Tarnimikkut nappaatilinnik nammineersinnaajunnaarsitsineq allatigullu pinngitsaaliissummik iliuuseqarneq pillugu Inatsisartut inatsisaanni nr. 24-mi, 3. december 2012-imeersumi § 40 naapertorlugu aalajangersarneqarput:

Kapitali 1
Ilisimatitsineq

Pinngitsaaliissummik unitsitsineq tigummigallagassanngortitsinerlu

§ 1.  Nakorsap unitsitsisup tarnimikkut nappaatilinnik nammineersinnaajunnaarsitsineq allatigullu pinngitsaaliissummik iliuuseqarneq pillugu Inatsisartut inatsisaanni § 6, imm. 2, naapertorlugu pinngitsaaliissummik unitsitsinissaq pisariaqartutut nalileruniuk, napparsimasoq tamatuminnga ilisimatissavaa.
Imm. 2.  Nakorsaq unitsitsisoq tamatuma malitsigisaanik §§ 3 aamma 38 naapertorlugit pinngitsaaliissummik unitsitsinermut tunngaviusoq siunertaasorlu pillugit napparsimasoq ilisimatissavaa, peqqissinerusinnaaneralu pillugu paasitillugu. Immikkoortortami uninngaviusussami nakorsaq taamatuttaaq pisussaaffeqarpoq.

§ 2.  Angerlartitaanissaq noqqaassutaappat, Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanerup, piaarnerpaamik kingusinnerpaamillu nal. ak. 24-t qaangiutsinnagit napparsimasoq angerlarsinnaanersoq imal. pinngitsaaliissummik tigummineqarallassanersoq nalunaarfigissavaa. Pinngitsaaliissummilli unitsitaanermiit nal. ak. 24-t iluanni angerlartitaanissaq noqqaassutaappat, nakorsaanerup aalajangiinera pinngitsaaliissummik unitsitsinermiit nal. ak. 48-t qaangiutsinnagit nalunaarutigineqassaaq.

§ 3.  Pinngitsaaliissummik tigummigallarneqarnissaq nakorsaanerup aalajangerpagu, ilisimatitsineq taama aalajangernermut tunngaviusumik, tassani siunertamik peqqissinerusinnaanerlu pillugit paasissutissanik imaqassaaq.

§ 4.  Nakorsaanerup Inatsisartut inatsisaanni § 31, imm. 2, naapertorlugu nammineersinnaajunnaarsitsinermik naliliinermut atatillugu, nammineersinnaajunnaarsitsinerup attatiinnarneqarnissaa aalajangiuppagu, napparsimasoq siunnersortaalu aalajangiineq pillugu ilisimatinneqassapput.

§ 5.  Inatsimmi § 5 naapertorlugu nammineersinnaajunnaarsitsinermi piumasaqaatit eqquutsinneqarsinnaajunnaarpata, nammineersinnaajunnaarsitsineq ingerlaannaq atorunnaarsinneqassaq. Napparsimasoq siunnersortaalu Inatsisartut Inatsisaanni § 11 naapertorlugu ingerlaannaq tamatuminnga ilisimatinneqassapput.

Pinngitsaaliissummik nakorsarneqarnissaq,aalaakkiineq il.il.

§ 6.   Inatsisartut inatsisaanni kapitali 4-mi aalajangersakkat naapertorlugit pinngitsaaliissummik nakorsarneqarnissaq, pinngitsaaliissummik aalaakkerneqarnissaq, timikkut pinngitsaaliinermik atuineq, napparsimasoq illersorniarlugu aalaakkiineq, napparsimasumik immikkut nakkutilliineq, immikkoortortami matunik parnaarsineq, Inatsisartullu inatsisaanni § 27 naapertorlugu pinngitsaaliinikkut timikkut eqqiluisaartitsineq, kiisalu Inatsisartut inatsisaanni § 29 naapertorlugu napparsimasup allagarsiaanik/ nassiussarsiaanik, napparsimmavimmi inimik uninngavigisaanik, pigisaanik, timaalu satsillugu misissuineq pisariaqarsorinarpata , napparsimasoq tamatuminnga ilisimatinneqassaaq.
Imm. 2.  Ilisimatitsissut pinngitsaaliissutaaniartup suunera pillugu paasissutissanik, pinngitsaaliiniarnermullu tunngaviusumik siunertaasumillu imaqassaaq. Pinngitsaaliissummik nakorsarneqarnermut atatillugu peqqissinerusinnaaneq, nakorsarneqarnerup sunniutai kingunerluutaasinnaasullu pillugit napparsimasoq aamma ilisimatinneqassaaq.

