Matumuuna Kalaallit Nunaanni ilinniartitaanermut inuussutissarsiutinillu siunnersuisarneq pillugu Inatsisartut inatsisaat nr. 4 29. novemberi 2013-meersoq, Inatsisartut inatsisaat nr. 12, 27. november 2018-meersumi aamma Inatsisartut inatsisaat nr. 18, 1. december 2021-meersumi allannguutit ilanngullugit, nalunaarutigineqarpoq.

 

Kapitali 1

Siunertaa nassuiaatillu

 

  § 1.  Kikkulluunniit ilinniarnissaq inuussutissarsiummillu ingerlataqalernissaq siunertaralugu akeqanngitsumik pitsaassusilimmillu ilitsersorneqarsinnaaput.

  Imm. 2.  Ilitsersuisarneq pingaartumik inuusuttunut tunngatinneqassaaq, takukkit §§ 19-23.

  Imm. 3.  Ilitsersuisarneq ilinniakkanik taamaatitsiinnartarnerit allanillu toqqaaqqittarnerit pinaveersaartinnissaannut aammalu ilinniartut ataasiakkaat ilinniartulluunniit ilinniakkamik toqqaakkaminnik ilinniakkanik inuttullu annertunerpaamik pissarsiaqarlutik naammassinnittarnissaannut annertunerpaamik tapersiissaaq.

  Imm. 4.  Ilitsersuisarneq aamma ataasiakkaat namminneq paasissutissanik ujarlersinnaanissaannut atuisinnaanerannullu tapersiissaaq, tassunga ilanngullugit qarasaasiaq atorlugu paasissutissanik ilitsuinersarnermillu neqeroorutit, ilinniagaq pillugu, ilinniarfiit siunissamilu suliffissat.

 

  § 2.  Ilitsersueriaatsit imm. 1-7-imi taaneqartut ingerlanneqartassapput ilitsersueriaatsinut assigiinngitsunut immikkut piumasaqaatit ataqqillugit:

1)  Ilinniagaqarneq pillugu ilitsersuineq tassaavoq ilitsersuineq ilinniagassamik ilinniaqqinnissamilluunniit toqqaanissamut tunngasoq.

2)  Inuussutissarsiutinut ilitsersuisarneq tassaavoq ilitsersuineq inuussutissarsiummik toqqaanissamut tunngasoq, tassunga ilanngullugit ilinniareernerup kingorna inuussutissarsiuteqalersinnaanerit, allamik inuussutissarsiuteqalerneq suliffeqarnerlu aamma suliffissaaleqinermi suliffeqarneq.

3)  Naammassinninnissamut ilitsersuineq tassaavoq ilinniartut ilinniagaqartulluunniit ilinniakkamik pineqartumik naammassinnissaat siunertarlugu ilinniagaqarnerup ingerlanerani ilitsersuineq.

4)  Ingerlaqqeriarnissamut ilitsersuisarneq tassaavoq ilinnigaqarnermit ilinniagaqaqqinnissamut ikaarsaariarnermut atatillugu aamma ilinniaqarnermit suliffeqalernermut atatillugu ilitsersuisarneq.

5)  Inunnik ataasiakkaanik ilitsersuisarneq tassaavoq inuit ataasiakkaat immikkut ilitsersorneqartarnerat.

6)  Ataatsimoortunik ilitsersuisarneq tassaavoq eqimattanik piffissami ataatsimi ilitsersuisarneq.

7)  Ujartuilluni ilitsersuisarneq tassaavoq kaammattorneqarani innuttaasunut ataasikaanut saaffiginnilluni ujartuilluni ingerlatsinikkut ilitsersuisarneq.

