Efterskolit pillugit Inatsisartut inatsisaanni nr. 13-imi, 5. december 2008-meersumi § 20, imm. 2 naapertorlugu makku aalajangersarneqarput:

Tapiissutisinissamut piumasaqaatit

§ 1. Danmarkimi efterskolimiinnermut tapiissutit Naalakkersuisunit aningaasanut inatsimmi aningaasaliissutigineqartut iluannit aningaasaliissutigineqartarput.
Imm. 2. Tapiiffigineqarnissamut piumasaqaatit makku naammassineqarsimassapput
1) ilinniartoq aamma ilinniartumut angajoqqaatut oqartussaatitaasut efterskolimiinnerup aallartinnerani Kalaallit Nunaanni najugaqavissuussapput efterskolimiinnerullu aallartinnera sioqqullugu sivikinnerpaamik ukiumi ataatsimi Kalaallit Nunaanni najugaqavissuusimassallutik. Kalaallit Nunaata avataani najugaqarnertut naatsorsuutigineqanngillat, taamaallaat ilinniarnissaq isumaginninnerluunniit pissutigalugit Kalaallillu Nunaanni oqartussat peqataaffigisaannik najugaqarnerit,
2) efterskolini ilinniartut ukiuni arfineq-pingasuni atuarsimassapput imaluunniit 14-inik ukioqalereersimassallutik, 18-inillu ukioqalereersimassanatik,
3) ilinniartup efterskoli atualerfissaa Danmarkimi ilinniartitaanermut ministerimit akuerisaassaaq,
4) ilinniartoq efterskolimiinnermini angajoqqaatut oqartussaatitaasut toqqagaanik Danmarkimi ilaqutariinnut atassuteqassaaq, tak. § 2,
5) ilinniartup efterskolimiinnermini pissarsiarisassaatut naatsorsuutigisat pillugit atuarfimmit oqaaseqaateqartoqareersimassaaq, tak. § 3 aamma
6) tapiiffigineqarnissamut qinnuteqaat piffissaq eqqorlugu tunniunneqarsimassaaq, tak. § 9.
Imm. 3. Oqaatsinik Pikkorissarfiup immikkut ittunik pissutissaqartillugu imm. 2, nr. 1, 2, aamma 6 saneqqussinnaavai.
Imm. 4. Efterskolimiinneq maanaannaq taamaatinneqarpat, imaluunniit ilinniartoq efterskolimiilernissap aallartinnerani takkutinngitsoorpat, tapiissuteqartarneq efterskolip taamaalisoqarneratigut maleruagassatut aalajangersagai naapertorlugit unitsinneqassaaq.
Imm. 5. Ilinniartitaanermut Naalakkersuisoqarfik tapiissutit utertinneqarnissaannik piumasaqaateqarsinnaavoq tapiissutit siunertanut akuersissutigineqartunit allaanerusunut atorneqarsimappata.

§ 2. Angajoqqaatut oqartussaatitaasut ilaqutariinnik atassuteqarfissanik toqqaasimanerat angajoqqaatut oqartussaatitaasut aamma ilaqutariinnik atassuteqarfigineqartussanit atsiorneqartumik nalunaaruteqarnikkut uppernarsarneqarsimassaaq. Ilinniartitaanermut Naalakkersuisoqarfimmit tamatumunnga atugassanngorlugu nalunaaruteqarnissamut immersugassiaq atorneqassaaq.

§ 3. Tapiissutinik qinnuteqaatit nalilernissaannut atugassatut atuarfiup qinnuteqaammut ilanngutissavai, ilinniartup Danmarkimi efterskolimiinnerani pissarsiarisassaanut naatsorsuutigisat pillugit oqaaseqaat. Oqaaseqaammut ilaassaaq, qinnuteqartup ilinniakkamik aallartitsinissaminut periarfissaminik pitsanngorsaanissaata qanoq ilimanartigineranik isummerneq.
Imm. 2. Ilinniartitaanermut Naalakkersuisoqarfiup immersugassiaa atorlugu oqaaseqaatiliortoqassaaq.

§ 4. Oqaatsinik Pikkorissarfiup qinnuteqaatinik tamarmiusunik ataatsimut naliliineq tunngavigalugu aalajangissavaa qinnuteqaatit sorliit akuerineqassanersut. Naliliinermi pingaartinneqassapput qinnuteqartup Danmarkimi efterskolerumanerminut tunngavilersuutai aamma ilinniartup efterskolimiinnermini pissarsiariumaagaatut ilimagisaasut pillugit atuarfiup oqaaseqaataa, tak. § 3. Toqqaaniarnermi aammattaaq tunngavigineqarsinnaavoq tapiissutinut aningaasaliissutit tamarmiusut nunap immikkoortuinut siammaallugit agguaannissaat.

