§ 1.

Inissianik attartorneq pillugu inatsisartut peqqussutaanni nr. 5, 31. maj 2001-imeersumi inatsisartut peqqussutaatigut nr. 18, 12. november 2001-imeersukkut, aamma nr. 2, 21. maj 2002-meersukkut allanngortinneqartumi makku allannguutigitinneqassapput:

1. Kapitali 1 ima oqaasertaqassaaq:

"Kapitali 1.
Atuuffissaa kiisalu innersuussisarnermi maleruagassat

§ 1. Peqqussummi pineqarpoq illup illulluunniit ilaata ukioq tamaat najugassatut attartorneqarnera, attartortumit allamut attartortinneqarnera ilanngullugu, apeqqutaatinnagu ineqarnermut akiliut aningaasaanngitsunik allatut akilerneqarnersoq, aammalu apeqqutaatinnagu illu ilaannakortumik allatut inigisassaanngitsutut attartortinneqarnersoq.
Imm. 2. Peqqussut atuutinngilaq attartornernut inatsisit immikkut ittut malillugit aqunneqartunut, imaluunniit inigisanut Naalakkersuisunit Namminersornerullutik Oqartussat inissiaataannit attartortittakkanit immikkoortinneqarsimasunut.
Imm. 3. Peqqussut atuutinngilaq Namminersornerullutik Oqartussat kommunilluunniit illuutaanni sulisunik inissiinernut allatulluunniit utaqqiisaasumik inissiinernut, inissiinermut akiliisitsisoqarpat akiliisitsisoqanngippalluunniit apeqqutaatinnagu.
Imm. 4. Peqqussummi taamaallaat pineqarput attartortitsinerit inunnut ataasiakkaanut tunngasut.
Imm. 5. Namminersornerullutik Oqartussat imaluunniit kommuni siunertanut aalajangersimasunut inissianik immikkoortitsisinnaapput."

§ 2. Attartornermut isumaqatigiissuteqartoqassaaq immersugassani kalaallisut qallunaatullu naqitani Naalakkersuisunit akuerisaasuni.
Imm. 2. Allakkatigut attartornermut isumaqatigiissummi aalajangersakkat, peqqussummi taaneqarsimasunit annertunerusunik attartortumut pisussaaffiliisut imaluunniit annikinnerusunik attartortumut pisinnaatitaaffiliisut atuutissagunik erseqqissarneqarsimassapput.
Imm. 3. Imm. 1-imi 2-milu aalajangersakkat isumaqatigiissuteqarnikkut attartortumut ajoqutaasumik sanioqqunneqarsinnaanngillat.

