Matumuuna sulisoqarnermut akitsuut pillugu Inatsisartut inatsisaat nr. 10, 2. novemberi 2006-meersoq, Inatsisartut inatsisaat nr. 5, 26. april 2007-meersumi, Inatsisartut inatsisaat nr. 11, 3 juni 2015-meersumi, Inatsisartut inatsisaat nr. 9, 19. novemberi 2020-meersumi aamma Inatsisartut inatsisaat nr. 51, 25. novemberi 2024-meersumi allannguutit ilanngullugit, nalunaarutigineqarpoq.

 

Akitsuummik akiliisussaatitaasut

 

  § 1.  Sulisitsisut il.il. kikkulluunniit aningaasarsiat A-t akileraarutaannik Aningaasarsianit akileraarutit pillugit Inatsisartut inatsisaanni § 76, tak. § 78, naapertorlugu unerartitsisussaatitaasut inatsimmi matumani aalajangersakkat naapertorlugit sulisoqarnermut akitsuummik landskarsimut akiliuteqartussaapput.

  Imm. 2.  Akitsuummik akiliisussaatitaasunut ilaanngillat naalagaaffik naalagaaffiullu suliffeqarfiutai.

  Imm. 3.  Sulisitsisut Kalaallit Nunaanni atortussiassat aatsitassanit pisut il.il. pillugit inatsit naapertorlugu aatsitassanik iluaqutiginninniarsinnaanermut akuersissuteqarfigineqarsimasut akitsuummik akiliisussaatitaanerat atorunnaassaaq tamanna pisinnaatitaaffeqalersumut akuersissummi allassimappat.

 

Akitsuutip naatsorsornera

 

  § 2.  Sulisoqarnermut akitsuut akissarsiat katinnerisa 1,9%-attut annertussuseqarpoq.

  Imm. 2.  Akissarsiarititat katinnerat tassaavoq inuit Kalaallit Nunaanni tamakkiisumik akileraartussaatitaasut sulisussarsiarineqarsimallutik nammineerlutik sulinerannut aningaasanngorlugit akissarsiatut tunniunneqartut suulluunniit katinnerat, matumani ilanngullugit akissarsiat, feeriarnersiat, honorarit, iluanaarutinit kajumissaatitut tapisiat, kiffartulussinnarnaveeqqutisiat akiliutillu taakkua assigisaat.

  Imm. 3.  Akissarsiarititat katinnerannut imm. 1-imi taaneqartumut ilaapputtaaq siulersuisunut, ataatsimiititalianut, kommissioninut assigisaannullu Kalaallit Nunaanni angerlarsimaffeqartunut ilaasortaanermi ikiortaanermiluunniit akissarsiat.

  Imm. 4.  Akissarsiarititat katinnerisa imm. 2 aamma imm. 3 malillugu naatsorsorneranni ilanngunneqassanngillat aningaasat sulisitsisumit aaqqissuussinernut, aningaasarsianit akileraarutit pillugit Inatsisartut inatsisaanni § 39, § 40 aamma § 47 b, imm. 6-mi taaneqartunut akilerneqartut.

 

  § 2 a.  Namminersorlutik suliffiuteqartunut atatillugu erninermi aningaasaateqarfimmik pilersitsinermi, ingerlatsinermi, nalilersuinermi, kukkunersiuinermi, nakkutilliinermi il.il. aningaasartuutit matussuserneqarnissaannut akissarsiat katinnerannit § 2, Imm. 2-mit 4-mut naapertorlugu akitsuuteqartitsisoqassaaq. Akitsuutip annertussusissaa Inatsisartut aningaasanut inatsisaanni ukiut tamaasa aalajangersarneqartassaaq.
  Imm. 2.  Kommunit aamma Namminersorlutik Oqartussat imm. 1 naapertorlugu akitsuummut akiliuteqartassanngillat.

 

Akitsuutip akilersinneqarnera

 

  § 3.  Piffissaq akitsuummik akiliiffiusoq tassaavoq qaammat.

 

  § 4.  Suliffeqarfiup akitsuummik akiliisussaatitaasup qaammatit naaneri tamaasa kingusinnerpaamillu ulloq qaammatip tulliuttup 10-iani akissarsiat akitsuusiivigineqartussamik katinnerat kiisalu taakkua akitsuutissaat akileraaruserivimmut nalunaarutigissavai. Nalunaarusiortussaatitaanermut piffissaliussaq kingusinnerpaaq sapaammi- imaluunniit nalliuttuni imaluunniit arfininngornermi pippat, taava piffissaliussaq ulluinnaasumut tullermut sivitsorneqassaaq.

