Matumuuna Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaat nr. 1, 31. maaji 2001-meersumi, nr. 11, 15. apriili 2003-meersumi, Inatsisartut inatsisaat nr. 1, 12. maaji 2005-meersumi, Inatsisartut inatsisaat nr. 1, 8. juuni 2006-meersumi, Inatsisartut inatsisaat nr. 16, 3. decemberi 2009-meersumi, Inatsisartut inatsisaat nr. 25, 18. novemberi 2010-meersumi, Inatsisartut inatsisaat nr. 4, 3. juuni 2015-meersumi kiisalu Inatsisartut inatsisaat nr. 25, 17. novemberi 2017-meersumi allannguutit ilanngullugit Inatsisartut inatsisaat nalunaarutigineqarpoq.

 

  § 1. Inatsisartuni naalakkersuinikkut sulineq nukittorsarumallugu naalakkersuinikkut partiit, kattusseqatigiillu Inatsisartuni ilaasortaatitaqartut inuillu ataasiakkaat partiit avataatigut qinigaasimasut aningaasanik tapiiffigineqartarput.

  Imm. 2. Inatsisartuni ilaasortanut, partii kattusseqatigiilluunniit sinnerlugit qinigaasimasunut, partiimit kattusseqatigiinnilluunniit tunuartunut tapiissuteqartoqartassaartaaq.

  Imm. 3. Tamatuma saniatigut kommunimut Inatsisartunulluunniit qineqqusaarnermut aningaasartuutit tapiiffigineqarsinnaapput.

  Imm. 4.  Kalaallit Nunaanni Namminersorlutik Oqartussat partiinut, kattusseqatigiinnut kisimiillutilluunniit qinigaasunut aningaasatigut toqqaannartumik toqqaannanngikkaluamilluunniit tapiissuteqarsinnaanngillat, tamanna inatsimmi matumani inatsimmiluunniit allami erseqqissumik tunngavissinneqarsimanngippat.

  Imm. 5. Imm. 4 apeqqutaatinnagu Inatsisartunut ilaasortat inatsisartuni sulinerannut atatillugu allaffinnik, ataatsimiittarfinnik assigisaannillu Kalaallit Nunaanni Namminersorlutik Oqartussat akeqanngitsumik atugassiisinnaapput.

 

Inatsisartuni sulinermut tapiissutit

 

  § 2. Naalakkersuinikkut suliniaqatigiiffik, partii, Inatsisartuni qinikkanik sinniisoqartoq partiip naalakkersuinikkut sulineranut ukiumut 850.000 kr.-inik tunngaviusumik tapiissummik kiisalu partiip qinigaatitaa ataaseq 275.000 kr.-inik annertussusilinnik qinikkatut tapiissutisisinnaatitaapput. Tunngaviusumik tapiissutit qinikkamullu tapiissutit Kalaallit Nunaanni kisitsit akinut iluarsiissutaasartoq naapertorlugu, taamaattorli koruuninut 100-mik aggorneqarsinnaasunut qaninnerpaanut akunnaallisillugu, qaammatisiutit ukiuata aallartinnerani ukiumut ataasiarlugu iluarsineqartassaaq. Iluarsiissuteqarneq siulleq 2019-imi pissaaq.

  Imm. 2. Imm. 1-imi taaneqartutut Inatsisartut ilaasortaanut partiit avataatigut qinigaasunut imaluunniit kattusseqatigiit sinnerlugit qinigaasunut tunngaviusumik kiisalu qinikkamut tapiissuteqartoqarsinnaavoq.

  Imm. 3. Inatsisartuni ilaasortat kattusseqatigiillutik arlaliullutik qinigaasimappata naalakkersuinikkut suliniaqatigiiffimmut partiimut sinniisutulli ilaasortat naalakkersuinikkut sulinerannut kattusseqatigiinnut taamatut ataatsimoortumik tapiissuteqartoqassaaq.

  Imm. 4. Immikkoortut 1-imiit 3-mut malillugit tapiiffigineqarnissamik qinnuteqaatit ukiumi qinnuteqarfiusumi tunniutereersimaneqassapput kingusinnerpaamik ukiumi qinnuteqarfiusumi 1. marts.