 

Kapitali 2

Akisussaaffik aaqqissuussaaneralu

 

Qitiusumi akisussaaffik

 

  § 3.  Naalakkersuisut pisussaaffigaat isumagissallugu:

1)  nalilersuisarneq aamma ineriartortitsineq siunnersuisarnermik ingerlatsinermi,

2)  siunnersuisarnerit ataqatigiissaarnissaat,

3)  siunnersuisarnermut tunngatillugu paasissutissiisarneq,

4)  siunnersuisarnermit atortussanik suliaqartarneq siammartitserisarnerlu,

5)  ilitsersuisartunik ilinniartitsisarneq ilinniaqqittarnerlu,

6)  supervision-ertitsisarneq najukkani ilitsersuisarfinnut atatillugu,

7)  misilittakkanik aamma ilisimasanik avitseqatigiittarneq,

8)  attaveqaqatigiiffiliortarnernut tapersersuisarneq, aamma

9)  tarnikkut aamma isumaginninnikkut siunnersuisarneq, tamatumani aamma peqqissaasarneq ilinniagaqartunik., tak. § 18, imm. 2.

10)  nuna tamakkerlugu ilitsersuinissamut periusissiornerup ingerlaavartumik nutarterneqartarnissaa.

 

  § 4.  Ilitsersuisarneq pillugu paasissutissiisarnermut atatillugu, takuuk § 3, nr. 3, ilitsersuisarneq pillugu quppersakkap pilersinnissaa ingerlannissaalu Naalakkersuisut isumagissavaat. Ilitsersuisarneq pillugu quppersagaq sumiiffinni ilitsersuisarfinni ilinniarfinnilu ilitsersuisartut, ilitsersorneqarusuttunut allanullu ilinniarneq inuussutissarsiuteqarnerlu pillugit paasissutissinneqarnissamik kissaateqartunut internetikkut paasissutissiisarnermi ilitsersuisarnermilu sakkussaq.

  Imm. 2.  Ilitsersuisarnermi quppersagaq Kalaallit Nunaani avataanilu ilinniarfiusinnaasut pillugit ilinniakkat ataasiakkaat sumut atorneqarsinnaanerannik piffissanilu aalajangersimasuni suliffeqarneq pillugu paasissutissanik imminnut sanilliunneqarsinnaasunik imaqassaaq.

  Imm. 3.  Ilitsersuisarnermi quppersagaq pillugu malittarisassanik annertunerusunik Naalakkersuisut aalajangersaasinnaapput.

 

  § 5.  Attaveqaqatigiittarnermik pilersitsinermut atatillugu, takuuk § 3, nr. 8, nuna tamakkerlugu attaveqaqatigiiffiusartup pilersinnissaa Naalakkersuisut isumagissavaat, tamatumani sumiiffinni ilitsersuisarfiit, ilinniarfiit, kattuffiit, peqatigiiffiit il.il. pissutsit ilinniartitaanermut inuussutissarsiutinullu pingaaruteqartut tamaasa pillugit isummaminnik saqqummiisinnaallutik, oqallissinnaallutik nalilersuisinnaallutillu.

  Imm. 2.  Nuna tamakkerlugu attaveqaqatigiiffiusartoq pillugu malittarisassanik annertunerusunik Naalakkersuisut aalajangersaasinnaapput.

 

  § 6.  Suliassat §§ 3-5-mi aamma § 8-mi taaneqartut taakkuluunniit ilaat pillugit nuna tamakkerlugu ilitsersuisarfimmik Naalakkersuisut pilersitsisinnaapput.

 

  § 7.  Ilitsersuisarnerup ineriartorteqqinnissaa pillugu Naalakkersuisunut ilitsersuisarnissaq siunertaralugu Kalaallit Nunaanni Ilitsersuisarneq pillugu Siunnersuisoqatigiit Naalakkersuisut pilersissavaat.

  Imm. 2.  Siunnersuisoqatigiit 6-inik inuttaqarput, tamatumunnga inassuteqartoqarnera naapertorlugu, tak. imm. 3, Naalakkersuisunit inuttut piginnaanitik naapertorlugit toqqarneqartartunik piffissamut ukiunik 4-nik sivisussusilimmut. Ilaasortaq toqqaqqinneqarsinnaapput. Siunnersuisoqatigiit ataatsimut sinniisuuffigissavaat siunnersuisarneq, ilinniartitaanerni aamma inuussutissarsiutini paasisimasaqassuseq.

