Oqaatsinik Pikkorissarfik pillugu Inatsisartut inatsisaanni nr. 14-imi, ulloq 6. november 1997-imeersumi § 2, imm. 4, aamma § 3, imm. 4, aamma § 7 naapertorlugit aalajangersarneqarput:

§ 1. Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Oqaatsinik Pikkorissarfiup siulersuisuinut ilaasortassanik tallimanik inuussutissarsiorneq aqqutigalugu, tamatumunnga ilanngullugit aatsitassarsiornermut, takornariartitsinermut niuernermullu attuumassuteqartut, oqaatsit ataatsit amerlanerusulluunniit iluanni ilisimasalinnik paasisimasaqartunillu toqqaasassaaq.
Imm. 2. Siulersuisunut ilaasortat imm. 1-imi taaneqartut saniatigut Oqaatsinik Pikkorissarfimmi ilinniartitsisut siulersuisunut ilaasortassamik ataatsimik aalajangersimasumik ilinniartitsisutut atorfillit akornannit toqqaassapput.

§ 2. Siulersuisut nakkutigissavaat Oqaatsinik Pikkorissarfiup ingerlatai anguniagassatut najoqqutassatullu aalajangersarsimasap iluanni ingerlanneqarnersut.
Imm. 2. Siulersuisut pisussaapput Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq pissutsinik pingaarutilinnik Oqaatsinik Pikkorissarfiup sulineranut sunniuteqarsinnaasunik ilisimatittuartassallugu.

§ 3. Siulersuisut sulinerannut atasumik angalanernut najugaqarnermullu aningaasartuutit Oqaatsinik Pikkorissarfimmit akilerneqartassapput.

§ 4. Oqaatsinik Pikkorissarfik siulersuisunut inassuteqartassaaq makku pillugit
1) ilinniartitaanerni pikkorissaanernilu anguniagassat imarisassallu,
2) Oqaatsinik Pikkorissarfiup ingerlataani atuartitsinermut najoqqutassat, aamma
3) ilinniartitaanernik pikkorissaanernillu neqeroorutinik nutaanik aallartitsinissaq.

§ 5. Siulersuisut killiliussatut najoqqutassiaat tunngavigalugit Oqaatsinik Pikkorissarfiup suliassat makku isumagissavai:
1) Ilinniartitaanernut pikkorissartitsinissanullu nutaanut siunnersuusiorneq aamma i-linniartitaanernik pikkorissartitsinernillu ingerlanneqareersunik nutarterisarneq.
2) Ilinniartitaanerit pikkorissartitsinerillu imarisassaannik aaqqissuussineq, tamatumunnga ilanngullugit ilinniarnissamut pilersaarusiorneq, ilinniartitsinermut ilitsersuusiorneq atortussiornerlu.
3) Kalaallit Nunaata avataani oqaatsinut atuarfimmiinnernik aqutsineq, tamatumunnga ilanngullugit pikkorissartunik ilinniarniartunillu ilitsersuineq.
4) Inunnik ataasiakkaanik, atorfeqarfinnik suliffinnillu Kalaallit Nunaanni taamatullu Kalaallit Nunaata avataani oqaatsinik pikkorissarnissamut oqaatsinillu ilinniartinne-qarnissanut periarfissat pillugit ilitsersuineq.

§ 6. Oqaatsinik Pikkorissarfik ilinniartitsinermut tunngasutigut siunnersuisoqatigiinnik pilersitsissaaq, tassanilu ilaasortaassapput ilinniartitsinermi suleqataasut tamarmik aamma siunnersorti Kalaallit Nunaata avataani oqaatsinut atuarfimmiittoqartarnernut tunngasunik suliaqartoq.
Imm. 2. Ilinniartitsinermut tunngasutigut siunnersuisoqatigiinni ilaasortat ataatsimiinnerni pinngitsooratik peqataasartussaapput.

§ 7. Ilinniartitsinermut tunngasutigut siunnersuisoqatigiit suliassat pikkorissarfimmi pisortamit siulersuisunillu saqqummiunneqartut tamaasa pillugit oqaaseqaateqartassaaq.
Imm. 2. Ilinniartitsinermut tunngasutigut siunnersuisoqatigiit Oqaatsinik Pikkorissarfik pillugu apeqqutini ilinniartitsinermut, aqutsinermut aningaasanullu tunngasuni pingaarutilinni tamani ilanngunneqartarsinnaavoq.

§ 8. Ilinniartitsinermut tunngasutigut siunnersuisoqatigiit suleriaasissani, tamatumunnga ilanngullugit ilinniartitsinermut tunngasutigut siunnersuisoqatigiit siulersorneqarnerat pillugu aalajangersakkat, nammineq aalajangersassavai. Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik suleriaasissaq pillugu ilisimatinneqartassaaq.

§ 9. Nalunaarut 1. oktober 2005 atuutilissaaq. Tassunga atatillugu Oqaatsinik Pikkorissarfiup siulersorneqarnera pillugu Namminersornerullutik Oqartussat nalunaarutaat nr. 5, 16. februar 1998-imeersoq atorunnaarpoq.

Namminersornerullutik Oqartussat, ulloq 19. august 2005

Henriette Rasmussen

/

Claus Kleemann