Inigisassaqartitsineq, inigisaqarnermut ikiorsiissuteqarneq, inigisanik attartortitsineq il.il. pillugit Kalaallit Nunaannut inatsit nr. 944, 23. december 1986-imeersoq naapertorlugu aalaja-ngersarneqarput:

 

Kapitali 1.
Atuuffissaa kiisalu innersuussinissamut maleruagassat

 

§ 1. Peqqussut illumik aamma illup initaanik ineqarfissanik attartornermut, taamatuttaaq attartukkamik allamut attartortitsinermut, atuuppoq, attartornerup aningaasaanngitsunik akilerneqarnera apeqqutaatinnagu aamma inissiap ilaata inissaanngitsutut attartortinneqarnera apeqqutaatinnagu.
Imm. 2. Peqqussut attartornermi pissutsinut immikkut inatsisitigut malittarisassaqartitaasunut atuutinngilaq.

 

§ 2. Attartornermut isumaqatigiissuteqartoqassaaq immersugassani kalaallisut qallunaatullu naqitani Naalakkersuisunit akuerisaasuni.
Imm. 2. Allakkatigut attartornermut isumaqatigiissummi aalajangersakkat, peqqussummi taaneqarsimasunit annertunerusunik attartortumut pisussaaffiliisut imaluunniit annikinnerusunik attartortumut pisinnaatitaaffiliisut, atuutissagunik erseqqissarneqarsimassapput.
Imm. 3. Imm. 1-2 isumaqatigiissuteqarnikkut attartortumut ajoqutaasumik sanioqqunneqarsinnaanngillat.

 

§ 3. Illuni Namminersornerullutik Oqartussanit kommuninilluunniit pigineqartuni inissiat inigineqanngitsut inissarsiortunut utaqqisut allattorsimaffiannut ilanngunneqarsimasunut innersuunneqartassapput, taamaattoq tak. §§ 4 aamma 5. Utaqqisut allattorsimaffiinik allaffissornikkut aqutsinermut inissarsiortut akiliisinneqartassapput.
Imm. 2. Innersuussisarneq aamma attartortitsisarneq, aamma utaqqisut allattorsimaffiinik allaffissornikkut aqutsineq, taamatuttaaq utaqqisut allattorsimaffiannut allatsinnermut atatillugu aamma ukiumoortumik utaqqisut allattorsimaffianniiginnarniarluni uppernarsaaqqittarnernut atatillugu akiliutit akileqquneqartarnerat annertussusissaallu pillugit maleruagassanik erseqqinnerusunik Naalakkersuisut aalajangersaassapput.

 

§ 4. Utaqqisut allattorsimaffiannit § 3-mi taaneqartumit salliutillugit taaneqartutut tulleriinnilerlugit innersuussutigineqassapput:
1) Namminersornerullutik Oqartussat kommunilluunniit nutarterinernut isaterinernulluunniitatatillugu inissaqartitsisarnissamik pisariaqartitsinerat naammassiniarlugu inissiat, takuuk § 48, aamma
2) inissiat, siusinnerusukkut inissaqartitsinissamik qularnaveeqqusiisoqarsimanerata naammassineqarnissaanut innersuunneqartussat, tak. § 39, imm. 3.
3) inissiat aapparisap toqukkut qimagaasup sulisut inissiaannit suliffimmut aalajangersimasumut inniminnigaasumit qimatsineranut atatillugu innersuussutigineqartussat, tak. § 43, imm. 2.
4) inissiat aapparisap toqukkut qimagaasup inissiamit innarluutilinnut inissiatut immikkut aaqqissugaallunilu tunniussaasimasumit nuunneranut atatillugu innersuussutigineqartussat, tak. § 43.imm. 3.
Imm. 2. Imm. 1 malillugu inissiat innersuunneqartut naleqquttumik angissuseqartinniarneqassapput pitsaassuseqartinniarneqassallutillu, ineqarnermullu aningaasartuutit tamarmiusut sapinngisamik inissiami qimatamisut annertussuseqartinniarneqassallutik.

 

§ 5. § 4 malillugu inigisanut taartissanik innersuussinissamut pisariaqartitat akuersissutigineqareerpata, utaqqisut allattorsimaffiannit § 3-mi taaneqartumit salliutillugit inissiat inigineqanngitsut imatut tulleriinnilerlugit innersuussutigineqassapput:
1) pisortat sullissiviini sulisunut inissiat ataatsimut sulisunut inissiatut immikkoortinneqarsimasunut pissarsisinneqarsinnaatitaasunut sulisunut inissiat, tak. § 6,
2) kommunit isumaginninnermi inissaqartitsinermut siunertanut inissianik pisariaqartitaannik naammassinnissamut inissiat, tak. § 7, aamma
3) nammineq kissaatigalugu nuunniartunut inissiat, taamatuttaaq inigisanik paarlaasseqatigiinnerit.
Imm. 2. Naalakkersuisut kommunit ataasiakkaat isumaqatiginiareerlugit inissianut siunertat assigiinngitsut akunnerminni imminnut agguaassinermi pissusissaat aalajangersassavaat.

 

§ 6. Ataatsimut sulisunut inissianut atugassanngortitat kommunini tamani Naalakkersuisut aalajangersagaannik inissianik amerlassusilerlugit agguaanneqassapput.
Imm. 2. Kommunini, ataatsimut sulisunut inissianut atugassanngortitat inissiat attartortittakkat tamarmiusut amerlassusiinut naleqqiullugu annertuumik amerlaffigisaanni inissianik atorneqanngitsunik innersuussisarnermut § 5 malillugu tulleriiaarisarneq pillugu Naalakkersuisut kommunillu akornanni immikkut innersuussisarnissamik isumaqatigiissuteqartoqarsinnaavoq.

 

§ 7. Kommunalbestyrelsip isumaginninnermi ineqartitsinermut siunertanut innersuussisinnaatitaanini atorpagu, piffissaq inissiap kommunimit atorneqarsinnaalerfia aallarnerfigalugu aamma attartortitsilernissap tungaanut kommunip ineqarnermut akiliutit inissiamullu atatillugu aningaasartuutit allat akilissavai. Kiisalu kommunip piffissami attartortup isumaginninnermi inatsisit malillugit pilersorneqarnissamut isumaginninnermi ikiorsiissutinik tigusisinnaatitaaffiani attartornermik isumaqatigiissutip attartortumit eqqortinneqarnissaa qulakkiissavaa.

 

Kapitali 2.
Attartornermut akiliutit aalajangersarneqartarnerat aamma iluarsiivigineqartarnerat

 

§ 8. Namminersornerullutik Oqartussat kommunillu inissiaataat attartortittakkat najugaqatigiiffinnut aningaasaqarnikkut namminersortunut agguataarneqassapput.
Imm. 2. Najugaqatigiiffinni ataasiakkaani najugaqartut §§ 9-mi aamma 12, imm. 2-mi maleruagassat malillugit najugaqatigiiffiup ingerlanneqarneranut sunniuteqaqataasinnaatitaapput, tassa najugaqatigiiffimmi najugallit ataatsimiinneranni najugaqatigiiffimmi siulersuisussanik sunniuteqaqataasinnaajumallutik qinersisimappata.
Imm. 3. Najugaqatigiiffinnut immikkoortiterineq, najugaqatigiiffinni siulersuisussanik qinersisarneq aamma taakku sulinissaat pillugit maleruagassat Naalakkersuisunit aalajangersarneqassapput.