  Imm. 3.  Tulliuttut tamarmik siunnersuisoqatigiinnut ilaasortassamik ataatsimik inassuteqartassapput:

1)  Sulisitsisut kattuffii.

2)  Sulisut kattuffii.

3)  Ilinniagaqartut kattuffii.

4)  Kommunit ataatsimoorlutik.

5)  Ilinniarfiit.

6)  Nakorsaaneq peqqinnissamik nakkutilliisoq.

  Imm. 4.  Kattuffiit suliaqarfiillu innersuussisut isumaqatigiillutik ilaasortassamik ataatsimik innersuussippata taanna toqqarneqassaaq. Innersuussineq pillugu isumaqatigiinngittoqarnerani, innersuussat akornanni ilaasortassamik Naalakkersuisut toqqaasassapput.

  Imm. 5.  Siunnersuisoqatigiinni ilaasortat akunnerminni siulittaasussaq toqqartassavaat.

  Imm. 6.  Siunnersoqatigiit suliassaat pillugit malittarisassanik Naalakkersuisut aalajangersaasinnaapput, tassunga ilanngullugu siunnersuisoqatigiit suleriaasiat.

 

  § 8.  Kalaallit Nunaanni Ilitsersuisarneq pillugu Siunnersuisoqatigiit allatseqarnerat Naalakkersuisut isumagissavaat.

  Imm. 2.  Kalaallit Nunaanni Ilitsersuisarneq pillugu Siunnersuisoqatigiit ataatsimiinneranni ilaasortat illoqarfitsik qimallugu ataatsimiigiartariaqartillugit, Inatsisartuni, Naalakkersuisunilu il.il. ilaasortat akissarsiaat il.il. pillugit Inatsisartut inatsisaanni Inatsisartunut ilaasortanngitsunut akissarsiat tapisiallu pillugit malittarisassat malillugit ullormusiaqassapput angalanerannilu aningaasartuutat matussuserneqartassallutik.

 

Sumiiffinni akisussaaffiit

 

  § 9.  Kommunalbestyrelsip akisussaaffigaa Inatsisartut inatsisaat naapertorlugu ilitsersuisoqartarnissaa kommunimi innuttaasunut, tak. taamaattoq § 3, nr. 9 aamma § 10.

 

  § 10.  Ilinniarfiit ilinniagaqarniarlutik qinnuteqartunut ilinniakkamik naammassinninnissamut ikaarsaariarnermilu ilitsersuisarnissamut akisussaapput. Ilinniakkanut pineqartunut malittarisassat atuuttut malillugit ilitsersuineq ingerlanneqassaaq, taamaattorli tak. imm. 2-4.

  Imm. 2.  Ilinniarfiit naammassinninnissamut ilitsersuinerat ilinniagaqartup ilisimasaanik, pikkorissusianik ilinniakkamilu piginnaasaanik ikorfartuillunilu ineriartortitsissaaq. Tassunga ilaapput inummut inooqataanermullu pissutsit, ilinniartitaanermi atuartitsissutinik qaffasissutsinillu toqqaaneq, takkutinngitsoorneq, kajumissuseq, karakteerit, soraarummeernermi periuseq, soraarummeernissamut annilaanganeq, ilinniariaaseq, sulinermi ileqqut, suleqatigiissinnaassuseq aamma ilinniakkami atuaqatigiinnilu atugarissaarneq pillugu ilitsersuineq. Naammassinnissinnaanermut ilitsersuineq siusissukkut pitsaaliuilluni suliniutitut tunniunneqassaaq ilinniagaqartup ilinniarnerup annertuumik artukkiisutut misigisaqannginnissaa atuartitsinermullu naleqqiullugu katataannginnissaa qulakkeerniarlugu.

  Imm. 3.  Ilinniarfiit ikaarsaariarnermi ilitsersuinerisa qulakkiissavaat ilinniartut ilisimatinneqarneq, eqqarsarfiusumik piviusorsiortumillu tunngaveqarlutik ilinniakkamik, inuussutissarsiummi aamma atorfimmi ingerlavissamik toqqaasinnaallutik. Tassunga ilaapput piginnaasat soqutigisallu paasisaqarfigineri, ilinniakkap imarisaanut, piumasaaqataanut, naatsorsuutigisanut, ingerlaqqinnissamut periarfissanut, ilinniartitsinermut, kulturimut avatangiisinut suliffeqarfinnillu ilisimasaqalernissap qulakkeerneqarnera.

