Matumuuna Piginnaanngorsaaqqinnissamut ikiorsiisarneq pillugu Inatsisartut peqqussutaat, allannguutit Inatsisartut peqqussutaanni nr. 3, 1. juni 2006-meersut aamma Inatsisartut inatsisaanni nr. 10, 1. juni 2017-meersut ilanngullugit nalunaarutigineqarpoq.

Suliassaqartitsiniarnermik inunnillu isumaginninnermik Kalaallit Nunaannut inatsit nr. 580, 29. november 1978-imeersoq naapertorlugu matumuuna piginnaanngorsaaqqinnissamut ikiorsiisarneq pillugu makku aalajangersarneqarput:

Siunertaq

  § 1.  Piginnaanngorsaaqqinnerup siunertaraa inuup sulisinnaassusilittut ukioqartup killilimmilli sulisinnaassuseqalersimasup suliinnarnissaanut sulilernissaanulluunniit ikiuinissaq, taamaaliornikkut pineqartup imminut ilaquttaminullu pilersuisinnaassusia pitsaanerulersinniarlugu.

Inuit pineqartut

  § 2.  Piginnaanngorsaaqqinnissamut ikiorserneqartassapput inuit peqqissutsimut tunngasut, inuttut atugarisanut tunngasut, tamatumani ilanngullugit sivisuumik suliffissaarusimaneq, sumiiffimmi pissutsinut tunngatillugu inuttut ilaqutariittulluunniit artorsaateqarnerit pissutigalugit imaaliallaannarlugit sulilernissamut naleqqussarneqarsinnaanngitsut imaluunniit naleqqussaqqinneqarsinnaanngitsut. Inuk ikiorserneqarsinnaatitaasoq taaneqartarpoq piginnaanngorsaqqittussaq.

  Imm. 2.  Piginnaanngorsaqqinnissamut qinnuteqartup pisussaaffigaa inuttut atugarisanut tunngasut peqqissutsimullu tunngasut qulaajarneqarnissaat peqataaffigissallugu piginnaanngorsaaqqinnissallu aallartinnissaanut aalajangiinissamut paasissutissanik pingaaruteqartunik tunniussinissaq tamakkiisumik pisussaaffigalugu.

  § 3.  Inuk piginnaanngorsaqqinneqarnissamut patsisissaatitaasunik naammassinnissimanersoq kommunip aalajangiiffigissassaraa.

Qulaajaanermik ingerlatsineq aamma piginnaanngorsaaqqinneq

  § 4.  Piginnaanngorsaaqqinnissamik ingerlassaq aallartinneqartinnagu qinnuteqartoq qulaajaanermik ingerlassaqassaaq, tassani qinnuteqartup sulisinnaassusia qulaajarneqassalluni.

  Imm. 2.  Qulaajaaniarluni ingerlassaq tassaavoq atuagarsornermik assassornermillu immikkoortortalik, qinnuteqartup tarnikkut timikkullu sulisinnaassusia qulaajarneqarluni.

  Imm. 3.  Qulaajaaniarluni ingerlassap nalaani qinnuteqartoq pisortanit manna tikillugu pilersugarisatut tunngavigisaminik pisinnaatitaavoq.

  Imm. 4.  Qulaajaaniarluni ingerlassat pillugit Naalakkersuisut malittarisassanik erseqqinnerusunik aalajangersaasinnaapput.

  § 5.  Piginnaanngorsaaqqinneq tassaavoq suliniutit inuussutissarsiornermut sammisut piginnaanngorsaqqittussap suliinnarnissaanut sulilernissaanulluunniit ikiuutaasinnaasut.

  § 6.  Piginnaanngorsaaqqinnermi suliniutit makkua ilaat ataaseq arlallilluunniit sammineqarsinnaapput:

1)  Sulilluni misiliineq pisortat imaluunnit namminersortut suliffeqarnini ingerlanneqartoq.

2)  Suliniutit inuussutissarsiornermut piorsaataasut imaluunniit qulaajaasut, matumani suliniutit taamaattut pisortat imaluunniit namminersortut suliffeqarnini ingerlanneqartut ilanngullugit.

3)  Suliffeqarfimmi piginnaanngorsaaqqinneq pisortat imaluunniit namminersortut suliffeqarfiini sungiusarnertigut pikkorissarnertigulluunniit.

4)  Ilinniagaqarneq, taassumalu ataani allamik ilinniagaqarsinnaaneq.

Suliffeqarfimmi piginnaanngorsaaqqinneq

  § 7.  Piginnaanngorsaqqittussat namminersortut pisortalluunniit suliffiini aningaasarsiaqartinneqarlutik sungiusaqqinnissamik imaluunniit ilinniagaqarnissamik neqeroorfigineqarsinnaapput.

