Napparsimasunik paarsisutut peqqinnissamullu ikiortitut ilinniartitaanerit pillugit Inatsisartut peqqussutaanni nr. 9-mi, 13. maj 1993-imeersumi, §§ 6, 7 aamma 8 naapertorlugit aalajangersarneqarpoq:

 

Kapitali 1
Ilinniartitaanerup siunertaa aaqqissuussaaneralu

§ 1. Peqqissaasutut ilinniartitaanerup siunertaraa ilinniartup peqqissaasutut sulisinnaalernissaminut nammineq inuttut sulisinnaassutsikkullu piumasarineqartutut piginnaassuseqalernissaa. Siunertarineqarportaaq ilinniartup suleqateqartarnissamut, ilisimatusarnermut inuiaqatigiinnullu tunngasutigut ineriartornerit malinnaavigalugit suliaminut tunngasutigut nutartertarnissamut kiisalu peqqissaasutut ilinniarnerup inerisarnissaanut piginnaanngorsarnissaa.

§ 2. Ilinniarfimmik nalunaarummi uani pineqarpoq Peqqissaanermut Ilinniarfik, peqqissaasutut ilinniartitaaneq.
Imm. 2. Peqqissaasutut ilinniartitaaneq ilinniartitsivimmi ilinniartitaanermut tassunga akuerisaasumik aaqqissuussiffigineqartumi ingerlanneqartarpoq, tak. § 11.
Imm. 3. Ilinniartitaaneq taanna qaammatinik 48-nik sivisussuseqartoq atuagarsorluni sungiusaatigalugulu sulilluni ilinniarnermik agguaqatigiissillugit sivisussuseqartunik 5:4 miss.

§ 3. Ilinniartitaaneq siulersorneqassaaq peqqissaasutut ilinniarsimasumit piginnaassusilimmit, taassumalu ilinniartitaanerup atuagarsornertaata napparsimasunillu sullissinikkut ilinniartitaanerup ataqatigiissarnissaat Kalaallillu Nunaanni peqqissaasutut sulisinnaatitaanermut akuersissummik peqassagaanni piumasaqaataasut naapertorlugit ilinniartitaanerup naammassineqanernissaa
akisussaaffigai.
Imm. 2. Atuarfimmi ilinniartitsisut ilinniartitsisinnaanermut piginnaaneqartut naammattut sulisorineqassapput.

 

Kapitel 2
Ilinniartitaanerup imarisai pilersaarusiorneqarneralu

§ 4. Ilinniartitsissutigineqartarput atuagarsorluni sulillunilu peqqinnissakkut isumaginninnermik napparsimasunillu paarsinermik ilinniarnerit makkununnga sammisitat: inuit peqqisut, arnat ernisuttut, inuit peqqigunnaarnissaannik aarleqqunnartut inuillu tassanngaannartumik ataavartumillu nappaatillit, timikkut eqqarsartaatsikkulu nappaateqartunik, aamma inuit qassinilluunniit ukiullit namminneq angerlarsimaffimmiinniittut, suliffinniittut, napparsimmavinniittut suliffeqarfinnilu allaniittut.
Imm. 2. Ilinniartitaaneq aaqqissuussaavoq pingasunik immikkoortulerlugu tamarmik ukiumit ataatsimit ukiut marlungajaat (uk. 1 3/4) tikillugit sivisussuseqartut, taakkunanilu ilinniarneqartassallutik napparsimasunik paarsisup peqqissusermut iluaqutaasussanik allanngutsaaliissutaasussanillu, napparnaveersaataasunik, katsorsaanermik, anniarunnaarsaanermik piginnaanngorsaqqinnermullu tunngasunik suliassai kiisalu tamakkununnga atasumik ataqatigiissaarinermik ilinniartitsinermillu suliassat.
Imm. 3. Ilinniartitaaneq aaqqissuunneqarpoq napparsimasunik paarsinermi suliassat nalinginnaasut aallarniutigineqarnerisigut. Immikkoortut tulliuttut marluk imaqarput napparsimasunik paarsisup suliassaanik immikkut ittunik, taakkulu aaqqissuunneqarput artornarsiartuaartillugit immikkoortuisa kingullersaat ilaqartussanngorluguttaaq napparsimasunik paarsisup suliassaanik namminersuutigalugu suliaqarnermik.
Imm. 4. Ilinniartitaanermut ilaatinneqassapput peqqinnissakkut napparsimasunillu paarsinikkut napparsimmavimmi nakorsaaserinikkut pilattaanikkullu paaqqinninneq, ernisussiorneq, peqqinnissakkut napparsimasunillu paarsinikkut naartusunik kiisalu meeqqanik paaqqinninneq, eqqarsartaatsikkut nappaatilinnik, utoqqalineq pissutigalugu nappaatinik peqqinnissakkut isumaginninneq napparsimasunillu paarsineq kiisalu angerlasimaffinni napparsimasunik paarsineq.

