Quppernerup imai iserfigikkit
Oqaatsit toqqakkit
Ujaasinermut uterit
Inatsisit
Nr. 4
7. maaji 2007
Atorunnaartut

Siusinaartumik pensionisiat pillugit Inatsisartut peqqussutaat

Suliassaqartitsinermik isumaginninnermillu ingerlatsineq pillugit Kalaallit Nunaannut inatsimmi nr. 580, ulloq 29. november 1978-imeersumi § 2 naapertorlugu aalajangersarneqarput:

 

Kapitali 1
Piumasaqatit nalinginnaasut il.il.

§ 1. Siusinaartumik pensionisianik pisartagaqarnissamut pisinnaatitaanermut, qinnuteqartup danskisut innuttaassuseqarnissaa piumasaqaataavoq.
Imm. 2. Tamannali atuutinngilaq:
1) Inunnut Isumaginninnikkut isumannaallisaaneq pillugu Nunat Avannarliit isumaqatigiissutaanni pineqartunut.
2) Inunnut qinnuteqarnerup siunitsianngua sivikinnerpaamik ukiuni pingasuni Kalaallit Nunaani aalajangersimasumik najugaqarsimasunut.

§ 2. Siusinaartumik pensionisiaqalerniarnermut piumasaqaataavoq, qinnuteqartup Kalaallit Nunaanni, Nunat Avannarliit arlaanni imaluunniit nunami EØS-ip isumaqatigiissutaanik akuersisimasumi aalajangersimasumik najugaqartuunissaa.

§ 3. Siusinaartumik pensionisiaqalernissamut piumasaqaataavoq, 15-init 65-inut ukioqalernerup akornanni sivikinnerpaamik ukiuni pingasuni Kalaallit Nunaanni, Danmark-imi Savalimmiuniluunniiit aalajangersimasumik najugaqarsimanissaq.

§ 4. Inatsisartut peqqussutaanni matumani inuit, aappariittut naatsorsuunneqartut tassaapput, katissimallutik aappariit, nalunaarsukkamik inooqatigiit imaluunniit aappariit, katissimanermut assingusumik sivikinnerpaamik ukiumi ataatsimi inooqatigiissimasut.
Imm. 2. Katissimallugu aapparisaq, nalunaarsukkamik aapparisaq imaluunniit inooqatigisaq isumaginninnerup iluani ulloq unnuarlu angerlarsimaffimmut aalajangersimasumik najugalittut § 12 naapertorlugu nuuppat, aappaasoq siusinaartumik pensionisiaqartumut naligitinneqassaaq.

 

Kapitali 2
Pisartagaqarsinnaanngorneq katersisarnerlu


Siusinaartumik pensionisiaqalersitsineq

§ 5. Inuit 18-inik ukioqalersimasut, sulili 65-inik ukioqalersimanngitsut siusinaartumik pensionisianik tunineqarsinnaatitaapput, takuulli § 29, imm. 2.
Imm. 2. Inuit 18-inik ukioqalersimanngitsut, qinnuteqartoq katissimallugu aappaminut, katissimallugu aapparisamut assingusumik inooqatigisaminut meeqqamulluunniit Pilersuisussaatitaasimaguni, siusinaartumik pensionisiaqalersinneqarsinnaapput.

§ 6. Inuit timikkut, eqqarsartaatsikkut inooqataanikkulluunniit pissutsinik patsiseqartumik inuussutissarsiorsinnaanermikkut ataavartumik appariaateqarsimasut siusinaartumik pensionisianik tunineqarsinnaapput.
Imm. 2. Inuit siusinaartumik pensionisianik tunineqarsinnaalersinnagit pineqartoq piginnaanngorsaqqinniarlugu kommuni misiliisimassaaq.