§ 3. Illuni Namminersornerullutik Oqartussanit kommuninilluunniit pigineqartuni inissiat inigineqanngitsut tulleriiaarinerni taaneqartunut innersuunneqartassapput:
1) Namminersornerullutik Oqartussat kommunilluunniit iluarsaanerinut isaterinernulluunniit atatillugu inissaqartitsisarnissamik pisariaqartitsinerat naammassiniarlugu inissiat, takuuk § 48,
2) inissiat attartortut inigisaminnik piginneqatigiilluni pigisatulluunniit inissiatut tiguserusun-ngitsut attartugaat, takuuk § 7,
3) inissiat, siusinnerusukkut inissaqartitsinissamik qularnaveeqqusiisoqarsimanerata naammassineqarnissaanut innersuunneqartussat, tak. § 39, imm. 3,
4) inissiat aapparisap toqukkut qimagaasup inigigisaanit suliffimmut aalajangersimasumut inniminnigaasumit qimatsineranut atatillugu innersuussutigineqartussat, tak. § 43, imm. 2,
5) inissiat aapparisap toqukkut qimagaasup inissiamit innarluutilinnut inissiatut immikkut aaqqissugaallunilu tunniussaasimasumit nuunneranut atatillugu innersuussutigineqartussat, tak. § 43.imm. 3,
6) inissiat siunertanut aalajangersimasunut inniminnigaasut, takuuk § 1, imm. 5,
7) sullissiveqarfinni inissaqartitsisuni sulisunut inissiat, takuuk § 4,
8) kommunip isumaginninnikkut ajornartorsiuteqartunut inissaqartitsinissamik pisariaqartitaa-nut inissiat, takuuk § 6,
9) nuunnissamik kissaateqartunut inissiat, tassunga ilanngullugit paarlaasseqatigiinnerit, aamma
10) nalinginnaasumik inissarsiortunut utaqqisut allattorsimaffianniittunut inissiat.
Imm. 2. Immikkoortoq 1-imi allassimasut apeqqutaatinnagit inissiat inoqanngitsut inissarsiortunut toqqaannartumik innersuunneqartassapput, takuuk imm. 6 aamma 7:
1) inissiat siunertanut aalajangersimasunut inniminnigaasut,
2) inissiat atorfinnut aalajangersimasunut inniminnerneqarsimasut, aamma
3) inissiat sulisunut inissiatut atorneqarsimasut.
Imm. 3. Sulisunut inissaqartinneqarsinnaallutik atorfinitsinneqarsimasunut inissianik Naalakkersuisut innersuussisinnaapput, takuuk imm.1, nr. 7. Inissianut sulisunut inigisassatut innersuussutigineqarsimasunut ukiumoortumik utaqqisut allattorsimaffianniiginnarniarluni uppernarsaaqqittarnernut atatillugu akileeqqusisoqartarpoq. Tamatuma saniatigut Namminersornerullutik Oqartussat sulisunut inissiaataasa allaffissornikkut aqunneqarneranni aningaasartuutiviusut matussuserneqarnissaannut allaffissornermut ukiumoortumik akiliuteqaqqusisoqartarpoq. Naalakkersuisut Namminersornerullutik Oqartussat sulisunut inissiaataasa allaffissornikkut aqunneqarnerat ingerlanneqarnerallu pillugit malittarisassiorsinnaapput, tassunga ilanngullugit ukiumoortumik akiliutigitinneqartartup angissusissaanik kiisalu allaffissornikkut aqutsinermut akiliutigitinneqartartup angissusissaanik aalajangersaaneq.
Imm. 4. Imm. 1, nr. 1 - 5 malillugu inissiat innersuunneqartut naleqquttumik angissuseqartinniarneqassapput pitsaassuseqartinniarneqassallutillu, ineqarnermullu aningaasartuutit tamarmiusut sapinngisamik inissiami qimatamisut annertussuseqartinniarneqassallutik.
Imm. 5. Naalakkersuisut kommunikkuutaartumik kommunit ataasiakkaat isumaqatiginiareerlugit inissianut siunertat assigiinngitsut akunnerminni imminnut agguaassinermi pissusissaat aalajangersarsinnaavaat.
Imm. 6. Utaqqisut allattorsimaffiannut allatsinnermut atatillugu aamma ukiumoortumik utaqqisut allattorsimaffianniiginnarniarluni uppernarsaaqqittarnernut atatillugu akiliutit akileqquneqartarput. Innersuussisarneq aamma attartortitsisarneq, kiisalu utaqqisut allattorsimaffiinik allaffissornikkut aqutsineq, akiliutit akileqquneqartarnerat annertussusissaallu pillugit Naalakkersuisut malittarisassiorsinnaapput.

