§ 1

Unammilleqatigiinneq pillugu Inatsisartut Inatsisaat nr. 1, 15. maaji 2014-imeersoq, tak. Unammilleqatigiinneq pillugu Inatsisartut inatsisaat pillugu Namminersorlutik Oqartussat nalunaarutaat nr. 2, 26. marsi 2021-meersoq, Inatsisartut Inatsisaat nr. 55, 25. novembari 2024-meersumi allanngortinneqartumi, ataani allanneqartut allanngortinneqassapput:

1. § 20-mi imm. 6-7-tut ilanngunneqassapput:

” Imm. 6. Imm. 1-4-ni killigititat immikkuullarissumik unitsinneqassapput, tassani Unammilleqatigiinnermut Ataatsimiititaliaq kattunneq akuerineqassanersoq pillugu nalilersuinissaminut paasissutissanik noqqaassuteqarsimappat, aamma

1. Piumasaqaat, suliffeqarfiit peqataasut ilaannit naleqquttumik pissuteqarluni ilanngunneqarsinnaanera, peqqutaavoq, aamma
2. Unammilleqatigiinnermut Ataatsimiititaliaq aaliangersimasumik akissuteqarnissanut killigititaqarpoq, suliffeqarfiullu peqataasup ilaannit unioqqutinneqarsimalluni.

  Imm. 7. Killigititamik unitsitsineq, tak. imm. 6, paasissutissat noqqaassutigineqartut ataatsimiititaliamut tunniunneqarnissai tikillugu, killigititaq atatinneqaannassaaq.”

2. Kapitali 6-imut qulequtaq ima oqaasertaliorneqarpoq:

“Kapitali 6

Tamanut ammatitsineq, allagaatinik takunnissinnaaneq aamma inummut paasissutissanik suliarinninneq”

3. § 24 ima oqaasertaliorneqarpoq:

” § 24.  Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat Inatsisartut inatsisaat manna malillugu sulianut atuutinngilaq, tassani ilaanatik § 4, imm. 2, § 7, imm. 6, § 8, imm. 2, 2. pkt., § 9, 2. pkt. § 10, imm. 1, § 11, imm. 6, § 12, imm. 3, 2. pkt., § 12, imm. 5, 2. pkt., § 15, imm. 4, § 17, imm. 3, § 26, imm. 3, aamma § 34, imm 3 malillugit aalajangersakkanik aalajangersaanissaq pillugu suliat. 

Imm. 2. Suliani una Inatsisartut Inatsisaat malillugu aalajangiiffigineqareersimasuni aalajangiiffigineqartussaniluunniit, suliffeqarfiit, uppernarsaatini atugaat pillugit paasissutissanik imaqarpata, imm. 1-imi takunnissinnaatitaanermut pisinnaatitaagaluaraanniluunniit, paasissutissat sunilluunniit imaqaraluarpata, Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni § 4, imm. 2 naapertorlugu takunnissinnaatitaasut.
Imm. 3. Paasissutissat imminnermut tunngasut pillugit takunnissinnaatitaanermut pisinnaatitaaneq, tak. imm. 2, suliffeqarfik pillugu paasissutissat uppernarsaatini, suliffeqarfiup allap teknikikkut paasissutissaatai, periusai aamma ingerlatsinermi suliffimmilu atukkat aamma paasissutissat allat allanit takuneqartussaanngitsut pillugit, allaqqasunut atuutsinneqanngilaq.
Imm. 4. Suliani, una Inatsisartut Inatsisaat malillugu aalajangiiffigineqartussani, Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni § 6, imm. 1 assinganik atorneqassaaq.
Imm. 5. Pisortaqarfimmut allamut Inatsisartut Inatsisaat malillugu paasissutissat ingerlateqqinneqarsimappata, imm. 1-4 aappiullugu atuutissaaq.”

