Quppernerup imai iserfigikkit
Oqaatsit toqqakkit
Ujaasinermut uterit
Allaffissornikkut najoqqutassiat
Nr. 28
30. oktobari 1998
Atuuttut

Piniarnermik aalisarnermillu nakkutilliisut suliassaat pisinnaatitaaffiilu pillugit Namminersornerullutik Oqartussat nalunaarutaat

Piniarneq aallaaniarnerlu pillugit Inatsisartut inatsisaanni nr. 15-imi, 6. november 1997-imeersumi § 8, § 10, imm. 4, § 12, imm. 2 Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, kingullermik Aalisarneq pillugu Inatsisartut inatsisaata allanngortinneqarneranik Inatsisartut inatsisaatigut nr. 12, 6. november 1997-imeersukkut allanngortinneqartumi, § 27, imm. 6, § 33, imm. 2 kiisalu Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11, 12. november 1980-imeersumi § 17 malillugit naalagaaffimmi oqartussaasut oqaloqatigineqareernerisigut aalajangersarneqarpoq:

 

Atuuffia

§ 1. Nalunaarut piniarnermik aalisarnermillu nakkutilliisut nunami aalisarnikkullu Kalaallit Nunaata oqartussaaffigisaani piniarnermik aallaaniarnermillu kiisalu kapisilinnik eqalunnillu aalisarnermik nakkutilliinerannut atuuppoq.

 

Piniarnermik aalisarnermillu nakkutilliisoqarnermik aaqqissuussinerup siunertaa

§ 2. Piniarnermik aalisarnermillu nakkutilliisoq Kalaallit Nunaanni piniarnermik, aallaaniarnermik aalisarnermillu nakkutilliissaaq piniarneq, aallaaniarneq aalisarnerlu pillugit inatsisartut inatsisaanni, peqqussutini, nalunaarutini kommunillu ileqqoreqqusaanni aalajangersakkat naapertorlugit. Taamatuttaaq piniarnermik aalisarnermillu nakkutilliisut nakkutilliinertik tunngavigalugu isumalluutinik uumassusilinnik iluaquteqarniarnermik aqutsinermut kisitsisitigut tunngavissat annertusarnerinut patajaallisarneqarnerinullu suleqataassapput.

 

Piniarnermik aalisarnermillu nakkutilliisut suliassaat

§ 3. § 2 naapertorlugu piniarnermik aalisarnermillu nakkutilliisut pingaarnerutillugu suliassaraat piniarnermik, aallaaniarnermik aalisarnermillu nakkutilliineq, tamatumunnga ilanngullugit piniarsinnaanermut allagartat akuersissutillu atuuttuunerannik, piffissat eqqissisimatitsiviusut aallaaniarnermullu aalajangersakkat kiisalu piniarnermut, aallaaniarnermut aalisarnermullu tunngatillugu malittarisassat allat eqqortinneqarnerannik nakkutilliineq.
Imm. 2. Piniarnermik aalisarnermillu nakkutilliisut sapinngisaq naapertorlugu ilitsersuinikkut paasisitsiniaanikkullu ikiuuttassapput kiisalu nujuartanik paaqqutarinninnermut pinngortitamullu tunngatillugu suliassanut allanut peqataasassallutik Aalisarnermut, Piniarnermut, Inuussutissarsiornermut Nunalerinermullu Pisortaqarfimmut kiisalu Avatangiisinut Pinngortitamullu Pisortaqarfimmut imaluunniit Pinngortitaleriffimmut erseqqinnerusumik isumaqatigiissuteqarnikkut.
Imm. 3. Uumasut pisassiissutitigut killilersugaasut piniarneqarnerannik nakkutilliinermi piniarnermik aalisarnermillu nakkutilliisoq nalunaaruteqartarnermi pisanillu nalunaaruteqarnermi ilitsersuisinnaavoq.

