Aalisarneq pillugu Inatsisartut inatsisaanni nr. 18-imi 31. oktober 1996-imeersumi, kingullermik aalisarneq pillugu Inatsisartut inatsisaata allanngortinneqarneranik Inatsisartut inatsisaatigut nr. 6-ikkut, 20. maj 1998-imeersukkut allanngortinneqartumi, aalisarneq pillugu Inatsisartut inatsisaata allanngortinneqarneranik Inatsisartut inatsisaatigut nr. 5-ikkut, 21. maj 2002-imeersukkut allanngortinneqartumi § 5, § 8, § 10, § 10a, imm. 1, § 13, imm. 2, § 23, § 24, imm. 1, § 25, § 26, § 33, imm. 2 aamma § 34, imm. 3 malillugit aalajangersarneqarpoq:

 

Atuuffia

§ 1. Nalunaarut kapisilinniarnermut tamarmut imartani Kalaallit Nunaata aalisarnikkut oqartussaaffigisaani Nunap Isuata kitaani NAFO-p sumiiffilersuiffiani 1-imi ingerlanneqartumut atuuppoq. Tunngaviusumik killigititamit 40 sømilit avataanni aalisarneq inerteqqutaavoq.
Imm. 2. Kalaallit Nunaata Kangiata aalisarfittaani kapisilinniarnermi malittarisassat nalunaarummi §§ 5 imm. 2, 6, 7, 8, 9, 10 aamma 12-mi taaneqartut taamatuttaaq atuupput. Tunngaviusumik killigititamit 12 sømilit avataanni aalisarneq inerteqqutaavoq.
Imm. 3. Nalunaarut aammattaaq kapisilinnik pisinerup tunisinerullu nalunaarutigineqarnerinut kiisalu inuussutissarsiummut atatinnagu kapisilinniarnermi pisat nalunaarutigineqarnerinut atuuppoq.

 

Nassuiaatit

§ 2. Inuussutissarsiutigalugu kapisilinniarneq nalunaarummi matumani paasineqassaaq pisat tamaasa ilaannaasaluunniit tuniniarnissaat siunertaralugu kapisilinniarnertut. Inuussutissarsiutigalugu kapisilinniarnissamut akuersissummik allagartallit kisimik kapisilinnik tuniniaasinnaatitaapput.
Imm. 2. Inuussutissarsiummut atatinnagu kapisilinniarneq nalunaarummi matumani paasineqassaaq nammineq atugassanik kapisilinniarnertut.
Imm. 3. Kapisilinnik pisineq nalunaarummi matumani paasineqassaaq inunnit kapisilinniarnissamut akuersissummik allagartaqartunit toqqaannartumik pisineq tigusinerlu.
Imm. 4. Piffissaq aalisarfiusoq nalunaarummi matumani paasineqassaaq piffissatut imaluunniit piffissat ilaattut kapisilinniarsinnaatitaaffittut.
Imm. 5. Pisassat ilaat nalunaarummi matumani paasineqassaaq pisassat tamarmiusut piffissami aalisarfiusumi piffissami aalajangersimasumi aalisarneqarsinnaasutut.

 

Inuussutissarsiutigalugu kapisilinniarnermut piumasaqaatit

§ 3. Akuersissummik allagartamik tunineqartut kisimik inuussutissarsiutigalugu kapisilinniarsinnaatitaapput. Inuussutissarsiutigalugu kapisilinniarsinnaanermut allagartat akuersissutit Aalisarnermut Pisortaqarfik tunniunneqassapput.
Imm. 2. Allagartat akuersissutit qinnuteqartunut piumasaqaatinik makkuninnga naammassinnittunut tunniussisoqarsinnaavoq:
1) Inuiaqatigiinnut kalaallinut attuumassuteqavissunut, tak. aalisarneq pillugu Inatsisartut inatsisaanni § 3, imm. 4.
2) Qassutinik kapisilinniutinik aamma angallammik kapisilinniummik 12,8 meterit (42 fod) tikillugit tamakkerlugu angissusilimmik nammineq pigisaqartunut.
3) Qinnuteqarnermut atatillugu qinnuteqartumit pigineqartut qassutit kapisilinniutit qassiunerinik qanorlu ittuunerinik imaluunniit ilisarnaataannik nalunaaruteqartumut.
Imm. 3. Angallatit raajarniarnermut atorneqartut inuussutissarsiutigalugu kapisilinniarnermut atorneqassanngillat.

