Soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaat nr. 21, 28. november 2016-imeersoq Inatsisartut inatsisaatigut nr. 16, 12. juni 2019-imeersukkut, Inatsisartut inatsisaatigut nr. 18, 30. november 2020-meersukkut allanngortinneqartup allannguutit ilanngullugit matumuuna nalunaarutigineqarpoq aamma Soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaata allanngortinneqarnera pillugu Inatsisartut inatsisaat nr. 29, 25. novembari 2022-mersooq.

 

  § 1.  Inuk 18-ileereersimasoq Kalallillu Nunaannut tamakkiisumik akileraartussaatitaasoq utoqqalinersiaqarneq pillugu Inatsisartut inatsisaanni §1 naapertorlugu soraarninngornissani tikillugu soraarnerussutisiaqarnissamut aaqqissuussinermut akiliisassaaq.

  Imm. 2.  Akiliisarneq kingusinnerpaamik aallartinneqassaaq ukiumi aningaasarsiorfiusumi inuup 18-inik ukioqalerfiata tulliani, aammalu ukioq aningaasarsiorfiusoq pineqartup soraarnerussutisiaqalertussatut ukioqalerfissaa ukiuni 4-nik sioqqullugu unitsinneqassalluni.

  Imm. 3. Soraarnerussutisiaqalernissamut aaqqissuussineq soraarnerussutisiaqarnissamut aningaasaateqarfimmi Danmarkimi imaluunniit Kalaallit Nunaanni nalunaarsorsimaffeqartumi imaluunniit inuunermut soraarnerussutisiaqalernissamullu sillimmasiisarfimmi Danmarkimi imaluunniit Kalaallit Nunaanni nalunaarsorsimaffeqartumi imaluunniit aningaaserivimmi Kalaallit Nunaanni nalunaarsorsimaffeqartumi aalajangersimasumilluunnit ingerlatsiveqartumi pilersinneqassaaq, imm. 4-li imaluunniit uani Centralforeningen for Stampersonels Pensionsfond (CS-Pensionsfond) imaluunniit HKKF-fond takuuk. Piumasaqaataavoq soraarnerussutisiaqarnissamut aningaasaateqarfik, inuunermut soraarnerussutisiaqalernissamullu sillimmasiisarfik imaluunniit aningaaserivik aningaasanik ingerlatsineq pillugu inatsimmi ilaassasoq suliffeqarfillu pineqartoq ingerlatsinissamut Finanstilsynimit akuerineqarluni.  

  Imm. 4.  Piffissami sivisunerpaamik ukiunik aningaasarsiorfiusunik marlunnik sivisussuseqartumi soraarnerussutisianut aaqqissuussinermut Norgemi, Savalimmiuni, Islandimi imaluunniit nunami EU-mut ilaasortaasumi pilersinneqarsimasumut akiliisoqartarsinnaasoq, akileraartarnermut ingerlatsivik qinnuteqarneq malillugu akuersissummik tunniussisinnaavoq. Qinnuteqaat kingusinnerpaamik akileraartussaatitaalernerup kingorna qaammatit pingasut qaangiutsinnagit nassiunneqassaaq. Akuersissummut piumasaqaataavoq inuk atorfeqarnerminut ilaatillugu nunamit pineqartumit Kalaallit Nunaannut nuussimassasoq aammalu soraarnerussutisianut aaqqissuussineq nuunnissaq sioqqullugu pilersinneqarsimassasoq. Aammattaaq piumasaqaataavoq inuup ukiut aningaasarsiorfiusut marluk sinnerlugit Kalaallit Nunaanniinnissaa naatsorsuutigineqanngitsoq.

 

  § 2.  Ileqqaarnissamut tunngaviusut tassaapput inuup A-nit B-nillu isertitai katillugit, aningaasat aningaarsianit akileraarutit pillugit Inatsisartut inatsisaanni § 41, imm. 2 aamma § 47 b, imm. 6 malillugit isertitanik akileraaruteqaataasussanik naatsorsuinermi ilaatinneqartussaanngitsut ilassutigalugit, taamaattoq takuuk imm. 2 aamma 3.

