Matumuuna kingusinaarluni akiliinermi erniat pillugit il.il. inatsit nalunaarutigineqarpoq, pisuussutitigut pisinnaatitaaffiit aalajangersimasut pillugit inatsisit Kalaallit Nunaannut atuutilersinneri pillugit peqqussut nr. 350, 14. juli 1980-imeersumi § 2-kkut Kalaallit Nunaannut atulersinneqartoq, peqqussutip nr. 548, 21. august 1986-imeersup aamma peqqussut nr. 991, 14. oktober 2011-imeersumi § 2-p malitsigisaanik allanngortinneqartoq. 

§ 1. Inatsit pisuussutitigut pisinnaatitaaffinnut tunngasuni aningaasatigut piumasaqaatit ernialersornerinut atuuppoq, taamaattoq tak. §§ 8 aamma 8 a. 

Imm. 2. § 9 a pisuussutitigut pisinnaatitaaffinnut tunngasuni pissarsiassanut tunngasunut akiliisitsiniarnermi aningaasartuutinut tamanut atuuppoq, § 9 b-ili taamaallaat taamatut pissarsiassanut tunngasuni nukingisaarutinut aningaasanillu akiliisitsiniarnermi akitsuutinut atuulluni. 

Imm. 3. Inatsit, allanik imaluunniit inatsit naapertorlugu aalajangiisoqarsimappat, imaluunniit allamik isumaqatigiittoqarsimappat, atorneqassanngilaq, taamaattorlu tak. §§ 7, 9 a aamma 9 b. 

Imm. 4. Inatsit, allatigut niuernermik atuinermik imaluunniit allamik ileqqoqarnermik malitseqarpat, atorneqassanngilaq, taamaattorli tak. §§ 9 a aamma 9 b. Tamanna § 7, imm. 1-imi taaneqartutut isumaqatigiissut naapertorlugu pissarsiassaq pineqartillugu, akiitsoqartumut ajoqusiisumik saneqqussineq eqqarsaatigalugu, atuutissanngilaq. Aammattaaq §§ 3-5 malillugit ernialiisoqarsinnaavoq, naak allat niuernermik atuinermik imaluunniit allamik ileqqoqarnermik malitseqaraluartut, inuussutissarsiuuteqarnermut atasumik inuussutissarsiortut akornanni imaluunniit inuussutissarsiuuteqarnermut atasup aamma naalagaaffiup, Namminersorlutik Oqartussat, kommunip, kommunimi peqatigiiffiup, pisortani oqartussat imaluunniit oqartussat ataatsit amerlanerusulluunniit kattuffiata imaluunniit pisortani inatsisitigut aaqqissugaanerit akornanni isumaqatigiissutaasunik imaluunniit nioqqutissanik kiffartuussinernik pilersuineq pillugu isumaqatigiissut naapertorlugu akissarsianut piumasaqaat tunngasuuppat. 

Imm. 5. Pisortani inatsisitigut aaqqissugaanermi, tak. imm. 4, peqqussummi matumani paasineqassaaq aaqqissugaaneq sunaluunniit inuit amerlanerit pisariaqartitaasa akuerineqarnissaat siunertaralugu immikkut pilersinneqarsimasoq, taamaattorli inatsisitigut pisinnaatitaasoq pisussaatitaasorlu suliffissuartigut aningaasarsiorfigaluguluunniit pisariaqartitsinngitsoq, aamma ingerlatsinerup affaa sinnerlugu naalagaaffimmit, Namminersorlutik Oqartussanit, kommunimit, kommuninit peqatigiinnit, pisortani oqartussanit imaluunniit oqartussat ataatsit amerlanerusulluunniit kattuffiata imaluunniit pisortani inatsisitigut aaqqissugaanermit aningaasalersorneqartoq, imaluunniit naalagaaffik, Namminersorlutik Oqartussat, kommuni, kommunit peqatigiit, pisortani oqartussat imaluunniit oqartussat ataatsit amerlanerusulluunniit kattuffiata imaluunniit pisortani inatsisitigut aaqqissugaaneq allaffissornikkut, aqutsinikkut nakkutilliinikkulluunniit aaqqissugaanermi ilaasortat affai sinnerlugit toqqaasinnaallutik. 