  Imm. 4.  Naalakkersuisunit akuerisaasumik ilinniartitsinermik inuussutissarsiutinullu siunnersuisarnermik ilinniagaqarsimasunit imaluunniit tassunga assingusumik ilitsersuisinnaanermik piginnaasaqarnermik uppernarsaasinnaasunit inunnit naammassinninnissamut ikaarsaariarnermilu ilitsersuineq ingerlanneqassaaq. Naalakkersuisut tamanna pillugu ilinniarfinniit qinnuteqartoqareernerata kingorna ilitsersuisarnerup inummit siunnersuisarnermi allaanerusunik piginnaasaqartumit utaqqiisaasumik ingerlanneqarnissaa akuerisinnaavaat, ilitsersuisartoq pineqartoq Naalakkersuisunit akuerisaasumik ilinniartitsinermik siunnersuisarnermillu ilinniarnermik ingerlataqarpat ilinniarnissamilluunniit pilersaaruteqarpat.

 

  § 11.  Ilitsersuisarnerup ataqatigiissarnissaa, annertusarnissaa sammiveqarnissaalu siunertaralugit kommunini ilitsersuiffinnik pilersitsinissap ingerlatsinissallu isumaginissaat kommunalbestyrelsit pisussaaffigaat.

  Imm. 2.  Kommunalbestyrelsip qularnaassavaa kommunit qitiusumik ilitsersuisarfiisa ilitsersuisarnerminnik sulianik ingerlatsinerminni inatsit naapertorlugu kommunini suliffissarsiuussisarfinnik suleqateqarnissaat, tak. suliffissarsiuussisarneq il.il. pillugit Inatsisartut inatsisaat

 

  § 12.  Kommunalbestyrelsip isumagissavaa kommunimi qitiusumik ilitsersuisarnermik ingerlatsiviup ilitsersuisarnikkut neqeroorutaasa piginnaaneqarluartunit ilitsersuisartunit ingerlanneqartarnissaa, tak. imm. 2, aamma inissat naleqquttut iluanni ingerlatsisoqartarnissaa.

  Imm. 2.  Inunnit Naalakkersuisunit akuerisaasumik ilinniartitsinermik ilitsersuisarnermillu ilinniagaqarsimasunit imaluunniit tassunga assingusumik iltsersuisinnaanermik piginnaasaqarnermik uppernarsaasinnaasunit ilitsersuisarneq ingerlanneqassaaq.

Naalakkersuisut tamatumunnga kommunalbestyrelsimiit qinnuteqartoqarneratigut periarfissaqartissinnaavaat ilitsersuisarnerup utaqqiisaasumik inummit ilitsersuisarnermi immikkut piginnaaneqanngitsumit ingerlanneqarallartarsinnaanera, ilitsersuisartup ilinniagaqalernerani imaluunniit ilinniagaqarnerani ilinniartitaanernut ilitsersuisarnermullu suliassanut Naalakkersuisunit akuerisaasumik.

 

  § 13.  Ilitsersuinikkut suliniutinik aqutsinermut aamma ilinniartitaanermut suliffeqarnermullu tunngatillugu anguniakkanut naleqqiullugu suliniutit siunnerfilernissaannut atugassanik nuna tamakkerlugu paasissutissanut tunngavinnik pilersitsinissaq siunertaralugu ataasiakkaanut ilitsersuinerni suliniutitik pillugit aamma innuttaasut ilinniartitaanikkut suliffeqarnikkullu killiffii pillugit paasissutissat kommunalbestyrelsinit ilinniarfinniillu nalunaarsorneqarlutillu Naalakkersuisunit nalunaarutigisassavaat.