4. § 24-p kingorna ilanngunneqassaaq:

” § 24 a. Aalajangiissutit uku il.il. oqartussaasunit akisussaasuusuniit tamanut ammasumik saqqummiunneqassapput:

1. Unammileqatigiinnermut Ataatsimiititaliap tunngavilersuutitut oqaaseqaataa.
2. Naalakkersuisut § 2, imm. 4 malillugu akissuteqaatai.
3. Atuisartoqarnermut Unammilleqatigiinnermullu Aqutsisoqarfiup Unammilleqatigiinnermut Ataatsimiititaliaq sinnerlugu aalajangiissutai, tassani aalajangiussaq Inatsisartut Inatsisaannik atuinermut paasinnissinnaassutsimut pingaaruteqarpat imaluunniit tamanit soqutigineqarpat.
4. Suliani § 38-mut innersuussuteqartoqartillugu parnaarussassanngortitsisoqassaaq imaluunniit akiligassiissuteqartoqassaaq. Tamanut saqqummiussineq eqqartuussummit, akiligassitsinnermit imaluunniit tassannga eqikkaanermit pissaaq.

Imm. 2. Unammilleqatigiinnermut Ataatsimiititaliaq Unammilleqatigiinnermut Ataatsimiititaliap suleriusia paasissutissiissutaalu pillugit tamanut saqqummiussisinnaavoq.

Imm. 3. Imm. 1 aamma 2 malillugit tamanut saqqummiinermi teknikikkut atukkat pillugit paasissutissat, ilisimatuutut misissuinermut, nioqqusioriaatsimut, nioqqutinut kiisalu ingerlatsinermut aamma suliffeqarfiup isertugaatai pineqartumi ilaatinneqarlutik, tamanut saqqummiunneqassanngillat, tassani paasissutissat pineqartumut imaluunniit suliffeqarfiup aningaasaqarneranut pingaaruteqarpata. Aammattaaq suliffeqarfimmi sullinneqartut aaliangersimasut pillugit paasissutissat, Aningaasaqarnermut Nakkutilliisunit nakkutigineqartut, tamanut saqqummiunneqassanngillat.
Imm. 4. Unammilleqatigiinnermut Ataatsimiititaliamut paasissutissanik tunniussisussaq, ataatsimiititaliap siulittaasua, imm. 3 tunngavigalugu paasissutissat tamanut saqqummiunneqannginnissaannut, aamma ataatsimiititaliami ilaasortanut tunniunneqannginnissaannut piumasaqaateqarsinnaavoq. Siulittaasoq paasissutissat qanoq annertutigisumik tamanut saqqummiunneqassanersut pillugit inerniliissummik aalajangiissaaq.”

5. § 24 a-p kingorna ilanngunneqassaaq:

”  § 24 b. Inatsisartut Inatsisaat malillugu suliani misissuinernilu paasissutissiinissamut pisussaaffik inunnut paasissutissanik suliarinnittarneq pillugu inatsimmi kapitali 8 aamma 9 atuutsinneqassanngilaq.”

6. § 27, imm. 2, ima oqaasertalerneqarpoq:

”  Imm. 2.  Ataatsimiititaliami siulittaasoq ilaasortallu Naalakkersuisunit ukiut sisamakkaarlugit toqqarneqartassapput. Piffissaliussap qaangiunnerani nutaamik ataatsimiititaliortoqarsimanngippat, ilaasortaareersut atorfimminni ingerlaannassapput, tassani nutaamik ataatsimiititaliortoqarnissaa tikillugu.”

7. § 27, imm. 5, ima oqaasertalerneqarpoq:

”  Imm. 5.  Naalakkersuisut ilaasortaq ataaseq atuisartoqarnermut kattuffinnit ataatsimoortuni inassuteqarneq malillugu aamma ilaasortaq ataaseq immikkut pisortat inuussutissarsiornermik ingerlatsinerannik ilisimasaqartoq kommuninit ataatsimoortuni inassuteqarneq malillugu Naalakkersuisut toqqassavaat.”

8. § 27-mi imm. 5-ip kingorna nutaatut ilanngunneqassaaq:

”  Imm. 6.  Naalakkersuisut atuisartoqarnermut pissutsinut ilisimasalimmik Unammilleqatigiinnermut Ataatsimiititaliamut ilaasortassamik toqqaassapput. Ataatsimiititaliap allattoqarfia toqqaanissamut qaammatit pingasut qaangiutsinnagit tamanut ammasumik tusagassiuutitigut aamma Atuisartoqarnermut Unammilleqatigiinnermullu Aqutsisoqarfiup nittartagaatigut saqqummiussissaaq, tassani soqutiginnittut atorfimmut qinnuteqarsinnaaniassammata.”

Matuma kingorna imm. 6 imm. 7-inngussaaq.