 

Katersineq

§ 7. Tamakkiisuusumik siusinaartumik pensionisiaqarsinnaatitaassagaanni, piffissami 15-inik ukioqalernermit siusinaartumik pensionisiaqalersinneqarneq sioqqullugu Kalaallit Nunaanni, Danmarkimi Savalimmiuniluunniit sivikinnerpaamik piffissap 5/6-rarterutaani najugaqarsimanissaq piumasaqaataavoq. Tamakkiisuusumik siusinaartumik pensionisiaqalernissammut piumasaqaat eqqortinneqarsimanngippat, siusinaartumik pensionisiat aningaasartaasa amerlassusiat piffissap najugaqarfiusimasup aamma 15-inik ukioqalernermit pensionisiaqalersinneqarneq sioqqullugu piffissap 5/6-rarterutaa tunngavigalugit aalajangersarneqartassapput. Tamakkiisuusumik siusinaartumik pensionisiat naatsorsorneqartut ilaat taanna siusinaartumik pensionisiat tamakkiisut amerlassusaasa 40-raterutaannut qaninnerpaamut appartinneqartassaaq.
Imm. 2. Siusinaartumik pensionisiaqartoq utaqqalinermi pensionisiaqarnermut ikaarsaarpat, utoqqalinermi pensionisiat amerlassusaasa 40-raterutaat, siusinaartumik pensionisiat tunniunneqartarsimasut amerlaqataat tunniunneqartassapput.

 

Kapitali 3
Pensionisiat aningaasartaat

§ 8. Siusinaartumik pensionisiat imatut annertussuseqarput:
1) Siusinaartumik pensionisialimmut kisermaamut ukiumut 88.812 kr.-nit.
2) Aappariinnut, aappaannaa siusinaartumik pensionisiaqarpat, ukiumut 88.812 kr.-nit aamma aappaasoq pisortanit pensionisianik sunilluunniit pisartagaqanngippat.
3) Aappariinnut tamarmik siusinaartumik pensionisiaqarsinnaatitaasunut ukiumut 133.312 kr.-nit.
Imm. 2. Aappariit, aappaa siusinaartumik pensionisiaqarpat aappaalu utoqqalinermi pensionisiaqarpat, pensionisiat tamakkiisut ukiumut 140.000 kr.-inik tikillugit annertussuseqarput.

§ 9. Siusinaartumik pensionisianik ilanngaassisoqassaaq, pisortanit pensionisiat saniatigut siusinaartumik pensionisiallip immaqalu katissimallugu aapparisaata, katissimasutut assingusumik aapparisaata inooqatigisaataluunniit isertitaasa, tassunga ilanngullugu Inunnut Isumaginninnikkut isumannaallisaaneq pillugu Nunat Avannarliit Isumaqatigiissutaanni aalajangersakkat malillugit siusinaartumik pensionisiat, sinnerpatigit:
1) Siusinaartumik pensionisialimmut kisermaamut ukiumut 28.000 kr.-nit.
2) Aappariit tamarmik siusinaartumik pensioniaqarsimappata ukiumut 42.000 kr.-nit.
3) Aappariinnut, aappaannaa siusinaartumik pensionisiaqarpat, aapparisaa pisortanit pensionisianik sunilluunniit pisartagaqanngippat ukiumut 42.000 kr.-nit.
4) Aappariinnut, aappaa siusinaartumik pensionisiaqarpat aappaalu utoqqalinermi pensionisiaqarpat ukiumut 70.000 kr.-nit.
Imm. 2. Siusinaartumik pensionisiaqarsinnaatitaaneq annaaneqassaaq taaneqartunik isertitaqartoqarsimappat
1) Siusinaartumik pensionisialimmut kisermaamut ukiumut 180.000 kr.-niusimappata.
2) Aappariinnut, tamarmik siusinaartumik pensionisialinnut ukiut 270.000 kr.-niusimappata.
3) Aappariinnut, aappaannaa siusinaartumik pensionisialimmut aapparisaalu pisortanit pensionisianik sunilluunniit pisartagaqanngitsumut ukiumut 270.000 kr.niusimappata.
4) Aappariinnut, aappaannaa siusinaartumik pensionisialimmut aappaalu utoqqalinermi pensionisialimmut ukiumut 300.000 kr.-niusimappata.
Imm. 3. Siusinaartumik pensionisiallit, tassunga Inunnut Isumaginninnikkut Isumannaallisaaneq pillugu Nunat Avannarliit Isumaqatigiissutaanni aalajangersakkat malillugit siusinaartumik pensionisiallit ilanngullugit, pisinnaatitaaffigaat siusinaartumik pensionisiallip kisermaap pensionisiassaasa 20 procentiannik pisartagaqarnissaq, takuuk § 8-mi imm. 1, nr. 1 isertitat akileraarutaasussat qanorluunniit annertutigigaluarpata.
Imm. 4. Siusinaartumik pensionisiat isertitsissutigineqarneranni annertussusiineq pillugu malittarisassat Naalakkersuisunit aalajangersarneqassapput.