§ 5. Atuagarsornertaa imaqarpoq ilinniagassanik makkuninnga: atuagarsornermik atuartitsineq tamakkerlugu tamarmik immikkut procentit makkua missaannik annertussuseqartunik:
1) Peqqinnissaq napparsimasunillu paarsineq pillugit ilinniagassat peqqinnissamullu tunngasunik ilisimatusarnikkut ilinniagassat allat: Peqqinnissamik isumaginninnermi napparsimasunillu paarsinermi atuartarissat suleriaaserlu kiisalu nappaatinik tunillaassuuttartunik ilinniarneq, nappaatilerineq, inuussutissalerineq, nakorsaaserineq, ernisussiorneq, inuiaqatigiinnut, suliffeqarfinnut avatangiisinullu tunngatillugu nakorsaaserineq il, - il.: 60 pct.
2) Pinngortitamik ilisimatusarnermi ilinniagassat: Anatomi (timip sananeqaataanik ilinniarneq), fysiologi, fysik, kemi, biokemi, mikrobiologi, klinisk kemi, genetik il.il.: 20 pct.
3) Inuuneq inuiaqatigiillu pillugit ilisimatusarnermi ilinniagassat: Psykologi (inuup eqqarsartaasia pillugu ilinniarneq), pædagogik (perorsaaneq), sociologi, attaveqaqatigiittarneq, peqqinnissamik inunnillu isumaginnittoqarfiup aaqqissuussaanera suliaalu, tamakkununnga ilanngullugit inatsiseqarneq, allaffeqarfikkut ingerlatsinermik ilinniarneq, allaffissorneq siulersuinerlu kiisalu isumassarsiaasimasut pingaarnerit pillugit oqaluttuarisaaneq ileqqorissaarnerlu il.il.: 20 pct.
Imm. 2. Atuagarsorluni ilinniartitaanerup erseqqinnerusumik pilersaarusiorneqarnera ilinniartitaanerullu ingerlanerata agguataarneqarnissaa aalajangersarneqassapput ilinniartitaanerup aaqqissuussiffigineqarnerani, tak. § 11.