9. § 27-p kingorna ilanngunneqassaaq:

”  § 27 a. Unammilleqatigiinnermut Ataatsimiititaliaq allakkatigut taasinikkut imaluunniit ataatsimiinnermi aalajangiussissaaq.

  Imm. 2.  Ataatsimiititaliaq, siulittaasoq, imaluunniit peqataasinnaanngippat siulittaasup tulliata, minnerpaamillu ilaasortat allat pingasut, peqataaneranni aalajangiisinnaavoq.

Imm. 3. Ataatsimiititaliap aalajangiussai nalinginnaasumik taasinermi amerlanerussuteqarnikkut aalajangiiffigineqassapput. Taasinermi amerlaqatigiittoqassappat, siulittaasup, imaluunniit peqataannginnerani siulittaasup tulliata, taasinera inerniliunneqassaaq.”

10. § 30 ima oqaasertaliorneqassaaq:

“ § 30. Unammilleqatigiinnermut Ataatsimiititaliaq aamma Atuisartoqarnermut Unammilleqatigiinnermullu Aqutsisoqarfik, Inatsisartut inatsisaat malillugu pisinnaatitsissuteqarnikkut suliaminnik suliaqarnissaminnut paasissutissanik, inuit imaluunniit inatsisitigut inuttut pisinnaatitaasut noqqaassummik tigusaqartut iserfigisinnaasaanik, noqqaassuteqarsinnaapput, kiisalu inatsisartut inatsisaanni aalajangersakkani atukkanut tunngasut ilaatinneqartut pillugit nalilersuinissaminnut atugassaminnik noqqaassuteqarsinnaallutik.

Imm. 2. Unammilleqatigiinnermut Ataatsimiititaliap aamma Atuisartoqarnermut Unammilleqatigiinnermullu Aqutsisoqarfiup aningaasaqarnermut saqqummiussat, paasissutissat, atuakkat assilineri, suliffeqarfiup paasissutissaatai allat elektronikkikkullu paasissutissanik toqqorsiviit noqqaassutigisinnaavai.

Imm. 3. Imm. 1 malillugu suliffeqarfik, suliffeqarfiit kattunnikut, inuit imaluunniit inatsisitigut inuttut pisinnaatitaasut paasissutissiinissaminut pisussaaffeqarput.

Imm. 4. Ataatsimiititaliaq aqutsisoqarfilluunniit paasissutissanik noqqaassutigineqartunik tigusinissaanut piffissamik killigititamik naleqquttumik Atuisartoqarnermut Unammilleqatigiinnermullu Aqutsisoqarfik inissiissaaq.

Imm. 5. Imm. 1-imi paasissutissat taaneqartut Atuisartoqarnermut Unammilleqatigiinnermullu Aqutsisoqarfiup Sverigemi, Norgemi, Islandimi, Finlandimi, Savalimmiuni Danmarkimilu, tak. § 34, unammilleqatigiinnermik oqartussanut ikiuinermini atornissai aamma piumasarneqarsinnaapput, oqartussat taakku namminneq nunaminni unammilleqatigiinneq pillugu malittarisassanik atuinissaat siunertaralugu.”

11. § 30-p kingorna ilanngunneqassaaq:

” § 30 a. Atuisartoqarnermut Unammilleqatigiinnermullu Aqutsisoqarfik Unammilleqatigiinnermut Ataatsimiititaliap aaliangersimasumi arlalinniluunniit nioqquteqartuni nioqqutinik misissuisoqarnissaanut imaluunniit inuussutissarsiornermi aaliangersimasumut arlalinnulluunniit ilusilersuinissamut aaliangernerata kingorna aallartitsisinnaavoq, tassani Unammilleqatigiinnermut Ataatsimiititaliaq isumaqarpat, inuussutissarsiornerup unammilleqatigiinneranut innarliisumik sunniuteqarpat.

Imm. 2. Unammilleqatigiinnermut Ataatsimiititaliap imm. 1 malillugu aaliangiinerata kingorna, Atuisartoqarnermut Unammilleqatigiinnermullu Aqutsisoqarfik ataatsimiititaliap niuerfimmik misissuinissaq pillugu aallarniutissamik allagaqaataa tamanut tusarniaassutigineqaqqaassaaq.

