Kingusinaartumik akiliisoqartillugu erniat il.il. pillugit inatsimmi § 9 a, imm. 3 naapertorlugu, tak. inatsimmut nalunaarut nr. 743 4. september 2002-meersoq, tak. peqqussut nr. 991, 14. Oktober 2011-meersoq matumuuna makkua Kalaallit Nunaanni atuuttussanngorlugit aalajangersarneqarput. 

§ 1. Nalunaarummi matumani malittarisassat atuupput pisuussutaateqarnermut inatsisinut tunngassuteqartuni piumasaqaatinik eqqartuussivik avaqqullugu akiliisitsiniarnermi.

§ 2. Allakkatigut akileeqqussutinik pisassarisanut tunngasunik nassiussisoqartillugu aamma pisassalik sinnerlugu allamik akiliisitsiniartitsisoqartillugu pisassalik akileeqqusisinnaavoq ernialiisarnermik inatsimmi § 9 b-mi malittarisassat malillugit. 

Imm. 2. Akiliisitsiniarnissamut iliuuseqaqqinnertut, tak. ernialiisarnermik inatsimmi § 9 a, pisassalik piumasaqarsinnaavoq aningaasartuutini naleqquttut tulluartullu akiligassallip akilissagai malittarisassat §§ 3 aamma 4-mittut naapertorlugit, akiliinissamut kinguaattoorneq akiitsullip atugarisaanik pissuteqanngippat. Pisassalik malittarisassat § 3 aamma § 4-miittut malillugit akileeqqusisinnaavoq, piumasaqaatit aalajangersakkani tamani taakkunaniittut naammassineqarsimappata. 

§ 3. Pisassallip alla nammineq sinnerluni pisassaminik akiliisitsiniartissimappagu, pisassallip akissarsiassat tulluartut taamaaliornermut attuumassuteqartut akiitsulimmut akileqqusinnaavai. Taamaallaalli taamaattoqarsinnaavoq tamanna sioqqullugu allakkatigut akileeqqussummik akiitsulimmut nassiussisoqarsimappat, oqaatigineqarsimassalluni allakkatigut akileeqqussutip nassiunneqarneraniit ikinnerpaamik ullunik qulinik piffissarititaq sioqqullugu akiliinngitsoorneq akiliisitsiniarnermi aningaasartuutinik suli allanik akiligassiinermik kinguneqarsinnaasoq, aammalu akiliisitsiniartartup pineqartup pisassarisanik akiliisitsiniarnissaa pisariaqarsimasoq. 

Imm.2. Akileqqusat imm. 1-imi, oqaaseqatigiinni siullerni eqqaaneqartut nalunaarummi ilanngussaq 1-imi aalajangerneqarsimasuniit amerlanerusinnaanngillat.

§ 4. Pisassalik pisassaminik nammineerluni akiliisitsiniarsimaguni, akilersuinissaq pillugu akiitsulimmik isumaqatigiissuteqarnerminut isumaqatigiissutillu suliarineranut tamatumalu allaffissornikkut aqunneqarneranut aningaasartuutinik tulluartunik akileeqqusisinnaavoq (eqqartuussutitaqanngitsumik isumaqatigiissut). Taamaallaalli taamaattoqassaaq tamanna sioqqullugu akiligassaqartumut allakkatigut akileeqqussummik nassiussisoqarsimappat nalunaarutigineqarsimalluni, allakkatigut akileeqqussutip nassiunneqarneraniit ikinnerpaamik ullunik qulinik piffissarititaq sioqqullugu akiliinngitsoorneq akiliisitsiniarnermi aningaasartuutinik suli allanik akiligassiinermik kinguneqarsinnaasoq, aammalu akiliisitsiniartartup pineqartup pisassarisanik akiliisitsiniarnissaa pisariaqarsimasoq.

Imm. 2. Akileqqusat imm. 1-imi, oqaaseqatigiinni siullerni eqqaaneqartut nalunaarummi ilanngussaq 2-mi aalajangerneqarsimasuniit amerlanerusinnaanngillat.

§ 5. Isumaqatigiissut imaluunniit niuernermi ileqquusartoq imaluunniit ileqquusartoq alla aqqutigalugu malittarisassat §§ 3 aamma 4-miittut sanioqqunneqarsinnaanngillat pisassalimmut ajoqutaasussanngorlugit, tamanna piumasaqaatinik eqqartuussivik avaqqullugu akiliisitsiniarnermut aningaasartuutinik naleqquttunik tulluartunillu pisassallip akileeqqusisinnaannginneranik kinguneqassappat. Pisassarisat isumaqatigiissut, ernialiisanermik inatsimmi § 7, imm. 1-mi taaneqartutut ittoq, naapertorlugu pisassarineqarpata, malittarisassat §§ 3 aamma 4-miittut aamma saneqqunneqarsinnaanngillat, isumaqatigiissummik imaluunniit niuernermi ileqquusartumik imaluunniit ileqquusartumik allamik atuinikkut.

§ 6. Nalunaarut attuutilersinneqarpoq ulloq 1. november 2011 aamma atuutissaaq akiliisitsiniarnermi aningaasartuutinut, tamatumani akileeqqusissut pineqartoq nalunaarutip atuutilersinneqarnerata kingorna pilersimassaaq.

Justitministereqarfik, ulloq 14.oktober 2011

MORTEN BØDSKOV

/ Joachim Kromann