§ 6. Sulinermik sungiusarneq pingaarnernik makkuninnga imaqarpoq: sulinermik sungiusarneq tamakkerlugu tamarmik immikkut procentit makkua missaannik annertussuseqartussanik:
1) Peqqinnissamik nakkutiginninneq napparsimasunillu paarsineq tunngatinneqartoq inunnut peqissunut, arnanut ernilersunut inunnullu peqqigunnaarnissaat aarleqqutiginartunut: 35 pct.
2) Peqqinnissamik isumaginninneq napparsimasunillu paarsineq inunnut tassanngaannartumik aamma katsorsarneqarsinnaanngitsumik nappaatilinnut, timimikkut eqqarsartaatsimikkullu nappaateqartunut sammisitat: 65 pct.
Imm.2. Sulinermik sungiusarnerup minnerpaamik 20 pct.-ia napparsimmaviup avataani inunnik peqqinnissamillu isumaginnittoqarfimmi pisassaaq.
Imm. 3. Sulinermik sungiusarneq sivisunerusumik ingerlanneqartarpoq, ilaqartinneqarluni napparsimasunik paarsinermi suliassanik.
Imm. 4. Sulinermik sungiusarneq imaalillugu aaqqissuunneqassaaq, immikkoortua siulleq ilinniartitaanerup ingerlanerani 25 pct-iata missaanik, immikkoortuisa aappaat 30 pct.-iata missaanik immikkoortuisalu pingajuat 45 pct.-iata missaanik sivisussusilerlugit.
Imm. 5. Sulinermik sungiusarnerup ilinniarnerullu agguaanneqarnerata erseqqinnerusumik aaqqissuussaaneri ilinniartitaanerup aaqqissuussiffigineqarneranni aalajangersarneqassapput, tak. § 11.

 

Kapitali 3
Piginnaassutsimik naliliineq

§ 7. Piginnaassutsit, ilinniakkatigut anguneqartut, atuagarsornermut atatillugu misilitsinnikkut sungiusaatigalugulu sulinermut atatillugu angusat nalilerneqarnerisigut uppernarsaaserneqartassapput.

§ 8. Misilitsinnerit ilinniarfimmi avataaniluunniit misilitsinnerupput. Ilinniarfimmi misilitsinnerit soraarummeersitsisumit (-sunit) nalileeqataasumillu ataatsimit imaluunniit nalileeqataasunit arlalinnit ilinniarfiup toqqagaanit nalilerneqartassapput. Ilinniarfiup avataani misilitsinnerit soraarummeersitsisumit (-sunit) nalileeqataasumillu, ilinniarfigisamit inassuteqareernikkut Kulturimut, Ilinniartitaanermut Ilisimatusarnermullu Pisortaqarfimmit soraammeersitsussanngortinneqartunit, nalilerneqartassapput. Nalileeqataasartut ikkunneqartassapput ukiunit pingasunit ukiunut tallimanut atuuttussanngorlugit.
Imm. 2. Ilinniarfimmi avataanilu misilitsinnerit Danmarkimi ilinniarfinni qaffasinnerusuni karakteriliisarnerit qaqugukkulluunniit tamanut atuuttut naapertorlugit nalilerneqartassapput. Maannakkut atorneqarpoq 13-skala.
Imm. 3. Piginnaassutsimik naliliinerni angusivoq/angusinngilaq atorneqartassapput.

§ 9. Ilinniarnerup immikkoortuisa pingasuusut § 4-mi taaneqartut naanerini tamani ilinniarfiup avataani misiliisoqartassaaq. Misilitsinnerni tamani sammisanik (stoffinik) ilinniagassani pingasuni § 5-imi taaneqartuniittunik soraarummersitsineqartassaaq.
Imm. 2. Ilinniarnerup immikkoortuisa pingasut, § 4-mi taaneqartut, naanerini ilinniarfiup avataani misilitsittoqartassaaq. Ilinniartitaanerup immikkoortuisa pingajuanni marloriarluni piginnaassutsimut naliliisoqartassaaq. Ilinniarnerup immikkoortuisa pingajuanni qaammatini pingasuni aamma arfineq-marlunni sungiusaatigalugu sulereernermi angusanik naliliineqartassaaq. Angusanik naliliinerit suliarineqarneranni tunniunneqarnerannilu napparsimasunik paarsisoq(-sut) sungiussaatigalugu sulinermut akisussaasoq(-sut) aamma napparsimasunik paasisussanik ilinniartitsisoq ilinniarfimmeersoq peqataassapput.
Imm. 3. Misilitsinnerit angusanillu naliliinerit tamarmik angusiffiussapput.
Imm. 4. Misilitsinneq angusiffiussaaq karakteeri 6-iuppat taassumanngaluunniit qaffasinneruppat imaluunniit naliliineq angusiffiuppat. Misilitsinnerit tamarmik immikkut angusiffiussapput. Misilitsinnerit angusiffiusut uteqqinneqarsinnaanngillat. Ilinniagaqartoq misilitsinnermut ataatsimut annerpaamik pingasoriarluni misilitsikkumasinnaavoq.
Imm. 5. Immikkut pissutissaqartillugu ilinniarfigisap sisamassaaneerluni misilitsittoqarnissaa akuersaarsinnaavaa.
Imm. 6. Ilinniagaqartut, angusanik naliliinermi angusinngitsoorsimasut, aappassaaneerlugit nalileqqinneqarsinnaapput sungiusaatigalugu sulineq ilinniarfiusup aalajangiineratigut nangeqqinneqareerpat.
Imm. 7. Ilinniagaqartut, angusanik aappassaaneerluni naliliinermi angusinngitsoorsimasut, pingajussaaneerlugit nalileqqinneqarsinnaapput suliffiup avataani sungiusaatigalugu sulisitsinikkut, tassanilu naliliinermi angusivoq/angusinngilaq atorneqartassapput.

