Kalaallit Nunaanni katersugaasiveqarneq pillugu inatsimmi nr. 610-mi 23. december 1980-imeersumi § 2 tunngavigalugu makku aalajangersarneqarput:

 

Kapitali 1.
Siunertaa il.il.

§ 1. Kalaallit Nunaata piorsarsimassutsikkut kingornussaasa tammatsaalineqarnissaat Kalaallit Nunaannilu katersugaasiveqarnikkut sulinerup suleqatigiinnerullu siuarsarneqarnissaa peqqussutikkut matumuuna siunertarineqarpoq.
Imm. 2. Kalaallit Nunaanni katersugaasiveqarnermut ilaappuut Nunatta Katersugaasivia Allagaateqarfialu, katersugaasiviit akuerisaasut, tak. kapitali 3, aamma Katersugaasiveqarnermut Ataatsimititaliaq.

§ 2. Nalunaarsuineq, katersuineq, toqqortarinninneq, paasiniaaneq paasisanillu ingerlatseqqittarneq aqqutigalugit katersugaasiviit suliassaraat:
1) Kalaallit Nunaata piorsarsimassutsikkut kingornussarsiaasa tammatsaalineqarnissaat sulissutigissallugu
2) Kalaallit Nunaata piorsarsimassutsikkut pinngortitamullu tunngasutigut oqaluttuarisaanera paasiniassallugu
3) katersugaatit tamanut takusassiarissallugit, aamma
4) katersugaatit ilisimatusarnermi atugassanngortissallugit, ilisimatusarnermilu paasisanit ilisimasat siammartissallugit.
Imm. 2. Ataatsimoortumik suliassaqarfinni katersugaasiviit suleqatigiissapput, suliassat imm. 1-imi taaneqartut isumagineqarnerisa siuarsarneqarnissaat siunertaralugu.
Imm. 3. Oqartussat eqqissisimatitsinermik sanaartugassanik pilersaarusiornermik suliaqartut katersugaasiviit akisussaaffeqarfimminni killissarititaasut iluanni suleqatigissavaat.

 

Kapitali 2.
Nunatta Katersugaasivia Allagaateqarfialu

§ 3. Nunatta Katersugaasivia Allagaateqarfialu Namminersornerullutik Oqartussat pilersippaat ingerlanneqarneranullu akisussaallutik.
Imm. 2. Nunatta Katersugaasivia Allagaateqarfialu pisortamit Naalakkersuisunit atorfinitsinneqartumit siulersorneqassaaq.

§ 4. Suliassat § 2 imm. 1-imi taaneqartut suliassallu inatsisit allat tunngavigalugit suliassiissutigineqartut Nunatta Katersugaasiviata Allagaateqarfiatalu suliarissavai.
Imm. 2. Ukiuni sisamani sulinissamut pilersaarusiaq Nunatta Katersugaasiviata Allagaateqarfiatalu suliarisassavaa, ilisimatitsissutitullu Naalakkersuisunut taanna nassiuttassallugu.
Imm. 3. Nunatta Katersugaasivia Allagaateqarfialu sulinini pillugu ukiumoortumik nalunaarusiortassaaq, taannalu Naalakkersuisunut akuerisassanngorlugu Katersugaasiveqarnermullu Ataatsimiititaliamut ilisimatitsissutitut nassiunneqartassalluni.

§ 5. Qangarsuarnitsat ilisimaneqartut tamaasa inatsisartut peqqussutaanni pineqartunut ilaatinneqartut aamma nassaat § 27 tunngavigalugu immikkut ittumik soqutiginaateqartutut nalilerneqartut Nunatta Katersugaasiviata Allagaateqarfiatalu nalunaarsussavai.