 

§ 9. Attartortitsisoq najugaqatigiiffinnut tamanut ingerlatsinermut missingersuummut siunnersuusiussaaq, tak. §§ 11, imm. 1 aamma 12, imm. 1, attartortitsisumit akuerineqavitsinnagu najugaqatigiiffiup siulersuisuinut saqqummiunneqartussamik.
Imm. 2. Najugaqatigiiffiup siulersuisui ingerlatsinermut missingersuutinut killiliussat iluanni makku pillugit aalajangiisinnaapput:
1) aserfallatsaaliinerit nutarterinerillu suut attartortitsisup najugaqatigiiffimmi suliarisariaqarnerai,
2) najugaqatigiiffimmi init ataatsimoorussat ingerlanneqarnerat atorneqartarnerallu aamma
3) najugaqatigiiffimmi sunngiffimmi sammisassanik assigisaannillu pilersitsisarnerit.
Imm. 3. Najugaqatigiiffiup ukiumoortumik naatsorsuutai attartortitsisumit akuersissutigineqavissinnagit kukkunersiorneqassapput najugaqatigiiffiullu siulersuisuinut akuersissutigisassanngorlugit saqqummiunneqassallutik

 

§ 10. Inissiaqarfinni inunnit namminernit pigineqartuni imaluunniit inissiani inunnit namminernit pigineqartuni ikinnerpaamik arfinilinnik inissiartalinni, piginnittumit ataatsimit pigineqartuni, ataatsimullu kiassaatilinni, errorsisarfilinni, nalliuttorsiortarfilinni, najugaqartunut illutalinni allatulluunniit ataatsimoorussanik atortulersugaasuni, attartortut ineqartut sinniisissaannik qinersisinnaatitaapput apeqqutinik tamanik inissiaqarfiup ingerlanneqarneranut pingaarutilinnik attartortitsisumut oqaloqateqarsinnaatitaasunik.
Imm. 2. Ineqartut sinniisaannik qinersisarneq taakkulu sulinerat pillugit maleruagassat Naalakkersuisunit aalajangersarneqassapput.

 

§ 11. Namminersornerullutik Oqartussat kommunillu inissiaataanni attartortittakkani najugaqatigiiffimmi inissianut ineqarnermut akiliutit tamarmiusut sukkulluunniit imatut aalajangersarneqarsimassapput najugaqatigiiffik periarfissillugu isertitaminit aningaasartuutit ingerlatsinermut attuumassuteqartut, taamatuttaaq akileeqataassutissatut aalajangerneqarsimasut unerartitsinerillu, akilersinnaanngorlugit.
Imm. 2. Pilersaarutigineqartutut aserfallatsaaliinermut aamma teknikikkut atortulersuutit nutarterneqartarnerannut naleqquttumik immikkoortitsisarnerit pillugit maleruagassanik Naalakkersuisut aalajangersaassapput.

 

§ 12. Ukiumi tullermi najugaqatigiiffinnut ataasiakkaanut ingerlatsinermut missingersuutit attartortitsisumit suliarineqarsimasut akuersissutigineqarsimasullu tunngavigalugit ineqarnermut akiliutit ukiukkaartumik aalajangersarneqartassapput. Ineqarnermut akiliutinik qaffaanerit § 11, imm. 1-imi piumasaqaatip naammassineqarnissaanut pisariaqartinneqartut qaammatinik pingasunik siumut ilimasaaraluni naammassineqarsinnaapput.
Imm. 2. Najugaqatigiiffiup siulersuisui aalajangiisinnaapput najugaqatigiiffimmi naammaginartumik pitsanngorsaanermik nutarterinermillu suliassat suliarineqassasut, tamanna peqatigitillugu najugaqatigiiffiup siulersuisuisa pisariaqartinneqartumik ineqarnermut akiliutit qaffanneqarnissaat akuerisinnaappagu. Najugaqatigiiffiup siulersuisuisa aalajangiinerat najugaqatigiiffiup ataatsimiinnerani akuersissutigineqassaaq.
Imm. 3. Ineqarnermut akiliutit qaffanneqarnissaannik piumasaqaat attartortunut ataasiakkaanut imm. 1-mi taaneqartutut ilimasaaruteqarluni allakkatigut ilimasaarutigineqassaaq imarissallugillu qaffaanerup naatsorsorneqarneranik, qaffaanermut pissutaasumik aamma qaffaanerup annertussusianik qaammammut kroninngorlugit taallugit paasissutissat.
Imm. 4. Ineqarnermut akiliutit naatsorsorneqartarnerat aamma ineqarnermut akiliutit qaffanneqarnissaannik ilimasaarineq pillugit maleruagassat Naalakkersuisunit aalajangersarneqassapput.

 

§ 13. Inissiani attartortittakkani namminersortunit pigineqartuni ineqarnermut akiliutit aningaasartuutit tunngavigalugit angissusilerneqartussaapput aammalu attartortitsisup uppernarsarneqartumik aningaasaliisimanerminut aningaasartuutai, uppernarsarneqartumik ingerlatsinermut aningaasartuutai aamma illuutip teknikikkut aningaasatigullu nalinganik ernianut akiliutigineqareersut affaattut amerlassusilinnik ernianut akiliutigisartagai qaangersimassanagit. Ineqarnermut akiliutit inissianut agguaanneqassapput taakku initussusiat malillugu.
Imm. 2. Aningaasaliissutit aningaasartuutitaat uppernarsaasigaasut tassaapput allanit illuliornissamut taarsigassarsinermi erniat imaluunniit sanatitsisup nammineq aningaasaatiminit aningaasaliissutaasa erniassaattut naatsorsukkat, tassaasut erniat nalorninaateqanngitsut aningaasaliissuteqarnermi nalorninarsinnaasunut tapinik ilallugit.
Imm. 3. Ingerlatsinermut aningaasartuutinut uppernarsaaserneqartunut ilaapput assersuutigalugu innaallagissamut, imermut, eqqiaanermut, allaffissornermut, sillimmasiissutinut aningaasartuutit, ingerlaavartumik aserfallatsaaliinermut aamma teknikikkut atortulersuutinik nutarterinissanut unerartitanut aningaasartuutit illuutip attartorneqartullu qanoq issusiat eqqarsaatigalugit naleqquttuutinneqartunut.
Imm. 4. Illuutip teknikkikkut-aningaasatigut nalinga naatsorsorneqassaaq boligstøtte-mit illuliat nalilersorneqartarneranni tunngavigineqartartut atuuttut naapertorlugit.
Imm. 5. Attartortitsisoq akit qaffannerisa, akiliutit qaffannerisa assigisaasalu kingunerisaannik imaluunniit attartortitsisoq illuutiminik attartorneqartumilluunniit pitsanngorsaasimaguni ine-qarnermut akiliutit qaffanneqarnissaannik piumasaqaateqarsinnaatitaavoq. Piumasaqaat illuutigisami attartortunut tamanut qaammatinik pingasunik siumut ilimasaaruteqarluni aamma qaffaanermut pissutaasoq annertussusissaalu taallugit allakkatigut ataatsikkoortillugulu saqqummiunneqassaaq.