§ 10. Ilinniarfiusup napparsimasunik paarsisutut naammassillugu ilinniarsimanermut uppernarsaat tunniutissavaa misilitsinnermi angusiffiusuni piginnaassutsimillu naliliinerni angusat nalunaarlugit.
Imm. 2. Ilinniartitaanerup immikkoortuisa siulliat aappaallu angusiffiullutik naammassineqarpata ilinniarfiusup peqqinnissamut ikiortitut ilinniarsimanermut uppernarsaat tunniussinnaanngussavaa. Uppernarsaat peqqinnissamut ikiortitut suliat pillugit nalunaarsummik imaqassaaq.

 

Kapitali 4
Ilinniartitaanerup aaqqissugaanera

§ 11. Ilinniarfiusup ilinniartitaaneq pillugu malittarisassat erseqqinnerusut ilinniartitaanermik aaqqissuussineq atorlugu suliarissavai.
Imm. 2. Nalunaarummi uani aalajangersagaasut takuneqarsinnaasut saniatigut ilinniartitaanerup aaqqissuussaanera makkuninnga imaqassaaq:
1) Ilinniartunngornissamut piumasarineqartut.
2) Ilinniartitaanerup immikkoortuini pingasuni tamani anguniakkat.
3) Atuagarsorluni ilinniarnermi atuartitsissutit tiimillu agguataarneqarneri.
4) Sungiusaatigalugu sulinerup agguataarneqarneranut aaqqissuunneqarneranullu pilersaarusiaq.
5) Sungiusaatigalugu suliffissanik akuersinissamut najoqqutassat.
6) Ilinniarfigisap avataani misilitsinnerit angusanillu naliliinerit qaqugukkut pisarnissaat.
7) (Ilinniarfigisami) misilitsinnernut aamma (sungiutsaatigalugu sulinermi) angusat nalilerneqarnerannut peqataajumassagaanni piumasaqaataasinnaasut.
8) Misilitsinnerit ataasiakkaat ilusilersugaaneri angusanillu naliliinerit pillugit maleruaqqusat.
9) Misilitsinnerit amerlassusii.
10) Atuartitsissutini/sammisani ataasiakkaani karakteerip, taanna atuartitsissummi/sammisami tassani misilitsinnerit karakteereqaataasussat arlallit agguaqatigiissinnerisimappassuk, qanoq ililluni taamaattuunissaanut maleruagassat.
11) Napparsimasimasut soraarummeernissaannut malittarisassat.
Imm. 3. Ilinniartitaanerup aaqqissugaanera Kultureqarnermut, Ilinniartitaanermut Ilisimatusarnermullu Pisortaqarfimmit akuersissutigineqassaaq.
Imm. 4. Ilinniartitaanerup aaqqissugaanerani allannguutit ilinniartitaanermi immikkoortup aallartinneqarnerani atuutilertassapput.