§ 4. Naalakkersuisut piniarnermik aalisarnermillu nakkutilliisoq nakkutilliinermik suliassat suliarinissaannut piginnaatissavaat pisariaqartinneqartumik inummut tassungaannaq tunngatitamik kinaassutsimut uppernarsaasiinikkut, takuuk ilanngussaq 1.
Imm. 2. Piniarnermik aalisarnermillu nakkutilliisut nakkutilliinermik sulinerannut ikiorsiiniarlutik Naalakkersuisut piniarnermik aalisarnermillu nakkutilliisut ikiortaannik atorfinitsitsisinnaapput.
Imm. 3. Piniarnermik aalisarnermillu nakkutilliisut ikiortaat nalunaarummi matumani piniarnermik nakkutilliisutut piginnaatitaaffeqarput pisussaaffeqarlutillu aammalu piniarnermik aalisarnermillu nakkutilliisoq sinnerlugu iliuuseqartussaallutik. Piniarnermik aalisarnermillu nakkutilliisut suliassanik piniarnermik aalisarnermillu nakkutilliisut ikiortaannut agguataarisassapput. Naalakkersuisut piniarnermik aalisarnermillu nakkutilliisunut naleqquttunik kinaassusermut uppersaatinik tunniussissapput (inummut tassungaannaq tunngatitanik, tak. ilanngussaq 1).

§ 5. Piniarnermik aalisarnermillu nakkutilliisut imaluunniit taakku ikiortaat nakkutilliinerminnut atatillugu piniagassanik pisassiissutitigut killilersugaasunik piniarnermut peqataaqqusaanngillat, taamaattorli § 8, imm. 1 takuuk.

 

Pisinnaatitaaffii

§ 6. Piniarnermik aalisarnermillu nakkutilliisoq inuillu allat, Naalakkersuisunit taamaaliornissamut piginnaatitaasut toqqarneqarsimasullu, piniarnermut, aallaaniarnermut aalisarnermullu angallatinut kiisalu piniarnermut, aallaaniarnermut aalisarnermullu assartuutigalugit angallatinut ikisinnaatitaapput tamatumunngalu atatillugu aalisakkat piniakkallu pisarineqarsimasut kiisalu piniarnermut, aallaaniarnermut aalisarnermullu atortut misissuiffigisinnaallugit, Piniarneq aallaaniarnerlu pillugit Inatsisartut inatsisaanni § 10, imm. 1, kiisalu Aalisarneq pillugu Inatsisartut inatsisaanni § 27, imm. 3 naapertorlugit.
Imm. 2. Piniarnermik aalisarnermillu nakkutilliisoq kiisalu inuit allat naalakkersuisunit tamatumunnga piginnaatinneqartut inatsisinik unioqqutitsisoqarneranik ilimasunnermut uppernarsaatissatut piniarfinni, najukkani kalaalimineerniarfinni kiisalu tunitsivinni uumassusillit misissorneqarnissaannut misiligutissanik tigusisinnaapput. Tamatuma saniatigut piniarnermik aalisarnermillu nakkutilliisoq kiisalu inuit allat naalakkersuisunit tamatumunnga piginnaatinneqartut uumassusillit misissorneqarnissaannut aalajangersimasumut misiligutissanik tigusisinnaapput Aalisarnermut, Piniarnermut, Inuussutissarsiornermut Nunalerinermullu Pisortaqarfiup kiisalu Avatangiisinut Pinngortitamullu Pisortaqarfiup imaluuniit Pinngortitaleriffiup akornanni isumaqatigiissutit aalajangersimasut killilikkallu naapertorlugit.
Imm. 3. Piniarnermik aalisarnermillu nakkutilliisoq inuillu allat, Naalakkersuisunit taamaaliornissamut piginnaatitaasut toqqarneqarsimasullu, inuup piniarsinnaaneranut aalisarsinnaaneranulluunniit uppernarsaammik atuuttumik takutitaqarnissaanik piumasaqarsinnaapput, Piniarneq aallaaniarnerlu pillugit Inatsisartut inatsisaanni § 10, imm. 2, kiisalu Aalisarneq pillugu Inatsisartut inatsisaanni § 27, imm. 4 naapertorlugit.
Imm. 4. Imm. 1-imi aamma 2-mi pisinnaatitaaffiit siumut eqqartuussiviit akuersiseqqaarnagit ingerlanneqarsinnaapput kinaassutsimut uppernarsaatinik takutitsinikkut.
Imm. 5. Piniarnermut, aallaaniarnermut aalisarnermullu angallatitut aamma piniarnermut, aallaaniarnermut aalisarnermullu assartuutigalugit angallatitut paasineqassapput angallatit, qamutit assigisaallu piniarnermut, aallaaniarnermut aalisarnermullu kiisalu piniarfimmut aalisarfimmulluunniit taakkunanngaaniillu assartuinermut atorneqartut imaluunniit atorneqartussatut ilimagineqartut.