 

  § 3. Partii, kattusseqatigiit imaluunniit ilaasortaq partiit avataatigut qinigaasoq siusinnerusukkut Inatsisartuni ilaasortaasimanngikkuni tapiiffigineqarsinnaatitaavoq § 2, imm. 1 - 3 malillugit.

  Imm. 2. Imm. 1 malillugu tapiissutit ukiumi qinersiviusumi tunniunneqassapput qaammammit qinersivimmiit ukiumut tapiissutissat agguaqatigiinnerat naapertorlugu.

  Imm. 3. Imm. 1 malillugu naalakkersuinikkut sulinermut tapiissutissanik qinnuteqaat kingusinnerpaamik tunniunneqarsimassaaq qinersinerup kingornatigut qaammatit marluk qaangiunneranni.

 

  § 3 a.  Naalakkersuinikkut suliniaqatigiiffik, partii, Inatsisartunut qinersinermi kingullermi Inatsisartunut qinigassanngortinngitsoq qinigaatitaqanngitsorluunniit, kisiannili kingusinnerusukkut Inatsisartunut ilaasortap ataatsip ilaasortalluunniit arlallit sinniisuuffigissallugu nuuffigisaat, partiip Inatsisartuni naalakkersuinikkut sulineranut tapiissutisisinnaatitaavoq. Tapiissut partiip ilaasortaatitaanut ataasiakkaanut tamanut ukiumut 275.000 kr.-iuvoq. Tapiissutit Kalaallit Nunaanni kisitsit akinut iluarsiissutaasartoq naapertorlugu, taamaattorli koruuninut 100-mik aggorneqarsinnaasunut qaninnerpaanut akunnaallisillugu, qaammatisiutit ukiuata aallartinnerani ukiumut ataasiarlugu iluarsineqartassaaq. Iluarsiissuteqarneq siulleq 2019-imi pissaaq.

  Imm. 2. Imm. 1 malillugu tapiissutit ukiumi partiip sinniisuutitaqalernerani ukiumoortumik tapiissutit ilaattut, qaammatip partiip sinniisuutitaqalerfiata naaneranit naatsorsorlugit, tunniunneqartassapput.

  Imm. 3. Partiip sinniisaa § 4 malillugu, pineqartoq partiimut sinniisuuffigilikkaminut nuutsinnagu, attaviitsutut tapiissutisisimappat, qinikkamut pineqartumut partii qinigaatitamut tapiissutisisinnaanngilaq piffissamut sinniisuutitarilikkap § 4 malillugu tapiissutisiffigisimasaanut.

 

  § 4. Inatsisartunut ilaasortaq partiimiit kattusseqatigiinnilluunniit qinigaasimasoq partiimit kattusseqatigiinnilluunniit tunuartoq Inatsisartuni naalakkersuinikkut sulinerminut tapiissutisisinnaatitaavoq. Tapiissut ukiumut 275.000 kr.-iuvoq. Tapiissutit Kalaallit Nunaanni kisitsit akinut iluarsiissutaasartoq naapertorlugu, taamaattorli koruuninut 100-mik aggorneqarsinnaasunut qaninnerpaanut akunnaallisillugu, qaammatisiutit ukiuata aallartinnerani ukiumut ataasiarlugu iluarsineqartassaaq. Iluarsiissuteqarneq siulleq 2019-imi pissaaq.

  Imm. 2. Imm. 1 malillugu tapiissutit tunniunneqartassapput ukiumi partiimit kattusseqatigiinnilluunniit tunuarfiusumi qaammammit partiimit kattusseqatigiinilluunniit tunuarfiup naaneraniit agguaqatigiissillugu ukiumoortumik pisassat tunngavigalugit.

  Imm. 3.  Imm. 1 malillugu tapiissutit qinnutigineqassapput partiimit kattuseqatigiinnilluunniit tunuarnerup kingornatigut kingusinnerpaamik qaammatit marluk qaangiunneranni.

 

  § 4 a. § 2 aamma 3a malillugit qinigaatitamut ataatsimut tapiissutit aamma § 4 malillugu tapiissutit qaammatinut ilivitsunut tamanut Inatsisartunut ilaasortap pineqartup atuuffimminik aningaasatigullu soqutigisaminik allanik paasissutissiisussaatitaanerminik naammassinniffiginngisaanut tunniunneqartassanngillat.

