanigisaasut peqqinnissaqarfimmut attaveqassapput.
Imm. 2.  Napparsimasup qaniginerusai tassaapput aappaasoq, inooqataasoq, angajoqqaat, qitornat inersimasut, napparsimasullu inoqutai. Napparsimasoq paaqqinniffimmiippat, unitsitsinissaq siunertaralugu peqqinnissaqarfimmut attaveqarnissamut pisussaaffik sulisuniippoq.

§ 2.  Qanigisaasut allalluunniit peqqinnissaqarfimmut saaffiginninngippata, politiit tamatumunnga pisussaaffeqarput.

Kapitali 2
Nakorsaq unitsitsisoq

§ 3.  Nakorsap napparsimasoq misissoreerlugu unitsinneqarnissaa pisariaqartoq paasiguniuk, Inatsisartut inatsisaanni § 3, imm. 1-imi aalajangersagaq naapertorlugu nakorsap napparsimasoq uninnissaanut akuersitinniassavaa, tamatumunngalu atatillugu Inatsisartut Inatsisaanni § 3, imm. 2, naapertorlugu pingaartumik uninnerup siunertaanik peqqissinerusinnaanerlu pillugit ilitsersorlugu.
Imm. 2.  Inatsisartut inatsisaanni § 4, imm. 1, naapertorlugu pissutsit apeqqutaatillugit, napparsimasoq uninnissamut apeqqut pillugu naammaginartumik piffissalerlugu eqqarsarfissinneqassaaq.

§ 4.  Napparsimasoq paasissutissinneqareerluni unitsinneqarnissamut akuersinngippat, pinngitsaaliissummik unitsinneqarnissaa pisariaqarnersoq nakorsamit naliliivigineqassaaq.
Imm. 2.  Inatsisartut Inatsisaanni § 5 naapertorlugu piumasaqaatit eqquutsinneqarpata pinngitsaaliissummik unitsitsisoqassaaq.

§ 5.  Pinngitsaaliissummik unitsitsisoqassappat, nakorsaq nappaatip suusinnaaneranik, napparsimasup tarnimigut pissusaanik nakorsallu Inatsisartut inatsisaanni § 5, imm. 1 (katsorsartittariaqarneq) imal. imm. 2 (navianartorsiortitsisinnaaneq) naapertorlugu, piumasaqaatit eqquutsinneqarnerannut isumaqataanermik imalimmik nalunaarusiussaaq.
Imm. 2.  Nalunaarut unitsitsinissaq pineqartoq siunertaralugu, nakorsap nammineq misissuineranik tunngaveqassaaq.
Imm. 3.  Misissuineq naammassiniariarpat piaarnerpaamik nalunaarusiortoqassaaq.
Imm. 4.  Pinngitsaaliissummik unitsitsisoqarnissaa siunertaralugu nalunnaarut nakorsap politiinut tunniutissavaa imal. nassiutissavaa.

Kapitali 3
Pinngitsaalissummik unitsitsineq

§ 6.  Pinngitsaaliissummik unitsitsinissap isumagineqarnissaa politiit aalajangiivigissavaat.

§ 7.  Pinngitsaaliissummik unitsitsinissamut aalajangiisussap, pinngitsaaliissummik unitsitsinermut atatillugu Inatsisartut inatsisaanni piumasaqaatit eqquutsinneqarnerat, tamatumunngalu atatillugu Inatsisartut inatsisaat naapertorlugu periusissap eqquutsinneqarnera, nakorsallu nalunaarutaa paasissutissanik pinngitsaaliissummik unitsitsinissamut tunngavissatut pisariaqartitanik imaqarnersoq misissussavaa.

§ 8.  Sumi pinngitsaaliissummik unitsitsi soqarnissaa, ingerlaannaq unitsitsinissaq pisariaqanngippat, qaqugu tamatuma pinissaa pillugu, politiit Dronning Ingridip Napparsimmavissuani tarnimikkut nappaatilinnut immikkoortortaqarfik isumaqatigiissuteqarfigissavaat. Inatsisartut inatsisaanni § 1, imm. 2, naapertorlugu Peqqinnissaqarfiup immikkoortuini allani ingerlaannaq pinngitsaaliissummik unitsitsisoqarallartariaqassappat, Dronning Ingridip Napparsimmavissuani tarnimikkut nappaatilinnut immikkoortortaqarfik, napparsimasup immikkoortortamut qaqugu nuunneqarnissaa pillugu, piaarnerpaamik attavigineqassaaq.

