Pinngortitamik illersuineq pillugu Inatsisartut inatsisaanni nr. 29-mi, 18. decembari 2003-meersumi § 58 naapertorlugu aalajangersarneqarput:

§ 1. Pinngortitap illersorneqarnera pillugu Naammagittaalliuuteqartarfik pilersinneqassaaq, tassunga pinngortitamik illersuineq pillugu Inatsisartut inatsisaat nr. 29, 18. decembari 2003-meersoq imaluunniit maleruagassat Inatsisartut inatsisaat naapertorlugu aalajangersarneqarsimasut naapertorlugit aalajangiinerit naammagittaalliuutigineqarsinnaassallutik.
Imm. 2. Naalakkersuisut Pinngortitap illersorneqarnera pillugu Naammagittaalliuuteqartarfimmut allattoqarfeqarnikkut sullississapput.

§ 2. Pinngortitap illersorneqarnera pillugu Naammagittaalliuuteqartarfik pingasunik ilaasortaqarpoq.
Imm. 2. Naalakkersuisut Pinngortitap illersorneqarnera pillugu Naammagittaalliuuteqartarfimmut siulittaasumik ilaasortanillu marlunnik, taakkualu sinniisussaannik toqqaassapput. Kalaallit Nunaanni Kommuneqarfiit Kattuffiannit inassuteqarnikkut ilaasortaq ataaseq toqqarneqassaaq.
Imm. 3. Pinngortitap illersorneqarnera pillugu Naammagittaalliuuteqartarfimmi ilaasortat Naalakkersuisunut ilaasortaassanngillat.
Imm. 4. Naalakkersuisut inunnik Avatangiisit illersorneqarnissaat pillugu Naammagittaalliuuteqartarfimmi, avatangiisit innarlitsaaliorneqarnissaannik Inatsisartut peqqussutaat nr. 12, 22. decembari 1988-imeersoq, kingusinnerusukkut allannguuteqartinneqartoq naapertorlugu pilersinneqarsimasumi ilaasortatut toqqarneqarsimasunik, Pinngortitap illersorneqarnera pillugu Naammagittaalliuuteqartarfimmi ilaasortaasussanik toqqaasinnaapput.
Imm. 5. Pinngortitap illersorneqarnera pillugu Naammagittaalliuuteqartarfiup piffissami atuuffiata Inatsisartut qinigaaffiat malippaa.
Imm. 6. Sulianut immikkut ilisimasalinnik aalajangeeqataasinnaanngitsunik Pinngortitap illersorneqarnera pillugu Naammagittaalliuuteqartarfimmi peqataatitsisoqarsinnaavoq.
Imm. 7. Inatsisartuni Naalakkersuisunilu il. il. ilaasortat aningaasarsiaqartitaanerat il. il. pillugit Inatsisartut inatsisaanni nr. 22, 18. decembari 2003-meersumi aalajangersakkat naapertorlugit Pinngortitap illersorneqarnera pillugu Naammagittaalliuuteqartarfimmi ilaasortat aningaasarsiaqartinneqassapput.

§ 3. Pinngortitap illersorneqarnera pillugu Naammagittaalliuuteqartarfiup suleriaasissani nammineerluni aalajangersaavigissavaa, tassani allassimassalluni minnerpaamik ukiumut ataasiarluni ataatsimiittoqartassasoq.

§ 4. Naammagittaalliuuteqartarfiup aalajangigaasa tamanut saqqummiunneqarnissaat, taamaattoqassappallu tamanut saqqummiussinerup qanoq pinissaa Pinngortitap illersorneqarnera pillugu Naammagittaalliuuteqartarfiup aalajangiiffigissavaa.

§ 5. Naammagittaalliuuteqarsinnaasut, naammagittaalliuuteqarnissamut killissarititaasoq, naammagittaalliuutip kinguartitsinermik sunniuteqarnissaa kiisalu eqqartuussivitsigut suliassanngortitsinerit pillugit aalajangersakkatPinngortitamik illersuineq pillugu Inatsisartut inatsisaanni nr. 29, 18. decembari 2003-meersumi aalajangersagaapput.

§ 6. Nalunaarut atuutilerpoq ulloq 17. marts 2009.

Namminersornerullutik Oqartussat, 12. februar 2009

Kim Kielsen

/

Steffen Ulrich-Lynge