  Imm. 2. Imm. 1 malillugu paasissutissiisussaatitaaneq atuutissaaq, tamanna Inatsisartut Suleriaasianni aalajangersarneqarsimaguni. Tassanissaaq aalajangersarneqarsinnaavoq paasissutissat aalajangersimasumik iluseqassasut, taamatullu aamma tamanut saqqummiunneqarsinnaassasut.

  Imm. 3. Imm. 1 naapertorlugu qinigaatitamut ataatsimut tapiissutit tunniunneqareersut qaammatit arfinillit tikillugit utertinneqarnissaat piumasarineqarsinnaavoq, paasinarsissagaluarpat paasissutissiissutaasussat amigaatigineqartut annertuunilluunniit amigaateqartut.

 

Naatsorsuinermi tunngaviusut

 

  § 5. §§-it 2-4 malillugit tapiissutit qinnuteqareernikkut ukiumut ataasiarlutik tunniunneqartarput, ukiup affaanut piffissanut 1. januarimiit 30. juunimut aamma 1. juulimiit 31. decembarimut atuuttussatut.

  Imm. 2.  § 2, imm. 1 aamma 3, aamma § 3a malillugit tapiissutit ukiup affaanut siullermut naatsorsorneqartassapput ukiumi qinnuteqarfimmi 1. januarimi ilaasortaqassuseq tunngavigalugu, ukiullu affaanut kingullermut naatsorsorneqartassallutik ukiumi qinnuteqarfimmi 1. julimi ilaasortaqassuseq tunngavigalugu.

  Imm. 3. Tapiissutit § 2, § 3a aamma § 4 malillugu partiimut, kattusseqatigiinnut ilaasortanulluunniit ataasiakkaanut ilaasortaajunnaartumulluunniit ukiup affaani qinersiviusumi tunniutassat ikilineqaratilluunniit amerlineqassanngillat, qinersineq 1. januarimut 1. julimulluunniit ilaasortat agguataarneqarnerannut sanilliullugu allannguuteqartitsisimagaluarpalluunniit

 

Qineqqusaarnermut tapiissutit

 

  § 6. Partii partiilluunniit avataatigut nunaqarfinni aqutsisunut, kommunimut Inatsisartunulluunniit qineqqusaartoq qinersineq sioqqullugu naalakkersuinikkut sulinermini aningaasartuutiminut tapiiffigineqarsinnaavoq.

  Imm. 2. Partiinut partiillu avataatigut qinigassanngortittunut tapiissutit aningaasat inatsisaanni aalajangerneqartassapput.

 

  § 7. Qinersineq sioqqullugu naalakkersuinikkut sulisimanermut tapiissutit qinnutigineqassapput kingusinnerpaamik qinersinerup kingornatigut qaammatit marluk qaangiunneranni.

 

Qinnuteqarneq aningaasallu tigunerat

 

  § 8. §§ 2 - 4 malillugit qinnuteqaatit Inatsisartut Siulittaasoqarfiannut tunniunneqassapput, tassa taakkua aalajangissammassuk tapiiffigineqarnissamut piumasaqaatit eqqortinneqarsimanersut.

  Imm. 2. Tapiiffigineqarnissamik qinnuteqaat tunniunneqassaaq partiip siulersuisuunerinit, kattusseqatigiit sinniisuannit aamma partiit avataatigut Inatsisartuni ilaasortaasumit imaluunniit partiit avataatigut qinigassanngortittumit tapiissutillu taakkununnga tunniunneqassapput.

  Imm. 3. § 6 malillugu tapiiffigineqarnissamik qinnuteqaatit Naalakkersuisunut tunniunneqartassapput.

 

  § 9. Inatsisartut inatsisaat manna naapertorlugu tapiissutit bankimi kontumut immikkut inissitamut ikineqassapput, taakkulu siunertanut allanut atorneqassanngillat.