§ 7.  § 6 naapertorlugu piaarnerpaamik pinngitsaaliissummillu iliuuseqartoqartinnagu ilisimatitsisoqassaaq.
Imm. 2.  Inatsisartut inatsisaanni §§ 19-22 naapertorlugit pinngitsaaliilluni aalaakkiinermi imal. nukersorfiginninnermi pingaartumik pinasuartariaqarnermi ajoqusertoqarnissaalu aarlerinaateqarpat, pinngitsaaliisariaqarnermik ilisimatitseqqaarani iliuuseqartoqarsinnaavoq. Taama pisoqarpat napparsimasoq pinngitsaaliissummik iliuuseqarnerup kingorna pinngitsaaliinermut tungavilersuutaasoq siunertaasorlu pillugit piaarnerpaamik ilisimatinneqassaaq.

Ilisimatitseriaaseq

§ 8.  Oqaatsitigut allakkatigullu ilisimatitsisoqassaaq. Taamaattorli § 1, imm. 1, naapertorlugu ilisimatitsinissami oqaatsit kisimik atorneqassapput.

Kapitali 2
Maalaaruteqarnissamut ilitsersuineq

Malittarisassat nalinginnaasut

§ 9.  Pinngitsaaliissummik iliuuseqarnerni tamatigut napparsimasoq pineqarnini pillugu maalaaruteqarsinnaaneranik, kiisalu maalaarutip Inatsisartut inatsisaanni § 39, imm. 2 aamma 3 naapertorlugit iliuuseriniakkamik kinguartitsinermik kinguneqarsinnaaneranik ilisimatinneqassaaq.

§ 10.  Pinngitsaaliissummik iliuuseqarfigineqarnissaq pillugu ilisimatinneqarnermut atatillugu, napparsimasoq maalaaruteqarsinnaaneq pillugu ilitsersorneqassaaq.
Imm. 2.  Pinngitsaaliissummik nakorsarneqarnissaq pillugu maalaarut, Inatsisartut inatsisaanni § 39, imm. 3, naapertorlugu kinguartitsinermik kinguneqarpat, piaarnerpaamik pinngitsaaliissummillu nakorsarneqarneq aallarnerneqartinnagu maalaaruteqarsinnaanermik ilitsersuisoqassaaq.

Ilitsersuutip imarisai

§ 11.   Pinngitsaaliissummik napparsimavimmut unitsitsinermi, pinngitsaaliissummik tigummigallagassanngortitsinermi, takkutinngitsoortunik/utinngitsoortunik pinngitsaaliissummik utertitsinermi, pinngitsaaliissummik nakorsaanermi, napparsimmavimmiit angerlareernermi pinngitsaaliissummik malittarinninnermi, pinngitsaaliissummik aalaakkiinermi, nukersorfiginninnermi, napparsimasoq illersorniarlugu aalaakkiinermi, ataavartumik nal. ak. 24-t sinnerlugit sivisussusilimmik immikkut nakkutilliinermi, kiisalu immikkoortortami parnaarsinermi, napparsimasoq Tarnimikkut Nappaatillit Maalaarutaannik Aalajangiisartunut, pinngitsaaliissummik iliuuseqarfigineqarneq pillugu maalaaruteqarsinnaaneranik ilitsersorneqassaaq. Napparsimasup siunnersortaataluunniit, Inatsisartut inatsisaanni § 42 naapertorlugu piumasaqaatigippagu, maalaarut Tarnimikkut Nappaatillit Maalaarutaannik Aalajangiisartunut suliassanngortinneqassasoq, napparsimasoq aamma ilitsersorneqassaaq.
Imm. 2.  Taamatuttaaq napparsimasoq tamatuminnga kissaateqarpat, Tarnimikkut Nappaatillit Maalaarutaannik Aalajangiisartunut maalaaruteqartarneq pillugu, napparsimasup napparsimasullu siunnersortaata, oqaatsit atorlugit imal. qarasaasiakkut attaveqaqatigiinnikkut Aalajangiisartunut saqqummiussisinnaanerat, kiisalu § 43 naapertorlugu Aalajangiisartut aalajangiinissaannut piffissaliussaq ilanngullugu, ilitsersuutigineqassapput.

Ilitsersueriaaseq

§ 12.  Malaaruteqarsinnaaneq oqaatsit atorlugit ilitsersuutigineqassaaq. Napparsimasup piumasaqaatigippagu maalaaruteqarnissamut ilitsersuut allaganngorluguttaaq tunniunneqassaaq. 

Kapitali 3
Atuutilersitsineq

§ 13.  Nalunaarut atuutilersinneqarpoq 16. december 2013.

Namminersorlutik Oqartussat, ulloq 2. december 2013

Steen Lynge

/

Ann Birkekær Kjeldsen