  Imm. 2.  Nunalunaaruteqarneq akileraaruseriffiup immersugassiai atorlugit pissaaq.

 

  § 5.  Akissarsiarititat akitsuummik akiliuteqaataasussat katinnerisa akitsuutitaat qaammatip tulliuttup ulluisa aallaqqaataanni akiligassanngussaaq, ulloq piffissaagallartillugu akilerneqarfissaa kingulleq tassaalluni qaammammi akilerneqarfissaani ulluinnaq kingulleq. Akiliisussaatitaanermut ulluliussaq kingullerpaaq arfininngornermi, sapaammi- imaluunniit nalliuttuni inissisimappat, taava piffissaliunneqartoq ulluinnaasumut tullermut sivitsorneqassaaq.

Imm. 2.  Akiliineq pissaaq akileraaruseriffimmut.

 

  § 6.  Akileraaruseriffiup suliffeqarfik piffissaagallartillugu akiliuteqartanngitsoq, peqqusinnaavaa piffissaq qaammammit ataatsimit sivikinnerusumik nalunaarusiornissaa pissasoq.

  Imm. 2.  Aammattaaq akileraaruseriffiup suliffeqarfik piffissaagallartillugu akiliuteqanngitsoq peqqusinnaavaa akiliiffissatut piffissaliussamit § 5, imm. 1-imi taaneqartumit sivikinnerusumik piffissaqarluni akileeqqullugu.

 

  § 7.  Suliffeqarfik akileraaruseriffimmut eqqunngitsumik nalunaaruteqarsimasoq, taamaalillunilu akitsuummik mikivallaamik akiliisimasoq paasineqarpat, aningaasat akiligassaalersut pillaammik ernialiunneqarsimasinnaasut ilanngullugit peqqusinermiit kingusinnerpaamik ullut 14-it qaangiunneranni akilerneqassapput.

  Imm. 2.  Suliffeqarfik akitsuummik angivallaamik akiliisimasoq paasineqarpat aningaasat akiliutaavallaartut utertinneqassapput.

 

Naatsorsuusiornermi aalajangersakkat

 

  § 8.  Akitsuummik akiliisussaatitaasup akissarsiarititat tunniunneqartut katinnerat, akitsuutip naatsorsorneqarnissaani kiisalu akitsuutip akilerneqarneranik nakkutilliinermi tunngaviusussaq naatsorsuusiugassaraa.

  Imm. 2.  Naatsorsuusiorneq pillugu maleruagassat erseqqinnerusut Naalakkersuisunit aalajangersarneqarsinnaapput.

 

Allaffissornermi malittarisassat

 

  § 9.  Inatsisip matuma atuutsinneqarnissaa pillugu maleruagassat erseqqinnerusut Naalakkersuisunit aalajangersarneqarsinnaapput.

 

Pineqaatissiinerit

 

  § 10.  Pillaammik akiliisinneqassaaq kinaluunniit piaaraluni mianersuaalliorujussuarluniluunniit:

1)  Paasissutissanik akitsuutip nakkutigineqarnissaanut atugassanik eqqunngitsunik paasinerlunneqarsinnaasunilluunniit paasissutissiisoq imaluunniit paasissutissanik nipangiussiinnartoq.

2)  § 4, imm. 1 aamma § 5, imm. 1-imik unioqqutitsisoq.

3)  § 6, imm. 1 aamma 2 naapertorlugit peqqussinermik malinninngitsoq.

  Imm. 2.  Malittarisassani inatsit naapertorlugu maleruagassiornikkut kinaluunniit maleruagassiani aalajangersakkanik piaaraluneerluni mianersuaalliorujussuarluniluunniit unioqqutitsisoq akiliisinneqarsinnaavoq.