Imm. 3. Unammilleqatigiinnermut Ataatsimiititaliaq imm. 1 naapertorlugu Atuisartoqarnermut Unammilleqatigiinnermullu Aqutsisoqarfik niuerfimmik misissuisoqassasoq, Atuisartoqarnermut Unammilleqatigiinnermullu Aqutsisoqarfiup matumani misissorneqartussat nalunaarutigalugit tamanut saqqummiissaaq.

§ 30 b. Atuisartoqarnermut Unammilleqatigiinnermullu Aqutsisoqarfik, niuerfimmik misissuinermini arlaannik aaliangersimasumik pissusilimmik imaluunniit inuussutissarsiornermi arlalinnik unammilleqatigiinnermut sunniuteqartoq nalilerpagu, aqutsisoqarfiup iliuuserisassatut peqqussuteqarsinnaavoq.

Imm. 2. Peqqussutit inuussutissarsiuteqartuni unammilleqatigiinnermut sapinngisamik ajoqusiinnginnissai anguniarlugu unammilleqatigiinnerlu ingerlalluartinniarlugu suliffeqarfimmut, suliffeqarfinnut kattunnikunut imaluunniit inatsisilerituumut kimulluunniit tunniunneqarsinnaapput.
Imm. 3. Peqqussut piffissami aaliangersimasumi piffissaligaanngitsumilluunniit atuutsinneqarsinnaavoq.
Imm. 4. Aqutsisoqarfiup niuerfimmi attuumassuteqartut pisortaqarfiillu peqqussuteqannginnermi tusarniaaffigeqqaassavai.

  Imm. 5. Imm. 1 malillugu peqqussut unammilleqatigiinnermut isumannaarisumik naammaginartuussaaq, pisariaqarlunilu naleqquttuulluni.

§ 30 c. Atuisartoqarnermut Unammilleqatigiinnermullu Aqutsisoqarfik suliffeqarfimmit, suliffeqarfinnut kattunnikunit imaluunniit inatsisilerituumit neriorsuuteqalersitsisumik aalajangiisinnaavoq:

1. Atuisartoqarnermut Unammilleqatigiinnermullu Aqutsisoqarfiup nalilerpagu, inuussutissarsiuteqartuni iliuutsitsigut periutsitigulluunniit inuussutissarsiutigisaanni pineqartumi unammilleqatigiinnermut innarliisoqarpat, aamma
2. Aqutsisoqarfiup nalilerpagu, neriorsuutit inuussutissarsiutigisaanni pineqartumi innarliissutinut ikiuutaasinnaappata unammilleqatigiinnermullu siuarsaataallutik.

  Imm 2.  Aqutsisoqarfiup niuerfimmi peqataasut pisortaqarfiillu peqqussuteqartigani tusarniaaffigeqqaassavai.

Imm. 3.  Imm. 1 malillugu aalajangiinerit piffissami aaliangersimasumi atuutsinneqartassapput, imaluunniit piffissamik killiliussaqanngitsumik, pisussaaffigisamik neriorsuut nalunaarutigineqarnerata kingorna, Atuisartoqarnermut Unammilleqatigiinnermut Aqutsisoqarfik § 30 b, imm. 1 malillugu peqqussuteqarnissamut, tunngavissaqarunnaartoq inissittassavaa. § 29, imm. 2-3, assingusumik atorneqartassaaq.

§ 30 d. Atuisartoqarnermut Unammilleqatigiinnermullu Aqutsisoqarfik § 30 b, imm. 1 malillugu peqqussuteqarpat imaluunniit § 30 c, imm. 1 malillugu neriorsuummik pituttuisumik aalajangiippat, aqutsisoqarfik suliffeqarfinnut, suliffeqarfinnut kattunnikunut imaluunniit inatsisilerituunut suliami peqataasunut ilisimatitsissummik nassiussissaaq.

  Imm. 2.  Atuisartoqarnermut Unammilleqatigiinnermullu Aqutsisoqarfik § 30 b, imm. 1 malillugu peqqussut pillugu aalajangiussaq aamma § 30 c, imm. 1 malillugu neriorsuummik pituttuisumik aalajangiussaq tamanut saqqummiussinnaavaa. 1. pkt. malillugu aalajangiissutimut missingersuummik tamanut saqqummiussinermi § 24 a, imm. 3 assingusumik atorneqartassaaq.