§ 7. Piniarneq, aallaaniarneq aalisarnerlu pillugit inatsisini aalajangersakkanik kiisalu eqqissisimatitsinermik aalajangersakkanik unioqqutitsinertut ilimagineqartut piniarnermik aalisarnermillu nakkutilliisumit pisortaqarfiup nalunaarutiginninnermut immersuiffissaliaa atorlugu politiinut nalunaarutigineqassapput.
Imm. 2. Piniarnermik aalisarnermillu nakkutilliisoq nakkutilliinermini angallammi, § 6, imm. 4 tak., inissiiviusinnaasunut aamma toqqorsivinnut isersinnaatitaavoq, pisanik inissiiviusinnaasunut taamatullu inatsisinik unioqqutitsigunarluni pisanik imaluunniit piniarnermut, aallaaniarnermut aalisarnermullu atortunik assiliinikkut videumulluunniit immiussinikkut nalunaarsuisinnaatitaavoq.
Imm. 3. Piniarnermik aalisarnermillu nakkutilliisoq inatsisinik unioqqutitsilluni pisarineqarsimagunartunit misissugassanik annikinnerusunik uppernarsaatissatut tigusisinnaatitaavoq.

§ 8. Uumasumik qularnanngitsumik pissatamik napparsimasumilluunniit, uumaannassasutut ilimagineqarsinnaanngitsumik, takunnittoqartillugu piniarnermik aalisarnermillu nakkutilliisoq piginnaatitaavoq tamanna pillugu aalajangersakkat atuuttut naapertorlugit uumasoq toqussallugu.

Imm. 2. Imm. 1 naapertorlugu uumasoq toqutaq inunnit nerineqarsinnaasutut nalilerneqarpat nassarneqassaaq sapinngisamillu piaarnerpaamik pisortat suliffeqarfiutaannut qaninnerpaamut taakkununnga atugassanngorlugu uppernarsaasiinikkut tunniunneqassalluni.
Imm. 3. Arfernik angisuunik toqutsisoqassatillugu tamanna pitinnagu Aalisarnermut, Piniarnermut, Inuussutissarsiornermut Nunalerinermullu Pisortaqarfimmut taamaaliornissamut akuersissummik pissarsiniartoqaqqaassaaq. Arfernik angisuunik toqutsinissamut atugassamik piniarnermik aalisarnermillu nakkutilliisoq angallatinik tuukkartalinnik qamutililinnik inuttaanillu, arfernik angisuunik piniarneq pillugu nalunaarut atuuttoq naapertorlugu arfernik angisuunik piniarnissamut piumasaqaataasunik naammassinnittunik, attartorsinnaavoq. Angallammik attartorneq akit atuuttut malillugit akilerneqassaaq.
Imm. 4. Piniarnermik aalisarnermillu nakkutilliisoq sapinngisamik piaartumik periarfissarlu siulleq atorlugu uumasunik toqutsineq pillugu Aalisarnermut, Piniarnermut, Inuussutissarsiornermut Nunalerinermullu Pisortaqarfimmut nalunaaruteqassaaq.

 

Pineqaatissiissutit

§ 9. Akiliisitsinermik kinguneqarsinnaavoq § 6, imm. 1 aamma 2 malillugit peqqussuteqarnermik malinninnginneq, § 7, imm. 2 aamma 3 kiisalu § 8, imm. 1 malillugit piniarnermik aalisarnermillu nakkutilliisup sulineranut akornusersuineq.

 

Atuutilerfia

§ 10. Nalunaarut atuutilerpoq ulloq 1. november 1998.




Namminersornerullutik Oqartussat, ulloq 30. oktober 1998.




Pâviâraq Heilmann

/

Jørn Birk Olsen


Ilanngussaq 1