  Imm. 2.  Ileqqaarnissamut tunngaviusut naatsorsorneqarneranni makku naapertorlugit tunniunneqartartut ilanngunneqassanngillat:

1)  Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisaat,

2)  Tjenestemandit Inatsisartut suliffeqarfiini atorfillit pillugit Inatsisartut inatsisaat, 

3)  Naalagaaffimmi tjenestemanditut atorfillit Kalaallit Nunaanniittut pillugit inatsit,

4)  Tjenestemandit pillugit inatsit,

5)  Inuit innarluutillit ikiorserneqartarnerat pillugu Inatsisartut inatsisaat,

6)  Meeqqanut tapiissutit pillugit Inatsisartut inatsisaat,

7)  Meeqqanik tapersiisarneq pillugu Inatsisartut inatsisaat,

8)  Pisortanit ikiorsiissutit pillugit Inatsisartut peqqussutaat,

9)  Utoqqalinermi pensionisiat pillugit Inatsisartut inatsisaat,

10)  Siusinaartumik pensionisiat pillugit Inatsisartut inatsisaat,

11)  Inissiani attartukkani ineqarnermut tapiissutit pillugit Inatsisartut inatsisaat,

12)  Ilinniagaqarnersiutit pillugit Inatsisartut inatsisaat, aamma

13)  Borgmesterinik borgmesterillu tulliinik kiisalu kommunalbestyrelsinut nunaqarfinnilu aqutsisunut ilaasortanik aamma najukkani ataatsimiititaliat ilaasortaannut il.il. akissarsiaqartitsineq pillugu Namminersorlutik Oqartussaanni nalunaarutaanni nr. 25, 30. april december 2013-imeersumi § 2, § 12 aamma § 14, akissarsiat aamma ilaasortaajunnaarnersiutit borgmesterinut taakkulu aappaannut meeraannullu pensionisiaqartitsineq pillugu Namminersorlutik Oqartussat nalunaarutaat nr. 24, 30. december 2013-imeersumi § 10, imm. 3, imaluunniit § 10, imm. 4 naapertorlugit pensionisianut tapiissutinut tuungavissiissut ilaanatik.

  Imm. 3.  Ileqqaarnissamut tunngavissanik naatsorsuinermi makku aamma ilanngussanngillat:

1)  meeqqanut akilersuutit, inuup angajoqqaavini pisortanilluunniit akilerneqartussat, aamma

2)  pensionisiatut tunniunneqartut allat, Utoqqalinersiaqarneq pillugu Inatsisartut inatsisaanni pineqartunut ilanngitsut.

  Imm. 4.  Imm. 2-mi nr. 1-4-mi aalajangersakkani akiliutit inuup tjenestemanditut soraarnerussutaanut tunngaviit ilaatinneqarput.

 

  § 3.  Inuup soraarnerussutisiaqalernissami aaqqissuussinermut akiliutai ukioq aningaasarsiorfimmi 2023-mi ileqqaarnissamut tunngavik 175.00 kr.-uppat qaffasinneruppalluunniit ileqqaarnissamut tunngaviup 7 procentianit annikinnerussanngilaq, imm. 2-li aamma 5 takukkit. Ukioq aningaasarsiorfimmi 2024-mit 2026-mut procenti ukiumut 1 procentimik qaffanneqartassaaq, taamaalilluni 2026-mi 10 procentiussalluni.

  Imm. 2.  Imm. 1-imi aalajangersagaq apeqqutaatinnagu inuup ukioq aningaasarsiorfimmi 2023-mi soraarnerussutisiaqalernissamut aaqqissuussinerminut akiliutai namminerisamik inuussutissarsiornermi sinneqartoorutit 175.00 kr.-uppata qaffasinneruppataluunniit

sinneqartoorutit akileraarutaasussaatitaasut 5 procentiannit annikinnerussanngillat, imm. 5-imili takuuk. Ukioq aningaasarsiorfimmi 2024-mit ukiullu aningaasarsiorfiusuni tulliuttuni akiliutit namminerisamik inuussutissarsiornermi sinneqartoorutit akileraarutaasussaatitaasut 6 procentiannit annikinnerussanngillat.

  Imm. 3.  Imm. 1 malillugu qaffasissuseq atuuttoq inuit ileqqaarnissamut tunngaviat 125.000 kr.-uppat assigiiaamik 0 procentimit inuit ileqqaarnissamut tunngaviat 175.000 kr.-uppat 100 procentimut qaffanneqassaaq.

  Imm. 4.  Imm. 2 malillugu qaffasissuseq namminerisamik inuussutissarsiornermi inuit sinneqartoorutaat 125.000 kr.-uppat assigiiaamik 0 procentimit inuit sinneqartoorutaat 175.000 kr.-uppat 100 procentimut qaffanneqassaaq.

  Imm. 5.  Pisuni imm. 1-imi 2-milu taaneqartuni, inuup soraarnerussutisianut aaqqissuussineranut ukiumi isertitaqarfiusumi ataatsimi 200.000 koruuninik imaluunniit annertunerusunik akiliisoqareernerani, akiliisussaatitaaneq atorunnaassaaq.