Imm. 3. Atuisartoqarnermut Unammilleqatigiinnermullu Aqutsisoqarfik § 30b, imm. 1 malillugu peqqussuteqartigani imaluunniit § 30 c, imm. 1 malillugu neriorsuummik pituttuisumik aalajangiussaqartigani, Atuisartoqarnermut Unammilleqatigiinnermullu Aqutsisoqarfiup illua-tungeriinnut aalajangiussaq nassiuteqqaassavaa.
Imm. 4. Illua-tungeriinnit oqaaseqaateqarnissamut tunniussinissamut killigititaq sapaatit akunneranik arfinilinnik sivisussuseqarpoq.

Imm. 5. Suliani, sulianik suliarinnittarneq pillugu inatsit malillugu tusarniaasoqassappat, oqaaseqaateqarnissamut killigititaq sapaatit akunnerinik pingasunik sivisussuseqarpoq, tassani suliaq Unammilleqatigiinnermut Ataatsimiititaliamut saqqummiunneqareersimanngippat. Kingullermi pineqartumi Unammilleqatigiinnermut Ataatsimiititaliaq sapaatit akunnerinik pingasunit sivikinnerusumik killigititassamik inissiisinnaavoq.

§ 30 e. Atuisartoqarnermut Unammilleqatigiinnermullu Aqutsisoqarfik Unammilleqatigiinnermut Ataatsimiititaliap niuerfimmik misissuinissamik aaliangiineraniit kingusinnerpaamik ukiut marluk qaangiutsinnagit tamanut saqqummiussisinnaavoq, tak. § 30 a, imm. 3, ataani allaqqasut pillugit aalajangiinerit:

1. § 30 b, imm. 1 malillugu peqqussuteqarneq,
2. § 30 c, imm. 1 malillugu neriorsuummik pituttuineq, imaluunniit
3. Niuerfimmik misissuineq naammassineqartoq pillugu tamanut saqqummiussineq.

Imm. 2. Atuisartoqarnermut Unammilleqatigiinnermullu Aqutsisoqarfik qaammatit arfinillit tikillugit killigititamik kinguartitsilluni aaliangiisinnaavoq, matumanilu aaliangiineq tamanut saqqummiullugu.

Imm. 3. Inatsisartut Inatsisaanni §§ 31 aamma 32 Atuisartoqarnermut Unammilleqatigiinnermullu Aqutsisoqarfiup § 30 a, imm. 1 malillugu niuerfimmik misissuinerani assingusumik atorneqartassaaq.

§ 30 f. Atuisartoqarnermut Unammilleqatigiinnermullu Aqutsisoqarfik immikkoortumik aaliangersimasumik misissuisinnaan-ngussaaq imaluunniit immikkoortortani aaliangersimasuni unammilleqatigiinnermut pissutsinut paasisaqarnerorusulluni immikkoortortani assigiinngitsuni (immikkoortortamik misissuinissamut) isumaqatigiissuteqarnikkut misissuisinnaanngussaaq.

Imm. 2. Atuisartoqarnermut Unammilleqatigiinnermullu Aqutsisoqarfiup imm. 1 malillugu misissuinissaminut nakkuginnilluni misissuinerit atorneqartillugit §§ 31 aamma 32-mi aalajangersakkat assingusumik atuupput.

Imm. 3. Atuisartoqarnermut Unammilleqatigiinnermullu Aqutsisoqarfik, § 24 a, imm. 3-mi aalajangersarneqartut malitsigisai, killigalugit imm. 1 malillugu misissuinerup inerneri pillugit tamanut saqqummiussisinnaavoq.”

12. § 34, imm. 1 aamma 2 ima oqaasertalerneqarpoq:

” Atuisartoqarnermut Unammilleqatigiinnermullu Aqutsisoqarfik unammilleqatigiinnermi pisortaqarfiusunut allanut, Atuisartoqarnermut Unammilleqatigiinnermullu Aqutsisoqarfiup nipangiussimatitaanermut pisussaaffia malillugu, aamma pisortaqarfiit unammilleqatigiinnermut inatsiseqarnerat pisariaqartumik ersarissarniarlugu, Naalagaaffeqatigiinnermilu Kalaallit Nunaata illugiimmik aamma amerlasuunik peqataaffigineqartunik pisussaaffinnik pisussaaffeqarnerup naammassineqarnissaa qulakkeerniarlugu, paasissutissanik tunineqarsinnaatitaallunilu tunniussisinnaatitaavoq.