§ 6. Katersugaatit takussutissat eqqortumik takutitsisuuniartussat Nunatta Katersugaasivia Allagaateqarfiatalu katersussavai, katersugaatinut ilanngutissavai tammatsaalissallugillu.
Imm. 2. Pigisat ataasiakkaat imaluunniit katersugaatit ilaat katersugaasivinni kapitali 3 tunngavigalugu akuerisaasuni uninngasuutigineqarsinnaapput. Pigisat uninngasuutigineqartut Katersugaasivimmut sukkulluunniit uterteqquneqarsinnaapput.
Imm. 3. Pisut immikkut ittut ilaanni pisortap inassuteqarneratigut Naalakkersuisullu akuersissuteqarnerisigut Nunatta Katersugaasiviata Allagaateqarfiatalu katersugaatit ilaat katersugaatinit immikkoortissinnaavai.
Imm. 4. Pigisat ilaat katersugaatinit immikkoortinneqartut katersugaasivinnut akuerineqarsimasunuinnaq tunniunneqarsinnaapput. Pigisaq pigisalluunniit pineqartut katersugaasiviit arlaannaannilluunniit tigujumaneqanngippata immikkoortinneqartut allanut tunniunneqarnissaat kasiilerneqarneqarnissaalluunniit Naalakkersuisut akuersissutigisinnaavaat.

§ 7. Piorsarsimassutsikkut oqaluttuarisaaneq pillugu ilisimatusarneq Nunatta Katersugaasiviata Allagaateqarfiatalu ingerlatissavaa, matumani Kalaallit Nunaanni illukunik il.il. assaalluni misissuinerit ilanngullugit eqqarsaatigalugit, paasisanillu ingerlatseqqittarneq aqqutigalugu kalaallit piorsarsimassutsikkut kingornussarsiaannik Kalaallillu Nunaata piorsarsimassuseqarnikkut ineriartorneranut ilisimasat siaruartereqataaffigalugit.

§ 8. Katersugaatit Nunatta Katersugaasiviata Allagaateqarfiatalu ilisimatusarnermut atugassanngortissavai. Tassunga atatillugu aningaasartuutit, katersugaatinik atuerusuttunit akilerneqassapput.
Imm. 2. Katersugaatit piffissani siumut aalajangerneqareersimasuni tamanit takuneqarsinnaatinneqassapput.
Imm. 3. Ilinniagaqarfiit atuartitsinermut ilagitillugu katersugaasivinnut takusaatitsisut akiliuteqartinneqarnissaat piumasarineqarsinnaanngilaq.

§ 9. Nunatta Katersugaasiviata Allagaateqarfiatalu katersugaasiviit akuerisaasut suliassani katersugaasivinnut tunngasuni siunnersortassavai.
Imm. 2. Suliat teknikkikkullu periarfissat tamanna ajornartinngikkaangassuk Nunatta Katersugaasivia Allagaateqarfialu katersugaasiviit akuerisaasut pigisaannik immikkut aanaveersaanermik ingerlataqartassaaq. Tamatumunnga aningaasartuutit katersugaasivinnit pineqartunit akilerneqartassapput.
Imm. 3. Nunatta Katersugaasiviata Allagaateqarfiatalu katersugaasivinnut akuerisaasunut pisussaaffii pillugit malittarisassat erseqqinnerusut Naalakkersuisut aalajangersarsinnaavaat, tamatumunnga ilanngullugit siunnersorneqarnermut tunngatillugu aningaasartuutit akilerneqarnerat pillugu.

§ 10. Katersugaasiviit akuerisaasut katersugaataasa toqqortarineqarnerat Nunatta Katersugaasiviata Allagaateqarfiatalu nakkutigissavaa.

§ 11. Nunatta Katersugaasivia Allagaateqarfialu nunat tamat katersugaasiveqarnikkut suleqatigiinneranni Kalaallit Nunaanni katersugaasiviit sinnerlugit peqataasassaaq.
Imm. 2. Piorsarsimassutsikkut oqaluttuarisaanermi qangarsuarnitsat Danmarkimut nunanulluunniit allanut anninneqarsimasut utertinneqarnissaat pillugu Nunatta Katersugaasivia Allagaateqarfialu Kalaallit Nunaanni katersugaasiviit sinnerlugit isumaqatigiinniuteqartuusassaaq.