  Imm. 2. §§ 2 - 4-imut malillugit tapiissutinik tigusisartut ukiut tamaasa qinnuteqarnerminnut aammalu naatsorsuutinik kukkunersiukkanik nassiussinerminnut ilanngullugu Inatsisartut Siulittaasoqarfiannut uppernarsarlugu nalunaarutigisassavaat qaamatisiutit ukiuanni qaangiuttu-mi tapiissutit naalakkersuinikkut sulinermut ilumut atorneqarsimasut, kiisalu tamanna nangeq-qinneqassasoq. Aammattaaq ukiut tamaasa kingusinnerpaamik 30. juni ukiumut siulianut naatsorsuutinik kukkunersiukkanik Inatsisartut Siulittaasoqarfiannut nassiussisoqartassaaq. Naatsorsuutit tiguneqarpata Inatsisartut Siulittaasoqarfiannit tamanut saqqummiunneqassapput. Ukiup affaanut siullermut tapiissutit Inatsisartut Siulittaasoqarfiata tapiiffigineqarnissamik qinnuteqaat suliarereeraangagu tunniunneqartassapput. Ukiup affaanut kingullermut tapiissutit ukiumut siulianut naatsorsuutit kukkunersiukkat nassiunneqareeraangata, siusinnerpaamilli 1, juli, tunniunneqartassapput. Taamatut uppernarsaalluni nalunaaruteqartoqanngippat Inatsisartut Siulittaasoqarfiat aalajangersinnaavoq tapiissutit tunniutassat tulliit kinguartinneqassasut tunniutinngiinnarneqassasulluunniit.

  Imm. 3. § 6 malillugu tapiissuteqarfigineqarsimasut ukiup ullorsiuteqarfiusup qinersisoqareernerata kingorna tullinnguuttup aallartinnerata kingornani aallartereerneraniit kingusinnerpaamik qaammatit arfinillit qaangiunneranni uppernarsarlugu Naalakkersuisunut nalunaarutigissavaat aningaasat qinersineq sioqqullugu naalakkersuinikkut suliniarnermut ilumut atorneqarsimasut. 25.000-init amerlanerusunik tapiissutisisimasut uppernarsarlugu nalunaarumminnut ilanngullu-git tapiissutit atorneqarnerinut naatsorsuutinik kukkunersiukkanik nassiussaqassapput. Taamatut uppernarsarlugu nalunaaruteqartoqanngippat imaluunniit naatsorsuutinik kukkunersiukkanik nassiussisoqanngippat Naalakkersuisut aalajangersinnaavaat tapiissutigineqarsimasut tamakker-lugit ilaannakorlugilluunnit utertinneqassasut.

  Imm. 4. Naalakkersuinikkut suliniaqatigiiffiit, kattusseqatigiit ilaasortalluunniit ataasiakkaat sinnerlugit aningaasartuutinut inatsit manna malillugu partiinut tapiissutinit Inatsisartut ilanngaasinnaapput ilanngaasitsisinnaallutilluunniit.

 

  § 10. Inatsit manna naapertorlugu tapiissutaasut isertitatut akileraarutaasussatut isigineqassanngillat. Tapiissutit erniatigut isertitaqaataasimappata akileraarutissanut ilanngunneqassanngillat.

  Imm. 2. Inatsit manna malillugu tapiissutinut aningaasartuutit Nunatta karsianit matuneqassapput.

 

  § 11. Inatsit atortuulerpoq 1. januar 2002.

  Imm. 2. 2001-imi tapiissutigineqarsimasut pillugit§ 9 malillugu naatsorsuutinik kukkunersiuk-kanik nassiussisoqassanngilaq.

  Imm. 3.  Tamatuma peqatigisaanik atorunnaarsinneqassapput naalakkersuinikkut suliaqarnermut tapiissutit pillugit Inatsisartut inatsisaat nr. 9, 31. oktober 1995-imeersoq kiisalu naalakkersuinikkut suliaqarnermut Inatsisartut inatsisaata allannguutaa nr. 5, 11. november 2000-imeersoq.

 

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisaat nr. 11, 15. apriili 2003-meersoq (Tapiissutinik pissarsisut naatsorsuutinik kukkunersiukkanik nassiussinissaannut tunniussivissatut piffissaliussaq)¹ atuutilersitsinissamut ataani taakkartorneqartunik imaqarpoq:

 

 

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarnissaanut Inatsisartut inatsisaat nr. 1, 12 maaji 2005-meersoq (Kommunimut Inatsisartunullu qinersinernut peqataanermi aningaasartuutinik matussusiinissamut aningaasatigut tapiiffigineqartarnermi nalunaarummik naatsorsuutinillu kukkunersiukkanik nassiussisarnissamut piffissaliussamik allannguineq)² atuutilersitsinissamut ataani taakkartorneqartunik imaqarpoq:

 

§ 2

 

Inatsisartut inatsisaat 1. juuni 2005-mi atuutilissaq tapiissutinullu 1. januaari 2005-ip kingorna tunniunneqartunut sunniuteqassalluni.

