Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni nr. 18 30. oktober 1998-meersumi § 13, imm. 1 aamma § 28, imm. 2 aamma 4, kingusinnerusukkullu Inatsisartut Inatsisaatigut nr. 23 22. november 2011 allanngortinneqartut naapertorlugit aalajangerneqarpoq:

Qimmeqarsinnaannermut qitsuuteqarsinnaanermullu akuersissut

§1.  Kommune Kujallermi qimmeqarsinnaanermut qitsuuteqarsinnaannermullu piumasaqaataavoq kommunalbestyrelsimit allakkatigut akuersissuteqarnissaq.
Imm.2.  Qinnuteqaat Kommune Kujallermi najukkani Teknikikkut ingerlatsivimmut nassiunneqassaaq. Qinnuteqaammi uppernarsarneqassaaq ileqqoreqqusami matumani aalajangersakkat eqquuttinneqarsimanissaat.
Imm. 3.  Qimmeqarsinnaanermut qitsuuteqarsinnaanermullu akuersissut inuup nammineq pigivaa taamaattumillu inunnut allanut tunniunneqarsinnaannani.

§ 2.  Kommunalbestyrelsip inuit qimmeqarsinnaanermut qitsuuteqarsinnaanermullu akuersissummik qinnuteqarneranik itigartissinnaavai, sakkortuummik arlaleriarlutilluunniit maleruaqqusaq una unioqqutissimappassuk.
Imm. 2.  Kommunalbestyrelsip qimmeqarsinnaaneq itigartitsissutigisinnaavaa innersuussutigalugu qimmeq pineqartoq/qimmip suussusia pissutigalugu, qimmiutigineqartut katillutik qanoq amerlatigissusiat eqqarsaatigalugu, qimmip sumi najugaqarnera aammalu kommuunip innuttai ataatsimut eqqarsaatigalugit.

Eqqussinissamut akuersissummik noqqaassummik tunniussaqarneq

§ 3.  Inuit ataasiakkaat Kalaallit Nunaannut qimminik qitsunnillu eqqussinissamik akuersissummik qinnuteqaataat tunniunneqassaaq Kalaallit Nunaata Sinniisoqarfianut, Strandgade 91, Postbox 2151, 1016 København K, aallarussinissaq sioqqutingaatsiarlugu aamma uppernarsaatinik pisariaqartunik ilaqartinneqassaaq.
Imm. 2.  Uumasumik eqqussinissamut Sinniisoqarfiup akiuersissutaa, kiisalu allagartat uppernarsaatillu uumasumut malitsigitinneqassapput.

Qimmiuteqarfiullutillu qitsuuteqarfiusinnaasut

§ 4.  Angallatini Kommune Kujallermi angerlarsimaffilinni qimmiuteqarneq qitsuuteqarnerluunniit inerteqqutaavoq.
Imm. 2.  Angallatit Kommune Kujalliup avataaneersut qimmiuteqarunik qitsuuteqarunilluunniit angallammiit niutinnissaat inerteqqutaavoq, Kommunalbestyrelsi allatut ittumik akuersissuteqarsimanngippat.

§ 5.  Kommune Kujallermi savaateqarfinni savat qimmii, tassa Border Collie, Kelpie imaluunniit taakkunannga akusat kisimik qimmiutigineqarsinnaapput.

Kinguaasiorsinnaajunnaarsitaaneq

§ 6.  Qimmit arnavissat qitsuillu arnavissat tamarmik, Kommune Kujallermut eqqussat imaluunniit pissarsiarisat, pilatsinnikkut imaluunniit kapitinnikkut naartusinnaajunnaarsinnikuussapput. Tamannali atuutinneqanngilaq savaateqarfinni savat qimmiinut.
Imm. 2.  Qitsuit ilumittut eqquteqqusaanngillat.
Imm. 3.  Qitsuit angutivissat issuerlugit kinguaasisorsinnaajunnaarsinneqarsimassapput.
Imm. 4.  Pilatsilluni naartusinnaajunnaarsitsinermut atatillugu aningaasartuutit kommuunip susassaqarfiginngilai.
Imm. 5.  Qimminik imaluunniit qitsunnik kinguaassiortitsineq inerteqqutaavoq. Savaateqarfinnili savat qimmiinik, tassa Border Collie, Kelpie imaluunniit taakkunannga akusanik kinguaassiortitsisoqarsinnaavoq.

Illersuummik kapitissimanissaq qungatsimilu allagartat

§ 7.  Qimmit qitsuillu malittarisassat ataavartut malillugit nappaatinut illersuummik kapitinnikkuusimassapput.
Imm. 2.  Qimmit qitsuillu qungaseqummik atugaqassapput nalunaaqqutalimmik perlerornermut akiuussutissamik kapitissimanermik uppernarsaatitalimmik aammalu allagartamik normutalimmik Teknikimut Ingerlatsivimmit tunniunneqarsimasumik.
Imm. 3.  Qungasequtit qimmimut ajoqusiisinnaasut atornissaat inerteqqutaavoq, tassalu qungasequtit naqquusartallit iml. qungasequtit sukallugit qimitsisinnaasut.