 

Kapitali 3.
Katersugaasiviit akuerisaasut

§ 12. Katersugaasiveqarnermut Ataatsimiititaliap akuersissuteqareerneratigut suliat § 2 imm. 1-mi erseqqinnerusumik taaneqartut nunap ilaani aalajangersimasumi sammisassanulluunniit aalajangersimasunut tunngasuni suliassat katersugaasiviup aalajangersimasup suliarissagai Naalakkersuisut akuersissutigisinnaavaat.
Imm. 2. Katersugaasiviup akuerisaasup sulineranut piorsarsimassuseqarnikkut siammarterisumik suliniuteqarnerit ilaatinneqarsinnaapput, matumani katersugaasiviup suliffeqarfinnik piorsarsimassuseqarnikkut siammarterinermik suliniuteqartunik suleqateqarsinnaanera ilanngullugu eqqarsaatigalugu.

§ 13. § 12 tunngavigalugu akuerineqassagaanni piumasaqaatit makku eqqortinneqarsimasariaqarput:
1) Katersugaasivik kommunimit kommunilluunniit suleqatigiiffiannit pigineqassaaq, imminut pigisuulluni imaluunniit peqatigiiffimmit katersugaasiviup ingerlanneqarnissaanik siunertaqartumit pigineqassalluni.
2) Kalaallit Nunaata piorsarsimassutsikkut kingornussarsiaasa ilaat erseqqinnerusumik allaaserineqarsimasut katersugaasiviup akisussaaffigissavai, katersugaasiviilluunniit suliassaattut taaneqarsimasut allat akisussaaffigissallugit.
3) Katersugaasivimmut ileqqoreqqusat katersugaasiviup aqqa, piginittuussutsinut tunngasut, siunertaa, akisussaaffeqarfii, siulersuisuisa katitigaanerat, siulersuisuinik qinersisarneq, initai, missingersuutai, naatsorsuutai, kukkunersiuisarneq, ileqqoreqqusat allanngortinneqarnissaannut periarfissat atorunnaaarsinneqassappallu qanoq iliortoqarnissaa pillugit aalajangersakkanik imaqassapput.
4) Katersugaasivik naammaginartumik pitsaassuseqassaaq, katersugaasiviup katersugaataasa illersorneqarsinnaasumik toqqortaritinneqarnissaannik qulakkeerisumik, aningaasatigullu tunngavissaqassalluni pitsaassutsip ataavartinneqarnissaanut periarfissiisumik.
5) Katersugaasiviup pisortaa katersugaasivimmi sulinermik ilinniagaqarsimasuussaaq, katersugaasivimmilluunniit siulersuinermik ingerlatsinissamut allatigut piukkunnaateqartuussalluni.
6)Katersugaatit piffissani siumut aalajangereersimasuni tamanit takusarneqarsinnaatinneqassapput, katersugaasivillu ilinniarfinnut atuartitsinermut atatillugu takusaatitsisunut akiliisitsinani isertitsisassalluni.

§ 14. Ukiuni sisamani sulinissamut pilersaarusiaq katersugaasiviup suliarisassavaa, taannalu kommunimut ingerlatsisuusumut tapiissuteqartartumulluunniit Nunatta Katersugaasivianut Allagaateqarfianullu Katersugaasiveqarnermullu Ataatsimiititaliamut ilisimatitsissutitut nassiunneqartassalluni.
Imm. 2. Katersugaasivik ukiumoortumik naatsorsuusiortassaaq, missingersuusiortassalluni katersugaasivittullu sulinini pillugu nalunaarusiortassalluni, taannalu kommunimut ingerlatsisuusumut tapiissuteqartartumulluunniit akuerisassanngortittassallugu. Katersugaasivik kommunimit taaffigineqartanngippat, naatsorsuutit, missingersuutit, katersugaasiviullu sulinini pillugu nalunaarusiaa katersugaasiviup malittarisassai malillugit, tak. § 13, nr. 3, akuerineqassapput.
Imm. 3. Katersugaasiup ukiumoortumik naatsorssutai, missingersuutai, katersugaasiviullu sulinini pillugu nalunaarusiaa, tak. imm. 2, Naalakkersuisunut, Nunatta Katersugaasivianut Allagaateqarfianullu kiisalu Katersugaasiveqarnermut Ataatsimiititaliamut ilisimatitsissutitut nassiunneqartassalluni.