 

Inuussutissarsiutigalugu kapisilinniarnermi piniutit

§ 4. Inuussutissarsiutigalugu kapisilinniarneq qarsorsat qassutilluunniit tasillugit 140 mm-inik nigartallit atorlugit taamaallaat ingerlanneqassaaq. Qassutit tissukartittakkat atorneqarsinnaapput, taamaattorli atuinermi ataatsimi amerlanerpaamik uiguleriit 20-kkuutaarlugit.
Imm. 2. Qassutit nigartaat uuttorneqassapput aalisarnermik nakkutilliisut uuttuutaata ½ kiilumik oqimaalutserlugu nigartamut ikkunneratigut nakkartinneratigullu. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput. Nigartat tamarmik imm. 1-imi piumasaqaat eqqortissavaat.
Imm. 3. Qassutit kapisilinniutit atorneqartut tamarmik piginnittup aqqanik imaluunniit taassuma angallataata normuanik nalunaaqutsersugaassapput. Nalunaaqutsiinermi atorneqartoq imermi allanngujaatsuussaaq.
Imm. 4. Silap pissusaata taamaattoqartissinnaappagu qassutit kapisilinniutit akuttunngitsumik akulikitsumillu qassusiarfigineqartassapput, pisat uumanissaminnut periarfissaat ajornerulertussaajunnaarlugit.

 

Inuussutissarsiutigalugu kapisilinniarnerup aqunneqarnera

§ 5. Inuussutissarsiutigalugu kapisilinniarneq, tak. § 2, imm. 1, imatut ingerlanneqassaaq:
1) Pisassiisarluni aalisarnertut ingerlatseqatigiiffinnut pisiortortunut tunisassanik.
2) Pisassiisarani aalisarnertut taamaallaat najukkani assigiinngitsuni kalaalimineerniarfiit kiisalu akunnittarfiit, neriniartarfiit, napparsimmaviit, ilinniartut ineqarfii nerisaqarfiillu tamanut ammasut allat aqqutigalugit tuninarneqarsinnaasunik.

§ 6. Aalisarnermut, tak. § 5, imm. 1, nr. 1, Naalakkersuisut ukiut tamaasa, nunat tamalaat akornanni isumaqatigiissutit mianeralugit, Kitaani kapisilittassat amerlanerpaaffissaannik aalajangersaasassapput. Pisassat pisassanut immikkoortiterneqarsinnaapput piffissap ilaani aalisarneqarsinnaasutut agguataarneqarsinnaallutik.
Imm. 2. Aalisarnermut Pisortaqarfik KNAPK-lu isumasioqatigereerlugu inuussutissarsiutigalugu kapisilinniarnissamut piffissat ilaannut ataasiakkaanut ulloq aallartiffissaq aalajangertassavaa. Piffissat ilaannut ataasiakkaanut ulloq aallartiffissaq kommuninut ataasiakkaanut, KANUKOKA-mut, KNAPK-mut kiisalu nuna tamakkerlugu tusagassiorfiit aqqutigalugit nalunaarutigineqassaaq.
Imm. 3. Inuussutissarsiutigalugu kapisilinniarneq piffissat ilaannut ataasiakkaanut ulloq aallartiffissatut aalajangerneqartoq sioqqullugu aallartinneqassanngilaq aammalu piffissat ilaasa ataasiakkaat naanerisigut unitsinneqarluni imaluunniit pisassat ilaat nungunneqarpata.
Imm. 4. Inuussutissarsiutigalugu kapisilinniarneq taamaallaat pisassatut aalajangerneqartut, aalisakkat uumatillutik uuttuutaattut (ilivitsuutillugit) kiilunngorlugit taaneqartut, iluanni pisinnaavoq.
Imm. 5. Inuussutissarsiutigalugu kapisilinniarnermit pisat Kalaallit Nunaata avataani taamaallaat pisiariortorneqarsinnaapput tuniniarneqarsinnaallutillu Naalakkersuisut pisinnaatitsineratigut.