§ 4. Namminersornerullutik Oqartussat sulisunut inissiaataat immikkoortunut sisamanut agguataarsimapput imalu tulleriiaarnilerlugit innersuussutigineqartarlutik:
1) Naalakkersuisunut ilaasortanut Naalakkersuisoqarfinnilu pisortanut inissiat,
2) Namminersornerullutik Oqartussat qitiusumik allaffeqarfianni immikkoortortaqarfinni pisortanut assigisaannullu akissaateqarfik 37 naapertorlugu taannaluunniit qulaallugu akissaateqartinneqartunut inissiat,
3) Namminersornerullutik Oqartussat qitiusumik allaffeqarfianni allaffiit pisortaannut akissaateqarfik 36 naapertorlugu taannaluunniit qulaallugu akissaateqartinneqartunut inissiat,
4) Namminersornerullutik Oqartussat qitiusumik allaffeqarfianni sullissiveqarfinni suliffeqarfinnilu tassunga atasuni kiisalu sullissiveqarfinni suliffeqarfinnilu inissaqartinneqarsinnaatitaasunut sulisunut allanut inissiat.
Imm. 2. Inissianik imm. 1, nr. 1-imi taaneqartunik innersuussisussaanerup naammassineqarnissaanut Namminersornerullutik Oqartussat inissianik arlaqartunik inniminniisimapput. Inissianik imm. 1, nr. 2-mi sulisunut taaneqartunut inissianik innersuussisussaanerup naammassineqarnissaanut Namminersornerullutik Oqartussat inissianik arlaqartunik inniminniisinnaapput.
Imm. 3. Sulisunut Inatsisartuni taakkualu suliffeqarfiutaanni inissaqartinneqarlutik atorfinitsinneqarsimasunut inissiat, kiisalu inissiat Inatsisartunut atugassanngortitat Naalakkersuisut Inatsisartullu akornanni isumaqatigiissuteqartoqarneratigut innersuunneqartassapput.
Imm. 4. Sulisunut Naalagaaffiup nunatsinni sinniisoqarfianit taassumalu suliffeqarfiutaani inissaqartinneqarlutik atorfinitsinneqarsimasunut inissiat Naalakkersuisut naalagaaffiullu sinniisoqarfiata akornanni isumaqatigiissuteqartoqarneratigut innersuunneqartassapput.
Imm. 5. Sulisunut sullissiveqarfinni suliffeqarfinnilu allani inissiaatilinni inissaqartinneqarlutik atorfinitsinneqarsimasunut inissianik innersuussisarneq pillugu Naalakkersuisut malittarisassiorsinnaapput.
Imm. 6. Sulisunut inissaqartinneqarlutik atorfinitsinneqarsimasunut, takuuk imm. 1, nr. 2, 3 aamma 4, imm. 3 aamma imm. 5, makku atuupput:
1) Sulisup pineqartup isumaqatigiissutaani ersarissumik allassimanngippat sulisoq inissiamik assersuutigalugu angissutsimigut inissisimanermigulluunniit immikkut ittumik inissaqartinneqarsinnaatitaasoq, taava sulisoq sulisunut inissiamik innersuunneqarsinnaavoq,
2) sulisoq sulisunut inissiamik innersuunneqarluni akuersiumanngippat inissiamik allamik innersuunneqarsinnaajunnaassaaq taamaattumillu inissiamut utaqqisut allattorsimaffiannit peerneqassalluni allatseqqissinnaajunnaassallunilu
3) sulisoq utaqqiisaasumik ineqartinneqarallartoq sulisunut inissiamik innersuunneqarluni akuersiumanngippat utaqqiisaasumik ineqarnermi ajunngitsorsiassanik tunineqaqqissinnaajunnaassaaq imaluunniit sulisitsisup akiligaanik ineqartinneqarallarsinnaajunnaassalluni taamaattumillu aamma siunissami ineqartinneqarallarnissani nammineq akilissallugu, aamma
4) sulisoq paarsinerlunnini pissutigalugu sulisunut inissiamit anisinneqartoq inissiamik allamik innersuunneqarsinnaajunnaassaaq.

