Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat nr. 7, 29. marts 2011-meersoq, § 14, imm. 5 aamma § 31, imm. 2 naapertorlugit makku aalajangersarneqarput:

Atuuffia

§ 1.  Ileqqoreqqusaq Kommuuneqarfik Sermersuumi Ammassallup  aamma Ittoqqortoormiit aqutsiveqarfiit killeqarfiini qilalukkanut qernertanut qassusersornermut tunngavoq.

Qassutinik atuineq

§ 2.  Qilalukkanik qaqortanik qernertanillu piniarnerni minnerpaamik 380 mm-rinik ningartalinnik qassusersorneq taamaallaat ajornartitaanngilaq.
Imm. 2.  Qassutit atorneqartut piginnittup aqqanik nalunaaqutserneqarsimassapput.
Imm. 3.  Akuttunerpaamik ullormut ataasiarlugit alakkarneqartassapput piniariarnerlu naammassigaangat qaqinneqassallutik.
Imm. 4.  Qassutit minnerpaamik 200 meterinik akuttussuseqassapput.

Qassusersornermi killeqarfiit

§ 3.  Ammassallup aqutsiveqarfiani sumiiffiit qilalukkanut qernertanut sumiiffinni taagorneqartuni qassusersorfigeqqusaanngitsut matuma kinguliini allassimapput:
1)  Kangerlussuarmi Nuliarpiip kangimut nuuaniit (Avannarpasissuseq 68°27’5N Kippasissuseq 32°25'0V) akimorpiaq titakkamiit kangerluup ilummut qinngua tikillugu (68°25’0N - 32°-33'5V) qilalukkanut qassuserfigeqqusaanngilaq, ilanngussaq 1-mi takutinneqarpoq.
2)  Nuugaalimmi Ikaasakajiip kimmut nuuaniit (Avannarpasissuseq 67°21’0N Kippasissuseq 33°22’5V) akimut Attertivanut titakkamiit ilummut kangerluup qinngua (67°18’5N 33°31’5V) tikillugu qassusersorfigeqqusaanngilaq,  ilanngussaq 2-mi takutinneqarpoq.
3)  Kangertitsivatsiami Ikkartitsivamiit (Avannarpasissuseq 66°20’0N Kippasissuseq 35°-’37,0V) akimut titakkamiit ilummut kangerluup qinngua (66°16’0N - 35°’41,0V) tikillugu qassusersorfigeqqusaanngilaq,  ilanngussaq 3-mi takutinneqarpoq.
4)  Sermiligaami Ilertamiit ilua´tungaaniit Immikkeertimut (Avannarpasissuseq 66°01’0N Kippa-sissuseq 36°30’0V) titakkamiit ilummut kangerluup qinngua (66°01’0N - 36°24’0V) tikillugu qassusersorfigeqqusaanngilaq, ilanngussaq 4-mi takutinneqarpoq.
5)  Sermilimmi Nuuk Oqqorsip ilua´tungaaniit (Avannarpasissuseq 66°14’0N – Kippasissuseq  37°42’0V) Nuuk Kiattermut titakkamiit ilummut kangerluup qinngua (66°09’5N - 37°34’0V)  tikillugu qassusersorfigeqqusaanngilaq,  ilanngussaq 5-mi takutinneqarpoq.
6)  Isortup  eqqaani Isertup Kangertivani, Immikkeertikajiip nuuaniit ilummut (Avannarpasissuseq 65°40’0N Kippasissuseq 39°10’0V), Ikertivarmi Nuuaasiakajiip Iliverta (65°40’0N - 39°13’0V) nuuaniit ilummut, Immikkoortukajiip tunuaniit ilummut (65°36’0N - 39°27’5V), Uttuttuluup paavaniit ilummut qinngui tikillugit (65°33’5N -  39°37’5V) qassusersorfigeqqusaanngillat, ilanngussaq 6-mi takutinneqarpoq.
Imm. 2.  Aqutsiveqarfik Ittoqqortoormiuni sumiiffimmi Ikaasakajik (Øfjordimik taaneqartarnikuusi-masoq) Nannut Qeqertaanniit (Bjørneømik taaneqartarnikuusimasoq) (71°05N - 25°30V) paavaniit akimut Aqissip Kangerdiva (Rypefjordimik taaneqartarnikuusimasoq) paavata tungaanut qilalukkanik qernertanik qassusersorneq inerteqqutaavoq,  ilanngussaq 7-mi takutinneqarpoq.  

 
Pineqaatissiinerit

§ 4.  § 2 - 3-mut unioqqutitsinerit Kalaallit Nunaanni pinerluttulerinermik inatsit naapertorlugu akiliisitsinermik aamma pisanik arsaarinnissuteqarnermik pineqaatissiissutaasinnaapput.

Atuutilernera

§ 5.  Ileqqoreqqusaq atuutilissaaq 21.06.2013.

Kommuneqarfik Sermersuumi kommunalbestyrelsep  taamatut akuersissutigivaa ulloq 17.05.2013

Asii Chemnitz Naarup

Borgmesteri

Namminersorlutik Oqartussat:  Ulloq 20. juni 2013

Karl Lyberth

Aalisarnermut Piniarnermut Nunalerinermullu Naalakkersuisoq

Ilanngussaq 1 - 7