 

Kapitali 4
Siusinaartumik pensionisiaqalersitsinermi naatsorsueriaaseq, ukiumoortumik iluarsiissuteqartarnissaq assigisaalu


Pisartagaqartitsilernermi naatsorsueriaaseq

§ 10. Siusinaartumik pensionisiassanik pisartagaqalernissamut ikaarsaariarnerup kingornatigut akileraarutaasussat ukiumut isertikkumaagassatut naatsorsuutigineqartut tunngavigalugit, siusinaartumik pensionisiassatut pisartagassat annertussusissaat naatsorsorneqartassapput.
Imm. 2. Piffissami siusinaartumik pensionisianik pisarsisinneqarnerup siulliup kingorna ukiullu tulliuttup naanerata tungaanut, isertitassat akileraarutaasussat naatsorsuutigineqartut tunngavigalugit, siusinaartumik pensionisiat annertussusissaat ukiumut ataatsimut isertitassatut naatsorsorneqartassapput.

 

Ukiumoortumik nalimmassaaneq

§ 11. Siusinaartumik pensionisiat ukiut tamaasa 1. januarimi, ukioq kingulleq isertitarisimasat ilisimaneqartut tunngavigalugit akinut nalimmassarneqartassapput.
Imm. 2. Siusinaartumik pensionisiat tunniunneqartartut ukiup ingerlanerani, siusinaartumik pensionisiallip inuttut imaluunnit aningaasaqarnikkut pissutsit atugarisaasa pingaarutilimmik ataavartumillu allannguuteqarsimaneri naapertorlugit nalimmassarneqartassapput. Nalimmassaatit, allannguinermiit qaammatip tulliuttup ullua siulleq aallarnerfigalugu atuutilertassapput.
Imm. 3. Siusinaartumik pensionisiaqartoq erninermut atatillugu sulinngiffeqarnermut atatillugu isertitami ilaanik annaasaqarpat siusinaartumik pensionisiatut tunniunneqartartut piffissami sulinngiffeqarfiup nalaani nalimmassarneqartassapput.

 

Ulloq unnuarlu paaqqinniffiusunut nuunneq

§ 12. Siusinaartumik pensionisianik pisartagalik isumaginninnermi ulloq unnuarlu angerlarsimaffimmut nuuppat, tassanilu najugaqarneq pisortanit akilersorneqarpat, siusinaartumik pensionisiat qaammammi nuuffiusumi qaammatillu tulliani allannguuteqaratik tunniunneqassapput. Tamatuma kingorna siusinaartumik pensionisiallip kisermaap, tak. § 7, imm. 1, nr. 1 naapertorlugu, siusinaartumik pensionisiat 20 % pisartagarilissavai, matumani siusinaartumik pensionisiallip pisartakkami saniatigut allanik isertitaqarnera apeqqutaatinnagu.
Imm. 2. Siusinaartumik pensionisianik pisartagalik pisortanit pensionisiat saniatigut akileraarutaasussanik isertitaqarpat isumaginninnermi ulloq unnuarlu angerlarsimaffimmiinneq tamakkiisumik ilaannakortumilluunniit nammineq akilersortinneqassaaq. Akiuliutissap taassuma, akileraarutit peereerlugit katillugit isertitat 60 %-ii sinneqqusaanngilai.
Imm. 3. Pisortanit akiligaannik, ulloq unnuarlu angerlarsimaffimmi allaminnermut tunngatillugu, siusinaartumik pensionisianut tunngasunik assigisaallu iluarsiissutissat pillugit malittarisassat Naalakkersuisut aalajangersagassaraat, tassunga ilaapput Kalaallit Nunaanni imaluunniit Danmarkimi sivisuumik napparsimavimmi uninnganermut tunngatillugu imaluunniit pineqaatissinneqarsimalluni isertitsivimmiinnermut tunngatillugu malittarisassasiat.