 

  § 4.  Aalisarnermit, piniarnermit, aallaaniarnermit, savaateqarnermit aamma kusanartuliornernit tunisassianik tunisinerni akileraarutinik unerartitsinissamut pisussaaffeqartoq, tunisisut soraarnerussutisianut aaqqissuussinerannut akiliutissanut akiliinissamik, pisussaaffeqartoq pillugu maleruagassanik Naalakkersuisut aalajangersaasinnaapput. Akiliutissaq tunisinerup aningaasartaasa ilaannik, § 3, imm. 2 malillugu akigititanit atuuttunit annikinnerusumik, annertussuseqassasoq, Naalakkersuisut tassunga ilanngullugu aalajangersaasinnaapput.

  Imm. 2.  Akiliuteqartussaatitaasup tigusisussap soraarnerussutisianut aaqqissuussinera ilisimasaqarfiginngippagu, akiliutissaq imm. 1-imi taaneqartoq akileraartarnermut ingerlatsivimmut akilerneqarsinnaasoq pillugu maleruagassanik aammattaaq Naalakkersuisut aalajangersaasinnaapput. § 7, imm. 6-imi 7-imilu, aamma § 8-mi aalajangersakkat taamatut pisoqarnerani atuutissapput.

 

  § 5.  Soraarnerussutisiaqarnissamut aaqqissuussinermut akiliutit, aningaasarsianut akileraaruteqaataasussanut ilanngunneqartussat imaluunniit akiliutit, aningaasarsianit akileraaruteqaataasussanit ilanngaatigineqarsinnaanngitsut ileqqaakkat § 3-mi taaneqartutut naatsorsorneranni akileraarutit ilanngaatigineqartinnagit amerlassusiinut naatsorsoqqinneqassapput.

 

  § 6.  Kialuunniit, akileraaruserinermik ingerlatsineq pillugu Inatsisartut inatsisaanni § 30 a, imm. 1-imi pineqanngitsumik pissuteqarluni soraarnerussutisiaqarnissamut aaqqissuussiner­nut akiliuteqarsimasup, ukiumi aningaasarsiorfiusumi qaangiuttumi akiliutaasimasut kingusinnerpaamik 1. maj akileraaruseriffimmut nalunaarutigisassavai.

 

  § 7.  Ukiup aningaasarsiorfiusup siuliani inuup soraarnerussutisianut aaqqissuussineranut aningaasat minnerpaaffissaat § 3-mi pineqartut akilerneqarsimanersut, Akileraartarnermut ingerlatsiviup ulloq 31. august tikitsinnagu naatsorsussavaa.

  Imm. 2.  Naatsorsuinerup takutippagu inuup soraarnerussutisianut aaqqissuussineranut akiliutit aningaasat minnerpaaffissaannik annikinnerusut, nikingassutaasoq 4.000 koruuninit annertunerusimappat, inuk soraarnerussutisianut aaqqissuussinerminut nikingassutaasoq akilissagaa aammalu akiliineq akileraartarnermut ingerlatsivimmut uppernarsassagaa, akileraartarnermut ingerlatsiviup piumasarissavaa.

  Imm. 3.  Akileraartarnermut Aqutsisoqarfiup ulloq 1. november tikitsinnagu akiliinermut uppernarsaat tigusimanngippagu, nikingassutaasoq akileraarutinut procentiliussamut tapiliussatut imaluunniit akileraarutit qaffannerisigut akilersinneqassaaq. Taamaattoq nikingassutaasut, ukiumut aningaasarsiorfiusumut, ukioq aningaasarsiorfiusoq skattekortip atuuffissaa ukiunik 4-nik sioqqullugu, inissisimasumut, tunngassuteqartut akilersinneqarsinnaanngillat.

  Imm. 4.  Imm. 3 malillugu tapiliussat ukiup aningaasarsiorfiusup tullianut akigititatut atuuttutut annerpaamik annertussuseqarsinnaapput, takuuk § 3, imm. 1 aamma 2. Akileraartarnermut ingerlatsiviup paasiguniuk ukiup aningaasarsiorfiusup ataatsip ingerlanerani inummi nikingassutaasut matussusernissaannut naammattumik akiliisitsisoqarsimasoq, akileraartarnermut ingerlatsivik akileraarummut procentiliussamut ilassusiinani skattekortimik nutaamik tunniussissaaq. Akilersinneqartut inummi nikingassutaasunit annertuneruppata, ukiumi aningaasarsiorfiusumi paasineqartumi akileraarutaagallartutut aningaasartai isigineqassapput.

  Imm. 5.  Akileraarutinut allagartanik nutaanik tunniussisoqarpat, nikingaassutaasoq annerpaamik arfinileriarluni akilersuinertut akilersinneqassaaq.

  Imm. 6.  Akileraartarnermut ingerlatsiviup nikingassutaasut akilerneqartut, takuuk imm. 3-5, inuup soraarnerussutisianut aaqqissuussineranut nuussavai.