§ 2. Ulloq akiliiffissaq kingulleq sioqqullugu piffissamut ernianik akiliisoqassanngilaq, taamaattorli tak. § 1, imm. 3 aamma imm. 4, oqaaseqatigiit siulliit aappaallu. 

§ 3. Erniat ulloq akiliiffissaq kingullermiit akilerneqassapput, tamanna siumoortumik aalajangersarneqarsimappat. 

Imm. 2. Pisuni allani ullup taassuma kingorna ullut 30-it ingerlareerpata ernianik akiliisoqassaaq, tassa pissarsisussap akiliinissaq pillugu noqqaassutini nassiussimammagu imaluunniit saqqummiussimammagu. Noqqaassutilli tiguneqarnerata siornaniittumut piffissamut ernianik akiitsoqartoq akiliissanngilaq. 

Imm. 3. Imm. 1 aamma 2 apeqqutaatinnagit, piumasaqaatip pissutissaqarneranik annertussusianillu nalilersuinissamut pisariaqartutut isigineqarsinnaasunik paasissutissanik akiitsoqartup ullormiit pissarsisinnaaneraniit ullut 30-it ingerlareersimatillugit siusinnerpaamik ernianik akiliisoqarsinnaavoq. 

Imm. 4. Imm. 2 aamma 3 apeqqutaatinnagit kingusinnerpaamik ullormit tassanngaanniit ernianik akiliisoqassaaq, akiitsut akilersinnissaannut eqqartuussivikkut malersuineq pissarsisussamit aallartinneqarsimammat. 

Imm. 5. Pissutsit immikkuullarissut tamatuminnga tunngavissaqartitsineranni piffissamit siusinnerusumiit imaluunniit kingusinnerusumiit erniat akilerneqassasut eqqartuussivik aalajangiisinnaavoq. Taamaattoq § 1, imm. 3, oqaaseqatigiit pingajuanni taaneqartutut isumaqatigiissutit naapertorlugit pissarsiassani erniat piffissami siusinnerusumiit taamaallaat akilerneqassasut eqqartuussivik aalajangiisinnaavoq.

§ 4. Pissarsisussap akiliinissaq pissutsitigut aporfissaqartippagu aporfissaq atuutsillugu ernianik akiliisoqassanngilaq. Tamanna atuutissaaq, akiitsut ulloq akiliiffissaq kingulleq sioqqullugu ernialersorneqassasut isumaqatigiissutaagaluarpalluunniit.

Imm. 2. Aporfiup immikkuullarissuunera malillugu pissarsisussamut naammaginartumik eqqarsaatiginninnermi aningaasat aningaaserivimmut imaluunniit sparekarsimut ikineqassasut akiitsoqartumut piumasarineqarpat, tamatumani pissarsiarineqarsimasussaagaluit pissarsisussap akilissavai.

§ 5. Ullup akiliiffissap kingorna erniat ukiumut ernianut aalajangersarneqassapput, akigititassatut tunuliaqutaasutut aalajangersarneqartunut naapertuuttut 7 pct.-inik ilallugit. Akigititatut tunuliaqutaasutut inatsimmi tassani isigineqarput pisortatigoortumik taarsigassarsisitsinermi erniat, Nationalbankip ukiumi pineqartumi januarip aallaqqaataani aamma julip aallaqqaataani aalajangersartagai.

Imm. 2. Inatsisinik atuutsitsinermut ministerip ukioq allortarlugu Danmarks Nationalbanki aamma Erhvervs- og Vækstministeriaqarfk isumaqatigiinniarfigereerlugit erniat allanngortissinnaavai, taamaattorli imm. 1-imi tapit taaneqartut 7 pct.-imit annikinnerusumik aalajangersarneqarsinnaanatik.