§ 15. Nassaat kapitali 5-imi pineqartunut ilaatinneqartut katersugaasivinnit akuerisaasunit Nunatta Katersugaasivianut Allagaateqarfianullu nalunaarutigineqartassapput.

§ 16. Katersugaasiviup katersugaataasa ilaat taamaallaat katersugaasivinnut akuerisaasunut allanut imaluunniit Nunatta Katersugaasivianut Allagaateqarfianullu tunniunneqarsinnaapput uninngasuutigitinneqarsinnaallutilluunniit. Pigisaq pigisalluunniit pineqartut katersugaasiviit arlaannaanilluunniit tigujumaneqanngippata immikkoortinneqartut allanut tunniunneqarsinnaapput kasiilerneqarsinnaallutilluunniit.

§ 17. Katersugaasiviup § 13-imi piumasaqaataasut eqqortikkunnaarpagit imaluunniit §§ 14-16-imi pisussaaffini sumiginnarpagit akuersissut Naalakkersuisut nammineq suliniuteqarnerisigut atorunnaarsinneqarsinnaavoq. Atorunnaarsitsinnginnermi Katersugaasiveqarnermut Ataatsimiititaliamit oqaaseqaammik piniartoqaqqaassaaq.
Imm. 2. Akuersissut atorunnaarsinneqarpat katersugaasiviup sulinini unitsittariaqarpaa, pissutsilluunniit Naalakkersuisut aalajangersimasumik piffissaliussaasa iluanni aaqqissallugit. Piffissaliussap aalajangiunneqannginnerani Katersugaasiveqarnermut Ataatsimiititaliaq tamanna pillugu oqaaseqaateqaqqaassaaq.

§ 18. Katersugaasivik sulinerminik unitsitsissappat katersugaasiviup katersugaataasa qanoq pineqarnissaat Nunatta Katersugaasiviata Allagaateqarfiatalu aalajangiivigissavaa.
Imm. 2. Katersugaasiviup akuersissutiminik arsaagaanini pissutigalugu unitsitsippat, imm. 1 malillugu ima aalajangiisoqassaaq katersugaasivik suliaminik unitsitsisoq akuersissummik arsaagaanerminiit ukiut marluk qaangiutinngineranni akuerisaaqqilluni periarfissaqassasoq katersugaatimik oqaasissaqarfigileqqinnissaanut.

 