§ 5. Inissianik § 3, imm. 1-imi taaneqartunik innersuussinermi inoqutigiinni inuit amerlassusaannit inimik ataatsimik amerlanerusunik innersuussisoqarsinnaavoq, taammattorli takuuk imm. 2.
Imm. 2. Inissianik § 3, imm. 1-imi nr. 4-mi 7-imilu taaneqartunik piniarnermi taamaallaat inissiat inoqutigiinni inuit amerlassusaannit ataasiinnarmik amerlanerusunik initallit innersuunneqarsinnaapput, utaqqinerup sivisussusissaa inissiamik inoqutigiinni inuit amerlaqataannik initalimmik utaqqinermit qaammatit pingasut sinnerlugit sivisunerussangatinneqanngippat.
Imm. 3. Sulisunut, takuuk § 4, imm. 1, nr. 2 - 4, imm. 3 aamma imm. 5, inissiat amerlanerpaamik tallimanik initallit piniarneqarsinnaapput, sulisoq inoqutigiinni inuit amerlassusaat naapertorlugu inissiamik anginerusumik innersuunneqartussaagaluarpalluunniit.
Imm. 4. Najukkami inissianik attartortitsinermi ajornakusoortitsisoqartillugu inoqutigiinni inuit amerlassusaat ataatsimik sinnerlugu initalimmik inissiamik qaqutigorluinnaq tunniussisoqarsinnaavoq.
Imm. 5. Imm. 1-imi 2-milu aalajangersakkat inissianik § 3-mi imm. 2, nr. 2-mi aamma § 4-mi, imm. 1, nr. 1-imi ilaatinneqartunik innersuussinermi atuutinngillat.

§ 6. Kommunalbestyrelsip isumaginninnermi ineqartitsinermut siunertanut innersuussisinnaatitaanini atorpagu, piffissaq inissiap kommunimit atorneqarsinnaalerfia aallarnerfigalugu aamma attartortitsilernissap tungaanut kommunip ineqarnermut akiliutit inissiamullu atatillugu aningaasartuutit allat akilissavai, soorluttaaq aamma kommunalbestyrelsi imm. 2-4 naapertorlugit annaasaqarsinnaanermut qularnaveeqqusiisussaasoq.
Imm. 2. Annaasaqarsinnaanermut qularnaveeqqutit attartortup ineqarnermut inissiamullu atatillugu aningaasartuutinik allanik, tassunga ilanngullugit iluarsaassinermut aningaasartuutit, akiliinngitsoornerani attartortitsisup annaasaqaatigisinnaasaanut tunniunneqartarput. Annaasaqarsinnaanermut qularnaveeqqutit attartornerup atorunnaarsinneqarnerani taamaatinneqarneraniluunniit attartortitsisup annaasaqaatai paasineqarsimatillugit aatsaat atuutilersinneqarsinnaapput, attartugaq qimallugu allamut nuuttoqarsimanera taamaattoqannginneraluunniit apeqqutaatinnagu.
Imm. 3. Annaasaqarsinnaanermut qularnaveeqqutit attartulernermit ukiumut ataatsimut piffissaqarluni atuuttarput. Annaasaqarsinnaanermut qularnaveeqqutit qaammatini aqqaneq-marlunni ineqarnermut akiliutinut naapertuuttumik angissuseqassapput, taamaattorli annerpaamik 60.000 kr.-iussallutik.
Imm. 4. Annaasaqarsinnaanermut qularnaveeqqutit attartulernermit ukioq ataaseq qaangiuttoq atuutilersinneqarsimanngippata taakku atorunnaassapput, tamatumalu kingorna attartortup ineqarnermut inissiamullu atatillugu aningaasartuutinik allanik, tassunga ilanngullugit iluarsaassinermut aningaasartuutit, akiliinngitsoornerani attartortitsisumut piumasaqaataasinnaasut qularnaveeqqutikkut naammassineqarsinnaanngillat.