 

Kapitali 5
Tapit

Meeqqanut tapit

§ 13. Siusinaartumik pensionisiallit meeqqanut 18-it inorlugit ukiulinnut pilersuisussaatitaasut meeqqat ataasiakkaarlugit tapisiaqaatigissavaat. Tapiutit tapiutigineqartassapput pilersuisussaatitaaneq toqqaannartumik pilersuinerunersoq imaluunniit meeqqanut akilersuutinik akiliisarnikkut eqquutsinneqarnersoq apeqqutaatinnagu.
Imm. 2. Pilersuisussaatitaaneq meeqqanut akilersuutinik akiliinikkut eqquutsinneqarpat, aningaasat meeqqanik akilersuutinik tigusisinnaatitaasumut il.il. meeqqanut kiisalu qitornavissiartaarnermi tapinut Inatsisartut peqqussutaanni malittarisassat naapertorlugit tunniuneqartassapput.
Imm. 3. Meeqqanut tapit siusinaartumik pensionisiaqartunut Kalaallit Nunaata avataanut nunassissimasunut tunniunneqartussaanngillat.

§ 14. Meeqqanut tapiutit tunniunneqartarunnaassapput kinguliini patsisissaatitaasut arlaat eqquutsinneqanngippat:
1) Meeqqanut inuusuttunullu ikiorsiisarneq pillugu inatsisartut peqqussutaat malillugu meeraq angerlarsimaffiup avataanut inissinneqarsimappat imaluunniit pisortanit tamakkiisumik pilersorneqarpat.
2) Meeraq ilinniagaqarnersiutinik pisarpat, matumani aamma sulilluni sungiusarnerup nalaani tamatumunnga malittarisassat malillugit pisartagaqarpat.
3) Meeraq meeqqanut tapiutit pingasoriaataannik amerlanerusunilluunniit sulinermigut isertitaqarpat.
4) Meeraq katissimalluni aapparminut meeqqamulluunniit nammineq pilersuisussaatitaalersimappat.
Imm. 2. Meeqqanut tapiutit pillugit maleruagassat Naalakkersuisut aalajangersassavaat.

 

Inummut tapit

§ 15. Inummut tapit pisariaqartitanik pisut ataasiakkaarlugit naliliineq tunngavigalugu akuersissutigineqartassapput, ingerlaavartumik pisartakkatut sivisunerpaamik ukiumut ataatsimut atuuttussatut aalajangersarneqartunik imaluunniit immikkut pisariaqartitanut matussutissatut ataasiaannartumik ikiorsiissutitut.
Imm. 2. Inummut tapiutit utertillugit akileqquneqarsinnaapput:
1) illersorneqarsinnaanngitsumik aningaasanik aqutsinerlunneq pissutigalugu inummut tapiutit tunniunneqarpata, imaluunniit
2) siusinaartumik pensionisialik inummut tapiutinik pisartagaqartoq kingusinnerusukkut aningaasanik, piffissamut pineqartumut inummullu tapiutit assinganik siunertaqartumik pissarsisimappat.
Imm. 3. Utertillugit akileeqqusineq aatsaat piumasarineqarsinnaavoq, siusinaartumik pensionisialimmut tapinik tunniussinermut atatillugu utertitsisussaatitaaneranik ilisimatinneqarsimappat.
Imm. 4. Siusinaartumik pensionisialinnut Kalaallit Nunaata avataani aalajangersimasumik najugalinnut inummut tapiutit tunniunneqarneq ajorput.
Imm. 5. Inummut tapiutit pillugit Naalakkersuisut malittarisassanik aalajangersaassapput.

 

Kapitali 6
Aqutsineq

§ 16. Inuit Kalaallit Nunaanni najugaqartut siusinaartumik pensinisiaqalernissamik, meeqqat tapiinik inummullu tapiutinik qinnuteqaataat, kommunemut najugarisamut tunniunneqartassapput. Inuit kommuneqarfiit killilersugaanerisa avataanni najugallit siusinaartumik pensionisiaqalernissamik, meeqqanut tapisiaqalernissamik inummullu taliussanik qinnuteqaatertik Naalakkersuisunut tunniuttassavaat.
Imm. 2. Isumaginninnikkut isumannaallisaaneq pillugu Nunat Avannarliit isumaqatigiissutaat naapertorlugu siusinaartumik pensionisiaqalernissamik qinnuteqaat Naalakkersuisunut tunniunneqassaaq.
Imm. 3. Inuup nammineerluni qinnuteqarsimanngitsup siusinaartumik pensionisiaqalernissaa pillugu kommuni najugaq suliassamik aallartitsisinnaallunilu aalajangiisinnaavoq.

§ 17. Qinnuteqaatip tunniunneqarnerata aammalu piumasaqaataasut naammassineqarnerisa kingorna qaammatip qinnuteqarfiusup allaqqaataa aallarnerfigalugu siusinaartumik pensionisianik pisartagaqarsinnaatitaalerneq atuutilersinneqartassaaq.