Atuarfissamik misissuiartorluni angalaneq

§ 5. Oqaatsinik Pikkorissarfiup Danmarkimi efterskolimi ilinnialernissaq ukiumik ataatsimik sioqqullugu ilinniartumut timikkut tarnikkulluunniit innarluutilimmut, taassumalu atassuteqarfigisartagaanut ilaqutaasaluunniit ilaannut ataatsimut, ilinniartup ajornartorsiutigisaanut immikkut ittunut naleqqunnerpaamik atuarfissamik misissuiartornermut angalaneq akuersissutigisinnaavaa.
Imm. 2.Misissuiartorluni angalanermut ilaassapput ilaqutariinnut attaveqaataasinnaasunut pulaarnerit, ilinniartup efterskolernerani suleqatigiinnissamut ataatsimoorluni ilimagisaasut qulaajarnissaat siunertaralugu.
Imm. 3. Misissuiartorluniangalanermut tapiissutit atorneqartarput Danmarkimut Danmarkiminngaanniillu angallanneqarnermut, kiisalu tikeraarnerni aqqutissat akikinnerpaat atorlugit angallassinernut, taamaattoq ilinniartumut timikkut tarnikkulluunniit innarluutilimmut ataatsimut taassumalu angalaqataanut tak. imm. 1, annerpaamik kr. 30.000.

Tapiissutit annertussusii il.il.

§ 6. Efterskolimiinnermut atasumik aningaasartuutinut isertitat apeqqutaatinnagit makkununnga tapiissuteqartoqarsinnaavoq
1) ilinniarnerup aallartilerneranut ilinniarunnaarnermullu atasumik Kalaallit Nunaata Danmarkillu akornanni siumut utimullu ilinniartup angalaneranut,
2) ilinniartup angalanerminut atasumik unnuisariaqarneranut,
3) ilinniartup angalanerani pisariaqartitsineq naapertorlugu nerisaqarneranut, aamma
4) qanigisat napparsimarulunnerannut qanigisanilluunniit toqusoqarneranut atasumik Kalaallit Nunaannut siumut utimullu ilinniartup angalaneranut.
Imm. 2. Qanigisatut, tak. imm. 1, nr. 4, paasineqassapput qatanngutit, aapparisaq, qitornat, angajoqqaat aamma aanaa/aataakkut. Immikkut ittumik pisoqartillugu Oqaatsinik Pikkorissarfik immikkut akuersissuteqarsinnaavoq.
Imm. 3. Kalaallit Danmarkimi efterskolertut tamarmik ilinniarnissamik ilitsersornerinut aamma ilinniartut tapiissutisinissamik akuerineqartut Danmarkimullu angalanissaminnut Oqaatsinik Pikkorissarfimmit akiliunneqartut apuunnerminni isumagineqarnissaannut aningaasartuutit Ilinniartitaanermut Naalakkersuisoqarfiup akilissavai.
Imm. 4. Ilinniartut, efterskolip ammanerata avataani ilaqutariittut attaveqaataasartussatut nalunaarutigineqarsimasunit allanilluunniit angajoqqaatut oqartussaasut pisinnaatitaannit isumagineqanngitsut, inissikkallarnissaannut aningaasartuutit Ilinniartitaanermut Naalakkersuisoqarfiup akilerallarsinnaavai. Aningaasartuutit tamatuma kingorna angajoqqaatut oqartussaasunut akiligassanngortinneqassapput.

§ 7. Efterskolimiinnermut angajoqqaat akiligassaannut annikilliliinissamik tapiisoqartarpoq.
Imm. 2. Tapiissutit annertussusissaat Inatsisartut aningaasanut inatsisaanni ukiut tamaasa aalajangerneqartarpoq.
Imm. 3. Angajoqqaat timikkut tarnikkulluunniit innarluutilimmik efterskolimi ilinniartuutillit akiliutissaat aalajangerneqassaaq, aningaasanut inatsimmi tapiissutissatut qaffasinnerpaatut taaneqartoq aallaavigalugu.
Imm. 4. Angajoqqaat, arlalinnik marlulissanilluunniit ataatsikkut imaluunniit ukiuni atuarfiusuni maliinnartuni efterskolertuutillit, ilinniartup efterskolimiittup aappaanut 50 %-imik annertusisamik tapiissutisisinnaapput.
Imm. 5. Tapiissutit efterskolimut atuarfiusussamut tunniunneqassapput.