 

§ 14. Attartortup ineqarnermut akiliutit qaffanneqarnissaannik piumasaqaat akueriumanngikkuniuk, takuuk § 13, imm. 3, attartortoq piumasaqaatip tiguneraniit kingusinnerpaamik sapaatit akunnerisa marluk qaangiunneranni attartortitsisumut allakkatigut akerliliilluni nalunaarnini saqqummiutissavaa allassimassallugulu immikkoortutigut sorlertigut piumasaqaat akuerineqarsinnaanngitsoq. Ineqarnermut akiliutit qaffanneqarnissaannik piumasaqaat aalajangiusimaneqaannassappat attartortitsisoq sapaatit akunneri arfinilinngortinnagit eqqartuussivikkut suliassanngortitsissaaq.
Imm. 2. Suliassaq eqqartuussisunut suliassanngortinneqarpat, attartortitsisup eqqartuussiviup aalajangiinissaata tungaanut ineqarnermut akiliutissatut ilimasaarutigineqartut ineqarnermut akiliutaagallartutut akileqqusarsinnaavai. Ineqarnermut akiliutit tamatuma kingorna eqqartuussiviup aalajangiinera naapertorlugu iluarsiivigineqassapput. Ineqarnermut annertuallaanik akileeqqusisoqarsimappat attartortitsisup eqqartuussiviup aalajangiinera kingusinnerpaamik qaammatinik pingasunik kingoqqullugu ineqarnermut akiliutit iluarsiivigissavai, piffissamit annertuallaanik ineqarnermut akiliutissanik akileeqqusisimanermit naatsorsorlugit.
Imm. 3. Attartortitsisoq ineqarnermut akiliutinik akiliivallaarutaasimasunik eqqartuussiviup aalajangiinerata kingorna qaammatinit pingasunit kingusinnerusukkut iluarsiissuteqarpat attartortoq ineqarnermut akiliivallaarutigisimasaminut ernialiiffigineqarnissaminut piumasaqarsinnaatitaavoq, piffissamit ineqarnermut akiliutaagallartunik annertunaarlugit akileeqqusisimaffimmit naatsorsorneqartunik. Erniat naatsorsorneqassapput kingusinaartumik akiliinikkut il.il. ernialersuisarneq pillugu inatsimmi maleruagassat malillugit.

 

§ 15. Pisortat namminersortulluunniit illuutaanni ineeqqanik ineqarfissanik nammineerluni attartortitsinermi ineqarnermut akiliutit annerpaamik inissiamut ineqarnermut akiliutinut tamarmiusunut aningaasartuutit imaluunniit piffissamut aalajangersimasumut akiliutit, kiassarnermut, innaallagissamut, imermut il.il., atorneqarsimasut init amerlassusiat malillugu naatsorsorneqartut annertoqatigissavaat.
Imm. 2. Ineeqqanik attartortitsisup nammineq inigisaata ilaaniittunut qaammammik ataatsimik siumut ilimasaaraluni ineqarnermut akiliutit qaffanneqarsinnaapput. Ineeqqanut allanut qaammatinik pingasunik siumut ilimasaarisoqartassaaq. Ilimasaarineq allakkatigut saqqummiunneqartassaaq.

 

§ 16. §§ 12-imit 15-imut maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.

 

Kapitali 3.
Qularnaveeqqusiissutit aamma ineqarnermut akiliutit akilerneqartarnerat

 

§ 17. Attartornissaq isumaqatigiissutigineqartinnagu Namminersornerullutik Oqartussat kommunillu illuutaanni attartortittakkani inissianik attartortussat attartortitsisumut qularnaveeqqusiissutit qaammatinut pingasunut ineqarnermut akiliutitut annertussusillit akiliutigissavaat, takuulli imm. 2.
Imm. 2. Attartortup attartornerup isumaqatigiissutigineqarnerani qularnaveeqqusiissutit aningaasanngorlugit akiliutigisinnaanngikkunigit attartortup taakku qaammatikkaartumik akiligassanut angeqqatigiiaanut aqqaneq marlunnut agguarlugit akilersorsinnaavai
Imm. 3. Akilersuinissamik aaqqissuussineq attartortumit malinneqanngippat, tamanna attartornermut isumaqatigiissummik naammassinninnginnertut isigineqassaaq ineqarnermut akiliutit piffissaq eqqorlugu akilerneqannginnerattut naatsorsuullugu, tak. § 18, imm. 1.
Imm. 4. Attartortitsisup inissiamik qimatsilluni nuuttoqarneranut atatillugu qularnaveeqqusiissutit attartortup attartornermut isumaqatigiissut naapertorlugu pisussaaffiisa matussuserneqarnerannut atorsinnaavai, taamatuttaaq attartortup iluarsaassinermut aningaasartuutinik akileeqataassutissaanut, tak. § 58.
Imm. 5. Qularnaveeqqusiissutit pillugit maleruagassat Naalakkersuisunit aalajangersarneqassapput.

 

§ 18. Attartortoq pisussaavoq piffissani attartornermut isumaqatigiissummi aalajangersarneqartuni ineqarnermut akiliutissat kiassarnerlu akilissallugit. Kingusinnerpaamik akiliisoqartassaaq ullup akiliiffissap kingornagut ulluinnaat pingajuanni. Ulluinnaq taanna arfininngorneruppat imaluunniit Inuiattut Ullorsiorfiuppat, ulluinnarmi tulliuttumi akiliineq piffissaq eqqorlugu akiliineruvoq.
Imm. 2. Attartortitsisup akiliiffissaq innersuussutigissavaa. Aningaaserivimmut akiliineq akiliiffissatut innersuussutigineqartumut akiliinertut isigineqassaaq. Akiliiffissaq innersuussutigineqarsimanngippat ineqarnermut akiliutit attartortitsisup niuernermik ingerlatsiviani akilerneqassapput.

 

§ 19. Attartorneq unitsinneqarpat imaluunniit piffissaa aalajangikkamik attartornerup naanerani attartortoq pisussaavoq attartornermut akiliutit piffissaq eqqorlugu akilissallugit, tassa attartornermut isumaqatigiissut naapertorlugu attartortoqarunnaarnissaata tungaanut, tak. §§ 50 aamma 51.

 

§ 20. Namminersortut inissianik attartortitsineranni qularnaveeqqusiissutit, aallarniutit aamma ineqarnermut akiliutit siumoortumik akilikkat aningaasat qaammatini arfinilinni attartornermut akiliutitut annertussusillit sinnersimasanngilaat.

 

Kapitali 4.
Kiassarnermut il.il. akiliisarneq

 

§ 21. Attartortitsisoq attartortumut kiassaallunilu imermik kissartumik pilersuiguni attartortitsisup attartortup kissamik aamma imermik kissartumik atuineranut kiisalu ininut ataatsimoorussanut il.il. kissamut imermullu aningaasartuuteqaqataaffissaanut aningaasartuutini utertillugit akileqqusinnaavai. Tamakkununnga aningaasartuutit ineqarnermut akiliutinut ilaatinneqarsinnaanngillat, kisiannili immikkut ukiumoortumik kiassarnermut naatsorsuutitigut attartortitsisumit suliarineqartutigut akilerneqassallutik. Ukiup kiassarnermut naatsorsuuteqarfiusup ukioq qaammatisiuteqarfiusoq malissavaa.
Imm. 2. Attartortut aningaasartuuteqaqataaffigisaasa matussutissaannut qaammatikkaartumik akileeqataassutaagallartussat attartortunut akileqquneqartassapput. Attartortup akileeqataassutissai attartornermi aningaasanngorlugit akiligassatut pisussaaffiupput ineqarnermullu akiliutinut ilanngullugit akileqquneqartassallutik, tak. § 18, imm. 1.
Imm. 3. Kiassarnermut naatsorsuutit suliarinissaat, aningaasartuutit attartortut akornanni agguataarneqarnissaat, kiassarnermut akileeqataassutit akilerneqartarnerat iluarsiivigineqartarnerallu pillugit maleruagassat Naalakkersuisut aalajangersassavaat.

 

§ 22. Illuutip kiassarneranut aamma imermik kissartumik pilersorneqarneranut aningaasartuutit pillugit attartortitsisup ukiumi kiassarnermut naatsorsuuteqarfiusumi kiassarnermut naatsorsuutit sumiiffimmi attartortitsisumit taaneqartumi kingusinnerpaamik ulloq 30. april tamanit takuneqarsinnaanngorlugit saqqummiuttassavai.
Imm. 2. Naatsorsuutit ulloq taanna imm. 1-imi aalajangersarneqartoq nallertinnagu saqqummiunneqanngippata, attartortitsisup akileeqataassutaagallartut sinnerlugit saniatigut akiliuteqaqqusisinnaatitaanini annaasavaa.
Imm. 3. Naatsorsuutit kingusinnerpaamik ulloq 30. juni saqqummiunneqarsimanngippata, attartortup naatsorsuutit tamakkerlugit inereerneranni pisassarisani Kalaallit Nunaanni aningaaserivimmi uninngasuutinut erniarititaasartut annerpaartaat sukkulluunniit atuuttut atorlugit akiliuteqartoqarnissaata tungaanut ernialersortissinnaatitaaffigai.