§ 7. Kapisilittassiissutit ilaat aalajangikkat tamakkerlugit pisarineqarnissaat qanillippat, Aalisarnermut Pisortaqarfiup nalunaarutigissavaa, qaqugu inuussutissarsiutigalugu kapisilinnik aalisarneq kiisalu taamatut aalisarnermit pisanik pisineq aamma tunisineq unissasoq.
Imm. 2. Tamanna kommuninut ataasiakkaanut, KNAPK-mut KANUKOKA-mullu aammalu nuna tamakkerlugu tusagassiorfiit aqqutigalugit nalunaarutigineqassaaq.
Imm. 3. § 6, imm. 3 naapertorlugu aalisarneq unippat, inuussutissarsiutigalugu kapisilinniarneq sunaluunniit kiisalu aalisarnermit tamatumannga pisineq tunisinerlu inerteqqutaapput.

§ 8. Aalisarnermut, tak. § 5, imm. 1, nr. 2, Naalakkersuisut kapisilinniarnerup ulloq aallartiffissaa unitsinneqarfissaalu ukiut tamaasa aalajangersartassavaat.
Imm. 2. Aalisarneq unitsinneqarpat, tak. imm. 1, inuussutissarsiutigalugu kapisilinniarneq kiisalu taamatut aalisarnermit pisanik pisiortorneq tunisinerlu inerteqqutaalissapput.

 

Inussutissarsiutigalugu kapisilinnik aalisarnermit pisanik nalunaaruteqartarneq

§ 9. Kapisillit pisarineqartut tamarmik Kalaallit Nunaanni Aalisarnermik Nakkutilliisoqarfimmut (KANUAANA) nalunaarutigineqassapput.
Imm. 2. Tunisat imaluunniit akigineqartut amerlassusii "niaquernagit erlaveerlugit" nalunaarutigineqarpata naatsorsueriaaseq 1,11 atorneqassaaq aalisakkat ilivitsunngortillugit naatsorsorneranni.
Imm. 3. Tunisassiorfimmut ingerlatseqatigiiffimmut tunisinermi ingerlatseqatigiiffiup tunisanik nalunaaruteqarnerit ullut tamaasa KANUAANA-mut nassiuttassavai, tak. imm. 5.
Imm. 4. Aalisartut inuussutissarsiutigalugu kapisilinniarnissamik akuersissummik allagartamik pillit, kalaalimineerniarfinni toqqaannartumik tunisisartut imaluunniit kalaalimineerniarfiit avataatigut toqqaannartumik pisumut tunisaqartartut ullut tamaasa tunisatik KANUAANA-mut nalunaarutigisassavaat, tak. imm. 5.
Imm. 5. Kapisillit pisat tunisallu KANUAANA-mut ullut tamaasa nalunaarutigineqartassapput. Tamanna pissaaq tunisinermut allattuiffiit atorlugit nalunaaruteqarnikkut, tak. imm. 6, imaluunniit oqarasuaat atorlugu nalunaaruteqarnikkut, tak. imm. 7, imaluunniit e-mail atorlugu, tak. imm. 8.
Imm. 6. Tunisanik allattuiffiit, tak. nalunaarummut ilanngussaq 1, ullut tamaasa KANUAANA-mut, Postboks 501, 3900 Nuuk, Telefax 32 32 35 imaluunniit 32 32 36 atorlugit nassiunneqartassapput.
Imm. 7. Oqarasuaatikkut nalunaarutit KANUAANA-mut oqarasuaat 34 50 00 atorlugu ulluinnarni tamani nal. 8.00-p aamma 11.00-p akornanni nalunaarutigineqarsinnaapput. Tallimanngornermit, arfininngornermit sapaammillu nalunaarutit ataasinngornermi tulliuttumi siullermi nalunaarutigineqartassapput. Oqarasuaatikkut nalunaarutit paasissutissartaasa tunisanik allattuiffinni paasissutissat assigissavaat.
Imm. 8. E-mail atorlugu nalunaarutit gflk@gh.gl atorlugu nalunaarutigineqassapput. E-mail atorlugu nalunaarutit paasissutissartaasa tunisanik allattuiffinni paasissutissat assigissavaat.
Imm. 9. Kapisillit tunineqarnissaat siunertaralugu pisarineqartut, tak. § 2, imm. 1, tunineqanngitsulli, § 11-mi malittarisassat naapertorlugit nalunaarutigineqassapput.