Kapitali 4.
Katersugaasiveqarnermut Ataatsimiititaliaq

§ 19. Katersugaasiveqarnermut Ataatsimiititaliaq tallimanik ilaasortalik sinniisussalillu Naalakkersuisut pilersissavaat, taakkunanngalu
1) ilaasortaq sinniisussaalu ataaseq Nunatta Katersugaasivianit Allagaateqarfianillu toqqagaassaaq,
2) ilaasortaq sinniisussaalu ataaseq katersugaasivinni akuerisaasuni pisortat akornanni Nunatsini Katersugaasiviit Kattuffiannit, NUKAKA-mit toqqagaassaaq,
3) ilaasortaq sinniisussaalu ataaseq katersugaasivinni akuerisaasuni siulersuisut akornanni Nunatsinni Katersugaasiviit Kattuffiannit, NUKAKA-mit toqqagaassaaq,
4) ilaasortaq sinniisissaalu ataaseq Kalaallit Nunaanni Kommunit Kattuffiannit KANUKOKA-mit toqqagaassaaq, aamma
5) ilaasortaq sinniisissaalu ataaseq Ilisimatusarfimmit toqqagaassalluni.
Imm. 2. Katersugaasiveqarnermut Ataatsimiititaliami ilaasortat ukiuni marlunni atasussan-ngorlugit Naalakkersuisunit ivertinneqartassapput.
Imm. 3. Katersugaasiveqarnermut Ataatsimiititaliap siulittaasussani taassumalu tullissaa ilaasortami akornannit qinertassavai.
Imm. 4. Katersugaasiveqarnermut Ataatsimiititaliap suleriaasissani nammineq aalajangersartassavaa.

§ 20. Katersugaasiveqarnermut Ataatsimiititaliap allattoqarfeqartinnera Nunatta Katersugaasivianit Allagaateqarfianillu isumagineqassaaq, taanna aamma aalajangersimasumik allatseqartitsisuussalluni. Allattoqarfiup suliassanik ingerlatsinera Nunatta Katersugaasiviata Allagaateqarfiatalu sulineranit immikkoortisimaneqassaaq.

§ 21. Katersugaasiveqarnermut Ataatsimiititaliap suliassarai:
1) katersugaasivinnut nuna tamakkerlugu suleqatigiiffiussalluni,
2) suliassani katersugaasiveqarnermut tunngasuni Naalakkersuisut pisortallu oqartussat allat siunnersuisuuffigissallugit,
3) katersugaasiviit akuerineqarnissaat inassuteqaatigisassallugu, tak. § 13, aamma
4) katersugaasiviup akuerineqarnissamut piumasaqaatit eqqortikkunnaarai imaluunniit §§ 14-16 malillugit pisussaaffini sumiginnarai paasigunigit Naalakkersuisunut nalunaaruteqassalluni.

§ 22. Katersugaasiveqarnermut Ataatsimiititaliaq suliani pillugit ukiumoortumik nalunaarusiortassaaq, taannalu Naalakkersuisunut, Nunatta Katersugaasivianut Allagaateqarfianullu kiisalu katersugaasivinnut akuerisaasunut ilisimatitsissutitut nassiunneqartassaaq.

 

Kapitali 5.
Qangarsuarnitsanik innarlitsaaliineq

Nassaat

§ 23. Qangasuarnitsat Kalaallit Nunaanni nassaarineqartut kimilluunniit uppernarsaasikkamik piginnittuuffiginiarneqarsinnaanngitsut piorsarsimassutsikkut oqaluttuarisaanermut immikkut pingaaruteqarunik Namminersornerullutik Oqartussanit pigineqassapput.
Imm. 2. Kinaluunniit qangarsuarnitsanik nassaartoq pigisaqalersorluunniit tamanna pillugu Nunatta Katersugaasivianut Allagaateqarfianullu imaluunniit katersugaasiviit akuerisaasut arlaannut pinasuartumik nalunaaruteqassaaq.
Imm. 3. Katersugaasivimmut akuerisaasumut taamatut nalunaaruteqartoqarpat § 15 malinneqassaaq.
Imm. 4. Nassaarineqartut piorsarsimassutsikkut oqaluttuarisaanermut pingaaruteqarnersut taakkulu qanoq toqqortarineqassanersut Nunatta Katersugaasivia Allagaateqarfialu aalajangiisassaaq.

§ 24. Taamatuttaaq imaatigut killeqarfiup iluani nassaat kimilluunniit piginnittuussutsimik uppernarsaasiivigineqarsinnaanngippata § 23 malinneqassaaq.