Qimmit pitussimanissaat

§ 8.  Qimmip pitoqqatiinnarneqarnissaa inerteqqutaavoq.
Imm. 2.  Qimmeq pitoqqassappat pituutaa naannerpaammik meterinik tallimanik takissuseqassaaq.
Imm. 3.  Qimmit aneersinneqartut ungaluniitinneqassapput kalunnernilluunniit pitussimatinneqassapput.
Imm. 4.  Qimmit taamaallaat pitussimatinneqarsinnaanngillat piginnittumit naalakkersorneqarsinnaagunik illoqarfiulluunniit killeqarfiata avataaniikkunik.

Qimminik nakkutilliisoq

§ 9.  Kommune Kujallermi kommunalbestyrelsip toqqassavaa illoqarfinni Nanortalimmi, Qaqortumi Narsamilu qimminik nakkutilliisoq suliassanik makkuninnga akisussaasuusoq:
1) Qimmit imaluunniit qitsuit nalunaarsorneqarnerat.
2) Qimminik imaluunniit qitsunnik piginnittut nalunaarsornerat.
3) Qimmit angalaaginnartut qaamatinik arfinillinnik utoqqaanerulersimasut, qitsuit angalaaginnartut, qimmit qitsuillu inerteqqutaasumik eqqunneqarnikut kiisalu taakkua pineqartut pigineqanngitsut tiguneqarnissaat toqunneqarnissaallu.

Qimmit qitsuillu angalaaginnartut, pigineqanngitsut kiisalu qimmit qitsuillu inerteqqutaasumik eqqunneqarlutillu uumasuutigineqartut

§ 10.  Qimmit angalaaginnartut, pigineqanngitsut, uumasuutigineqarnerinik uppernarsineqarsinnaangitsut aammalu unioqqutitsilluni eqqullugillu uumasuutigineqartut toqqunneqartassapput.
Imm. 2.  Qimmeq qitsulluunniit, kimit pigineqarnersoq imaaliallaannaq uppernarsineqarsinnaasoq, soorlu atsiukkamik qungasequtsigaq, nal. akunnerisa 24-t iluani toqunneqarsinnaavoq, inuttaa ilisimatinneqareersimappat qimmip qitsulluunniit tigusarineqarsimaneranik, inuttaa ersarissumik ilisimatinneqareersimappat, qimmeq qitsulluunniit toqunneqartussaasoq aaneqanngikkuni.
Imm. 3.  imm. 1 aamma 2 malillugu toqutsineq pissaaq piginnittumut taarsiissutaassussaassutitaqanngitsumik.

Naammigittaalliorsinnaaneq

§ 11.  Arlaatigut qimmiuteqarnermut imaluunniit qitsuuteqarnermut tunngasunik ippigisaqarsimagaanni naammagittaalliut kommunalbestyrelsimut ingerlatinneqassaaq.

Kinguneqartitsineq

§ 12.  Qimmit qimuttut kiisalu qimmeqarneq qitsuuteqarnerlu pilugit inatsisartut inatsisaanni § 28, imm. 2. malillugu akiliisitsisoqarsinnaavoq ileqqoreqqusami matumani § 1, imm. 1 aamma 3, § 4, § 5, imm. 1-3 aamma imm. 5, § 6, § 7 aammalu § 8-mi aaliangersakkanut tunngasunik unioqqutitsisoqarsimassappat.
Imm. 2.  Piginneqatigiiffiit, anpartsselskabit assigisaalluunniit unioqqutitsisimappata, ingerlatseqatigiiffik akiliisinneqarsinnaavoq.

Atuutilersinneqarnera

§ 13.  Ileqqoreqqusaq atuutinneqalerpoq ulloq 15.11.2013.
Imm. 2.  Tamatumunnga atatillugu atorunnaarsinneqarput kommunit ileqqoreqqusaat ukua atorunnaarsinneqarput:
1) Qaqortup kommuniani Qimmeqarsinnaanermut qitsuuteqarsinnaanermullu ileqqoreqqusaq 30/9-2002-meersoq
2) Nanortallip kommuniani Qimmeqarsinnaanermut qitsuuteqarsinnaanermullu ileqqoreqqusaq 4/7-2006-meersoq
3) Narsap kommuniani Qimmeqarsinnaanermut qitsuuteqarsinnaanermullu ileqqoreqqusaq 13/3-2008-meersoq

Taamaasilluni akuerineqarpoq Kommune Kujallermi kommunalbestyrelsimit, ulloq        2013

 Jørgen Wæver Johansen
Borgmester

Matumuunna Kommune Kujallermi qimmeqarsinnaanermut qitsuuteqarsinnaanermullu ileqqorerqusaq naqissuserneqarpoq.

Kalaallit Nunaanni Namminersorlutik Oqartussat, ulloq 14. november 2013

 Karl Lyberth
Aalisarnermut, Piniarnermut Nunalerinermullu Naalakkersuisoq