  Imm. 2.  Imm. 1-imi siunertarisatut taaneqartut innersuussutigalugit, kommunalbestyrelsit, ilinniarfiit, meeqqat atuarfii namminersortut, efterskolit folkehøjskolellu ilinniarfiup ilitsersuisoqarnikkut suliai pillugit paasissutissanik nalunaaruteqaqqullugit Naalakkersuisut peqqusisinnaapput.

  Imm. 3.  Imm. 1 aamma 2 naapertorlugit nalunaarsuisarneq paasissutissanillu nalunaaruteqartarneq pillugit Naalakkersuisut malittarisassanik aalajangersaasinnaapput, tassunga ilanngullugu paasissutissat elektroniskimik nalunaarsorsimanissaannik  nalunaarutigineqarnissaannillu piumasaqarsinnaaneq pillugu.

 

Kapitali 3

Ilitsersuisarnerup aaqqissuunneranut ingerlanneqarneranullu sinaakkutit

 

  § 14.  Ataqqinninneq, naligiissitaaneq, ammasuuneq tatiginninnerlu aallaavigalugit ilitsersuisarneq ingerlanneqartassaaq aammalu ataasiakkaat soqutigisaat inuttullu piginnaasaat ilanngunneqartassallutik, tassunga ilanngullugit aqqissuussaanngitsumik piginnaasat, maannamut ilinniagaqarsimaneq suliffeqarsimanerlu, kiisalu ilinniarsimasunik sulisoqarnissamik inuussutissarsiortullu namminersortut pisariaqartitaattut ilimagisat.

 

  § 15.  Ilitsersuisarneq aaqqissuunneqartassaaq ingerlanneqartassallunilu paasissutissat, ilinniartitsineq, ingerlatat inunnillu ataasiakkaanik oqaloqateqarneq ataqatigiissillugit.

  Imm. 2.  Ilitsersuisarneq imatut aaqqissuunneqartassaaq ilitsersuinermi ataqatigiissitsisoqarluni, siuariartortitsisoqarluni assigiinngiiaartitsillunilu, tassunga ilanngullugit ilitsersorneqartup nammineq piginnaasani pillugit qisuariarnissaa aammalu ilinniakkamik inuussutissarsiummullu toqqaanermut tunngatillugu periarfissat qulakkeerlugit.

 

  § 16.  Ilitsersuisarnermi neqeroorutit ataasiakkaat ataqatigiissarneqassapput, taamaalilluni ilitsersuisarnermi ingerlatat imminnut atassallutik, tassani tamat ilitsersorneqarnissamik pisariaqartitaat annertunerpaamik qulakkeerneqassallutik.

 

  § 17.  Ilitsersuisarneq immikkoortut ilinniarfiillu soqutigissaannut atatinneqassanngilaq.

 

Kapitali 4

Ilitsersuisarnermi suliassat

 

Tamanut tunngasut

 

  § 18.  Ilitsersuisarnermi suliassat Inatsisartut inatsisaat una naapertorlugu tassaapput:

1)  Kalaallit Nunaanni ilinniagaqarnissamut periarfissat pillugit ilitsersuisarneq,

2)  Kalaallit Nunaata avataani tamatumanilu aamma Danmark-imi ilinniagaqarnissamut periarfissat pillugit ilitsersuisarneq,

3)  Suliffissat aamma suliffinni qaffakkiartorsinnaanermut periarfissat pillugit ilitsersuisarneq,

4)  aningaasaqarnermut tunngasutigut, tamatumanilu aamma ilinniagaqarnersiuteqarnermut tunngasutigut siunnersuisarneq, aamma qinnuteqarnermut atatillugu immersugassanik immersuisarnernut tunngatillugu,

5)  ineqarnermut tunngasunik ilitsersuisarneq,

6)  inummut tunngasutigut aamma tarnikkut pissutsinut tunngasutigut ikiorserneqarnissamik ilitsersuisarneq,

7)  tarnikkut inuttullu atukkanut tunngasutigut siunnersuisarneq, tamatumani aamma peqqissaasarneq ilinniagaqartunik, tak. imm. 2, aamma

8)  ilinniagaqarnermik aallartitsinermut qinnuteqarnermullu atatillugu ilinniagaqarnersiutinillu qinnuteqartarnermi periutsit pillugit ilitsersuineq.

