Aalisarnermut aningaasaliissutinut immikkoortitat pillugit Inatsisartut inatsisaat

nr. 15, 20. november 2006-meersoq naapertorlugu, Inatsisartut inatsisaanni nr. 66, 25. september 2025-meersumi § 7, imm. 3 naapertorlugu aalajangersarneqarput:

Kapitali 1

Atuuffia

  § 1. Illoqarfinni Qaanaami, Ittoqqortoormiini, Tasiilami nunaqarfinnilu eqqaaniittuni, kommunimut pilersaarutini atuuttuni killeqarfilerneqarsimasutuut, sinerissap qanittuani aalisarnermi angallatinik aalisariutinik ingerlaavartumik taarsersuinissamut nutarterinissamullu tapiissutinik agguaanissamut nalunaarut atuuppoq.

  Imm. 2.  Taamaallaat tapiissuteqartoqarsinnaavoq angallatinik nutaanik atornikunillu pisinernut inuussutissarsiornermi atorneqarsinnaasutut akuerisaasunut 6 meterinit anginernit aammalu siunissami sivisunerusumi aalisarluarsinnaassuseq ingerlatiinnarumallugu aalisarluarsinnaasutut  nutaaliaasutullu nalilerneqartunut.

Kapitali 2

Tapiissutit

Tapiissutinik tunniussineq

  § 2.  Inuit Qaanaami, Ittoqqortoormiini, Tasiilami nunaqarfinnilu eqqaaniittuni inuit nalunaarsorfianni angerlarsimaffillit angallatinik nutaanik atornikunillu pisiniarneranni tapiiffigineqarsinnaapput:

1)  6 aamma 9,5 meterit akornanni takissusillit raajaanngitsunik aalisarnermut atugassat pisiarinerani ataatsimut akiata 85 %-ia tikillugu imaluunniit

2)  9,5 meterinit takinerit raajaanngitsunik aalisarnermut atugassat pisiarinerani ataatsimut akiata 60 %-ia tikillugu.

  Imm. 2.  Pisinermi akimi tamarmi ilaatinneqarput:

1) Angallat teknikikkut pisariaqartunik ikkussuiffigineqarsimasoq.

2) Isumannaallisaanermut atortut.

3) Teknikikkut ikkussukkat allat.

4) Aalisarnermut atortut ingerlatsinermullu atortut tamakkununnga assingusut allat.

5) Pisinermut atatillugu teknikikkut aningaasaqarnikkullu pisariaqartumik siunnersuineq.

Nammineerluni akilikkat

  § 3.  Naalakkersuisut tapiisinnaapput piumasaralugu qinnuteqartup nammineq aningaasaliissutini uppernarsassagai makkunatigut:

1)  2% angallatinut 6 – 9,5 meterit akornanni takitigisunut, aamma

2)  5% angallatinut 9,5 meterinit takinernut.

  Imm. 2.  Nammineq aningaasaliissutitut isigineqarput:

1)  aningaasat tigoriaannaat aamma

2)  nalilinnik aningaasaliineq

Kapitali 3

Tuniseqqinnermi piumasaqaateqarneq

  § 4.  Tapiissutit taamaallaat tunniunneqarsinnaapput aalisariut imaluunniit suliniutitut nalilik ukiuni siullerni qulini tunniunneranit allamut tunineqassanngippat. Taamaattoq tapiissutit utertillugit akilerneqarnerisigut, qinnuteqarnerup kingorna tunisinissaq Naalakkersuisut akuerisinnaavaat.

  Imm. 2.  Aamma Naalakkersuisut akuersissutigisinnaavaat tapiiffigineqartup angallat suliniummilu pigisat tunisinnaagai, piginnittoq nutaaq tapiiffigineqarnissamut piumasaqaatinik naammassinnippat.

Kapitali 4

Qinnuteqarneq

Qinnuteqaatit imarisassaat

  § 5.  Qinnuteqartut Sullissivik.gl aqqutigalugu qinnuteqaammut immersugassaq immersoriarlugu nassiutissavaat. Tapiffigineqarnissamik qinnuteqaat suliniummik nassuiaammik ilaqassaaq, makkuninnga:

1)  Qinnuteqaatip siunertaa.

2)  Ingerlatsinermi aningaasaqarnermilu missingersuutit tapiiffigitinnissamut pisariaqartinneqartut amerlassusiinik nalunaarutitallit.

3)  Qinnuteqartut piginnittullu amerlassusaat pillugit paasissutissat.

4)  Pissarsiariniarneranut piffissaliussaq.

5)  Aalisakkat aalisarneqarusuttut, atortut kiisalu aalisariut atorneqarusuttoq pillugu pingaarnertut nassuiaatit, matumanilu angallammik nutaamik atornikumilluunniit pisineq ilanngullugu.

Qinnuteqaammut uppernarsaatinut piumasaqaatit

  § 6.  Taperneqarnissamik qinnuteqaat uppernarsaasersorneqassaaq, matumanilu:

1)  Inuussutissarsiutigalugu aalisarnissamut akuersissut.

2)  Angallammik pisinissamut neqeroorut kiisalu paasissutissat, matumanilu umiartuutigisinnaaneranut uppernarsaat kiisalu Umiartorneq pillugu aqutsisoqarfimmit angallatinik atornikunik pisinermi qanoq issusianut nalunaarusiaq.

3)  Avataanit attartortitsisartunit tapersiut imaluunniit nammineq aningaasalersuinissamut allatut uppernarsaatit.

4)  Suliffeqarfimmik piginnittuunermut uppernarsaatit kiisalu isumaqatigiissutit attuumassuteqartut.

5)  Inuussutissarsiornermut taarsigassarsianut imaluunniit pisortanit tapiissutinut paasissutissat.

Kapitali 6

Pineqaatissiissutit

  § 7.  Makku pissutigalugit akiliisitsisoqarsinnaavoq:

1)  angallammik § 4-mut akerliusumik tuniseqqinneq, imaluunniit

2)  pisortani oqartussanut paasissutissanik eqqunngitsunik salloqittaataasunilluunniit paasissutissiineq, § 5 naapertorlugu.

Kapitali 7

Atuutilersitsineq

  § 8.  Nalunaarut ulloq 1. juuni 2026 atuutilissaaq.

Namminersorlutik Oqartussat, ulloq 7. maj 2026

Peter Borg (atsior.)

Aalisarnermut, Piniarnermut, Nunalerinermut Imminullu Pilersornermut Naalakkersuisoq

/Emanuel Rosing (atsior.)