 

Inuussutissarsiummut atatinnagu kapisilinnik aalisarnermit pisanik nalunaaruteqartarneq

§ 10. Inuussutissarsiummut atatinnagu pisassiissutit aalajangersarneqartut avataasigut kapisilinnik aalisarneq § 5, imm. 1, nr. 1 naapertorlugu danskit naalagaaffianni innuttaassuseqartunit Kalaallit Nunaanni najugaqavissunit ingerlanneqassaaq, tak. aalisarneq pillugu Inatsisartut inatsisaanni § 8, imm. 1. Nunani allani innuttaassuseqartut Danmarkimeersuunngitsut Kalaallit Nunaanni najugaqavissut aammalu ukiuni marlunni ataannartumik najugaqareersut danskit naalagaaffianni innuttaassuseqartunut naligitinneqassapput.
Imm. 2. Inuussutissarsiummut atatinnagu kapisilinnik aalisarneq piffissap Naalakkersuisunit aalajangersarneqartup iluinnaani pisassiisarani inuusutissarsiutigalugu aalisarneq pisinnaavoq.
Imm. 3. Inuussutissarsiummut atatinnagu kapisilinnik aalisarneq taamaallaat pisinnaavoq angallatinit 12,8 meter (42 fod) tikillugit tamakkerlugu angissusilinnit. Inuussutissarsiummut atatinnagu kapisilinniarnermi qarsorsat qissattaatillu atornissaat inerteqqutaanngillat kiisalu qassutit (ataatsit) 2000-inik nigartallit, taakkua tasillugit nigartaat minnerpaamik 140 mm-iusut.
Imm. 4. Qassutit nigartaat uuttorneqassapput aalisarnermik nakkutilliisut uuttuutaata ½ kiilumik oqimaalutserlugu nigartamut ikkunneratigut nakkartinneratigullu. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput. Nigartat tamarmik imm. 1-imi piumasaqaat eqqortissavaat.
Imm. 5. Qassutit kapisilinniutit atorneqartut tamarmik piginnittup aqqanik imaluunniit taassuma angallataata normuanik nalunaaqutsersugaassapput. Nalunaaqutsiinermi atorneqartoq imermi allanngujaatsuussaaq.
Imm. 6. Silap pissusaata taamaattoqartissinnaappagu qassutit kapisilinniutit akuttunngitsumik akulikitsumillu qassusiarfigineqartassapput, pisat uumanissaminnut periarfissaat ajornerulertussaajunnaarlugit.

 

Inuussutissarsiummut atatinnagu kapisilinnik aalisarnermit pisanik nalunaaruteqartarneq

§ 11. Inuussutissarsiummut atatinnagu kapisilinnik aalisarnermi kapisillit pisarineqartut tamarmik KANUAANA-mut nalunaarutigineqassapput.
Imm. 2. Pisanik nalunaaruteqarneq nalunaarummut ilanngussaq 2 atorlugu, oqarasuaat imaluunniit e-mail atorlugit nalunaaruteqarnikkut pisassaaq. Nalunaarutit kingusinnerpaamik ullup pisaqarfiup aqaguani KANUAANA-mut, Postboks 501, 3900 Nuuk, Telefax 32 32 35 imaluunniit 32 32 36 atorlugit imaluunniit e-mail gflk@gh.gl atorlugu nassiunneqassapput.
Imm. 3. Oqarasuaatikkut nalunaarutit paasissutissartaasa ilanngussaq 2-mi paasissutissat assigissavaat.

 

Akiliilluni kapisilinnik aalisarneq

§ 12. Takornariat taamaallaat kapisilinnik aalisarsinnaapput akiliilluni aallaaniarneq aalisarnerlu pillugit Namminersornerullutik Oqartussat nalunaarutaat naapertorlugu.
Imm. 2. Taamaallaat akiliilluni kapisilinniartoqarsinnaavoq piffissap Naalakkersuisunit aalajangersarneqartup iluinnaani pisassiisarani inuussutissarsiutigalugu aalisarneq pisinnaavoq.
Imm. 3. Akiliilluni kapisilinnik aalisarnermi taamaallaat qarsorsap qissattaatillu atornissaat akuerisaavoq.
Imm. 4. Imm. 1 naapertorlugu kapisillit pisarineqartut Kalaallit Nunaanni Kalaallit Nunaataluunniit avataani pisiarineqaratillu tuniniarneqassanngillat.

