Kalaallit Nunaanni pinngortitamik allanngutsaaliuineq pillugu landstingip inatsisaani nr. 11, 12. november 1980-imeersumi §§ 4 aamma 19 naapertorlugit makku aalajangersarneqarput:

§ 1. Angujaartorfiup Nunaani nunap immikkoortortaa Arnangarnup Qoorua kaajallallugu nunap assingani imatut killilikkap iluaniittoq 66°30'N/51°37'V, 66°29'N/51°37'V, portussuseq (kotepunkt) 1040 m, portussuseq (kotepunkt) 949 m, 66°27'N/51°20'V aamma 66°32'N/51°07'V allanngutsaaliugassanngortinneqarpoq pinngortitap kusanassusia, kulturikkut kiisalu ilisimatooqarnikkut pingaaruteqarnera pissutigalugit (takuuk nunap assinga ilanngussaq 1).
Imm. 2. Sumiiffimmi imm. 1-imi taaneqartumi naasut uumasullu ukioq naallugu innarlitsaaliugaallutillu eqqissisimatitaapput.
Imm. 3. Illukut, ilerrit, allallu qangarnitsanut eqqaassutissat imaaliinnarlugit peerneqarsinnaanngitsut innarlerneqassanngillat qanoq ilillugilluunniit allanngortinneqassanatik.
Imm. 4. Naasunik, nassunnik, niaqqut saarnginik qangarnitsanillu tamanik katersinissaq inerteqqutaavoq.

§ 2. Nunap immikkoortuani allanngutsaaliukkami taamaallaat pisuinnarluni angalaartoqartassaaq.

§ 3. Nunap immikkoortuani allanngutsaaliukkami uninngaarnermi nunaminertat innersuussutigineqartut avataanni tupertoqarnanilu assinginik uninngaarfiliortoqassanngilaq. (takuuk nunap assinga ilanngussaq 2).
Imm. 2. Nunap naasui suusulluunniit ikummatitut atorneqassanngillat.
Imm. 3. Palleqarfinniit orpinnullu assingusunik naasoqarfinniit 50 m-inik qaninnerusumi ikumatitsinissaq inerteqqutaavoq.

§ 4. Maanngaannaq igitsineq, inissiineq assaassinerlu inerteqqutaapput pigisalluunniit nunap immikkoortuanut allanngutsaaliukkamut nassarsimasat qimaannarneqassanatik.

§ 5. Naalakkersuisut Maniitsumi kommunalbestyrelsep isumasioqatigereerneragut aalajangersakkanik §§ 1-imiit 4-imut allassimasunik saneqqutsisitsisinnaapput.

§ 6. Nalunaarummi matumani aalajangersagaqareeraluartoq nunami allanngutsaaliukkami Kalaallit Nunaanni
aatsitassat il. il. pillugit inatsit nr. 844 ulloq 21. december 1988-imeersoq naapertorlugu aatsitassanik misissueqqaarnermut, ujarlernermut atuinermullu akuersissuteqartoqarsinnaavoq.

§ 7. Nalunaarummi matumani aalajangersakkanik §§ 1-imiit 4-imut allassimasunik unioqqutitsinermi eqqartuussisutigut akiliisitsisoqarsinnaavoq.

§ 8. Nalunaarut atortuulerpoq 1. december 1989, tamatumunngalu peqatigitillugu Angujaartorfiup Nunaata allanngutsaaliorneqarnera pillugu nalunaarut ulloq 2. oktober 1984-imeersoq atorunnaarpoq.

Namminersornerullutik Oqartussat, ulloq 20. oktober 1989.

Jonathan Motzfeldt

/

Aqigssiaq Møller

Ilanngussaq 1+2