Imm. 3. Pissutsit immikkuullarissut tamatuminnga tunngavissaqartitsineranni piffissamit siusinnerusumiit imaluunniit kingusinnerusumiit erniat akilerneqassasut eqqartuussivik aalajangiisinnaavoq. Taamaattoq § 1, imm. 3, oqaaseqatigiit pingajuanni taaneqartutut isumaqatigiissutit naapertorlugit pissarsiassani erniat qaffasinnerusut akilerneqassasut eqqartuussivik taamaallaat aalajangiisinnaavoq.

§ 6. Pissarsisussaq allamik tunngaveqarluni qaffasinnerusumik ernianik piumasaqarsinnaappat tassunga pisinnaatitaaffini pigiinnassavaa.

§ 7. Akiitsoqartoq annerusumik inuussutissarsiummi avataani niuerpat, inuussutissarsiummik ingerlataqartup inuussutissarsiumminut atasumik isumaqatigiissuteqarnerani akiitsortimut ajoqutaasumik § 5 saneqqunneqarsinnaanngilaq. Isumaqatigiissutip isumaqatigiissutaasup oqaaseqatigiinnut siullernut ilaanngunnera pillugu inuussutissarsiuteqartoq uppernarsaasussaavoq.

Imm. 2. Akiitsoqartup ullup akiliiffissap kingulliup kingorna ernianut taarsiullugu imaluunniit tapiliullugu ingerlaavartumik tuniniaasorisap akissarsiaanik assigisaanilluunniit akiliissasoq pillugu imm. 1-imi taaneqartunik isumaqatigiissutinik akuersineq akiitsoqartumut pituttuinngilaq, erniat tuniniaasorisamullu akissarsiat katinneri § 5 malillugu erniat qaangersimappatigit.

Imm. 3. Piffissamut ulloq akiliiffissaq kingulleq siornanut akiitsoqartoq aalajangersimasunik imaluunniit allanngorartunik ernianik, tuniniaasorisap akissarsiaanik assigisaanilluunniit tapeqarsinnaasunik § 5, imm. 1 aamma 2 malillugit aalajangersarneqarsimasumik ernianik qaffasinnerusunik akiliissappat taamaattoq pissarsisussap ullup akiliiffissap kingulliup kingorna ernianut qaffasinnerusunut il.il. pisinnaatitaaffini pigiinnassavaa.

Imm. 4. Imm. 1-3-imi aalajangersakkat aningaaserivimmit, illuummik qularnaveeqqusiilluni taarsigassarsisarfimmit imaluunniit taarsigassarsisitsisarfimmit akuerineqartumit isumaqatigiissutaasunut atuutinngillat.

§ 8. Pisuussutitigut pisinnaatitaaffinnut tunngasut avataanni aningaasatigut piumasaqaatit piffissaq eqqorlugu akilerneqanngippata, erniat § 5, imm. 1 aamma 2 malillugit aalajangersarneqarsimasut ullormit tassanngaanniit akilerneqassapput, akiitsut akilersinnissaannut eqqartuussivikkut malersuineq pissarsisussamit aallartinneqarsimammat. 

Imm. 2. § 3, imm. 5, § 4, imm. 1, § 5, imm. 3, aamma § 6 aamma pisuussutitigut pisinnaatitaaffinnut tunngasut avataanni aningaasatigut piumasaqaatinut atuupput.

§ 8 a. Eqqartuussutikkut allatigulluunniit pisortani suliami eqqartuussinertigut allami aalajangiisoqarneratigut suliap ingerlanneranut aningaasartuutit akiligassanngortinneqartut piffissap naammassinniffiusussap naaneraniit § 5, imm. 1 aamma 2 malillugu aalajangersarneqartunik erniaqartillugit ernialerneqassapput.

