Sunngiffimmi sammisassaqartitsineq pillugu Inatsisartut peqqussutaanni nr. 5-imi 9. april 1992-imeersumi § 10, imm. 5, naapertorlugu aalajangersarneqarput:

Kapitali 1
Siunertarisaq

§ 1. Fagini ataasiakkaani inersimasunut kursusertitsinermi siunertaavoq inuit atuarfimmik qimatsereersimasut periarfississallugit inuttut ineriartornissamut aammalu periarfississallugit annerusumik ilinniagaqarnissamut piumasaasumik ilisimasassanik piginnaasariaqartunillu pissarsinissaannut.

Kapitali 2
Meeqqat atuarfianni inaarutaasimik. aamma inaarutaasumik annertusisamik misilitsinnerit

§ 2. Misilitsinnissamut piareersaataasumik atuartitsineq meeqqat atuarfianni inaarutaasumik misilitsinnissamik siunertaqartoq pingaartumik 19-it qaangerlugit ukioqalereersimasunik sunngiffimmi atuartitsinermut atasumik pilersinneqassaaq.
Imm. 2. Misilitsinnissamut piareersaataasumik atuartitsinissaq meeqqat atuarfianni atuartitsinermut ataqatigiissinneqassaaq meeqqat atuarfiat pillugu Inatsisartut peqqussutaanni § 4 naapertorlugu, tak. meeqqat atuarfiini sunngiffimmi sammisassaqartitsineq pillugu nalunaarut, ingerlanneqassallunilu meeqqat atuarfianni fagini misilitsinnissamut piareersaataasumik atuartitsisarnertut allatulli.
Imm. 3. Kommunimi oqartussaasut aalajangiinerat malillugu nalunaaquttap akunneri arlallit imminnut ilinniartittunut ilitsersuinermut atugassanngortinneqarsinnaapput.

§ 3. Misilitsinnissamut piareersaataasumik atuartitsineq inaarutaasumik misilitsinnermik imaluunniit annertusisamik misilitsinnermik inaarneqarsinnaasoq aaqqissuunneqarsinnaavoq fagini: kalaallit oqaasii, danskit oqaasii, kisitsineq/matematikki, tuluit oqaasii aamma fysikki/kemii.
Imm. 2. Atuartitsinerup siunertaa imarisaalu meeqqat atuarfianni atuartitsinissanut pilersaarutini oqaatigineqarput.

§ 4. Atuartitsineq inaarutaasumik misilitsinnissamik siunertaqartoq aaqqissuunneqarsinnaavoq ukiumi ataatsimi kursusernertut imaluunniit ukiuni marlunni kursusernertut aamma klassit qulinganni imaluunniit aqqarnanni sammivimmut tamatigoortumut naleqquttunngorlugu, nalunaaquttap akunnerisa amerlassusilerneqarnissaat aalajangersakkat ataani allassimasut iluanni pisussanngorlugu:

§ 5. Atuartitsineq inaarutaasumik annertusisamik misilitsinnissamik siunertaqartoq aaqqissuunneqarsinnaavoq ukiumi ataatsimi kursusernertut imaluunniit ukiuni marlunni kursusernertut aamma klassit qulinganni imaluunniit aqqarnanni sammivimmut annertusisamut naleqquttunngorlugu, nalunaaquttap akunnerisa amerlassusilerneqarnissaat aalajangersakkat ataani allassimasut iluanni pisussanngorlugu:

§ 6. §§4 aamma 5 malillugit ukiumut ataatsimut aaqqissukkami kursuseqataassagaanni peqataasussap klassit qulinganni fagit uani pineqartut sammivinnut immikkoortinneqarnerisut pereersimassavai imaluunniit allatigoorluni ilisimasassat pisariaqartut pissarsiarereersimassallugit.
Imm. 2. §§ 4 aamma 5 malillugit ukiunut marlunnut aaqqissukkami kursuseqataassagaanni peqataasussap klassit qulingiluaanni fagit uani pineqartut sammivinnut immikkoortinneqarnerisut pereersimassavai imaluunniit allatigoorluni ilisimasassat pisariaqartut pissarsiarereersimassallugit.

§ 7. Misilitsikkumaneq misilitsinnerlu pisassapput aalajangersakkat meeqqat atuarfiannut atortuusut malillugit, takuuk meeqqat atuarfiat pillugu Inatsisartut peqqussutaanni § 15.

Kapitali 3
Aalajangersakkat allat

§ 8. Fagini ataasiakkaani atuartitsisarnermi allatigut makku piumasaqaataapput:
1) Pisortaq ilinniartitsisorlu, atuartitsinermik siulersuisuusussat, tamatumunnga piukkunnaateqassapput.
2) Atuartitsineq inini naleqquttuni pisariaqartunillu atortuuteqartuni ingerlanneqassaaq.
3) Atuakkat atuartitsinermilu atortussat allat akilersinnagit peqataasunut atugassanngortinneqassapput.
4) Fagini ataasiakkaani atuartitsinermi peqataanermut akiliuteqartitsineqartassaaq, tak. sunngiffimmi ilinniartitsinermi peqataanermut akiliuteqartarneq pillugu aalajangersakkat.

§ 9. Peqataajumasut ikinnerpaamik arfineq-pingasut nalunaarsimappata ilinniaqatigiit pilersinneqassapput.
Imm. 2. Peqataasut takkuttartut agguaqatigiissillugit amerlassusii sap. akunnerisa tulleriiginnaat sisamat ingerlaneranni sisamanit ikinnerulerpata ilinniaqatigiit atorunnaarsinneqassapput.

§ 10. Kursusernissamik kissaatigisat peqataaniartut ikippallaarnerat pissutigalugu pilersinneqarsinnaanngippata peqataaniarlutik qinnuteqartut meeqqat atuarfianni sunngiffimmi atuartitsinermi misilitsinnissamut piareersaataasumik atuartitsinernut innersuunneqarsinnaapput.
Imm. 2. Atuaqatigiit meeqqat atuarfianni sunngiffimmi atuartitsinermi misilitsinnissamut piareersaataasumik atuartitassatut imaluunniit sunngiffimmi atuartitsinermi fagini ataasiakkaani atuartitassatut naatsorsuunneqassanersut aalajangerneqartassaaq atuaqatigiit aallartinneranni peqataasut amerlanersaasa qassinik ukioqarneri najoqqutaralugit.

Kapitali 4
Atulerfissaa

§ 11. Nalunaarut una atortuulissaaq decembarip aallaqqaataani 1993-imi.
Imm. 2. Ulloq taanna atorunnaassaaq Namminersornerullutik Oqartussat nalunaarutaat nr. 22, 2. juli 1986-imeersoq.
Imm. 3. Taamaattorli atuaqatigiit aggustip aallaqqaataani 1993-imi ukiumi ataatsimi imaluunniit ukiuni marlunni kursusertussatut pilersinneqartut nal. akunneri nalunaarummi imm. 2-mi taaneqartumi allattorsimasut atussavaat fagini nalunaarummi uani §§ 4-mi 5-imilu taaneqartuni.

Namminersornerullutik Oqartussat, ulloq 26. november 1993.

Marianne Jensen

/

Aqigssiaq Møller