Pujortarnermik inerteqquteqarneq pillugu Inatsisartut inatsisaanni nr. 15-imi, 26. maj 2010-meersumi § 9, imm. 3 naapertorlugu aalajangersarneqarput:

Pillaatissinneqarsimasut tigummigallagaasullu politiit isertitsiviinittut

§ 1. Pillaatissinneqarsimasut tigummigallagaasullu, politiit isertitsiviiniittut, isertitsivimmi pujortarsinnaapput, tassunga ilanngullugu isertitsivimmi inimi ataatsimoortarfimmi, tamanna politiit isertitsiviiniittarneq pillugu malittarisassanut Politimesterimit aalajangersarneqarsimasunut qaqugukkulluunniit atuuttunut akerliunngippat.
Imm. 2. Pillaatissinneqarsimasut tigummigallagaasullu allat kiisalu sulisut eqqarsaatigalugit imm. 1 naapertorlugu pujortartarneq, piffissani pillaatissinneqarsimasut tigummigallagaasullu allat sulisulluunniit isertitsivimmi isersimanerini pisinnaassanngilaq.      
Imm. 3. Politiit pillaatissinneqarsimasunut tigummigallagaasunullu atugassamik illup iluani silamiluunniit pujortartarfiliorsinnaapput. Illup iluani pujortartarfiliortoqassappat, igalaalerneqassaaq imaluunniit silammut silaannarissarfilerneqassaaq, taamaalilluni ingerlaavartumik silaannarissaasoqarsinnaassalluni. Qulakkeerneqassaaq pillaatissinneqarsimasut tigummigallagaasullu allat kiisalu sulisut inimik pujortartarfeqarnerup kingunerisaanik pujoorfigineqannginnissaat. Inimi pujortartarfimmi pujortarneq matu matullugu pisassaaq.           
Imm. 4. Isertitsivimmi imm. 1 aamma imm. 2 naapertorlugit imaluunniit inimi pujortartarfimmi pujortartoqassappat, politiit qulakkiissavaat isertitsivimmi inimilu pujortartarfimmi akuttunngitsumik silaannarissaasoqartarnissaa.    

Pineqaatissinneqarsimasunut inissiisarfinniittut

§ 2. Pinerluuteqarsimasunik Nakkutilliisoqarfiup inissiisarfiini pineqaatissinneqarsimasut inissinneqarsimasut aalajangissavaat, namminneq iniminni pujortartoqarsinnaassanersoq. Nammineq inigisami pujortarneq matu matullugu pisassaaq.    
Imm. 2.   Imm. 1 naapertorlugu taamaallaat pujortartoqarsinnaavoq, tamanna ullormut aalajangersakkanut qaqugukkulluunniit atuuttunut inissiisarfiup pisortaanit aalajangersarneqarsimasunut akerliunngippat.
Imm. 3.  Sulisut eqqarsaatigalugit inissiisarfimmiittunut nammineq inigisami pujortarneq piffissani sulisut isersimanerini akuerisaanngilaq. 
Imm. 4.  Pinerluuteqarsimasunik Nakkutilliisoqarfik pinerluuteqarsimasunut inissiisarfiimmiittunut atugassamik illup iluani silamiluunniit pujortartarfiliorsinnaavoq. Illup iluani pujortartarfiliortoqassappat, igalaalerneqassaaq imaluunniit silammut silaannarissarfilerneqassaaq, taamaalilluni ingerlaavartumik silaannarissaasoqarsinnaassalluni. Qulakkeerneqassaaq pineqaatissinneqarsimasut allat kiisalu sulisut inimik pujortartarfeqarnerup kingunerisaanik pujoorfigineqannginnissaat. Inimi pujortartarfimmi pujortarneq matu matullugu pisassaaq.
Imm. 5.   Nammineq inigisami imm. 1-3 naapertorlugit, inimiluunniit pujortartarfiusumi, pujortartoqassappat, Pinerluuteqarsimasunik Nakkutilliisoqarfiup qulakkiissavaa nammineq inigisami inimiluunniit pujortartarfiusumi akuttunngitsumik silaannarissaasoqartarnissaa.

Eqqarsartaatsimikkut nappaatillit napparsimmavinni unitsinneqarsimasut mattussaasut

§ 3.  Eqqarsartaatsimikkut nappaatillit napparsimmavinni unitsinneqarsimasut mattussaasut aneerasaartarfimmi igalaalersukkami pujortartarfissatut aaqqissuussaasumi pujortarsinnaapput, tamanna sulisut malittarisassaannut akerliunngippat. Aneerasaartarfimmi pujortarneq matu matullugu pisassaaq. Qulakkeerneqassaaq eqqarsartaatsimikkut nappaatillit allat mattussaasut kiisalu sulisut aneerasaartarfiup pujortartarfiunerata kingunerisaanik pujoorfigineqannginnissaat.
Imm. 2.  Pisuni immikkut illuinnartuni sulisut aalajangissavaat eqqarsartaatsimikkut nappaatillit mattussaasut namminneq inigisaminni pujortarsinnaanersut. Nammineq inigisami pujortarneq sapinngisaq naapertorlugu matu matullugu pisassaaq.
Imm. 3.  Sulisut eqqarsaatigalugit eqqarsartaatsimikkut nappaatillit mattussaasut namminneq inigisaminni pujortarsinnaatitaanngillat piffissani sulisut isersimanerini. Eqqarsartaatsimikkut nappaatillit mattussaasut allat kiisalu sulisut eqqarsaatigalugit aneerasaartarfimmi pujortartoqassanngilaq, piffissani eqqarsartaatsimikkut nappaatillit mattussaasut allat imaluunniit sulisut aneerasaartarfimmiinneranni.
Imm. 4. Aneerasaartarfimmi imaluunniit nammineq inigisami imm. 1-3 naapertorlugit pujortartoqassappat, sulisut qulakkiissavaat aneerasaartarfimmi aamma nammineq inigisami akuttunngitsumik silaannarissaasoqartarnissaa.

Atuutilerfia

§ 4.  Nalunaarut manna atuutilerpoq ulloq  1.oktober 2010.

Namminersorlutik Oqartussat, ulloq 29. september 2010

Agathe Fontain

/

Ann Birkekær Kjeldsen