§ 7. Namminersornerullutik Oqartussat kommunilluunniit inissiaataasa ilaanni attartortut attartortitsisumut piginneqatigiilluni pigisassatulluunniit inissiaminnik tigusiniarlutik allakkatigut kissaateqarpata, attartortitsisup attartortoq piginneqatigiilluni pigisassatulluunniit inissiaatitaarusunngitsoq inissiap taamaaqataanik neqeroorfigissavaa, takuuk § 3, imm. 1, nr. 2.
Imm. 2. Imm. 1 naapertorlugu inissiap taamaaqataanik neqeroorfiginnittussaatitaaneq taamaallaat atuuppoq, attartortup attartornermut isumaqatigiissut malissimappagu, aammalu attartortup inissiamik neqeroorfigineqarnissaminut piumasaqaatinik allanik naammassinnissimappat. Attartortitsisup pissutsit pingaaruteqanngitsut imaluunniit attartortumit isumannaarneqareersut tunngavilersuutigisinnaanngilai.
Imm. 3. Namminersornerullutik Oqartussat kommunilluunniit inissiaataanni attartortut inigisaminnik piginneqatigiilluni inissiaatitut tiguserusuttut piginneqatigiilluni inissiaatilittut peqatigiiffiliorsimappata Naalakkersuisut §§ 3 aamma 45 sanioqqussinnaavaat, inissiap piginnittaata piginneqatigiilluni inissiaatillit peqatigiiffiannut inissiamik tigusinissamut allakkatigut neqe-roorfiginninneranit qaammatit qulingiluat iluini."

2. § 10, imm. 2 ima oqaasertalerneqassaaq:
"Imm. 2. Ukiumi tullermi najugaqatigiiffinnut ataasiakkaanut ingerlatsinermut missingersuutit attartortitsisumit suliarineqarsimasut akuersissutigineqarsimasullu tunngavigalugit ineqarnermut akiliutit ukiumoortumik aalajangersarneqartassapput. Piumasaqaatit imm. 1-imi taaneqartut naammassinissaannut pisariaqartumik attartornermut akiliutit qaffanneqarsinnaapput qaammatit pingasut sioqqullugit attartortunut pineqartunut allakkatigut ilimasaarutigineratigut. Ilimasaarut qaffaanerup naatsorsorneqarneranik, qaffaanermut pissutaasumik aamma qaffaanerup annertussusianik qaammammut koruuninngorlugit taallugit paasissutissanik imaqanngippat ilimasaarineq atuutissanngilaq. Attartornermut akiliutit apparneri ilimasaaruteqaqqaangitsumik pisinnaapput."

3. § 11, imm. 1. ima oqaasertaqassaaq:
"Illuutip sananeqarnermini akianut ilaapput sananeqarnerani aningaasartuutit tamarmik tassu-nga ilaallutik pilersaarusiornera, nakkutilliineq sanaartorfissagissaanerlu. Illup sananeqarnermini akia kvadratmeterimut minnerpaamik 7.000 kr.-eqarpoq. Aningaasaliissutinit iluanaarutit naatsorsorneqarneranni illup sananeqarnerani kvadratmeterimut annerpaamik 15.000 kr.-eqarnera atorneqartarpoq sananeqarnerani aningaasartuutiviit qaffasinnerugaluarpataluunniit.

4. § 13, imm. 5 ima oqaasertaqassaaq:
"Imm. 5. Attartortitsisoq akit qaffannerisa, akiliutit qaffannerisa assigisaasalu kingunerisaannik imaluunniit attartortitsisoq illuutiminik attartorneqartumilluunniit pitsanngorsaasimaguni ine-qarnermut akiliutit qaffanneqarnissaannik piumasaqaateqarsinnaatitaavoq. Piumasaqaat illuutigisami attartortunut tamanut qaammatinik pingasunik siumut ilimasaaruteqarluni saqqummiunneqassaaq. Ilimasaarut qaffaanerup naatsorsorneqarneranik, qaffaanermut pissutaasumik aamma qaffaanerup annertussusianik qaammammut koruuninngorlugit taallugit paasissutissanik imaqanngippat ilimasaarineq atuutissanngilaq."

