§ 1

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaanni nr. 1-imi, ulloq 31. maj 2001-imeersumi, Inatsisartut inatsisaatigut nr. 25, 18. november 2010-meersukkut kingullermik allanngortinneqartutut, makku allannguutigitinneqassapput:

1. § 3-p kingornanut ilanngunneqassaaq:
“3a.  Naalakkersuinikkut suliniaqatigiiffik, partii, Inatsisartunut qinersinermi kingullermi Inatsisartunut qinigassanngortinngitsoq qinigaatitaqanngitsorluunniit, kisiannili kingusinnerusukkut Inatsisartunut ilaasortap ataatsip ilaasortalluuniit arlallit sinniisuuffigissallugu nuuffigisaat, partiip Inatsisartuni naalakkersuinikkut sulineranut tapiissutisisinnaatitaavoq. Tapiissut partiip ilaasortaatitaanut ataasiakkaanut tamanut ukiumut 210.000 kr.-iuvoq.
Imm. 2.  Imm. 1 malillugu tapiissutit ukiumi partiip sinniisuutitaqalernerani ukiumoortumik tapiissutit ilaattut, qaammatip partiip sinniisuutitaqalerfiata naaneranit naatsorsorlugit, tunniunneqartassapput.
Imm. 3.  Partiip sinniisaa § 4 malillugu, pineqartoq partiimut sinniisuuffigilikkaminut nuutsinnagu, attaviitsutut tapiissutisisimappat, qinikkamut pineqartumut partii qinigaatitamut tapiissutisisinnaanngilaq piffissamut sinniisuutitarilikkap § 4 malillugu tapiissutisiffigisimasaanut.”

2.  § 4-p kingornanut ilanngunneqassaaq:
”§ 4 a.  § 2 aamma 3a malillugit qinigaatitamut ataatsimut tapiissutit aamma § 4 malillugu tapiissutit qaammatinut ilivitsunut tamanut Inatsisartunut ilaasortap pineqartup atuuffimminik aningaasatigullu soqutigisaminik allanik paasissutissiisussaatitaanerminik naammassinniffiginngisaanut tunniunneqartassanngillat.
Imm. 2.  Imm. 1 malillugu paasissutissiisussaatitaaneq atuutissaaq, tamanna Inatsisartut Suleriaasianni aalajangersarneqarsimaguni. Tassanissaaq aalajangersarneqarsinnaavoq paasissutissat aalajangersimasumik iluseqassasut, taamatullu aamma tamanut saqqummiunneqarsinnaassasut.
Imm. 3.  Imm. 1 naapertorlugu qinigaatitamut ataatsimut tapiissutit tunniunneqareersut qaammatit arfinillit tikillugit utertinneqarnissaat piumasarineqarsinnaavoq, paasinarsissagaluarpat paasissutissiissutaasussat amigaatigineqartut annertuunilluunniit amigaateqartut.”

3. § 5 ima oqaasertaqassaaq:
“§ 5.  §§-it 2-4 malillugit tapiissutit qinnuteqareernikkut ukiumut ataasiarlutik tunniunneqartarput, ukiup affaanut piffissanut 1. januarimiit 30. juunimut aamma 1. juulimiit 31. decembarimut atuuttussatut.
Imm. 2.  § 2, imm. 1 aamma 3, aamma § 3a malillugit tapiissutit ukiup affaanut siullermut naatsorsorneqartassapput ukiumi qinnuteqarfimmi 1. januarimi ilaasortaqassuseq tunngavigalugu, ukiullu affaanut kingullermut naatsorsorneqartassallutik ukiumi qinnuteqarfimmi 1. julimi ilaasortaqassuseq tunngavigalugu.
Imm. 3.  Tapiissutit § 2, § 3a aamma § 4 malillugu partiimut, kattusseqatigiinnut ilaasortanulluunniit ataasiakkaanut ilaasortaajunnaartumulluunniit ukiup affaani qinersiviusumi tunniutassat ikilineqaratilluunniit amerlineqassanngillat, qinersineq 1. januarimut 1. julimulluunniit ilaasortat agguataarneqarnerannut sanilliullugu allannguuteqartitsisimagaluarpalluunniit.”

4. § 9, imm. 2, oqaaseqatigiit 3-4 ima oqaasertaqassapput:
“Ukiup affaanut siullermut tapiissutit Inatsisartut Siulittaasoqarfiata tapiiffigineqarnissamik qinnuteqaat suliarereeraangagu tunniunneqartassapput. Ukiup affaanut kingullermut tapiissutit ukiumut siulianut naatsorsuutit kukkunersiukkat nassiunneqareeraangata, siusinnerpaamilli 1, juli, tunniunneqartassapput.”

5.  § 9-mi imm. 3-p kingornanut immikkoortutut nutaatut ilanngunneqassaaq:
”Imm. 4.  Naalakkersuinikkut suliniaqatigiiffiit, kattusseqatigiit ilaasortalluunniit ataasiakkaat sinnerlugit aningaasartuutinut inatsit manna malillugu partiinut tapiissutinit Inatsisartut ilanngaasinnaapput ilanngaasitsisinnaallutilluunniit.”

§ 2

Inatsisartut inatsisaat una ulloq 1. juli 2015 atuutilerpoq.

Namminersorlutik Oqartussat, ulloq 3. juni 2015