  Imm. 2.  Unammilleqatigiinnermi pisortaqarfiusunut allanut paasissutissanik ingerlatitseqqiinermi, Atuisartoqarnermut Unammilleqatigiinnermullu Aqutsisoqarfiup paasissutissat ataani allaqqasunik naammassinninnersut qulakkeeqqaassavaa:

1) tigusisussaq assingusumik nipangiussimatitaanermik pisussaaffeqartoq,

2)  illugiimmik amerlasuunilluunniit peqataaffigineqartumik isumaqatigiissutip atuutsinneqartup inissinneqareernerani atorneqarnissaa kisiat siunertaralugu, matumani paarlaateqatigiinneq naapertorlugu ingerlanneqassappat, aamma

3)  Atuisartoqarnermut Unammilleqatigiinnermullu Aqutsisoqarfimmit ersarissumik pisinnaatitsissuteqarnermi kisimi ingerlatitseqqinneqarsinnaasut, pisinnaatitsissutillu siunertaanut kisiat ingerlateqqinneqassasut.”

13. § 34-p kingorna ilanngunneqassaaq:

” § 34 a. Atuisartoqarnermut Unammilleqatigiinnermullu Aqutsisoqarfik sulianik suliarinninnermini atukkaminik uppernarsaatinik tamanut saqqummiisinnaavoq, tassungalu pingajuusumit oqaaseqaatit pisariaqartinneqarpata. § 24 a, imm. 3, tamanut saqqummiussinermi assingusumik atorneqartarpoq.”

14. § 37 ima oqaasertaliorneqarpoq:

“ § 37. Naalakkersuisut imaluunniit Naalakkersuisunit matumannga akuerineqarluni pisussaatinneqartoq, ataani allaqqasuni ullormut imaluunniit sapaatip akunnikkaarlugit akileeqqussutinik peqqussuteqarsinnaavoq:

1) Inatsisartut Inatsisaat malillugu Unammilleqatigiinnermut Ataatsimiititaliap imaluunniit Atuisartoqarnermut Unammilleqatigiinnermullu Aqutsisoqarfiup noqqaassutigisinnaasaat,

2)  Inatsisartut Inatsisaanni nalunaarutigineqarnikut malillugit piumasaqaammik imaluunniit peqqussummik naammassinninneq, imaluunniit

3) neriorsuummik pituttuisunngortinneqarsimasumik naammassinninneq, tak. § 29 imaluunniit § 30 c, imm. 1.

Imm. 2. Imm. 1 malillugu akileeqqussutit, Nunatta Karsianut ikineqartassapput.”

15.  § 38, imm. 1, nr. 11-mi, ”§ 29, imm. 1”-ip kingorna: ”imaluunniit § 30 c, imm. 1,” ilanngunneqassaaq,”

16. § 38, imm. 1, nr. 12-imi, ”§ 29, imm. 2,”-p kingorna: ”imaluunniit § 30 b, imm. 1,” ilanngunneqassaaq,”

17. § 38, imm. 1, nr. 14, ima oqaasertaliorneqassaaq:

“ 14) Unammilleqatigiinnermut ataatsimiititaliamut imaluunniit Atuisartoqarnermut Unammilleqatigiinnermullu Aqutsisoqarfimmut imaluunniit immikkoortoqarfimmik misissuinermi paasissutissanik eqqunngitsunik imaluunniit tammartitsisunik tunniussaqartoq imaluunniit suliamut paasissutissarsiorfigisamut paasissutissat pingaartut nipangiunneqarpata.”

§ 2.

Inatsisartut Inatsisaat ulloq 1. juuli 2026-mi atuutilissaaq.

  Imm. 2.  Inatsisartut Inatsisaat suliffeqarfinnut kattunnikunut, tassa kattunnissamut isumaqatigiissuteqareersimasunut, piginnittussamit neqerooruteqartoqareerneratigut imaluunniit piginneqataasoqaruni Inatsisartut inatsisaata atuutsinneqalinnginnerani aqutseqataanissamut piginneqataasumik, atuutsinneqassanngilaq. Kattunnerni taamaattuni inaatsisit maannamut atuuttut atuussapput.

Namminersorlutik Oqartussat, ulloq 25. juuni 2026

Jens-Frederik Nielsen (atsior.)

Naalakkersuisut Siulittaasuat