Imm. 2. Ingerlateqqitassanngortitsisoqartillugu erniat siuliani oqartussaasoqarfimmi aalajangiineq pillugu naammassinninnissamut piffissaliussap naanerata kingornaniit erniat akilerneqassapput, suliami aningaasartuutit pillugit aalajangiineq aalajangersarneqarsimappat. Tamanna atuutissaaq, ingerlateqqitassanngortitsineq piffissap naammassinniffiusussap naanerata kingorna pisimagaluarpalluunniit imaluunniit ingerlateqqitassanngortitsineq allatigut kinguartitsinermik kinguneqarsimagaluarpalluunniit.

§ 9. Immikkut piumasaqaatinut erniat pillugit inatsisini aalajangersakkat § 5, imm. 1 aamma 2 malillugit aalajangersarneqartunit appasinnerisumik erniaqartitsippat taamaattoq ullormit tassanngaanniit erniaq taaneqartoq akiitsoqartumit akilerneqassaaq, akiitsut akilersinnissaannut eqqartuussivikkut malersuineq pissarsisussamit aallartinneqarsimammat. § 5, imm. 3 taamaaqataanik atorneqassaaq.

§ 9 a. Pissarsiassat eqqartuussivik avaqqullugu akiliisitsiniarnermi pissarsisussap aningaasartuutai naammaginartut attuumassuteqartullu akiitsoqartup akilissagai pissarsisussamit piumasarineqarsinnaapput, akiliinissap kinguaattoornera akiitsoqartumi pissutsinik tunngaveqanngippat.

Imm. 2. Imm. 1 isumaqatigiissuteqarnikkut imaluunniit niuernermut atuinermi imaluunniit ileqquusumik allaanerusumi pissarsisussamut ajoqusiisumik saneqqunneqarsinnaanngilaq. § 7, imm. 1-imi taaneqartutut isumaqatigiissut naapertorlugu pissarsinissaq pineqarpat imm. 1-imi malittarisassaq aamma isumaqatigiissuteqarnikkut akiitsoqartumut ajoqusiisumik saneqqunneqarsinnaanngilaq.

Imm. 3. Inatsisinik atuutsitsinermut ministeri aningaasartuutit suut imm. 1 malillugu akileqquneqarnissaat pillugu malittarisassanik erseqqinnerusunik aalajangersaasinnaavoq, aningaasartuutit paasiuminartuunissaat aamma pissarsiassanut naleqqiullugu tulluartuunissaat siunertaralugu, matumunnga ilanngullugu aningaasatigut killiliussat aalajangersimasut iluanni pissarisassat aningaasatigut annertunerpaaffinnut aalajangersimasut tikillugit taamaallaat akileqquneqarsinnaaneri pillugit malittarisassat.

Imm. 4. Eqqartuussivitsigut akiliisitsiniarnermi aningaasartuutit eqqarsaatigalugit suliani aningaasartuutit pillugit eqqartuussisarnermi inatsimmi malittarisassat atuutissapput.

§ 9 b. Pissarsiassanut tunngatillugu nukingisaarilluni allakkat eqqarsaatigalugit allakkat naammaginartumik tunngavilersuuteqartillugit nassiunneqarsimappata (nukingisaarinermi akitsuut) pissarsisussaq akitsuummik piumasaqarsinnaavoq, tak. imm. 2. Tamanna naammaginartumik tunngavilersorneqarpat pissarsisussaq sinnerlugu akiliisitsiniarnermi alla noqqaaffigineqarsimappat pissarsisussaq akitsuummik aamma piumasaqarsinnaavoq, tak. imm. 3, (akiliisitsiniarnermi akitsuut).