 

Kapitali 5
Peqqinnissamik isumaginninnermi ikiortinik ilinniartitseqqinneq 

§ 12.  Peqqinnissamik isumaginninnermi ikiortit peqqinnissamut qullersaqarfiup (Sundhedsstyrelsip) Kalaallit Nunaanni peqqinnissamut ikiortissat ilinniartitaasarnissaannik kaajallaasitaa 17. juni 1980-imeersoq malillugu ilinniagaqarsimasut napparsimasunik paarsisussat ilinniartitaanerata immikkoortuisa pingajuannut ilaaniarlutik qinnuteqarsinnaapput.
Stk. 2. Peqqinnissamik isumaginninnermi ikiortit napparsimasunik paarsisussatut ilinniartitaanerup aallartiffia ukiunik tallimanik sioqqullugu ilinniagaqarsimasut, napparsimasunik paarsisussatut ilinniartitaanerup immikkoortuisa pingajuannit ilinniagaqalersinnaapput:
1) napparsimasunik paarsisussatut ilinniartitaanermi immikkoortut aapaanni ilinniarfiusup avataani misilitsinnissamut piareersaataasumik atuagarsorluni ilinniartitsinermut qaammatit sisamat missaannik sivisussuseqartumut peqataasimasuugunik, aamma
2) napparsimasunik paarsisussatut ilinniartitaanermi immikkoortut aappaanni ilinniarfiusup avataani misilitsinnerit angusiffigisimagunikkit.
Stk. 3. Peqqinnissamilli isumaginninnermi ikiortit napparsimasunik paarsisussatut ilinniartitaanerup aallartiffia ukiut tallimat sinnerlugit sioqqullugu ilinniagaqarsimasut ilinniartunngortinneqarsinnaapput, tak. imm. 2, ilinniarfiusoq isumaqarpat qinnuteqarput napparsimasunik paarsisussatut iliniartitaanerup naammassisinnaanngornissaanut allatut iliornikkut pisariaqartitanik piginnaanngorsarfigisimagaat.

 

Kapitali 6
Ilinniartitaanerup aqunneqarnera

§ 13. Ilinniarfigisami ilinniartitaanermut siunnersuisoqatigiiliortoqassaaq. Ilinniartitaanermut siunnersuisoqatigiit aqqanilinnik ilaasortaqassapput.
Imm. 2. Ilaasortat marluk Naalakkersuisunit toqqarneqassapput, ilaasortarlu ataaseq kommunip oqartussaaffiini sungiusaatigalugu suliffissanik ilimaarinnittoq Kalaallit Nunaanni Kommuneqarfiit Kattuffiannit toqqarneqassaaq. Ilinniartitaanermut siunnersuisoqatigiinni ilaasortat sinneri makkuussapput:
1) Peqqinnissamut Ilinniarfiup pisortaa.
2) Napparsimasunik paarsisutut ilinniartitaanermi nakkutilliisoq.
3) Peqqinnissamut Ilinniarfimmi ilinniartitsisut aalajangersumik atorfeqartut akunnerminni toqqagaat ataaseq.
4) Ilinniagaqartut akunnerminni toqqagaat ataaseq.
5) Dronning Ingridip Napparsimmavissuani napparsimasunik paarsisut pisortaat.
6) Dronning Ingridip Napparsimmavissuani nakorsat pisortaat.
7) Nakorsaq peqqinnissakkut Nakkutilliisuutitaq.
Imm. 3. Siunnersuisoqatigiinni ilaasortat sinniisussaannik toqqaasoqassaaq, Nuummi najugaqanngisunik.
Imm. 4. Ilinniartitaanermut siunnersuisoqatigiit assersuutigalugu inuit perorsaanermik paasisimasaqartut isumaginninnermullu tunngasunik ilisimasaqartut taaseqataasinnaatinnagit ataatsimeeqatiserisinnaavaat.
Imm. 5. Ilinniartitaanermut siunnersuisoqatigiit namminneerlutik inissitsitissapput siulittaasulerlutik siulittaasullu tullilerlutik. Siulittaasoq taassumalu tullia napparsimasunik paarsisuussapput. Ilinniartitaanermut siunnersuisoqatigiit suleriaasissartik nammin-
neerlutik aalajangersassavaat, tassanissaaq ataatsimiigiaqqullugit aggersarneqarsimasut taaseqataasinnaatitaassanersut aalajangissallugu.
Imm. 6. Ilinniarfik ilinniartitaanermut siunnersuisoqatigiinnut allattoqarfiussaaq.