5. § 17 ima oqaasertaqassaaq:
" § 17. Attartorneq aallartitsinnagu Namminersornerullutik Oqartussat kommunillu inissiaataanni attartortut attartortitsisumut aningaasanngorlugu siumoortumik akiliutigissavaat qaammatini pingasuni ineqarnermut akiliutissat nalingat. Attartortup attartornerup isumaqatigiissutigineqarnerani siumoortumik akiliutigisassat aningaasanngorlugit akiliutigisinnaanngikkunigit attartortup taakku qaammatikkaartumik akiligassanut angeqqatigiiaanut aqqaneq marlunnut agguarlugit akilersorsinnaavai.
Imm. 2. Imm. 1 naapertorlugu naafferarlugu akilersuinissamik pilersitsinermut attartortoq akiliutissanik 500 kr.-inik akiliuteqartinneqassaaq naafferarlugulu akilersuinerup atuunnerani qaavatigut 50 kr.-inik qaammammut akiliuteqartinneqartassalluni, taamaattoq tak. imm. 3. Akileeqqusissummik piumasaqarfigineqarnermut tunngatillugu 1.000 kr.-it sinnerlugit akiligassaqartoqarpat akiliutissat 50 kr.-it 2 %-imik ilallugit attartortitsisup akileqqusinnaavai, taamaattoq tak. imm. 3. Aningaasat kruunimut ilivitsumut qaninnerpaamut apparlugit iluarsineqassapput.
Imm. 3. Imm. 2 malillugu akiliutissap akileqquneqarnissaa inissarsiortunut inoqutigiit tamarmiusut akileraaruteqaataasussamik ukiumut isertitaat inissiani attartortittakkani ineqarnermut tapiissutit pillugit inatsisartut peqqussutaat sukkulluunniit atuuttoq, tassungalu atatillugu nalunaarut, malillugit ineqarnermut tapiissutinik pissarsinissamut aningaasat killiliussat ataallugit isertitaqartartunut atuutinngilaq.
Imm. 4. Paasissutissanik eqqunngitsunik tunniussinerup kingunerissavaa siumoortumik akiliutissat tamarmiusut erngerlutik akiligassanngornerat.
Imm. 5. Allamut nuunnermut tunngatillugu attartortitsisup akiliigallassutit atorsinnaavai attartortup attartornermut isumaqatigiissut malillugu pisussaaffiinut, tamatumani ilanngullugu § 58 naapertorlugu iluarsaassinermut aningaasartuutinut akileeqataassutissanut.
Imm. 6. Siumoortumik akiliutit pillugit Naalakkersuisut malittarisassiorsinnaapput."

6. § 39, imm. 3-mi "§ 4, imm. 1, nr. 2" "§ 3, imm. 1, nr. 3"-nngortinneqassaaq

7. § 39-p kingorna ilanngunneqassaaq:
"§ 39a. Attartortut allamut nuunnissamik kissaateqarlutik utaqqisut allattorsimaffianniittut iluminni nuunnissamik isumaqatigiissuteqarpata tamanna allamut nuunnissamik kissaateqartut utaqqisut allattorsimaffianni qanorluunniit inissisimaneq apeqqutaatinnagu pisinnaavoq. Piumasaqaataavoq attartortut inigisaminnik paarlaannissamik kissaateqartut attartornermik isumaqatigissummik naammassinnissimanissaat.
Imm. 2. Inigisamik paarlaannissamik akuerineqarnissamut piumasaqaataavoq inissianut paarlaannermi ilaatinneqartunut inissianik attartortarneq pillugu peqqussut qaqugukkulluunniit atuuttoq naapertorlugu attartornermik isumaqatigiissusiortoqarnissaa, tassunga ilanngullugu qularnaveeqqusiissutinik akiliineq.
Imm. 3. Inigisamik paarlaannermut atatillugu inissiat paarlaannermi ilaatinneqartut nalinginnaasumik iluarsaanneqassapput nalinginnaasumilluunniit iluarsaanneqarsimasutut isikkoqassallutik. Taamaattorli attartortut allakkatigut nalunaarutigisinnaavaat nuunnerminnut atatillugu attartukkamik nutaap namminneq iluarsaannissaa kissaatigalugu. Taamaattumik inissiat taakku nuunnerup nalaani pissusissaattut iluarsaanneqarsimasutut isigineqassapput §§ 57 aamma 58-imut naleqqiullugu.
Imm. 4. Attartortup attartukkamini nutaami nuunnerminut atatillugu nammineq nalinginnaasumik iluarsaassinissani kissaataa attartortitsisup itigartissinnaavaa attartukkap nalinginnaasumik iluarsaanneqarneranit kingullermit qaammatit tallimat sinnerlugit ingerlareersimappata.
Imm. 5. Nalinginnaasumik iluarsaassinissap nalaani inissiat inoqannginneri pissutigalugit inissiat paarlaannermut ilaatinneqartut imm. 3 naapertorlugu nalinginnaasumik iluarsaanneqarnerannut atatillugu aningaasartuutaanerusoqarpat, taakku attartortumit inigisaminik qimatsisumit akilerneqassapput."