§ 25. Nassaat §§ 23-mi 24-milu pineqartunut ilaatinneqartut allanngortinneqassanngillat/ akornuserneqassanngillat. Taamaattorli nassaat ajoquserneqariaannaappata aserorneqariaannaappataluunniit nassaartup nassaani toqqortarigallagassanngorlugit nassarsinnaavai.
Imm. 2. Nassaat isumannaarneqarnissaannut toqqortarineqarnerannullu pisariaqarsimasumut nassaartup aningaasartuutai naleqquttumik amerlassusillit Nunatta Katersugaasiviata Allagaateqarfiatalu taarserlugit akilissavai.
Imm. 3. Qaqutigoorluinnartunik piorsarsimassutsikkullu oqaluttuarisaanermut pingaaruteqarluinnartunik nassaartoqartillugu Nunatta Katersugaasiviata Allagaateqarfiatalu oqaaseqaateqareerneratigut nassaartoq Naalakkersuisunit akissarsitinneqarsinnaavoq.

§ 26. Naasunik uumasunilluunniit ujaranngorsimasunik ujaranngulersunilluunniit, imaluunniit nunap sananeqataanik ilisimatuussutsikkut soqutiginaateqarluinnartumik saqqummersissallugilluunniit soqutiginaateqartut Namminersornerullutik Oqartussanit pigineqarput.
Imm. 2. imm. 1 malillugu nassaaq nassaartumit Nunatta Katersugaasivianut Allagaateqarfianullu tunniunneqassaaq.
Imm. 3. Nunatta Katersugaasiviata Allagaateqarfiatalu aalajangissavaa, nassaap ilisimatuussutsikkut asseqannginnersoq imaluunniit saqqummersinneqarnissamut piukkunnaateqarnersoq nassaarlu qanoq paarineqassanersoq.
Imm. 4. Naalakkersuisut Nunatta Katersugaasiviata Allagaateqarfiatalu oqaaseqaateqareerneratigut nassaartoq akissarsitissinnaavaa.

 

Nassaat soqutiginaateqartutut nalilerneqartartut

§ 27. Nassaat §§ 23-mi 24-milu pineqartunut ilaatinneqanngitsut, kalaallilli piorsarsimassutsikkut oqaluttuarisaanerata ilaanik pingaaruteqartunik takussutissiisut Nunatta Katersugaasivianit Allagaateqarfianillu immikkut soqutiginaateqartutut isigalugit nalilerneqarsinnaapput.
Imm. 2. Nassaanik soqutiginaateqartutut nalilerneqarsimasunik piginnittup piginnittuussutsimut tunngasut toqqortarineqarfialu allannguuteqartinniarunigit tamanna Nunatta Katersugaasivianut Allagaateqarfianullu ilisimatitsissutigissavaa.
Imm. 3. Nassaat immikkut soqutiginaateqartutut nalilerneqarsimasut tuniniarneqarpata taakku Namminersornerullutik Oqartussanut pisiarinerani akii malillugit neqeroorutigineqaqqaassapput.

 

Annissuineq

§ 28. Nassaat kalaallinit suliarineqarsimasut 1945-p siornaneersut, nassaallu § 27 tunngavigalugu immikkut soqutiginaateqartutut nalilerneqarsimasut Nunatta Katersugaasivia Allagaateqarfialu akuersiseqqaartinnagu nunanut allanut anninneqarsinnaanngillat.
Imm. 2. Nassaat nunanut allanut annisissallugit kissaatigineqartut pisoqaassusii nalornisoornartoqartillugit Nunatta Katersugaasivianit Allagaateqarfianillu paasiniarneqartassapput.
Imm. 3. Pisuni immikkut ittuni piffissami aalajangersimasumik sivisussusilikkami annissinermut akuersissutip atuunnissaa nalunaarutigineqarsinnaavoq.