 

§ 23. Kingusinnerpaamik ulloq 15. juni saniatigut akiliuteqarnissamik imaluunniit utertitsilluni akiliuteqartoqarnissaanik allakkatigut nalunaarut attartortumut nassiunneqareersimassaaq. Nalunaarut imaqartinneqassaaq attartortup imm. 3 malillugu akerliliinissamut pisinnaatitaaffiinik paasissutissanik.
Imm. 2. Imm. 1 malillugu allakkatigut nalunaaruteqarneq kingusinnerpaamik ulloq 15. juni nassiunneqarsimanngippat attartortumut saniatigut akiliuteqartitsinissaq piumasaqaatigineqarsinnaanngilaq.
Imm. 3. Attartortup naatsorsuutinut akerliliissutaa attartortitsisumut allakkatigut saqqummiunneqassaaq attartortumillu kingusinnerpaamik 1. august nassiunneqarsimassalluni. Akerliliissutip imarissavai naatsorsuutit sutigut akuersissutigineqarsinnaannginnerannik paasissutissat.

 

§ 24. Attartortitsisup § 23, imm. 1-imi piffissaliussap naareernerani pisiniarfigisartakkanit allaneersunit siumut naatsorsuutigineqarsinnaanngitsunik akiligassat kiassarnermut naatsorsuutinut inaarsarneqareersunut tunngasut tigussagunigit, attartortitsisup pisarneq malinnagu akiligassat kiassarnermut naatsorsuutinut tulliuttunut nuussinnaavai. Attartortitsisup attartortut akiligassat nuunneqartut amerlassusiannik ilisimatitsissuteqarfigissavai.
Imm. 2. Attartortut akornanni aningaasartuutit kukkusumik agguataarneqarsimappata attartortitsisup attartortunut pineqartunut allakkatigut nalunaaruteqarluni piaarnerpaamik kukkuneq iluarsissavaa, tak. imm. 3 aamma 4.
Imm. 3. Attartortoq akileeqataassutaagallartunik akiliinikippallaarsimappat, attartortitsisup siusinnerpaamik ineqarnermut akiliutinik akiliinermi siullermi ilassutitut akiliutissat akileqqusinnaavai, tamanna pissalluni attartortup imm. 2 naapertorlugu nalunarummik tigusaqarneranit qaammatip ataatsip qaangiunnerani. Ilassutitut akiliutissat qaammatinut pingasunut ineqarnermut akiliutissat qaangersimappatigit attartortoq pisinnaatitaavoq qaammatikkaartunut pingasunut annertoqatigiinngorlugit akiliinissaminut.
Imm. 4. Attartortoq akileeqataassutaagallartunik akiliivallaarsimappat akiliutaavallaarsimasut aningaasanngorlugit attartortumut utertillugit akiliutigineqassapput imaluunniit imm. 2 naapertorlugu nalunaaruteqareernerup kingornatigut ineqarnermut akiliutit akilerneqarneranni siullermi ilanngaatigineqassallutik.

 

§ 25. §§ 21-24-mi aalajangersakkat isumaqatigiissuteqarnikkut attartortumut ajoqutaasumik sanioqqunneqarsinnaanngillat.

 

Kapitali 5.
Aserfallatsaaliineq aamma iluarsaassineq

 

§ 26. Namminersornerullutik Oqartussat kommunillu illuutaanni attartortittakkani attartortitsisoq pisussaavoq illuutit attartortitallu isumannaatsumik aserfallatsaalinissaannut.
Imm. 2. Avammut kuuffinnut, kiassarnermut, innaallagissamut, gasimut imermullu teknikikkut atortulersuutit tamarmik pitsaasuutinneqassapput atorsinnaajuassallutillu. Taamatuttaaq attartortitsisup pisussaaffigaa innaallagissamut ikuffiit, iikkanut ikkussat, matserfiit, kiassaatit, ruujorit, sikaaviit aalaakkaasut, illup iluani atortut il.il., aserfallatsaaliussallugit. Nungullarnikkut pisoqalinikkullu ajorseriaatit kingunerisaannik nutarterinerit iluarsaassinerillu illuutit attartorneqartullu pissusii sianiginiarlugit pisariaqartitsinerit malillugit suliarineqartassapput.
Imm. 3. Piffissami attartorfiusumi attartortup akisussaaffigaa inissiami qilaat qalipanneqartarnissaat, iikkat qalipanneqartarnissaat tapetilersorneqartarnissaalluunniit kiisalu natit lakkerneqartarnissaat taakkununngalu aningaasartuutit akilertassallugit.

 

§ 27. Namminersortut inissianik attartortitsineranni taamatuttaaq § 26 atorneqassaaq, attartortoq attartortitsisorlu allanik isumaqatigiissuteqarsimanngippata.

 

§ 28. Attartortitsisup attartorneqartoq attartornerup aallartinnissaanut piffissamiit isumaqatigiissutaasumiit pitsaasumik illersorneqarsinnaasumillu pitsaassuseqartillugu atugassanngortissavaa. Iikkat, qilaat natillu pissusissaatut iluarsaanneqarsimassapput, tak. § 57, imm. 2. Attartorneqartoq eqqiarneqarsimassaaq uumasuaraqassananilu, igalaavi, sikaaviit matui aamma matut tamarmiussapput parnaarsaatillu atorsinnaassallutik. Tamakku saniatigut matut silarliit tamarmik immikkut marlunnik matuersaateqassapput, teknikikkullu atortulersuutit ajoquteqassanatik.
Imm. 2. Iserternissaq sioqqullugu attartortitsisup attartortussaq taassumaluunniit sinniisaa peqatigalugu inissiaq misissussavaat iserternermullu nalunaarusiaq suliaralugu, taassuma assilineqarnera attartortup pissavaa. Amigaataasut misissuinermi paasineqartut iserternermut nalunaarusiami ilanngunneqassapput.
Imm. 3. Aammattaaq amigaatit, iserternerup kingorna attartortup tigusinermut atatillugu ilanngukkusutai iserternerup kingorna sapaatit akunneri marluk qaangiutsinnagit attartortitsisumut allakkatigut nalunaarutigineqassapput. Tamannali atuutissanngilaq amigaataasoq pisarnertut misissuataarinermi takuneqarsinnaanngippat imaluunniit attartortitsisoq peqquserlulluni iliuuseqarsimappat.
Imm. 4. Imm. 2 aamma 3 isumaqatigiissuteqarnikkut attartortumut ajoqutaasumik saneqqunneqarsinnaanngillat.

 

§ 29. Attartortup attartorneqartoq isumannaatsumik paarissavaa ajoqusikkanullu attartortup nammineq, attartortup illoqataasa allalluunniit attartortup attartorneqartumut isersinnaatitaasa illersorneqarsinnaanngitsumik pissusilersornerisigut ajoquserneqartunut taarsiinissamut akisussaatitaavoq. Takusaanermi paarsinerluttoqartoq paasineqarpat attartortup ingerlaannartumik ajoqusikkat iluarsaatissavai, tassa attartortitsisup tamanna piumasarippagu.
Imm. 2. Attartortup attartortitsisoq akuersiseqqaartinnagu inissiaq isumaqatigiissutigineqartunit allaanerusumik atussanngilaa.
Imm. 3. Inissiami inisimasunut ineeqqanik inissianik ataasiakkaanik allanut attartortitsinerup saniatigut attartortup attartortitsisoq akuersissuteqarteqqaarnagu illoqatigisami saniatigut attartorneqartoq allanut atugassanngortissinnaanngilaa, taammaattorli tak. § 39.
Imm. 4. Attartortup attartortitsisoq pisariaqartinneqartumik isumaqatigiissuteqarfigeqqaarnagu inissiaq piffissaanngitsukkut qimassanngilaa.