§ 14. Ilinniartitaanermut siunnersuisoqatigiit napparsimasunik paarsisutut ilinniartitaanermi siunnersuisuussapput inassuteqaateqartassallutillu Kultureqarnermut, Ilinniartitaanermut Ilisimatusarnermullu Pisortaqarfimmut, aammattaaq § 26 naapertorlugu misiliutaasumik aaqqissuussinernut.
Imm. 2. Tamakku saniatigut ilinniartitaanermut siunnersuisoqatigiit inunnik isumaginninnermut peqqinnissamullu tunngasunik ilinniartitsinerit ilisimatusarnermut inuiaqatigiillu inerisaaneqarnerannut attuumassuteqartut pillugit Naalakkersuisunut inassuteqartassapput.

§ 15. Ilinniartitaanermut siunnersuisoqatigiit makku alaj angiivigisassavaat:
1) ilinniartunik soraarsitsinerit,
2) ilinniagaqartut pillugit inuttaanut tunngatillugit immikkut akuersissuteqartarnerit aamma
3) sungiusaatigalugu suliffissat akuersissutigineqarneri.

 

Kapitel 7
Soraarummeerneq pillugu naamnagittaalliuutit

§ 16. Ilinniarfigisap iluani avataaniluunniit misilitsinnerit soraarummeernerilluunniit pillugit naammagittaalliuutit makkununnga tunngassuteqarsinnaapput:
1) soraarummeerummut toqqammavigisaq, aammattaaq soraarummeernermi apeqqutit, suliassiissutit assigisaallu atuagassallu annertussusaannut sanilliullu
2 ) soraarummeernerup qanoq ingerlanneqarnera imaluunniit
3) soraarummeernermik naliliineq.

§ 17. Naammagittaalliuut, ilinniarf igisamut tunniunneqartussaq, allaganngorlugu sunalu pillugu maarlaaruteqarneq oqaatigalugit tunniunneqassaaq.
Imm. 2. Naammagittaalliuut, misilitsinnerup soraarummeernerulluunniit inernerata tiguneranerit, kingusinnerpaamik ulluinnaat arfineq pingajuanni tunniunneqassaaq.
Imm. 3. Immikkut pisoqartillugu ilinniarfik imm. 2 pillugu immikkut akuersissuteqarsinnaavoq.

§ 18. Ilinniarf igisap naammagittaalliuut piaarnerpaamik nalileeqqaarsimasunut saqqummiutissavaa.

§ 19. Naliliisoq (-sut) nalileeqqissinnaavoq, aammaarlugu soraarummeernissamik neqerooruteqarsinnaalluni naammagittaalliuummiluunnit toqqammavilersuut itigartitsissutigisinnaallugu .
Imm. 2. § 16-imi taaneqartut arlaannik arlalinninnilluunniit amigaateqarneq pissutigalugu nutaamik naliliisoqassatillugu, nutaamik naliliineq soraarummeeqataasunut, taamatulli soraarummeernermi amigaateqartunut, tamanut naliliinerussaaq,
Imm. 3. §16-imi taaneqartunut sanilliullugu arlaannik arlalinnilluunniit annertuumik amigaateqartoq naliliisup naliliisulluunniit ilaata isumaqarf igippagu, aammaarluni soraarummeernissaq neqeroorutigineqassaaq. Soraarummeertunut, taamatulli soraarummeernermi amigaateqarsimasunut, tamanut aammaarluni soraarummeernissaq neqeroorutigineqassaaq.