§ 29. § 28, imm. 1 tunngavigalugu annissinissamut akuersissuteqartoqanngippat nassaat taakku sumiluunniit tuniniarneqarunik akigisinnaasaannik akilerlugit Namminersornerullutik Oqartussanit tiguneqarnissaat nassaanik taamaattunik piginnittup piumasarisinnaavaa.
Imm. 2. Sulianik ilisimasallit naliliisereerlugit, matumani Nunatta Katersugaasiviata Allagaateqarfiatalu oqaaseqaateqartinneqarnera ilanngullugu, akigitinneqartussaq Naalakkersuisunit aalajangersarneqassaaq.

 

Kapitali 6.
Aningaasalersuineq tapiissuteqartarnerlu

§ 30. Nunatta Katersugaasiviata Allagaateqarfiatalu sulinera Landskarsimit tapiissutitigut, avataanit tapiissutitigut aamma kiffartuussinernik il.il. tunisaqartarnikkut aningaasalersorneqassaaq.
Imm. 2. Nunatta Katersugaasivianut Allagaateqarfianullu Landskarsip tapiissutigisartagai ukiumoortumik aningaaasaliissutinut inatsisitigoortumik aalajangersarneqartassapput.

§ 31. Kommunit katersugaasivinnik akuerisaasunik ingerlatsisut ingerlatsinermulluunniit annertuumik tapiissuteqartartut ukiumoortumik aningaasaliissutinut inatsisitigoortumik ataatsimoortumik tapiissutit aqqutigalugit Landskarsimit tamatumunnga tapiissuteqarfigineqartassapput.

 

Kapitali 7.
Naammagittaalliuuteqartarneq pineqaatissiisinnaanermullu aalajangersakkat

§ 32. § 23-mi imm. 4-p naggataa kiisalu § 28-mi imm. 1 tunngavigalugit Nunatta Katersugaasiviata Allagaateqarfiatalu aalajangiinerat sap. ak. sisamat qaangiutinnginneranni Naalakkersuisunut naammagittaalliuutigineqarsinnaapput. Naalakkersuisut inaarutaasumik aalajangiin-nginneranni Katersugaasiveqarnermut Ataatsimiititaliaq oqaaseqaateqartinneqartassaaq.

§ 33. §§ 23 imm. 2-mik, 24-mik, 26 imm. 1-imik 2-millu, 27 imm. 2-mik aamma 28 imm. 1-imik unioqqutitsinerit akiliisitsinermik pineqaatissiissutigineqarsinnaapput.

 

Kapitali 8.
Atortuulersitsineq ikaarsaariarnermilu aalajangersakkat

§ 34. Inatsisartut peqqussutaat manna januaarip aallaqqaataani 1999-imi atortuulersinneqarpoq. Taamaattorli § 31-imi aalajangersagaq 1. januar 2000-imi aatsaat atortuulersinneqarpoq.
Imm. 2. Tamatumunnga peqatigitillugu katersugaasiveqarnermut allagaateqarfeqarnermullu Namminersornerullutik Oqartussat nalunaarutaanni nr. 4-imi maajip 18-iani 1990-imeersumi katersugaasiveqarnermut aalajangersakkat atorunnaarsinneqarput, taamaattoq kapitali 12-imi aalajangersakkat aatsaat decembarip 31-iani 1999-imi atuutilersumik atorunnaarsinneqassapput.

§ 35. Katersugaasiviit Inatsisartut katersugaasiveqarneq toqqorsiveqarnerlu pillugit peq-qussutaat nr. 4 maajip 18-iani1990-imeersoq siusinnerusukkulluunniit inatsisaasimasut tunngavigalugit akuerineqarsimasut aggustip aallaqqaataani 1999 nallertinnagu kapitali 3-imi aalajangersakkat tunngavigalugit akuerineqareersimassapput.

§ 36. Katersugaaveqarnermut Ataatsimiititaliaq, tak. § 19, januaarip aallaqqaataani 1999-imi siullermeerutaasumik pilersinneqassaaq.

Namminersornerullutik Oqartussat, ulloq 30. oktober 1998.

Jonathan Motzfeldt

/

Konrad Steenholdt