 

§ 30. Attartortup pissutissaqavinngikkuni attartortitsisoq inissiamut isernissaanik itigartissinnaanngilaa, taanna inissiamik inatsisinik unioqqutitsilluni atuisoqarnersoq imaluunniit aserfallatsaaliinerup qanoq issusianik paasiniaalluni, iluarsaassisoqassatillugu imaluunniit allanut attartortitsisoqassatillugu inissiamik misissuiniarpat.
Imm. 2. Attartortitsisoq sapaatit akunnerinik arfinilinnik siumut ilimasaaraluni attartukkami sulianik aallartitsisinnaavoq, suliat ingerlanneqarnissaat attartortumut annertuumik akornutaassanngippat. Sulianik allanik aallartitsisoqartinnagu attartortoq qaammatinik pingasunik siumut ilimasaarneqarsimasussaavoq. Attartortitsisorli tamatigut siumut ilimasaareqqaarnani kinguartinneqarsinnaanngitsunik iluarsaassisinnaavoq.
Imm. 3. Suliat suungaluartulluunniit attartortitsisumit aallartinneqartut unitsinneqaratik attartortumullu sapinngisamik annertunerpaamik mianerinnilluni suliarineqassapput. Attartortitsisoq ingerlaannartumik suliat malitsigisaanik iluarsaassissaaq.

 

§ 31. Attartortup taassumalu inoqutaasa kiisalu inuit attartortumit attartorneqartumut isersinnaatitaasut illumi pissusissatut malittarisassat atuuttut maleruassavaat.

 

Kapitali 6.
Attartortup attartukkami atuisinnaatitaanera

 

§ 32. Attartortoq attartortitsisumut siumoortumik allakkatigut isumaqatigiissuteqarluni attartorneqartumi nalinginnaasumik atortulersuisinnaavoq nammineq akiligassaminik, attartortitsisup qularnaarsinnaanngippagu illuutip innaallagissamut avammullu kuuffinnut nammassinnaasai atortulersuutinut naammanngitsut.

 

§ 33. Attartortut kommunimi najukkamilu pilersaarutit ataqqillugit ataasiakkaarlutik ataatsimoorlutilluunniit illumi attartortitsisup innersuussineratigut radiop TV-llu aallakaatitaannik tigooqqaanissamut radiomut fjernsynimulluunniit antenniliisinnaatitaapput, taamaattoq tak. imm. 2. Taamatuttaaq attartortut illumi radiop TV-llu aallakaatitaannik isiginnaarnissamut kabelikkut attaviliisinnaatitaapput, najugaqarfimmi TV-mut kabelinut attaviliinissaq periarfissaqarpat.
Imm. 2. Imm. 1 malillugu attartortut pisinnaatitaaffiat atuutissanngilaq ikkussineq illumut najugaqartuinullu allanut akornutaassasoq attartortitsisup uppernarsarpagu. Pisinnaatitaaneq aamma atuutissanngilaq attartortitsisup ataatsimoorussamik TV-kkut isiginnaagassanik pilersuinera aqqutigalugu imaluunniit attartortut arlaata antenniliussaa ataatsimoorussaasinnaasoq aqqutigalugu attartortut kissaatigisaminnik isiginnaarsinnaappata.
Imm. 3. Attartortut illumi antenneliinnginneranni attartortitsisoq taamaaliornissamut allakkatigut akuersissuteqassaaq, attartortitsisullu tassunga atatillugu piumasarisinnaavaa attartortut allamut nuuttoqarnerani pissusaatut pilersitseqqissasut aamma attartortut atortut peerneqareerpata illumik pissusaatut pilersitseqqinnissamut qulakkeerutaasunik naammaginartunik qularnaveeqqutissanik akiliissasut.

 

§ 34. Attartortoq attartortitsisoq siumut allakkatigut akuersissuteqarteqqaarlugu isumaginninnermi inatsisini aalajangersakkat malillugit iluaqusersuutinik ikkussuisinnaatitaavoq. Attartortitsisup piumasaqaatigisinnaavaa attartortoq qimatsinermini pissusiatut pilersitseqqissasoq aamma kommunalbestyrelsi pissusaatut pilersitseqqinnermut aningaasartuutit akilerneqarnissaannut qularnaveeqqusiisuussasoq. Attartortup attartortitsisoq iluaqusersuutit ikkussuunneqannginneranni kingusinnerpaamik sapaatit akunnerinik arfinilinnik sioqqutsilluni ilisimatitsissuteqarfigissavaa.

 

§ 35. Attartortoq ajoqusikkanut attartortut ataasiakkaat §§ 32-34 malillugit ikkussuussimasaannik pissuteqartunut taarsiinissamut akisussaavoq. Attartortitsisup piumasarisinnaavaa attartortoq qularnaveeqqusiinikkut allatulluunniit taarsiinissamik piumasaqaatip naammassineqarnissaanut pisariaqartinneqartumik pinngitsoorani qulanaveeqqusiissasoq.

 

§ 36. Attartortoq attartortitsisumit siumut allaganngorlugu pisinnaatinneqaqqaarluni inissiami silataanilu erseqqissumik aalajangikkanik pitsanngorsaasinnaatitaavoq il.il. allamullu nuunnermini aningaasartuutigisimasami uppernarsaaserneqartut aningaasanngorlugit taarsertinnissaannut pisinnaatitaalluni, tak. §§ 37 aamma 38.
Imm. 2. Pitsanngorsaanerit il.il. naammaginartuullutillu naleqquttuussapput, immikkut inuulluarniutinut tunngasuunatik immikkullu nukissiuutinik atuiffiusariaqaratik. Suliat inissarsiortunut assigiinngitsunut, taamatuttaaq utoqqarnut inunnullu innarluutilinnut, inissiaq inissiatut atorsinnaajunnaarsissanngilaat. Suliat attartortitsisumut immikkut ingerlatsinermut aserfallatsaaliinermullu aningaasartuutinik kinguneqarpata ineqarnermut akiliutit taamatut qaffanneqassapput.

 

§ 37. Taartisiat attartortitsisumit attartortup inissiamik qimatsinerani akiliutigineqassapput. Attartortitsisoq attartortup attartortitsisumut pisussaaffiinut taartisiassaanik ilanngaassisinnaavoq. Taartisiassat attartortup pitsangorsaasimaneraniit qaammatit 100-t ingerlaneranni nalikillilerneqassapput.
Imm. 2. Nutaamik attartulersoq inissiamut attartortuusimasup pitsanngorsaaffigisimasaanut il.il. nuuttoq attartortitsisup taarsiissutigalugit aningaasartuutigisimasani matussutissiiviginiarlugit ineqarnermut akiliummik qaffaanera akilersussavaa. Akiliutip qaffaataa unitsinneqassaaq appartitsiartuaarneq naammassippat, tak. imm. 1.

 

§ 38. Naalakkersuisut attartortup pitsanngorsaanerit suliassallu allat suut suliarisinnaanerai aamma taartisiassat annertussusissaat, naatsorsorneqartarnerat akiliutigineqarnissaallu pillugit maleruagassanik erseqqinnerusunik aalajangersaassapput.