§ 9.  Inatsisartut Inatsisaanni § 5, imm. 1 (katsorsartittariaqarneq) naapertorlugu pinngitsaaliissummik unitsitsisoqarpat, nakorsap unitsitsisup napparsimasumik misissuineranut atatillugu pinngitsaaliissummik unitsitsisoqanngippat, pinngitsaaliissummik unitsitsinissap qaqugu pinissaa pillugu, politiit nakorsamut unitsitsisumut ilisimatitsissapput. Pinngitsaaliissummik unitsitsinissap qaqugu pinissaa aalajangiivigineqarniariarpat, piaarnerpaamik ilisimatitsissutigineqassaaq.
Imm. 2.  Pinngitsaaliissummik unitsitsinermi nakorsaq unitsitsisoq sapinngisamik peqataassaaq. Tamatumani Inatsisartut inatsisaanni §§ 3 aamma 38 naapertorlugit nakorsaq napparsimasumik ilitsersueqqissaaq, pinngitsaaliissummillu  unitsitsinissamut piumasaqaatit eqquutsinneqarnerat misissussallugu.

§ 10.  Pinngitsaaliissummik unitsitsinermi Inatsisartut inatsisaanni § 5, nr. 2 (navianartorsiortitsisinnaaneq) naapertorlugu nakorsap misissuinera ullup unnuallu kingulliup ingerlanerani pisimanersoq, Inatsisartullu inatsisaanni § 7, imm. 3 (katsorsartittariaqarneq) naapertorlugu unitsitsineq, ullut arfineq marluk kingulliit iluanni pisimanersoq politiit misissussavaat.
Imm. 2.  Inatsisartut inatsisaanni § 7, imm. 3, naapertorlugu piffissaliussat eqquutsinneqanngippata, nakorsap napparsimasumik misissueqqinneratigut unitsitsinissamullu tunngatillugu nutaanik allagartaliornikkut aatsaat pinngitsaaliissummik unitsitsisoqarsinnaavoq.

§ 11.  Pinngitsaaliissummik unitsitsineq Inatsisartut inatsisaanni § 4, imm. 3, naapertorlugu, pisariaqanngitsumik kanngutsatsitsisoqaqqunagu akornuseeqqunaguluunniit, sapinngisaq tamaat qajassuartumik malunnaarsaartumillu ingerlanneqassaaq. Politiit peqataasut sapinngisaq naapertorlugu inuinnartut atisaqassapput. Napparsimasoq politiit biiliinik angallanneqassappat, sapinngisaq tamaat inuinnaat biilii suliffimmi atorneqartartut atorlugit angallanneqassaaq.

§ 12.  Pinngitsaaliissummik unitsitsinnginnermi sapinngisaq tamaat napparsimasup qanigisaa ataaseq arlallilluunniit, pinngitsaaliissummik unitsitsinissaq pillugu politiinit ilisimatinneqassapput.
Imm. 2.  Napparsimasup najugaqataa/najugaqatai imal. najugaqarfia sapinngisaq tamaat isumaqatigalugit pinngitsaaliissummik unitsitsisoqassaaq.
Imm. 3.  Imm. 1 naapertorlugu pinngitsaaliissummik unitsitsinnginnermi ilisimatitsisoqarsinnaasimanngippat, napparsimasup qanigisaa ataaseq arlallilluunniit pinngitsaaliissummik unitsitsineq pillugu, politiinit piaarnerpaamik tamatuminnga ilisimatinneqassapput.

Kapitali 4
Napparsimasup unitsinneqarnera

§ 13.  Dronning Ingridip Napparsimmavissuani tarnimikkut nappaatilinnut immikkoortortaqarfimmi pinngitsaaliissummik uninngaviusussami nakorsaanerup, Inatsisartut inatsisaanni § 8, imm. 2, naapertorlugu pinngitsaaliissummik unitsitsinermi piumasaqaatit eqquutsinneqarsimanersut aalajangiivigissavai. Nakorsaanerup peqannginnerani tarnimikkut nappaatilinnut immikkoortortaqarfimmi nakorsaq alla aalajangiisuusinnaavoq. Taamaattoqartillugu aalajangiineq nakorsaanermit piaarnerpaamik isummerfigineqassaaq.
Imm. 2.  Inatsisartut inatsisaanni § 5, nr. 2 (navianartorsiortitsisinnaaneq) naapertorlugu pinngitsaaliissummik unitsitsisoqarpat, napparsimasoq ingerlaannaq unitsinneqassaaq.
Imm. 3.  Inatsisartut inatsisaanni § 5, nr. 1 (katsorsartittariaqarneq) naapertorlugu pinngitsaaliissummik unitsitsisoqarpat, napparsimasoq nakorsamit misissortereernerup kingorna piaarnerpaamik, kingusinnerpaamillu ullut arfineq marluk qaangiutsinnagit unitsinneqasaaq.

Kapitali 5
Atuutilersitsineq

§ 14.  Nalunaarut 16. december 2013 atuutilersinneqarpoq.

Namminersorlutik Oqartussat , ulloq 2. december 2013

Steen Lynge

/

Ann Birkekær Kjeldsen