 

Nakkutilliineq

§ 13. Angallatit, nalunaarummi matumani pineqartut KANUAANA, Sakkutuut imarsiortut (GLK), piniarnermik aalisarnermillu nakkutilliisut kiisalu politiit suleqatigissavaat suliffeqarfiit taakkua suliassaminnik isumaginninneranni, tak. aalisarneq pillugu Inatsisartut inatsisaanni §§ 26-31.
Imm. 2. Angallatit qulakkiissavaat KANUAANA-p, GLK-p aammalu politiit sulisuisa kiisalu piniarnermik aalisarnermillu nakkutilliisut ajornaquteqanngitsumik ikillutik angallammik nakkutilliinissaat.

 

Pineqaatissiissutit

§ 14. § 2, imm. 1-imik, § 3, imm. 1-imik, § 4, imm. 1-imik aamma 3-mik, § 5, imm. 2-mik, § 6, imm. 3, 4 aamma 5-imik, § 7 imm. 3-mik, § 8 imm. 2-mik, § 9, § 10, § 11, aamma § 12-mik unioqqutitsineq akiliisitaanermik aamma pisanik arsaarinninnermik kinguneqarsinnaapput. §§ 4, 10 aammalu 12-imik unioqqutitsineq taamatuttaaq piniutinik atorneqartunik arsaarinninnermik kinguneqarsinnaavoq.

 

Atortuulerfia

§ 15. Nalunaarut ulloq 12. august 2002 atortuulerpoq. Tamatuma peqatigisaanik kapisilinniarneq pillugu Namminersornerullutik Oqartussat nalunaarutaat nr. 29, 8. august 2001-imeersoq atorunnaarpoq.

Namminersornerullutik Oqartussat, ulloq 10. august 2002.

Hans Enoksen

/

Amalie Jessen

 

---

Kapisilinniarneq pillugu nalunaarummut ilanngussaq 1.

Tunisanillu nalunaarsuiffik uunga nassiunneqassaaq oqarasuaatikkulluunniit nalunaarutigineqassalluni: Aalisarsinnaanermut Akuersissutinik Nakkutilliisoqarfik (KANUAANA), Box 501, 3900 Nuuk, Oqarasuaat 34 50 00, Telefax 32 32 35 imaluunniit 32 32 36, e-mail gflk@gh.gl.

Immersugassaq maskinamik naqitaasiorluniluunniit allaqqunaqaaq.

A. KAPISILINNIK TUNISANIK NALUNAARUT
Tunisisup aqqa:	Kapisillit qassit:   Kiilut qassit (erlaveerlugu):
Cpr. nummer:
Kommuni:
Illoqarfik/nunaqarfik:
Angallatip normua/aqqa:
Angallatip angissusia:
A katillugit	_________________kg. kapisillit (MHUI)

(MHUI = kapisilik erlaveerlugu)

 

Sumiiffik kiisalu ulloq:_______________________________________________________

Atsiorneq:__________________________________________________________________

 

---

Kapisilinniarneq pillugu nalunaarummut ilanngussaq 2.

Pisanik nalunaarut uunga nassiunneqassaaq: Aalisarsinnaanermut Akuersissutinik Nakkutilliisoqarfik (KANUAANA), Box 501, 3900 Nuuk, oqarasuaat 34 50 00, Telefax 32 32 35 imaluunniit 32 32 36, e-mail gflk@gh.gl.

Immersugassaq maskinamik naqitaasiorluniluunniit allaqqunaqaaq.

C. KAPISILINNIK NAMMINEQ ATUGASSATUT PISANIK NALUNAARUT
Ateq:	Kapisillit qassit:     Kiilunngorlugit. (erlaveerlugit):
Kommuni:
Illoqarfik/nunaqarfik:
C katillugit	_________________kg. kapisillit (MHUI)

(MHUI = kapisilik erlaveerlugu)

 

Sumiiffik kiisalu ulloq:_______________________________________________________

Atsiorneq:_________________________________________________________________