 

Kapitali 7.
Atuisinnaatitaanerup allanut nuunneqarnera

 

§ 39. Attartortup inissiamik attartornermut isumaqatigiissut eqqortissimappagu, attartortoq inissiamik allanut attartortitsisinnaatitaavoq, attartortoq peqanngikkallassappat napparsimanermik, ilinniagaqarluni allamiinnermik, nuukkallarnermik imaluunniit assigisaannik pissuteqartumik.
Imm. 2. Attartortitsisup allanut attartortitsineq akerliuffigisinnaavaa,
1) inissiami inuit katillugit ineeqqanit inigineqartussanit amerlaneruppata, imaluunniit
2) taamatuttaaq attartortitsisoq allanut attartortitsinissamut akerliussalluni pissutissaqavippat.
Imm. 3. Namminersornerullutik Oqartussat kommunillu inissiaataanni attartortittakkani attartortoq inissiamik allanut attartortitsinermut taarsiullugu piffissap peqanngiffiup naanerani inissaminik allamik innersuunneqarnissani qularnaarlugu attartornerminik atorunnaarsitsisinnaavoq, tak. § 4, imm. 1, nr. 2.
Imm. 4. Allanut attartortitsisarneq aamma inissaqartitsinissamik qularnaveeqqusiisarneq pillugit maleruagassat Naalakkersuisunit aalajangersarneqassapput.

 

§ 40. Attartortup toqunerani aapparisaa qimataasoq atugassarititaasut atuinnarlugit attartornermik ingerlatseqqiinnarsinnaatitaavoq. Inuttaaq inissiamik attartornermut isumaqatigiissummi atsioqataasimanngitsoq kisiannili sivikinnerpaamik ukiuni marlunni attartortumut illoqataasimasoq taamatut pisinnaatitaaffeqarpoq.
Imm. 2. Sulisunut inissiaq pineqarpat attartortup pisortani sulisitsisuusuni suliffeqarnermigut sulisunut inissiatut innersuunneqarfigisimasaa, aappaasoq attartornermut atugassarititaasut atorlugit inissiamik innersuussivigineqarsinnaatitaavoq. Innersuussinissamut piumasaqaataavoq aappaasup nammineerluni pisortani sulisitsisuusuni atorfeqarnermigut sulisunut inissiamik innersuussivigineqarsinnaatitaannginnissaa aamma attartortup aappaasulluunniit sivikinnerpaamik ukiuni marlunni utaqqisut allattorsimaffianni nalinginnaasumi allaqqasimanissaa, tak. § 3. Taamatuttaaq pisinnaatitaaffeqarpoq inuk sivikinnerpaamik ukiuni marlunni attartortumut illoqataasimasoq.
Imm. 3. Attartortoq utoqqalinini nappaateqarniniluunniit pissutigalugit paaqqinnittarfimmut assigisaanulluunniit nuuppat, imm. 1-2-mi aalajangersakkat taamatuttaaq atorneqassapput.

 

§ 41. Attartortoq averuserpat imaluunniit avippat imaluunniit attartortup aappariinnera atorunnaarsinneqarpat, pisariaqassappat akuersissuteqarnikkut eqqartuussinikkulluunniit aappariit arlaat inissiamik attartortuuinnarsinnaatitaanersoq aalajangerneqassaaq.
Imm. 2. Attartortup aappani qimappagu, aappaasoq attartortuuinnarsinnaatitaavoq.

 

§ 42. Inuit sivikinnerpaamik ukiuni marlunni illoqatigeereersut inooqatigiinnertik taamaatikkunikku isumaqatigiissutigisinnaavaat arlamik sorliup attartorneq ingerlatiinnarsinnaassaneraa. Attartortitsisoq isumaqatigiissummut akerliusinnaavoq, tassa attartortitsisoq taamaaliornissaminut pingaarutilinnik pissutissaqaruni.
Imm. 2. Pineqartut akornanni isumaqatigiittoqarsinnaanngippat taakkua arlaat kina ataatsimut inigisimasaminnut attartortuuinnarsinnaatitaassanersoq eqqartuussinikkut aalajangiisoqarsinnaavoq. Eqqartuussinermi meeqqat nammineersinnaassuseqalersimanngitsut pingaartumik sianiginiarneqassapput.

 

§ 43 Attartortup pisinnaatitaaffiit §§ 39-42 malillugit attartortup allalluunniit pisinnaatitaaffigisaat annaasinnaanngilai, taamaattorli tak. imm. 2 - 4.
Imm. 2. § 40, imm. 2-mi aalajangersakkat atuutissanngillat inissiaq sulisunut inissiaappat atorfimmut aalajangersimasumut atugassanngortitaq. Taarsiullugu inissiamik allamik innersuussisoqarsinnaavoq, tak. § 4, imm. 1, nr. 3.
Imm. 3. § 40, imm. 1-mi aalajangersakkat inissianut innarluutilinnut inissiatut immikkut aaqqissukkanut atugassanngortinneqarsimasunullu atuutinngillat. Taarsiullugu inissiaq alla innersuussutigineqarsinnaavoq, tak. § 4, imm. 1, nr. 4.
Imm. 4. §§ 41 aamma 42-mi aalajangersakkat atuutissanngillat inissiaq atorfeqartitaanermut atatillugu atugassanngortitaasimappat imaluunniit innarluutilinnut inissiatut innersuussutaasimappat.

 

Kapitali 8.
Atorunnaarsitsineq

 

§ 44. Attartortup inissiamik attartornermut isumaqatigiissut attartornermut isumaqatigiissummi atorunnaarsitsinissamik ilimasaarinissamik allassimasutut atorunnaarsissinnaavaa, tamaattorli tak. § 50, imm. 2. Attartortulli aapparisani akuersiseqqaartinnagu ilaqutariit inigisaannik attartorneq imaluunniit aappariit imaluunniit aapparisap suliffeqarfianut atatillugu attartornermut isumaqatigiissut atorunnaarsissinnaanngilaa.

 

§ 45. Sulisunut inissiamik attartorneq atorfeqarnerup unitsinneqarnerani atuukkunnaassaaq tamatumunngalu atatillugu qimanneqassalluni.

 

§ 46. Attartortitsisup makkuninnga attartorneq atorunnaarsissinnaavaa:
1) Ineeqqanik, attartortitsisup inissiami inigisaataa ilaaniittunik, imaluunniit illuni ilaqutariinnut ataatsinut marlunnulluunniit inissiani attartortitsisup najugarisaaniittuni.
2) inissiami illumiittumi, taakkunani piffissami atorunnaarsitsiviusumi taamaallaat marlunnik inissiartalimmi, taakkunannga piginnittoq aappaani najugaqartillugu.

 

§ 47. Attartornerni allani § 46-mi taaneqanngitsuni attartortitsisoq taamaallaat atorunnaarsitsisinnaavoq:
1) Attartortitsisup nalunaarutigippagu attartortitani nammineerluni najugaqalivinniarluni, imaluunniit tunngavissat pingaaruteqartut attartortitsisup attartornermit atorunnaarsitsinissaanut immikkut pissutissaqartitsippata, aammalu atorunnaarsitsiniarluni nalunaaruteqarneq illuatungeriinnut tunngasut nalilerneqarnerat aallaavigalugu akuersaarnartutut isiginarpat.
2) Attartortitsisup uppernarsarpagu illumik isaterinerup allanngortiterinerulluunniit kingunerissagaa attartorneqartup qimanneqartariaqalernera.
3) Attartortoq illup ingerlatsivigineranut atatillugu atorfeqartitaasimappat, inissiarlu attartortitseqqinnermi atorfimmit taartaasumut atorneqassappat.
4) Attartortoq attartortitsisoq eqqaasitsisaraluartoq pissuserisassanik malinninngippat imaluunniit illuanut ineqartunulluunniit allanut akornutaappat pissutsilli imaagatik attartortitsisup attartornermik isumaqatigiissut atorunnaarsisinnaallugu.