Imm. 2. Nukingisaarilluni allakkianut ataasiakkaanut tamanut 100 kr.-it tikillugit nukingisaarinermi akitsuummik piumasaqartoqarsinnaavoq, taamaattorli akiliutissamut ataatsimut tunngatillugu annerpaamik allakkianut pingasunut. Akiitsoqartoq piffissap ataqatigiissup ataatsip iluani akiitsunut taakkununnga tunngasunik suli akiliisimanngippat, oqaaseqatigiit siulliit apeqqutaatinnagit piffissami pineqartumi akilinngisanut tunngatillugu allakkianut pingasunut nukingisaarilluni akitsuutinik annerpaamik piumasaqarsinnaavoq. Taamaattorli sivikinnerpaamik ullunik qulinik akunneqartumik nassiunneqartunut nukingisaarinnilluni allakkianut akitsuummik piumasaqartoqarsinnaavoq.

Imm. 3. Akiliisitsiniarnermi akitsuummik qaffasinnerpaamik 100 kr.-imik akileeqqusisoqarsinnaavoq.

Imm. 4. Imm. 1-3-imi malittarisassat isumaqatigiissuteqarnikkut akiitsoqartumut ajoqusiisumik saneqqunneqarsinnaanngillat, § 7, imm. 1-imi taaneqartutut isumaqatigiissut naapertorlugu pissarsiassaq ataaseq pineqarpat. § 9 a, imm. 1 aamma imm. 2, oqaaseqatigiit siulliit malitsigisaannik pisuni allani imm. 1-3-imi malittarisassat isumaqatigiissuteqarnikkut imaluunniit niuernermi atuinikkut ileqquusimilluunniit allaanerusumi saneqqunneqarsinnaapput.

§ 10. (Ilaatinneqanngilaq)¹⁾

§ 11. (Ilaatinneqanngilaq)²⁾

-----

Peqqussut nr. 350, 14. juli 1980-imeersoq (Isumaqatigiissuteqarneq il.il. pillugu inatsimmi, kingusinaartumik akiliinermi erniat il.il. pillugit inatsimmi aamma atuisut isumaqatigiissutaat aalajangersimasut pillugit inatsimmi allannguutit)³⁾ kingusinaartumik akiliinermi erniat pillugit il.il. inatsimmut tunngasut atuutilersitsinermi ikaarsaarnermilu aalajangersakkanik ukuninnga imaqarpoq: 

§ 2

Imm. 1. Kingusinaartumik akiliinermi erniat il.il. pillugit inatsimmi nr. 638, 21. december 1977-imeersumi § 11-imi aalajangersarneqarpoq inatsit Kalaallit Nunaannut atuutilersinneqassasoq.⁴⁾ 

Imm. 2. Inatsit aningaasatigut piumasaqaatinut 1. oktober 1980-imi kingusinnerusumiluunniit kingusinnerpaamik akileqquneqartuni Kalaallit Nunaanni atorneqassaaq. 

Imm. 3. Inatsimmi § 7 isumaqatigiissutinut, 1. oktober 1980 sioqqullugu isumaqatigiissutigineqartunut, piumasaqaat 1. oktober 1980-imi kingusinnerusumiluunniit kingusinnerpaamik akilerneqartussaappat Kalaallit Nunaanni atorneqassaaq. 

-----

-----

Peqqussut nr. 991, 14. oktober 2011-imeersoq (Atuisutut isumaqatigiissutini aalajangersimasuni il.il. isumaqatigiissutitigut piumasaqaatit naammaginanngitsut) (Atuisutut pissutsini akileeqqussutini akitsuutit il.il. qummut killilerneri) (Niuernermi pissutsini aalajangersimasuni il.il. kingusinaartumik akiliinerit akiorneqarneri pillugu EF-imi peqqussutip naammassineqarnera) (Suliani aningaasartuutit, inatsisitigut ilitsersorneqarneq akeqanngitsumillu eqqartuussisutigoortitsineq) (Pisassarisat pisoqalisoortut pillugit inatsisip nutaat malitsigisaanik allannguinerit, pisinermut inatsimmi pisinerni aalajangersimasuni il.il. naammagittaalliuuteqarnissamut piffissaliussat atorunnaarsinneri) (tunngavilersuinissaq pillugu sillimmasiinermut isumaqatigiissuteqarneq pillugu inatsimmi malittarisassat nutaat, paasissutissanik eqqunngitsunik tunniussisoqarnerani malittarisassanik oqilisaaneq, sillimmasiinermi akilersuutinik akiliineq, akiliigallarneq pillugu ilitsersuut aamma ajoqusiisup akiliisinnaajunnaarnerani il.il. toqqaannartumik piumasaqaatit kiisalu pisuussutitigut pisinnaatitaaffiit pillugit inatsisini aalajangersimasuni erniat allanngortinneri)⁶⁾ atuutilersitsinermi ikaarsaarnermilu aalajangersakkanik makkuninnga imaqarpoq: 