§ 20. Naammagittaalliuut naliliisumit (-sunit) tiguneqarneranit kingusinnerpaamik ulluinnaat aqqaneq aappaanni naammagittaalliuut naammassillugu suliarineqariissaaq aalajangiinerlu ilinniarfigisimasut nalunaarutigineqarluni, tassanngaaniillu naammagittaalliuuteqartoq aalajangiineq pillugu piaarnerpaamik nalunaarfigineqassaaq.
Imm. 2. Imm. 1-mi piffissaliunneqarsimasup ingerlanerani naammagittaalliuutip suliarineqarnissaanut akornutissaqarsimappat, ilinniarfigisap naammagittaalliuuteqartoq tamanna pillugu piaarnerpaamik nalunaarfigissavaa, naammagittaalliuullu qaqugukkut naammassineqassangatinneqarnersoq nalunaarlugu.

§ 21. Naliliisup (-sut) § 19 naapertorlugu aalajangiinera naammagittaalliortumit Kultureqarnermut, Ilinniartitaanermut Ilisimatusarnermullu Pisortaqarfimmut ingerlateqqinneqarsinnaavoq.
Imm. 2. Naammagittaalliuut, ilinniarfigisamut tunniunneqartussaq, allaganngorlugu sunalu pissutigalugu naammagittaalliuuteqarneq oqaatigalugu tunniunneqassaaq.
Imm. 3. Naliliisup (-sut) aalajangiinera pillugu naammagittaalliortoq ilisimatinneqareerpat, naammagittaalliuut kingusinnerpaamik ulluinnaat arfineq pingajuaanni tunniunneqassaaq.
Imm. 4. Immikkut pisoqartillugu, ilinniarfigisaq imm. 3 pillugu immikkut akuersissuteqarsinnaavoq.

§ 22. Kultureqarnermut, Ilinniartitaanermut Ilisimatusarnermullu Pisortaqarfiup karaktere atorunnaarsissinnaavaa, nutaamik (-nik) naliliisulerluni nalileeqqittoqarnissaa aalajangiussinnaallugu naammagittaalliornermiluunniit toqqammavilersuut itigartitsissutigisinnaallugu.
Imm. 2. Kultureqarnermut, Ilinniartitaanermut Ilisimatusarnermullu Pisortaqarfiup naammagittaalliuut aalajangiivigitinnagu ilinniartitaanermut siunnersuisoqatigiit naliliisorlu (-sullu) oqaaseqartissavai.
Imm. 3. Nutaamik (-nik) naliliisoqarluni nalileeqqittoqarnissaa Kultureqarnermut, Ilinniartitaanermut Ilisimatusarnermullu Pisortaqarfiup aalajangiuppagu, naliliisussat Kultureqarnermut, Ilinniartitaanermut Ilisimatusarnermullu Pisortaqarfiup toqqassavai.
Imm. 4. § 16-imi taaneqartut arlaannik arlalinnilluunniit amigaateqarsimaneq pissutigalugu karakterip qaffanneqarnissaa, nutaamik naliliisoqarnissaa aammaarluniluunniit soraarummeeqqusinermik neqeroorut Kultureqarnermut, Ilinniartitaanermut Ilisimatusarnermullu Pisortaqarfiup aalajangiuppagu, aalajangiineq soraarummeertunut, soraarummeernermi taamatulli amigaateqarsimasunut, tamanut atuuppoq.