  Imm. 3.  Imm. 1-imi 2-miluunniit taaneqartut arlaat aktieselskabimit, anpartsselskabimit, andelsselskabimit, peqatigiiffimmit, suliffeqarfimmit imminut ingerlattumit, aningaasaateqarfimmit assigisaannilluunniit unioqqutinneqarpat inatsisit malillugit inuttut isigineqarsinnaasoq taanna akiliisinneqarnissamut akisussaatinneqarsinnaavoq. Namminersornerullutik Oqartussat, kommunimit imaluunniit kommunit suleqatigiiffiat unioqqutitsisimappat Namminersornerullutik Oqartussat, kommuni imaluunniit kommunit suleqatigiiffiat akiliisinneqarsinnaavoq.

  Imm. 4.  Akiliisitsissut landskarsip pisassaraa.

 

  § 11.  Naalakkersuisut inatsimmi matumani aalajangersakkanik unioqqutitsisoq nalunaarfigisinnaavaat suliassap eqqartuussinertaqanngitsumik naammassineqarsinnaaneranik, unioqqutitsisup unioqqutitsinini nassuerutigippagu akiliisitsissullu nalunaarummi taaneqartoq piffissaq aalajangersimasoq, qinnuteqarnikkut sivitsorneqarsinnaasoq nallertinnagu akilerumallugu akuersippat.

  Imm. 2.  Nalunaarummut imm. 1-imi taaneqartumut tunngatillugu aalajangersakkat eqqartuussisarnermi inatsimmi unnerluussinermik imaqartut aammattaaq atuupput.

  Imm. 3.  Akiliisitsissut piffissaq eqqorlugu akilerneqarpat imaluunniit aalajangiunneqarnermi kingorna akiliisitsiniarnikkut akilersinneqarpat qanoq iliuuseqaqqittoqassanngilaq.

 

Aalajangersakkat atuutilersitsisuusut ikaarsaarutaasullu

 

  § 12.  Inatsisartut inatsisaat ullormi 1. januar 2007-imi atuutilissaaq. 
  Imm. 2.  Tassunga ilutigitillugu atorunnaarsinneqassaaq Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaat nr. 16 ulloq 23. november 1989-imeersoq (AEB).
  Imm. 3.  Taamaattorli Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaanni nr. 16 ulloq 23. november 1989-imeersumi maleruagassat maannamut atuuttut akiliutinut piffissamut 1. januar 2004-miit 31. december 2006-imut tunngasunut atuutiinnassapput, soorluttaaq akiliutit akilerneqarsimanngitsut suli akiliisitsiniarnikkut akilersinniarneqarsinnaasut.
  Imm 4.  Ilinniagaqarnersiutit pillugit Inatsisartut peqqussutaanni nr. 5, 14. november 2004-meersumi § 5, imm. 1-imi oqaaseqatigiit aappaat pingajuilu atorunnaarsinneqassapput.

 

Inatsisartut inatsisaat nr. 5, 26. april 2007-meersoq (Sulisoqarnermut akitsuummiik nalunaarutinik tunniussinissamut akiliuteqarnikkullu isumannaarinissamut piffissaliunneqartunut allannguutit)^[1] atuutilernissamut aalajangersakkanik ataani taakkartukkanik imaqarpoq:

 

§ 2

 

Inatsisartut inatsisaat 1. januar 2008 atuutilerpoq.

 

Inatsisartut inatsisaat nr. 11, 3. juni 2015-meersoq (Sulisoqarnermut akitsuutip akilerneqarnissaanut piffissaliussap allanngortinnera)^[2] atuutilernissamut aalajangersakkanik ataani taakkartukkanik imaqarpoq:

 

§ 2

 

 

Inatsisartut inatsisaat nr. 9, 19 novemberi 2020-meersoq (Erninermi aningaasaateqarfimmik aningaasalersuinissaq il.il.)^[3] atuutilernissamut aalajangersakkanik ataani taakkartukkanik imaqarpoq:

 

§ 2

 

 

Inatsisartut inatsisaat nr. 51, 25. novemberi 2024-meersoq (Akileraarusiisarnermi iluarsaaqqinnerup piviusunngortinneqarnera il.il.)^[4] atuutilernissamut aalajangersakkanik ataani taakkartukkanik imaqarpoq:

 

§ 4

 

Atuutilerneranut- aamma ikaarsaariarnermullu aalajangersakkat

 

 

 

Isumaginninnermut, Suliffeqarnermut Nunamullu namminermut Naalakkersuisoqarfik ulloq 26. april 2025

 

 

Aka Grønvold (atsior.)

Naalakkersuisoqarfimmi pisortaagallartoq

 

 

/Mehdi Shams (atsior.)