8. § 43, imm. 2-mi "§ 4, imm. 1, nr. 3" "§ 3, imm. 1, nr. 4"-nngortinneqassaaq.

9. § 43, imm. 3-mi "§ 4, imm. 1, nr. 4" "§ 3, imm. 1, nr. 5"-inngortinneqassaaq.

10. § 48, imm. 1-imi "§ 4, imm. 1, nr. 1" "§ 3, imm. 1, nr. 1"-inngortinneqassaaq.

11. § 60-ip kingorna kapitali nutaaq ilanngunneqassaaq:

"Kapitali 10a.
Nakkutilliineq

§ 60a. Namminersornerullutik Oqartussat kommuniluunniit avataaneersumik sanaartornermik aqutsisoqarpata Naalakkersuisut kommunalbestyrelsilluunniit inatsisartut peqqussutaat manna kiisalu peqqussut naapertorlugu aalajangersakkat malillugit sanaartornermik aqutsisup sulinini ingerlanneraa nakkutigissavaat tamannalu pillugu ukiumoortumik nalunaaruteqartassallutik.
Imm. 2. Kommune inissiaatiminik nammineq aqutsiguni inatsisartut peqqussutaat manna peqqussullu naapertorlugu aalajangersakkat malillugit tamanna ingerlatissavaa.
Imm. 3. Inissiaatillip nakkutilliisussaatitaanini naammassiniarlugu inissianik aqutsisup kukkunersiuisua inissianik aqutsisup inatsisartut peqqussutaat manna peqqussullu naapertorlugu aalajangersakkat malillugit suliaminik ingerlatsinera pillugu nalunaaruteqartissinnaavaa.
Imm. 4. Kommune inissiaatiminik nammineq aqutsisoq inissianik aqutsinerup inatsisartut peqqussutaat manna peqqussullu naapertorlugu aalajangersakkat malillugit ingerlatsineq pillugu nammineq kukkunersiuisuni nalunaaruteqartissinnaavaa.
Imm. 5. Inissiaatilik tunngavissaqanngitsumik kinguarsaanani imm. 1, 3 imaluunniit 4-mi nalunaarummik taaneqartumik ukiut tamaasa Naalakkersuisunut nassiussisassaaq.’
Imm. 6. Namminersornerullutik Oqartussat kommunillu inissiaataannik attartortittakkanik najugaqatigiiffinnillu, taakkununnga ilanngullugit inissiaatillip aqutsisulluunniit aningaasaliissutinik ingerlatsineranik, missingersuusiorneranik, naatsorsuusiorneranik kukkunersiuineranillu nakkutilliinermut Naalakkersuisut malittarisassiorsinnaapput."

12. § 61, imm. 3-mi "imm. 4" "imm. 2"-nngortinneqassaaq.

13. § 62, imm. 1-imi "§§ 57-60" "§§ 57, 58 aamma 60, imm. 1 aamma 2"-nngortinneqassaaq.

§ 2.

Peqqussut 1. juni 2003-mi ullormit tassannga atuutilersumik atuutilerpoq.

Namminersornerullutik Oqartussat, ulloq 15. april 2003.

Hans Enoksen

/

Mikael Petersen