§ 23. Ilinniagaqartup naammagittaalliuutimi suliarineqarnerata nalaani ilinniarnini ingerlatiinnarsinnaavaa. Taamaanngilarli nalunaarummi uani ilinniartitaanerullu aaqqissuussaanerani allatut aalajangersaasoqarsimappat.
Imm. 2. Naammagittaalliuut uppernarsaatitaarnissamut kinguneqartussaatitaanngilaq, tak. § 10.

§ 24. Nutaamik naliliineq aammaarluniluunnit soraarummeerneq piaarnerpaamik pissaaq.

§ 25. Naammagittaalliuuteqarneq appasinnerusumik karaktereqalernermik kinguneqarsinnaanngilaq.

 

Kapitali 8
Immikkut akuersissuteqartarneq, naammagittaalliuuteqartarneq atuutilerfialu

§ 26. Ilinniartitaanermut siunnersuisoqatigiit inassuteqartereernerisigut Kultureqarnermut, Ilinniartitaanermut Ilisimatusarnermullu Pisortaqarfiup nalunaarummi matumani aalajangersakkanik sanioqqutsigallarnissamut akuersissuteqarsinnaavoq. Taamaaliortoqartillugu misiliinerup sivisussusissaa qanorlu nalunaarusiortoqartarnissaa ilanngullugit aalajangersarneqartassapput.
Imm. 2. Immikkorluinnaq pissutissaqartillugu Kultureqarnermut, Ilinniartitaanermut Ilisimatusarnermullu Pisortaqarfik nalunaarummi aalajangersakkat sanioqqunneqarnissaannut akuersissuteqarsinnaavoq.

§ 27. Ilinniarfigisaq tamatigut nalinginnaasumilluunniit aalajangersakkatigut akuersissuteqarsinnaavoq Kalaallit Nunaanni, Qallunaat Nunaanni nunaniluunniit allani ilinniakkat naammasseriikkat/angusiffiusimasut ilinniakkanut nalunaarummi uani pineqartunut taarsiunneqarsinnaasut.
Imm. 2. Imm. 1 naapertorlugu akuersissuteqartoqarnerani ilinniagaq naammassineqarsimasutut isigineqartassaaq, ilinniagaq pineqartoq pillugu aalajangersakkat malillugit angusiffiusimappat nalunaarulluunniit manna naapertorlugu angusiffiusimappat. Naliliineq angusiffiusimasutut nuunneqassaaq, karakteerimut taarsiullugu atorneqanngikkuni aammalu naliliussaasimanngikkuni aalajangersakkat taakkuusut atorlugit, karakteeritut nalunaarut una malillugu tunniunneqartutut.

§ 28. Ilinniartitaanermut siunnersuisoqatigiit aalajangiineri tigunerinit sapaatip akunneri sisamat qaangiutsinnagit Kultureqarnermut, Ilinniartitaanermut Ilisimatusarnermullu Pisortaqarfimmut ingerlateqqinneqarsinnaapput. Naammagittaalliuut aalajangiivigitinnagu ilinniartitaanermut siunnersuisoqatigiit ilinniarfigisarlu oqaaseqaateqartinneqassapput.

§ 29. Aalajangiinerit allat pillugit naammagittaalliuutit, ilinniarfigisap aalajangiineri ilanngullugit, aalajangiinerup tiguneranit sapaatip akunneri sisamat qaangitsunnagit Kultureqarnermut, Ilinniartitaanermut Ilisimatusarnermullu Pisortaqarfimmut ingerlateqqinneqarsinnaapput. Naammagittaalliuut aalajangiivigineqartinnagu ilinniartitaanermut siunnersuisoqatigiit ilinniarfigisarlu oqaaseqaateqartinneqassapput.

§ 30. Nalunaarut una atortuulissaaq januarip aallaqqaataani 1994-imi.

Namminersornerullutik Oqartussat, ulloq 27. december 1993.

Marianne Jensen

/

Aqigssiaq Møller