Quppernerup imai iserfigikkit
Oqaatsit toqqakkit
Ujaasinermut uterit
Allaffissornikkut najoqqutassiat
Nr. 21
22. decembari 2010
Atuuttut

Kalaallit Nunaata Isiginnaartitsisarfianut siulersuisunut atorfigivinngisamik suliaqarnermi akissarsiaqartitsineq aningaasartuuteqarnermilu ajunngitsorsiaqartitsineq pillugu Namminersorlutik Oqartussat nalunaarutaat

Isiginnaartitsisarfeqarneq pillugu Inatsisartut inatsisaanni nr. 23-imi, 18. november 2010-meersumi § 4, imm. 9 naapertorlugu aalajangersarneqarput:

 

Atorfigivinngisamik suliaqarnermi akissarsiat

§ 1.  Kalaallit Nunaata Isiginnaartitsisarfianut siulersuisut atorfigivinngisamik suliaqarnermi ukiumoortumik akissarsisassapput. Siulittaasup atorfigivinngisamik suliaqarnermi akissarsiai 30.000 kr.-iupput. Ilaasortat sinnerisa atorfigivinngisamik suliaqarnermi akissarsiaat 7.500 kr.-iupput.

§ 2.  Atorfigivinngisamik suliaqarnermi akissarsiat ukiumut aqqaneq marloriarluni qaammammut kingumoortumik tunniunneqartassapput.
Imm. 2.  Siulersuisunut ilaasortap ilaasortanngornerani ullunut tamanut siulersuisunut ilaasortap ilaasortaaffigisaanut aningaasat § 1, imm. 2-mi 3-miluunniit taaneqartut 1/365-iinik atorfigivinnagu suliaqarnermi akissarsiaqartitsisoqassaaq. Tamannattaaq siulersuisunut ilaasortap qaammammi ingerlaavartumi soraarnerani atuutissaaq.


Aningaasartuutigisanut ajunngitsorsiat

§ 3.  Aningaasartuutit, taakkununnga ilanngullugit angalanernut, nerisaqarnermut najugaqarnermullu aningaasartuutit, Kalaallit Nunaata Isiginnaartitsisarfiata sulinerani akilerneqartut Kalaallit Nunaanni Namminersorlutik Oqartussani tjenestemandinut malittarisassat qaqugukkulluunniit atuuttut naapertorlugit siulersuisunut ilaasortanut ajunngitsorsiaritinneqassapput.


Atuutilersinneqarnera

§ 4.  Nalunaarut manna 1. januar 2011-mi atuutilerpoq.




Namminersorlutik oqartussat, ulloq 16. december 2010




Mimi Karlsen

/

Lise Lennert Olsen