Qinnuteqaateqarnermi periaatsit

§ 8. Angajoqqaatut oqartussaatitaasut namminneerlutik ilinniartup efterskolernissaa qinnutigissavaat.
Imm. 2. Tapiiffigineqarnissamik qinnuteqarnermi qinnuteqarfissiaq Ilinniartitaarnermut Naalakkersuisoqarfimmit suliarineqarsimasoq atorneqassaaq. Qinnuteqaatip ilaatigut imarissavaa ilinniartup Danmarkimi efterskolernissaanut tunngavilersuut.
Imm. 3. Qinnuteqarfissiaq kommunimi ilinniartup atuarfigisaani atuartitaanermut ingerlatsivimmit tunniunneqassaaq.
Imm. 4. Qinnuteqartup tapiiffigineqarnissamik qinnuteqaat atuartitaanermut ingerlatsivimmut nassiutissavaa, tassunga ilanngullugit ilinniartup ilinniartunngortussatut akuerisaaneranut efterskolimit uppernarsaat, kiisalu ilaqutariit atassuteqarfiusussat nalunaarutaat atsiugaq, tak. § 2.
Imm. 5. Atuartitaanermut ingerlatsiviup tapiiffigineqarnissamik qinnuteqaat, ilanngussat imm. 4-mi taaneqartut, atuarfiup ilinniartoq pillugu oqaaseqaataa, tak. § 3, aamma misilitsissimanermut uppernarsaatit imaluunniit karakterit kingulliit uppernarsaataasa assilineri Oqaatsinik Pikkorissarfimmut nassiutissavai.
Imm. 6. Atuartitaanermut ingerlatsiviup atuarfiup ilinniartoq pillugu oqaaseqaataata assilinera angajoqqaatut oqartussaatitaasunut nassiutissavaa.

§ 9. Qinnuteqaat efterskolimiinnissap ukioq aallartiffissaa sioqqullugu kingusinnerpaamik 1. december atuartitaanermut ingerlatsivimmit tiguneqareersimassaaq.
Imm. 2. Qinnuteqaat ukiumi efterskolimiinnissap aallartiffissaani kingusinnerpaamik januarip 15-iani Oqaatsinik Pikkorissarfimmit tiguneqareersimassaaq.

§ 10. Oqaatsinik Pikkorissarfiup tapiissutit akuersissutigineqarsimanersut ukiumi efterskolimiinnissap aallartiffissaani kingusinnerpaamik martsip 15-iani qinnuteqartunut nalunaarutigissavai.
Imm. 2. Oqaatsinik Pikkorissarfiup tapiissutit tunniunneqartut pillugit efterskolimut nalunaaruteqassaaq, § 3-milu taaneqartoq oqaaseqaat nassiutissallugu.
Imm. 3. Oqaatsinik Pikkorissarfik atuartitaanermut ingerlatsivimmut qinnuteqaatit ingerlatsiviup nassiussaasa aalajangiiffigineri pillugit nalunaaruteqassaaq.

§ 11. Ilinniartup angalanissaata piareersarnissaaatuartitaanermut ingerlatsiviup isumagissavaa. Oqaatsinik Pikkorissarfik ilinniartut angalanissaannik aaqqissuisuusimappat najukkami atuarfimmik ingerlatsivimmut bilitsit kingusinnerpaamik majip 15-iani nassiunneqassapput. Oqaatsinik Pikkorissarfik ilinniartut taakku Danmarkimut apuunnerminni isumagineqarnissaannik ataqatigiissaarisuussaaq.

Efterskolimiinnermik maanaannaq taamaatitsineq

§ 12. Efterskolimi ilinniartup Danmarkimi efterskolernini maanaannaq unitsikkumalissappagu, angerlarnissaanut aningaasaliisoqartinnagu Kalaallit Illuata ilinniartumik oqaloqateqarnissaq isumagissavaa.
Imm. 2. Oqaloqatigiinneq pissaaq ilinniartup efterskoliani, angerlarnissamik kissaateqarnerup nalunaarutigineqarnerata kinguninngua. Oqaloqatigiinnermi peqataassapput Kalaallit Illuanni sulisoq ataaseq, efterskolimi sulisoq ataaseq, ilinniartoq, ilinniartorlu 18-it inorlugit ukioqarpat angajoqqaavi imaluunniit ilaqutariit atassuteqarfigisai.

Naammagittaalliorsinnaaneq

§ 13. Tapiissutit pillugit aalajangiinernut naammagittaalliutit Ilinniartitaanermut Naalakkersuisoqarfimmut suliakkiissutigineqarsinnaapput. Naammagittaalliutit aalajangiinerup kingorna kingusinnerpaamik sapaatip-akunnerisa sisamat qaangiunneranni Ilinniartitaanermut Naalakkersuisoqarfimmit tiguneqareersimassapput.
Imm. 2. Ilinniartut pillugit atuarfiit oqaaseqaataat, tak. § 3, pillugit naammagittaalliuutit Ilinniartitaanermut Naalakkersuisoqarfimmut suliakkiissutigineqarsinnaanngillat.

Atulerfissaa atorunnaarsitsinerlu pillugit aalajangersakkat.

§ 14. Nalunaarut 1. september 2009-mi atuutilissaaq, ukiumiillu atuarfiusumit 2009/2010-miit sunniuteqalissalluni.
Imm. 2. Tamatuma peqatigisaanik Danmarkimi efterskolimiinermut tapissuteqartarneq pillugu Namminersornerullutik Oqartussat nalunaarutaat nr. 26, 15. januar 2004-meersoq atorunnaarsinneqarpoq.

Namminersorlutik Oqartussat, ulloq 3. september 2009.

Mimi Karlsen

/

Lise Lennert Olsen