  Imm. 2.  Imm. 1, nr. 7-imi ilinniagaqartutut paasineqassapput inuit ilinniakkamik ingerlatsisut aamma ilinniagaqartut, pikkorissaqqinnermik ingerlatsisut suliffissanut, ilitsersuisarnernut pikkorissaqqinnernullu qitiusumik ingerlatsivinni.

  Imm. 3.  Ilitsersuinermi suliassat pillugit Naalakkersuisut annertunerusunik malittarisassiorsinnaapput.

 

Inuusuttunut ilitsersuineq

 

  § 19.  Inuusuttunut 18-it tikillugit ukioqartunut ilitsersuisarneq pillugu kommunini atuarfeqarfiit, kommuninilu ilitsersuisarfiit ingerlaavartumik suleqatigiittarnissaat kommunalbestyrelsit qulakkiissavaat.

  Imm. 2.  Imm. 1 malillugu ilitsersuinermut atatillugu sumiiffinni ilitsersuisarfiit kommunini atuarfeqarfiit, meeqqat atuarfii namminersortut, efterskolit højskolillu aamma ilinnarfiit ikaarsaariarneq pillugu ilitsersuinerisa piareersarneranni ingerlatsinerannilu ikiuutissapput.

  Imm. 3.  Atuartut naammassisut pillugit meeqqat atuarfiisa iliuusissatut pilersaarutaat suliarineqarnikut assilinerannik kommunini ilitsersuisarfiit tigusaqarnissaat atortullu ilitsersuinermi atugassat pisariaqartut, tassunga ilanngullugit atuartut ataasiakkaat atuarnermik naammassinermut uppernarsaataat karakterillu pillugit paasissutissat, kommunalbestyrelsit qulakkiissavaat.

  Imm. 4.  Atuartunut atuarnermik naammassinnittunut iliuusissatut pilersaarutit meeqqat atuarfianni suliarineqartut assilinerannik ilinniarnertuunngorniarfiit, inuussutissarsiutinut ilinniarfiit imaluunniit qitiusumik ilinniarfiit tigusaqarnissaat kommunalbestyrelsit qulakkiissavaat.

  Imm. 5.  Kommunini atuarfeqarfiit kommuninilu ilitsersuisarfiit suleqatigiinnerat pillugu aamma ilinniarfiit kommuninilu ilitsersuisarfiit suleqatigiinnerat pillugu Naalakkersuisut annertunerusunik malittarisassiorsinnaapput, tassunga ilanngullugit ikaarsaariarnermi ilitsersuisarnerup piareersarnera ingerlanneralu pillugit suleqatigiinneq pillugu.

 

  § 20.  Atuarfiit ilinniarfiillu aamma kommunini ilitsersuisarfiit inuusuttunut immikkut ilitsersorneqaratik ilinniarnermik aallartitsinissamik ingerlatsinissamillu inuussutissarsiormilluunniit toqqaanissamik ajornartorsiuteqartunut ajornartorsiuteqartussanulluunniit siunnerfeqartumik ilitsersuisassapput.

  Imm. 2.  Inuusuttunut meeqqat atuarfiannit assigisaanniilluunniit atuartussaatitaanermik naammassillutik atuarunnaarsimasunut, ilinniarnermik inuussutissarsiummilluunnit aallartitsisimanngitsunut imaluunniit ilinniagaqarnermik unitsisisamasunut ujartuilluni ilitsersuisoqartassaaq.

  Imm. 3.  Inuusuttut kissaatigisaat ilitsersuinermi pitsaassusilerneqassapput, inuusuttullu nammineerlutik angerlarsimaffiillu suleqatigigalugit ilinnigassamik inuussutissarsiutissamillu toqqaasinnaalersinneqassallutik.

  Imm. 4.  Inuusuttunut 18-it inorlugit ukiulinnut ilitsersuinermi ilitsersuineq imatut aaqqissuunneqartassaaq angajoqqaatut oqartussaassuseqartut ilitsersuinermi inuusuttullu ilinniarnissamik pilersaarusiorneranni peqaatinneqarlutik.