 

§ 48. Namminersornerullutik Oqartussat kommunilluunniit attartukkamik nutarterinissap isaterinissalluunniit kingunerisaannik attartortitsineq atorunnaarsippassuk, tak. § 47, nr. 2, attartortoq inissiamik taartaasussamik innersuussivigineqassaaq, tak. § 4, imm. 1, nr. 1. Inissiamik taartaasussamik innersuussisussaatitaaneq taamaallaat atuuppoq, attaartortup attartornermut isumaqatigiissummi atorunnaarsinneqartumi attartornissamik isumaqatigiissut eqqortissimappagu.
Imm. 2. Attartortut, nutarterinissap kingunerisaanik inissiamik taartaasussamik innersuu-ssivigineqartut, nutarterinerup naammassereerneratigut illuni nutarterneqartumi inissiamik innersuussivigineqarnissaminnut salliutinneqartussaatitaapput, attartortulli isaterinerup kingunerisaanik inissiamik taartaasussamik innersuussivigineqartut illuni isaterneqartunut taartaasussatut inissiaqarfimmi tassani sananeqartuni inissiamik innersuussivigineqarnissaminnut salliutinneqartussaatitaallutik.
Imm. 3. Salliutinneqartussaatitaaneq taamaallaat atuutissaaq attartortup inissiami taartaasussatut innersuussivigineqartumi attartornermut isumaqatigiissut eqqortissimappagu, taamatullu attartortup inissiamik innersuussivigineqarnissamut piumasaqaatit allat naammassisimappagit. Attartortitsisup pissutsit annertuumik pingaaruteqanngitsut, imaluunniit attartortumit piffissami iluarsaassinissaq isaterinissarluunniit pissutigalugit attartorunnaarnissamik nalunaaruteqarfiup nalaani aaqqinneqarsimasut pissutiginiarsarisinnaanngilai.

 

§ 49. Attartortitsisup § 47 malillugu attartornermik atorunnaarsitsinera allakkatigoortuussaaq attartortullu imm. 2 malillugu akerliliisinnaatitaanera pillugu paasissutissanik imaqassalluni. Atorunnaarsitsinertaaq atorunnaarsitsinermut pissutaasut pillugit paasissutissanik imaqassaaq.
Imm. 2. Attartortup atorunnaatsitsineq akuerisinnaanngikkuniuk attartortoq atorunnaarsitsinerup tiguneraniit sapaatit akunneri arfinillit nallertinnagit allakkatigut akerliliissummik saqqummiussaqassaaq. Taamatut pisoqarpat attartortitsisoq sapaatit akunneri arfinillit suli allat nallertinnagit eqqartuussivimmut suliassanngortitsissaaq, tassa attartortitsisup atorunnaarsitsineq atuutiinnassasoq kissaatigiguniuk. Namminersornerullutik Oqartussat kommunillu inissiaataanni attartortittakkani inissiamik attartornermik atorunnaarsitsinermut § 47, nr. 2 malillugu akerliliineq kinguartitsigallarnermik kinguneqarsinnaanngilaq.

 

§ 50. Attartortitsisumit atorunnaarsitsisoqassaaq sivikinnerpaamik qaammatinik pingasunik siumut ilimasaaruteqarluni qaammatip naanerani pisussanngorlugu, taamaattorli qaammammik ataasiinnarmik siumut ilimasaaruteqarluni ineeqqanik attartorneq tamatumani pineqarsimappat, tak. § 46, nr.1.
Imm. 2. Attartortumit atorunnaarsitsisoqassaaq allakkatigut sivikinnerpaamik qaammammik ataatsimik siumut ilimasaaruteqarluni qaammatip naanerani pisussanngorlugu.
Imm. 3. Attartortoq siumut ilimasaaruteqarsimaneq naatinnagu inigisaminik qimatsippat attartortitsisup attartorneqartup attartorteqqinnissaa ilungersuutigissavaa. Attartortitsisup attartortitseqqinnermini isertitai isertitassaraluiluunniit attartortumut piumasaqaataanit ilanngaatigineqassapput.

 

§ 51. Attartornermik isumaqatigiissut piffissamut aalajangersimasumut isumaqatigiissutaasimappat attartorneq isumaqatigiissuteqarfiup naanerani siumut unitsinniarneqaqqaarani atorunnaassaaq. Piffissamut aalajangersimasumut attartornissamik isumaqatigiissut attartornerup nalaani unitsinniarneqarsinnaanngilaq, allallugu isumaqatigiissutigineqarsimanngippat attartornissamik isumaqatigiissutip atorunnaarsinneqarsinnaanera.
Imm. 2. Attartortitsisulli imm. 1-mi aalajangersakkat apeqqutaatinnagit kapitali 9-mi maleruagassat malillugit attartornissamik isumaqatigiissut atorunnaarsissinnaavaa pissutsit attartortumik assuarliutissat annertuumik pingaaruteqarpata.

 

§ 52. §§ 47-51-imi maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.

 

Kapitali 9.
Attartortitsisup attartornermut isumaqatigiissummik atorunnaarsitsisinnaanera

 

§ 53. Attartortitsisup attartornermik isumaqatigiissut atorunnaarsissinnaavaa imatut pisoqartillugu:
1) Ineqarnermut, kiassarnermut qularnaveeqqusiissutinulluunniit akiligassat akilersorneqan-ngippata, tak. §§ 17, imm. 1 aamma 18, imm. 1.
2) Inissiaq inatsisinik unioqqutitsinikkut atorneqarpat, tak. § 29, imm. 1 aamma 2.
3) Piffissaanngitsukkut inissiaq qimanneqarpat, tak. § 29, imm. 4.
4) Attartortitsisoq inatsisinik unioqqutitsinikkut inissiamut iseqquneqanngippat, tak. § 30, imm. 1.
5) Pissuserisassatut malittarisassat unioqqutinneqarpata, tak. § 31.
Imm. 2. Attartortitsineq attartortitsisup taamaallaat atorunnaarsissinnaavaa, pissutsit attartortumut nammagassersuutaasut annertuumik pingaaruteqarpata. Attartortitsineq atorunnaarsinneqarsinnaalersinnagu attartortitsisup attartortoq pissutsinik iluarseeqqullugu peqqussavaa, aamma attartortitsisup pissutsit imm. 1, nr. 1-5-mi taaneqartut patsisiginiarsinnaanngilai attartortitsisup attartornermik isumaqatigiissummik atorunnaarsitsinnginnerani iluarsineqarsimappata.

 

§ 54. Attartortitsisup attartornermik isumaqatigiissut taamaallaat kingusinaartumik akiliisoqartillugu atorunnaarsissinnaavaa, tak. § 53, imm. 1, nr. 1, allakkatigut tamanna pillugu piumasaqaatip attartortumut takkunnerata kingornatigut kingusinnerpaamik ulluinnaat pingasut qaangiunneranni akiligassanut kinguaattoorutit attartortup iluarsisimanngippagit. Attartortitsisup piumasaqaataa ullup akiliiffissap eqqortup kingulliup kingornatigut tunniunneqarsimassaaq paatsuugassaanngitsumillu allassimassalluni attartortitsineq atorunnaarsinneqarsinnaasoq attartornermut akiliutissanut kinguaattoorutit piffissamik killiliussap naannginnerani akilerneqanngippata.
Imm. 2. Piumasaqaateqarnermut akiliutitut attartortitsisup 50 kr. akileqqusinnaavai 1000 kr.-t saniatigut aningaasat akiligassat 2 %-ii ilanngullugit. Aningaasat kroninut ilivitsinut qaninnerpaanut akunnaallisineqassapput.