§ 4. Peqqussut ulloq 1. november 2011-imi atuutilerpoq. 

Imm. 2. Peqqussut aningaasatigut piumasaqaatinut, ulloq 1. november 2011-imi kingusinnerusumiluunniit akilerneqartussat erniaannut atorneqarpoq, taamaattorli taamaallaat akiliinissamut noqqaaneq pineqartoq ulloq 1. november 2011-imi kingusinnerusumiluunniit nassiunneqarsimappat. 

Imm. 3. Peqqussut akiliisitsiniarnermi aningaasartuutinut atuuppoq, akiliinissamut piumasaqaatit pineqartut pinngortunut. Peqqussut aamma nukingisaaraluni allakkanut, peqqussutip atuutilernerata kingorna nassiunneqartunut nukingisaaraluni akitsuutinut atuuppoq, aamma peqqussutip atuulernerata kingorna akitsuutinut piumasaqaatinut pineqartunut akiliisitsiniarnermi akitsuutinut. 

Imm. 4. Peqqussummi § 2, imm. 15 peqqussutip atuutilerata kingorna eqqartuussutaasunut eqqartuussinernut allatigullu eqqartuussivimmi aalajangiinernut atorneqarpoq. 

Imm. 5. (Ilaatinneqanngilaq) 

Inatsisinik atuutsinermut ministeriaqarfik, 11. september 2015 

SØREN PIND 

/ Helga Lund Laursen

-----

¹⁾ Aalajangersakkami pineqartut kingusinaarluni akiliinermi erniat il.il. pillugit inatsisip nr. 638, 21. december 1977-imeersup Danmarkimi atuutilernera. 

²⁾ Aalajangersakkami pineqarpoq kingusinaarluni akiliinermi erniat il.il. pillugit inatsisip nr. 638, 21. december 1977-imeersup nunani immikkoortunut atuutilernera. Aalajangersakkami aamma aalajangersarneqarpoq inatsit kunngip peqqusineratigut Savalimmiunut aamma Kalaallit Nunannut atuutilersinneqarsinnaasoq, savalimmiuni aamma kalaallit nunaanni pissutsit immikkuullarissut pissutigalugit allannguuteqartillugu. 

³⁾ Peqqussutip nr. 350, 14. juli 1980-imeersup kingusinaarluni akiliinermi erniat il.il. pillugit inatsisip nr. 638, 21. december 1977-imeersup Kalaallit Nunaannut atuutilersippaa. 

⁴⁾ Peqqussut nr. 350, 14. juli 1980-imeersoq namminermi ullormik atuutilerfiusumik imaqanngilaq. Peqqussut taamaattumik Lovtidendemi nalunaarutigineraniit sapaatit akunnerata qaangiunnerani atuutilerpoq, tak. Lovtidendep aamma Ministerialtidendep saqqummiunneqarnera pillugu inatsit 25. juni 1870-imeersumi § 3. peqqussut Lovtidende 14. august 1980-imeersumi nalunaarutigineqarpoq. 

⁵⁾ Allannguummi pineqarput § 5, § 7, imm. 3, aamma §§ 8 aamma 9. 

⁶⁾ Allannguummi pineqarput §§ 1 aamma 2, § 3, imm. 2, 3 aamma 5, § 5, § 7, imm. 1 aamma 4, aamma §§ 8a , 9 a aamma 9 b.