  Imm. 5.  Ilitsersuisarnerup imarisassaa, aaqqissuunneqarnera piffissatigullu inissinneqarnera ataasiakkaat inissisimanerannut pisariaqartitaannullu naleqqussarneqartassaaq.

 

  § 21.  Kommunit ilitsersuarsarfii ilitsersuinermut atatillugu inuusuttoq 18-it inorlugit ukioqarpat meeqqallu atuarfianni naammasseriinnerup kingorna ilinniarnermik inuussutissarsiornermilluunniit allartitsisimanngippat imaluunniit inuussutissarsiornermik ilinniarnermilluunniit taamaatitsisimappat inuusuttut taakkununngalu angajoqqaatut oqartussaassuseqartut suleqatigalugit ilinniarnissamut iliuusissatut pilersaarummik suliaqassaaq.

  Imm. 2.  Ilinniarnissamut iliuusissatut pilersaarummi atuartup iliuusissatut pilersaarut meeqqap atuarfinni ilinniartitsisuni isumasioqatigalugit suliarisimasaa aallaavigineqassaaq, takuuk meeqqat atuarfiat pillugu Inatsisartut inatsisaat. Inuusuttunut meeqqat atuarfiannit iliuusissatut pilersaarusiorsimanngitsunut ilinniarnissamut pilersaarutip sapinngisamik inuusuttup taamanikkut atuarfigisimasaa peqataatillugu suliarineqarnissaa sumiiffimmi ilitsersuisarfiup qulakkiissavaa.

 

  § 22.  Ilinniarnissamut pilersaarummi inuusuttup siunissami ilinniagassatut toqqagaani anguniagassat aalajangersarneqassapput, tassunga ilanngullugit anguniakkat angunissaannut piumasaqaatit. Ilinniagassatut toqqagassatut kissaatigisap piviusunngortinneqarnissaanut tunngatillugu inuusuttup suliamik ingerlatsinermi inuttullu piginnaasaasa ineriartortinnissaat siunertaralugu ingerlatassanik aalajangersimasunik ilinniagaqarnissamut iliuusissatut pilersaarummi aamma aalajangersaasoqassaaq.

  Imm. 2.  Ilinniagaqarnissamut iliuusissatut pilersaarutip piviusunngortinnissaa pillugu aamma anguniakkat nutaat nutartikkalluunniit aalajangersarnissaa pillugu inuusuttoq 18-it ataallugit ukiulik tassungalu angajoqqaatut oqartussaasuseqartoq pisariaqartitsineq malillugu minnerpaamillu ukiumut ataasiarlutik oqaloqatiginissaat kommunit ilitsersuisarfiisa qulakkiissavaat.

  Imm. 3.  Ilinniagaqarnissamut iliuusissatut pilersaarutit pillugit malittarisassanik annertunerusunik Naalakkersuisut aalajangersaasinnaapput, tassunga ilanngullugit pilersaarutit isikkui imarisaallu aammalu nangitseqqiisarneq pillugit.

 

  § 23.  Kommunini innuttaasut inuusuttunut 18-it ataallugit ukioqartunut meeqqat atuarfianni naammassisimasunut aammalu ilinniagaqarnermik inuussutissarsiuteqarnermilluunniit aallartissimanngitsunut imaluunniit ilinniarnermik taamaatitsisimasunut angajoqqaatut oqartussaassuseqartut ilinniagassatut inuussutissarsiutitullu toqqagassat inuusuttunut neqeroorutigineqartut pillugit nalinginnaasumik ilisimatinneqarnissaat kommunini ilitsersuisarfiit isumagissavaat.

 

Kapitali 5

Aningaasalersuineq nakkutilliinerlu

 

  § 24.  Ilitsersuisarnerni suliassanut aningaasartuutit suliassanik inatsisitigut pisussaaffeqartut akilissavaat.