 

§ 55. Attartortitsisup attartortitsineq atorunnaarsissinnaavaa attartortoq illumut, attartortitsisumut, taassuma sulisuinut, illumi attartortunut allanut inatsisit malillugit illumi angalaartunut annertuumik ajoqutaasumik pissusilersorpat, taamatuttaaq:
1) Attartortoq inunnut pineqartunut nakuuserpat imaluunniit nakuusernissamik siorasaarippat.
2) Attartortup pissusilersornera illumut imaluunniit inunnut pineqartunut ulorianartorsiortitsisinnaappat, taamatuttaaq sakkunik atuinermik imaluunniit attartorneqartumi atortussanik ulorianartunik uninngatitaqarnermik pissuteqartumik.
Imm. 2. Attartortitsineq atorunnaarsinneqarsinnaavoq pissusilersorneq imm. 1-imi taaneqartoq attartortumit namminermit, attartortup illoqataanit allanilluunnit attartortup attartukkamut isersinnaatitaanit pissusilersornerunersoq apeqqutaatinnagu.

 

§ 56. §§ 53 aamma 55-imi taaneqartut pissutigalugit attartortitsineq atorunnaarsinneqarpat, attartortoq pisussaavoq attartukkani ingerlaannaq qimassallugu ineqarnermullu akiliutit akiligassallu allat attartortup nalinginnaasumik ilimasaaruteqarnikkut nuunnissaata tungaanut attartortitsinerup kingunerisai akilissallugit. Taamatuttaaq attartortoq pisussaavoq attartortitsisoq annaasanut atornerluinerup kingunerisaanut taamatuttaaq attartortitamit anisitsinikkut aningaasartuutaanut taarsiivigissallugu.
Imm. 2. Attartortitsisup attartukkap attartorteqqinnissaa anguniassavaa. Attartortitsisup piffissami imm. 1-imi taaneqartumi attartortitseqqinnermini isertitai isertitassaraluiluunniit attartortumut piumasaqaataanit ilanngaatigineqassapput.
Imm. 3. Namminersornerullutik Oqartussat kommunillu inissiaataanni attartortittakkani attartortitsinermik atorunnaarsitsinermi maleruagassat Naalakkersuisunit aalajangersarneqassapput.

 

Kapitali 10.
Attartortup inigisamit nuunnera

 

§ 57. Attartortup inissiamit nuunnermi attartukkani iserterfigeqqaarneratut pissuseqartillugu tunniutissavaa.
Imm. 2. Pisariaqassappat inissiamit nuuttoqarnerani inissiaq nalinginnaasumik iluarsaanneqassaaq qilaavi qalipallugit, iigai qalipallugit tapetilersorlugillu kiisalu pisariaqartinneqartumik eqqiarlugu. Natii nutaamik lakersimasutut isikkoqassapput.
Imm. 3. Attartortup nammineerluni nuunnermini nalinginnaasumik iluarsaassinissani kissaatigippagu, iluarsaassineq suliarineqassaaq suliarinerani assassornermik ilinniagaqarsimasutut illersorneqarsinnaasumik pitsaassusilerlugu. Unitsitsiniarneq imaluunnit attartornerup atorunnaarsinneqarnissaa kiisalu inissiap misissoriartorneqarnissaa sioqqullugu suliaq naammassereerneqarsimassaaq, tak. § 59.
Imm. 4. Attartortup nuunnermi nammineerluni nalinginnaasumik iluarsaassisarneranut aamma attartortup tamatumunnga atatillugu aningaasartuutaasa akilerneqartarnerannut maleruagassat erseqqinnerusut Naalakkersuisunit aalajangersarneqassapput.

 

§ 58. Attartortup inissiamik tigusineraniit qaammatit 100-t ingerlanerini § 57 malillugu nalinginnaasumik iluarsaassinermut aningaasartuutit attartortitsisup tigujartuaassavaa. Piffissaliussatut aalajangiunneqartup naannginnerani allamut nuuttoqartillugu attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.

 

§ 59. Attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allakkatigut isumaqatigiissutigissavaat. Attartortoq pisariaqassappat immikkut ilisimasalimmik ilaqarluni misissuinermut peqataasinnaatitaavoq. Attartortitsisup sivikinnerpaamik ullunik arfineq marlunnik siumut ilimasaaruteqarluni attartortoq misissuinermut peqataaqqullugu qinnuigisinnaavaa.
Imm. 2. Misissuinermi attartortitsisoq misissuisimanermit nalunaarusiussaaq, tassani allassimassapput amigaataasinnaasut paarinerlutallu attartortitsiup isumaa malillugu attartortup akisussaaffigisassai. Attartortoq taakkununnga isumaqataanngippat tamanna nalunaarusiami allanneqassaaq attartortup isumai taallugit. Nalunaarusiaq illuatungeriinnit misissuinermut atatillugu atsiorneqassaaq. Attartortup taassumaluunniit sinniisaata misissuinermut atatillugu nalunaarusiap assilineqarnera pissarsiarissavaat. Tulliullugu attartortoq pissuteqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussat pillugit allakkatigut akigitissamaakkanik nalunaarfigineqassaaq.
Imm. 3. Attartortup inissiamik qimatsinissani kingusinnerpaamik ullunik arfineq pingasunik sioqqullugu najugaqarfik nalunaarutit nassiunneqartarfissaat nalunaarutigissavaa.

 

§ 60. Attartortoq taassumaluunniit piginnaatitaa misissuinermut takkutinngippat, attartortitsisoq pisinnaatitaavoq nalunaarusiaq tunngavigissallugu aamma attartortup nalinginnaasumik iluarsaassinermut aningaasartuutaanut, tak. §§ 57, imm. 2 aamma 58, aningaasartuutit matussuserneqarnissaannut aamma attartornermik isumaqatigiissut naapertorlugu attartortup pisussaaffiisa matussuserneqarnissaannut attartortup qulanaveeqqusiissutaasa atornissaannut.
Imm. 2. Attartortitsisup amigaatit misissuinermi pissusissaatut sissuernikkut malugineqarsinnaasimagaluit attartortoq peqqusersusaarluni iliuuseqarsimanngippat piumasaqaatigisinnaanngilai.
Imm. 3. Attartortitsisoq nuuffigineqartumi paarsinerluttoqarsimaneranik aserorterisoqarsimaneranilluunniit piumasaqaateqarpat, pissutsit annertussusiilu immikkoortillugit uppernarsaaserneqassapput.

 

Kapitali 11.
Ikaarsaariarnermi atuutilersitsinermilu aalajangersakkat

 

§ 61. Inatsisartut peqqussutaat manna 1. januar 2002-imi atuutilissaaq.
Imm. 2. Peqatigitillugu atorunnaassapput inissianik attartorneq pillugu Inatsisartut peqqussutaat nr. 3, 13. juni 1994-imeersoq kingullermik Inatsisartut peqqussutaatigut nr. 3-kkut 29. oktober 1999-imeersukkut allanngortinneqarsimasoq.
Imm. 3. Nalunaarutit allaffitsigoortumillu aalajangersakkat Inatsisartut peqqussutaani taaneqartumi imm. 4 malillugu aalajangersagaasut atuutiinnassapput allanngortinneqarnissamik imaluunniit peqqussut manna malillugu aalajangersakkatigut atorunnaarsinneqarnissartik tikillugu.

 

§ 62. § 13, imm. 1 aamma 2 attartornernut Inatsisartut peqqussutaata atuutilinnginnerani isumaqatigiissutigineqarsimasunut atuutissanngillat. § 26, imm. 3 aamma §§ 57-60 attartornernut 1. januar 1990 sioqqullugu isumaqatigiissutigineqarsimasunut atuutissanngillat.
Imm. 2. Namminersortut attartortittagaanni attartornerni Inatsisartut peqqussutaata matuma atuutilinnginnerani isumaqatigiissutigineqarsimasuni attartornermut akiliutissatut isumaqatigiissutigineqarsimasut attartornerit uninnissaata tungaanut allanngortinneqaratik ingerlaqqitsiinnarneqassapput.

Namminersornerullutik Oqartussat, ulloq 31. maj 2001.

Jonathan Motzfeldt

/

Steffen Ulrich-Lynge