§ 1

Ilageeqarneq pillugu Inatsisartut inatsisaat nr. 9, 19. maj 2010-meersoq, Inatsisartut inatsisaat nr. 2, 29. november 2013-imeersumi aamma Inatsisartut inatsisaat nr. 27, 3. december 2018-meersukkut allanngortinneqartumi, allannguutit makku ilanngunneqarput:

1. § 3-p kingornatigut ikkunneqassaaq:

”  § 3 a.  Palasit, provstit, domprovsti biskoppilu Naalakkersuisut atorfinitsillugillu soraarsittarpaat.

  Imm. 2.  Palasinik, provstinik domprovstimillu atorfinitsitsinernik soraarsitsinernillu biskoppi isumaginnittussanngortillugu Naalakkersuisut piginnaatissinnaavaat.”

2. § 7, imm. 3 atorunnaarpoq.

3. § 15, imm. 2, ima oqaasertalerneqassaaq:

”  Imm. 2.  Palaseqarfimmi palasi ataasiinnaatillugu, taassuma palasip atuagarsuarnut allattuineq isumagissavaa.” 

4. § 15, imm. 4-tut nutaatut ikkunneqassaaq:

”  Imm. 4.  Palasip atuagarsuarnik allattuisup palaseqarfimmi suleqataasumut atorfeqartumut allamut, palaseqarfiup atuagarsuisa suliassartaannik suliarinnissinnaassusilimmut tunniussinnaavaa.”

Imm. 4 tamatuma kingorna imm. 5-inngussaaq.

5. § 24 ima oqaasertalerneqassaaq:

”  § 24. Biskoppip palasinik, ajoqinik pattattunillu aamma palasip ikiortaanik ilinniartitseqqinnerit ingerlaqqillunilu ilinniartitsinerit isumagisassarai.

  Imm. 2.  Naalakkersuisut palasinik, ajoqinik pattattunillu aamma palasip ikiortaanik ilinniartitseqqinnerit ingerlaqqillunilu ilinniartitsinerit pillugit aalajangersakkanik aalajangersaasinnaapput.”

6. § 26 d ima oqaasertalerneqassaaq:

”  § 26 d.  Kinaluunniit Kalaallit Nunaanni Ilagiinni palasitut atorfinitsinneqartoq biskoppimit soraarummeersinneqarsimassaaq, ivertinneqarsimassaaq, Ilagiinnut palasitut neriorsuisimassaaq biskoppillu uppernarsaasigaanik palasitut sulisinnaanngortitaasimassalluni.”

§ 2

Inatsisartut inatsisaat ulloq 1. januar 2027 atuutsinneqalissaaq.

Kalaallit Nunaanni Namminersorlutik Oqartussat, ulloq 25. juuni 2026

Jens-Frederik Nielsen (atsior.)

Naalakkersuisut Siulittaasuat