  Imm. 2.  Kalaallit Nunaanni Ilitsersuisarneq pillugu Siunnersuisoqatigiit ingerlatsinerannut, takuuk § 8, imm. 2, aningaasartuutit Nunap Karsiata ukiumoortumik tapiissutai atorlugit akilerneqartassapput.

 

  § 25.  Naalakkersuisut kommunalbestyrelsimut naammassisassanut isumaqatigiissuteqassapput, inatsit naapertorlugu ilitsersuisarnernik suliassanik suliaqartarneq pillugu.

  Imm. 2.  Naammassisassanut isumaqatigiissummi ilaassapput kommunimi ilitsersuisarnikkut suliani anguniagassat, tamatumunngalu aallaavittut tunngaviusussat. Taannalu aamma imaqassaaq ilitsersuisarnermi anguniagassanik tigussaasunik.

  Imm. 3.  Naalakkersuisut naammassisassatut anguniakkani naammassinnissimannginneq iliuuseqarfigisinnaavaat, kommuninut ataatsimoorussanik tapiissutini annikinnerulersitsinikkut.

 

  § 26.  Kommunalbestyrelsit, ilinniarfiit, meeqqat atuarfii namminersortut, efterskolit højskolillu inatsit manna naapertorlugu aqutsinerat Naalakkersuisut nakkutigissavaat.

  Imm. 2  Paasissutissanik inatsit naapertorlugu suliassat ingerlanneqarnissaannut pisariaqartunik kommunalbestyrelsit ilinniarfiillu Naalakkersuisut piumasaqarfigisinnaavaat.

  Imm. 3.  Inatsisartut inatsisaanni uani siunertat ilanniippata kommunalbestyrelsit ilinniarfiillu misileraanissaat Naalakkersuisut akuerisinnaavaat.

 

Kapitali 6

Atuutilersitsinermut, ikaarsaariarnermut atorunnaarsitsinermullu aalajangersakkat

 

  § 27.  Inatsit 1. januar 2014-imi atuutilersinneqarpoq. Tassunga peqatigitillugu Kalaallit Nunaanni ilinniarnermut inuutissarsiutinillu ilitsersuineq pillugu Namminersornerullutik Oqartussat nalunaarutaat nr. 5, 3. september 1982-imeersoq atorunnaarsinneqarpoq.

 

Inatsisartut inatsisaat nr. 12, 27. november 2018-meersoq (Ilinniagaqartunik tarnikkut isumaginninnikkullu siunnersuisarneq pillugu ilassut, ilitsersuisarnerup ilaatut, aamma Siunnersuisarnermut Siunnersuisoqatigiit katitsigaanerat pillugu allannguut, aamma kalaallisuuani iluarsiissutit § 11, imm. 2, § 12, imm. 1, § 12, imm. 2, oqaaseqatigiit aappaat, aamma § 25 inatsisip kalaallisut oqaaseqaataani.)^[1] atuutilernissaanik aalajangersakkanik makkuninnga imaqarpoq:

 

§ 2

 

Inatsisartut inatsisaat atuutilissaaq 1. januar 2019.

 

Inatsisartut inatsisaat nr. 18., 1. december 2018-meersoq (Nuna tamakkerlugu ilitsersuisarnermi iliuusissanik periusissiornerup ilanngunneqarnera aamma naammassinninnissamut ikaarsaariarnissamullu siunnersuinermut piumasaqaatip ikkunneqarnera)^[2] atuutilernissaanik aalajangersakkanik makkuninnga imaqarpoq:

 

§ 2

 

Inatsisartut inatsisaat atuulissaaq 1. januar 2022.

  Imm. 2.  Inatsisartut inatsisaanni § 1, nr. 2-mi § 10, imm. 4, 1. januar 2022 sioqqullugu ilitsersuisarnermik suliaqartutut taaneqartuni inunnut atorfeqartunut atorneqassanngilaq.

 

Isumaginninnermut, Suliffeqarnermut Nunamullu Namminermut Naalakkersuisoqarfik, ulloq 26. april 2025

 

 

Aka Grønvold (atsior.)

Naalakkersuisoqarfimmi pisortaagallartoq

 

 

/ Mehdi Shams (atsior.)