 

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisaat kiisalu Inatsisartunut Naalakkersuisunullu ilaasortat aningaasarsiaqartitaanerat il.il. pillugit Inatsisartut inatsisaata allanngortinneqarneranik Inatsisartut inatsisaat nr. 8, 1. juuni 2006-meersoq (Partiinut tapiissutit qaffanneqarneri tunngaviusumillu tapiissutinik agguataarisarneq aammalu qinikkamut tapiissutit, kiisalu Inatsisartunut ilaasortat inatsisikkut piginnaatitaaffiusumik ataasiakkaarlutik paasisassarsiorlutik angalasarnerinik atorunnaarsitsinissaq)³ atuutilersitsinissamut ataani taakkartorneqartunik imaqarpoq:

 

§ 3

 

Inatsisartut inatsisaat ulloq 1. juuni 2006 atuutilissaaq. 2006-ip sinneranut naalakkersuinikkut sulinermut tapiissutit qaffaataanik qinnuteqaatit kingusinnerpaamik ulloq 1. aggustusi 2006 tunniunneqassapput.

 

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisaat nr. 16, 3. decembari 2009-meersoq (Partiit aningaasaqarnerisa Inatsisartut allaffeqarfiata missingersuutaanit immikkoortinneqarnerat)⁴ atuutilersitsinissamut ataani taakkartorneqartunik imaqarpoq:

 

§ 2

 

Inatsisartut inatsisaat atortuulerpoq ulloq 1. januaari 2010.

 

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisaat nr. 25, 18. novemberi 2010-meersoq (Paasisassarsiorluni angalanernut aningaasat Inatsisartunit partiinut nuunneqarnerat)⁵ atuutilersitsinissamut ataani taakkartorneqartunik imaqarpoq:

 

 

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisaat nr. 4, 3. juuni 2015-meersoq

(Partiinut nutaanut tunngaviusumik tapiissuteqartannginneq. Atuuffiit allat pillugit paasissutissiinngikkaanni qinigaanermut tapiissutisisinnaannginneq. Partiit sinnerlugit aningaasartuutinik ilanngaassisinnaaneq)⁶ atuutilersitsinissamut ataani taakkartorneqartunik imaqarpoq:

 

§ 2

 

Inatsisartut inatsisaat una ulloq 1. juuli 2015 atuutilerpoq.

 

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisaat nr. 25, 17. novemberi 2017-meersoq

(Tapiissutinik qaffaaneq)⁷ atuutilersitsinissamut ataani taakkartorneqartunik imaqarpoq:

 

§ 2

 

Inatsisartut inatsisaat ulloq 1. januar 2018 atuutilerpoq. 

 

 

Isumaginninnermut, Suliffeqarnermut Nunamullu Namminermut Naalakkersuisoqarfik ulloq 8. maajip 2025

 

 

Aka Grønvold (atsion.)

Naalakkersuisoqarfimmi pisortaagallartoq

 

 

 

/ Mehdi Shams (atsiorn.)

 

 

 

 

^[1] Inatsimmut allannguut § 9, imm. 2.-mut tunngavoq

² Inatsimmut allannguut § 9, imm. 3, 1. imm. -mut tunngavoq

³ Inatsimmut allannguut § 2, imm. 1-3, § 4, imm. 1.-inut tunngassuteqarpoq

⁴ Inatsimmut allannguut § 1, imm. 4-5, § 2, imm. 1, § 4, imm. 1, § 9, imm. 2, allannguut ”Landstinget” uunga ”Inatsisartut”, ”Landstingets” uunga ”Inatsisartuts”, ”Landstingsvalg” uunga ”Inatsisartutvalg”, ”Landstingsarbejde” uunga ”Inatsisartutarbejde” aamma ”Landsstyret” uunga ”Naalakkersuisut”.

⁵ Inatsimmut allannguut § 2, imm. 1, § 4, imm. 1.

⁶ Inatsimmut allannguut § 3a, § 4a, § 5, imm. 1-3, § 9, imm. 2, imm. 3-4, § 9, imm. 4.

⁷ Inatsimmut allannguut § 2, imm. 1, § 3a, imm. 1, § 4, imm. 1