§ 18. Utoqqalinermi pensionisiaqartut kommunimut Naalakkersuisunulluunniit nalunaaruteqarnissamik pisussaatitaapput, utoqqalinermi pensionisiamik iluarsiivigineqarnissaannik unitsinneqarnissaannilluunniit kinguneqarsinnaasunik inuttut atugarisamigut aningaasaqarnermigullu allannguuteqartoqarpat.
Imm. 2. Siusinaartumik pensionisiaqartitaaneq atorunnaassaaq piumasaqaataasut naammassineqarsinnaajunnaarpata imaluunniit tunniussineq eqqunngitsunik tunngaveqarsimappat.
Imm. 3. Inuttut atugarisanut aningaasaqarnermullu tunngasutigut eqqunngitsumik paasissutissiisimaneq tunngavigalugu pissusissamisuunngitsumik utoqqalinermi pensionisiaqartitsisoqarsimappat aningaasat pisassarinngisat utertillugit akilerneqarnissaat piumasaqaataasinnaavoq imaluunniit pensionisiassanit ilanngaatigalugit akilersorlugit unerartinneqarsinnaallutik.

§ 19. Inuit 65-inik ukioqalernerminni siusinaartumik pensionisiallit qinnuteqaqqaanngikkaluarlutik utoqqalinermi pensionisianik pisartagaqalissapput, takuujulli § 29, imm. 2.

 

Kapitali 7
Tunniussisarneq

§ 20. Siusinaartumik pensionisiat tapiusinnaasullu tunniunneqartassapput qaammatikkaartumik siumoortumik.

§ 21. Kommunalbestyrelsi naliliippat siusinaartumik pensionisiallip aningaasaqarnini isumagisinnaanngikkaa, utoqqalinermi pensionisiat, matumani inummut tapiutit meeqqallu tapii ilanngullugu aqutsivigineqarnissaat aalajangiiffigineqarsinnaavoq.

§ 22. Siusinaartumik pensionisiaqarnissamut piumasaqaataasut eqquutsinneqarunnaarpata pisartagaqartitsineq qaammatip tulliuttup naaneranit unitsinneqassaaq. Tunniunneqartartunilli unitsitsineq, nunanut avannarlernut imaluunniit nunanut allanut EØS-imik isumaqatigiissummut atasunut nuunnermi piumasaqaatinik suli eqquutsitsiffiusimappat, Kalaallit Nunaat qimallugu nuunnermi qaammatip nuuffiusup naanerani pisassaaq.
Imm. 2. Siusinaartumik pensionisiallip maqaasineqarluni nalunaarutigineqarneraniit qaammatit pingasut qaangiunneranni uumaneralu uppernarsarneqarsinnaanngippat pisartagaqartitsineq qaammatip tulliup aallaqqaataanit unitsinneqassaaq. Siusinaartumik pensionisiaqarneq atuukkunnaassaaq, siusinaartumik pensionisiaqarnerup unitsinneqarneraniit ukiup ataatsip qaangiunnerani siusinaartumik pensionisialik suli uumanersoq uppernarsarneqarsinnaanngippat.

 

Kapitali 8
Akiligassanngortitsisarneq

§ 23. Siusinaartumik pensionisianik ilanngaassisoqarsinnaanngilaq allatulluunniit eqqartuussivimmi suliassiisoqarsinnaanani. Taamatut piumasaqarluni isumaqatigiissutit atortussaatinneqanngillat. Kisiannili takuuk § 15-imi imm. 2 aamma § 18-imi imm. 3.

 

Kapitali 9
Naammagittaalliuuteqarsinnaaneq

§ 24. Inunnik Isumaginninnerup aqunneqarnera aaqqissugaaneralu pillugit Inatsisartut peqqussutaanni malittarisassat atuuttut naapertorlugit, peqqussut manna malillugu aalajangiinerit aalajangersarneqarsimasut Isumaginninnermi Naammagittaalliuuteqartarfimmut naammagittaalliuutigineqarsinnaapput.

