§ 1

Siusinaartumik pensionisiat pillugit Inatsisartut peqqussutaat nr. 4, 7. maj 2007-meersoq, Inatsisartut peqqussutaat nr. 1, 26.november 2009-meersumi allanngortinneqarsimasoq imatut allanngortinniarneqarpoq:

1. § 8 ima oqaasertalerneqassaaq:
”§ 8.  Siusinaartumik pensionisiat imatut annertussuseqarput:
1) Siusinaartumik pensionisialimmut kisermaamut ukiumut 100.000 kr.-nit,
2) Aappariinnut, aappaannaa siusinaartumik pensionisiaqarpat, ukiumut 100.000 kr.-nit aamma aappaasoq pisortanit pensionisianik sunilluunniit pisartagaqanngippat.
3) Aappariinnut tamarmik siusinaartumik pensionisiaqarsinaatitaasunut ukiumut 150.000 kr.-nit.
Imm. 2.  Aappariit, aappaa siusinaartumik pensionisiaqarpat aappaalu utoqqalinermi pensionisiaqarpat, pensionisiat tamakkiisut ukiumut  152.600 kr.-nit.
Imm. 3.  Imm. 1-imi aamma 2-mi aningaasat taaneqartut Naatsorsueqqissaartarfiup atuisunut akitigititaanut naleqqersuutaa tamanut saqqummiunneqartoq tunngavigalugu naatsorsorneqartassapput. Siusinaartumik pensionisiassat atuisunut akigititanut naleqqersuutip pointinik pingasunik allanngorneratigut 3 %-imik iluarsineqartassaaq. Iluarsiineq januarip aallaqqaataani siullermi tulliuttumiit atuutilertassaaq, julip aallaqqaataani atuisunut akigititanut naleqqersuut tunngavigalugu.
Imm. 4.  Aningaasat iluarsineqarsimasut ukiut tamaasa januarip aallaqqaataani Naalakkersuisunit tamanut saqqummiunneqartassapput.”

2. § 9, imm. 2 ima oqaasertalerneqassaaq:
”Imm. 2.  Siusinaartumik pensionisiaqarnissaq  appartinneqassaaq isertitassatut akileraarutaasussatut killiliunneqarsimasut qaangerlugit qaffakkiartuaarsimappata:
1) Siusinaartumik pensionisialimmut kisermaamut ukiumut 180.000 kr.-nit.
2) Aappariit tamarmik siusinaartumik pensionisiaqarsimappata ukiumut 270.000 kr.-nit.
3) Aappariinnut, aappaannaa siusinaartumik pensionisiaqarpat, aapparisaa pisortanit pensionisianik sunilluunniit pisartagaqanngippat ukiumut 270.000 kr.-nit.
4) Aappariinnut, aappaa siusinaartumik pensionisiaqarpat aappaalu utoqqalinermi pensionisiaqarpat ukiumut 300.000 kr.-nit.”  

3. § 18 ima oqaasertalerneqassaaq:
”§ 18.  Utoqqalinermi pensionisiaqartut kommunimut Naalakkersuisunulluunniit nalunaaruteqarnissamik pisussaatitaapput, utoqqalinermi pensionisiamik iluarsiivigineqarnissaannik unitsinneqarnissaannilluunniit kinguneqarsinnaasumik inuttut atugarisamigut aningaasaqarnermigullu allannguuteqartoqarpat.
Imm. 2. Siusinaartumik pensionisiaqartitaaneq atorunnaassaaq piumasaqaataasut eqquutsinneqarsinnaajunnaarpata imaluunniit tunniussineq eqqunngitsumik tunngaveqarsimappat.
Imm. 3.  Inuttut atugarisanut aningaasaqarnermullu tunngasutigut eqqunngitsumik paasissutissiisimaneq tunngavigalugu pissusissamisuunngitsunik utoqqalinermi pensionisiaqartitsisoqarsimappat, aningaasat pisassarinngisat utertillugit akilerneqarnissaat piumasaqaataasinnaavoq, imaluunniit pensionisiassanit ilanngaatigalugit akilersorlugit unerartinneqarsinnaallutik.”

4. § 21 imaoqaasertalerneqassaaq:
”§ 21.  Kommunalbestyrelsi naliliippat siusinaartumik pensionisiallip aningaasaqarnini isumagisinnaanngikkaa, siusinaarluni pensionisiat, matumani inummut tapiutit meeqqallu tapii ilanngullugu aqutsivigineqarnissaat aalajangiiffigineqarsinnaavoq.”

5. § 22,imm. 2 ilanngunneqassaaq:
“Imm. 3.  Pensionisiaqartup toquneranut atatillugu aappariinni qimanneqartoq, § 4 naapertorlugu qaammammi toqqukkut qimaguffiusup naanerata kingorna qaammatini marlunni siusinaartumik pensionisiassaanik tigusaqartassasoq.”

§ 2

Inatsisartut peqqussutaat 1. juli 2010-mi atuutilissaaq.

Kalaallit Nunaanni Namminersorlutik Oqartussat 31. maj 2010

Kuupik Kleist

/

Maliina Abelsen