  Imm. 7.  Inuk ingerlasumik soraarnerussutisianut aaqqissuussaqartoq akileraartarnermut ingerlatsiviup ilisimanngippagu, imaluunniit soraarnerussutisianut aningaasaateqarfiup imaluunniit soraarnerussutisianik neqerooruteqartup soraarnerussutisianut aaqqissuussinermik pilersitsiviusimasup akileraartarnermut ingerlatsivimmit akiliutinik tigusisarnissaq kissaatiginngippagu, akileraartarnermut ingerlatsivik pineqartumut soraarnerussutisianut aaqqissuussinermik pilersitsisinnaavoq, takuuk § 8.

 

  § 8.  Naalakkersuisut piginnaatinneqarput soraarnerussutisiaqarnissamut aaqqissuussinernik akileraaruseriffiup § 7, imm. 7 naapertorlugu pilersitaanik isumaginninnissaq pillugu, soraarnerussutisiaqarnissamut aningaasaateqarfimmut, sillimmasiisarnermik ingerlatsineq pillugu inatsimmi pineqartumut, imaluunniit inuunermut soraarnerussutisiaqarnissamulluunniit sillimmasiisarfimmut, sillimmasiisarfimmik imaluunniit aningaaserivimmik ingerlatsinissamut Finanstilsynimit akuersissummik peqartumut Kalaallit Nunaanni angerlarsimaffeqartumut imaluunniit aalajangersimasumik ingerlatsiveqartumut aamma Finanstilsynimit akuersissummik peqarluni sillimmasiisarnermik ingerlatsisumut isumaqatigiissuteqarnissamut.

 

  § 8 a.  Peqqussutini aalajangersakkanik unioqqutitsinermut akiliisitsinermik pineqaatissiisarneq pillugu maleruagassanik, peqqussutini inatsit naapertorlugu aalajangersarneqartuni aalajangersaasoqarsinnaavoq.

  Imm. 2.  Aktiaateqarluni ingerlatseqatigiiffiup, piginneqataassuseqarluni ingerlatseqatigiiffiup, piginneqatigiilluni ingerlatseqatigiiffiup, peqatigiiffiup, suliffeqarfik imminut pigisup, aningaasaateqarfiup assigisaataluunniit unioqqutitsineranut akiliisitsinermik pineqaatissiisarneq pillugu maleruagassanik, peqqussutini inatsit naapertorlugu aalajangersarneqartuni aalajangersaasoqarsinnaavoq. Namminersorlutik Oqartussat, kommuni imaluunniit kommunit ataatsimooqatigiiffiat unioqqutitsisuuppata, Namminersorlutik Oqartussat, kommuni imaluunniit kommunit ataatsimooqatigiiffiat akiliisitsinermik pineqaatissinneqarsinnaapput.

  Imm. 3.  Imm. 1 imaluunniit 2 malillugu akiliisitsinerit Nunatta Karsianut tutsinneqassapput.

 

  § 9.  Inatsisartut inatsisaat ulloq 1. januar 2018 atuutilersinneqarpoq.

 

 

 

Soraarnerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaata allanngortinneqarnera pillugu Inatsisartut inatsisaat nr. 16, 12. juni 2019-imeersoq (Inatsisartut inatsisaata kalaallisut qulequtaata oqaatsitigut allanngortinneqarnera, borgmesterinik akissarsiaqartitsinermut ileqqaarnissamut tunngavissani ilaatitsinnginneq)^[1] ima atuutilernissamut aalajangersagaqarpoq:

 

 

 

 

Soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaata allanngortinneqarnissaa pillugu Inatsisartut inatsisaat nr. 18, 30. november 2020-meersoq^[2]  atuutilersitsinermi aalajangersimasunik ukuninnga imaqarpoq:

 

 

Inatsisartut inatsisaat ulloq 1. januar 2021 atuutilissaaq.

  Imm. 2.  Ukiumut isertitaqarfiusumut 2020-mut ileqqaarnissamut tunngavissat naatsorsorneqarneranni, tjenestemandit pillugit inatsit naapertorlugu aningaasarsiat tunniunneqartut ilanngunneqassanngillat.

 

 

 

 

 

Inatsisartut inatsisaat ulloq 1. januar 2023 atuutilissaaq.

 

 

 

 

 

 

 

 

 

Pisortaq

 

 

[2] Inatsimmi allannguut §§ 1, imm 2-4, 2, 3, 4, 5, 7, 8 aamma 8-amut tunngavoq.

[3] Inatsimmi allannguut 1, imm. 3, 2, imm. 4, 3, imm. 1-4 aamma 7, imm. 2.