 

Kapitali 10
Aningaasalersuineq naatsorsuuserinerlu

§ 25. Siusinaartumik pensionisianut meeqqallu tapiinut aningaasartuutit, takuuk § 13 Nunap Karsianit 50%-imik kommuninillu 50 %-imik akilerneqartassapput. Inummut tapinut aningaasartuutit, kommuninit akilerneqartassapput, tak. § 15.
Imm. 2. Siusinaartumik pensionisiallit kommunit agguataarnerisa avataani aalajangersimasumik najugaqartut pensionisiaannut, meeqqanut tapisiaannut inummullu tapisiaannut aningaasartuutit Nunap Karsianit akilerneqartassapput.
Imm. 3. Siusinaartumik pensionisialinnut Kalaallit Nunaata, Danmark-ip Savalimmiulluunniit avataanni aalajangersimasumik najugaqartunut, siusinaartumik pensionisiaannut aningaasartuutit Nunatta karsianit aningaasartuutigineqassapput.
Imm.4. Inatsisartut peqqussutaannik aqutsinermut aningaasartuutit oqartussaasumit akisussaasumit akilerneqartassapput.
Imm. 5. 1. januar 2002 sioqqullugu siusinaartumik pensionisianut aningaasartuutaasarsimasut Nunap Karsiata 90%-ii kommunillu 10%-ii akiligassaraat.

§ 26. Kommunit naatsorsuutinik saqqummiussisarnissaat kukkunersiuisarnissaallu pillugit malittarisassat Naalakkersuisunit aalajangersarneqassapput.

§ 27. Qaammatit pingasut ukiullu ullorsiuteqarfiusup naanerata kingorna kingusinnerpaamik qaammatip ataatsip qanngiunnerani kommunimi utoqqalinermi pensionisianik pisartagaqartut pillugit kisitsisitigut paasissutissat kommunalbestyrelsip Naalakkersuisunut nalunaarutigissavai.
Imm. 2. Paasissutissat nalunaarutigineqartussat imarisassaat ilusilersorneqarnissaallu pillugit malittarisassat Naalakkersuisunit aalajangersarneqassapput.

§ 28. § 27 imaluunniit §-ini 26-imi 27-imilu malittarisassatut aalajangersakkat piumasaqaataasut kommunalbestyrelsimit eqquutsinneqarsimanngippata, § 25-mi aningaasartuutinut tamakkiisunut ilaannakuusunulluunniit landskarsip aningaasaatai aningaasaliissutaasut Naalakkersuisut unitsissinnaavaat.
Imm. 2.
Peqqussut una malillugu unitsitsineq innuttaasup ikiorsiissutinik pissarsinissamut pisinnaatitaaneranut sunniuteqartussaanngilaq.

 

Kapitali 11
Atortuulersitsinermi ikaarsaariarnermilu aalajangersakkat

§ 29. Inatsisartut peqqussutaat una 1. juli 2007-imi atortuulerpoq.
Imm. 2. Ikaarsaariarnermi aalajangersakkat makku aalajangersarneqarput:
1) 31. december 2008 ilangullugu inuit ukiunik 18-leereersimasut, kisiannili suli 63-inik ukioqalersimanngitsut siusinaartumik pensionisiaqarnissamut akuerineqarsinnaapput
2) 1. januar 2009 aallarnerfigalugu 31. december 2009-lu ilanngullugu inuit ukiunik 18-leereersimasut, kisianni suli 64-inik ukioqalersimanngitsut siusinaartumik pensionisiaqarnissamut akuerineqarsinnaapput
3) 1. januar 2010 aallarnerfigalugu inuit ukiunik 18-leereersimasut, kisiannili suli 65-inik ukioqalersimanngitsut siusinaartumik pensionisiaqarnissamut akuerineqarsinnaapput.
Imm. 3. Ulloq unnuarlu paaqqinnittarfinni allani najugaqarallarnermi meeqqat tapii, isertitanik nalimmassaasarneq aamma utoqqalinersitsisarneq pillugit malittarisassat, pisortat inunnik ikiorsiisarnerat pillugu Inatsisartut peqqussutaanni nr. 9, 15. april 2003-meersukkut tunngavissinneqartumik aalajangersakkat, tamanna pillugu tunngavissiineq atorlugu maleruagassanik aalajangersaanikkut imaluunniit Inatsisartut peqqussutaasigut Inatsisartulluunniit inatsisaasigut taarserneqarnissamik atorunnaarsinneqarnissamilluunniit tungaannut atuutiinnarallassapput.




Namminersornerullutik Oqartussat, ulloq 7. maj 2007




Hans Enoksen

/

Aleqa Hammond

Allakkiat