  § 8.  Sulisitsisup akilissavaa atorfinitsitsinermi piginnaanngorsaqqittussap akissaatitigut isumaqatigiissutit naapertorlugit akissarsiaqartinnissaa imaluunniit taamatut suliaqarnermi akissaasersuinissamut naapertuuttumik akissaateqartitsilluni. Ilinniartut pineqartillugit ilinniartunut akissaatit nalinginnaasut malillugit akissaateqartitsisoqassaaq.

  § 9.  § 8 naapertorlugu kommunip sulisitsisoq akissarsiatigut tapiissuteqarfigissavaa.

  Imm. 2.  Akissarsianut tapiissutit pillugit patsisissaatitaasut ersarinnerusut Naalakkersuisut aalajangersassavaat.

Piginnaanngorsaaqqinnissamut piffissaliussaq

  § 10.  Kommunip piginnaanngorsaaqqinneq aaqqissuutissavaa sapinngisamik sivikinnerpaamik sivisussusilerlugu. Piginnaanngorsaaqqinneq aallaaviatigut ukiut marluk sinnerlugit ingerlanneqarsinnaanngilaq, tamaattoq takuuk imm. 2.

  Imm. 2.  Kommuni piffissamik piginnaanngorsaqqittup piginnaanngorsaaqqinnermut ikiorsiissutisisinnaaffianik sivitsuisinnaavoq,

1)  piffissaq piginnaanngorsaaqqiffiusoq timikkut tarnikkulluunniit piginnaasakillisimaneq pissutigalugu ukiut marluk ingerlaneranni naammassineqarsinnaanngippat imaluunniit pissutsit immikkut ittut taammaaliornissamut pissutaappata, imaluunniit

2)  napparsimanermik, qitornanik napparsimasunik imaluunniit qitornanik timikkut tarnikkulluunniit piginnaasakillisimasunik paarsinermik, erninermi sulinngiffeqarnermik imaluunniit inuttut atugarisanik immikkut ittunik pissuteqartumik piginnaanngorsaaqqinnerup kinguarsarneqarnera pissutigalugu piginnaanngorsaqqittup ukiut marluk iluanni piginnaanngorsaaqqinneq naammassisinnaanngippagu.

Piginnaanngorsaaqqinnermut pilersaarut

  § 11.  Piginnaanngorsaqqittussaq suleqatigalugu kommunip piginnaanngorsaaqqinnissamut pilersaarut suliarissavaa, piginnaanngorsaqqittussap piginnaasaanut pisariaqartitaanullu naleqqussarlugu aammalu nammineq siunissami suliarisassatut kissaatigisai naapertorlugit.

  Imm. 2.  Piginnaanngorsaaqqinnermut pilersaarummi nalunaarneqassapput anguniakkat, piffissalersuinerit qanorlu imaqassanersoq aammalu piviusorsiortumik isiginiarneqassallutik piginnaanngorsaqqittussap killissinnaasai, piginnaasai soqutigisaalu kiisalu ilinniarfissamut suliffissamullu periarfissat isiginiarneqassallutik.

  Imm. 3.  Suliffeqarfimmi piginnaanngorsaaqqinnermi pilersaarummut ilaatinneqassaaq suliffeqarfimmi piginnaanngorsaaqqinnerup ingerlanerani suliffeqarfik qanorpiaq peqataassanersoq kiisalu kommuni suliffimmut qanoq ikiuutissanersoq.

  § 12.  Piginnaanngorsaaqqinnermut pilersaarut pillugu, suut piginnaanngorsaaqqinnermut pilersaarutip piviusunngortinnissaanut patsisissaatitaassanersut allannguutaasinnaasullu ilanngullugit Naalakkersuisut aalajangersassavaat.

Piginnaanngorsaaqqinnermi aningaasatigut ikiuutit

  § 13.  Piginnaanngorsaaqqinnissaq piginnaanngorsaaqqinnissamut pilersaarut naapertorlugu aallartinneqarpat kommuni piginnaanngorsaqqittussamut piginnaanngorsaaqqinnermi ikiorsiissutinik tunniussissaaq. Piginnaanngorsaaqqinnermi ikiorsiissutit aatsaat tunniunneqartassapput piginnaanngorsaqqittussap pilersaarut suleqataaffigippagu.

  Imm. 2.  Piginnaanngorsaaqqinnerup nalaani immikkut tapiissutinik tunniussisoqarsinnaavoq ataasiaannarluni aningaasartuutissanut pisariaqartunut.

  Imm. 3.  Piginnaanngorsaqqittussaq piginnaanngorsaaqqinnermi ikiorsiissutinik pisinnaatitaavoq aapparisap isertitai pigisaalu apeqqutaatinnagit.

  § 14.  Piginnaanngorsaaqqinnermi ikiorsiissutit annertussusissaat iluarsiivigineqartarnissaallu kiisalu piginnaanngorsaaqqinnermut ikiorsiissutisinissamut unitsitsinissamullu patsisissaatitaasut Naalakkersuisut aalajangersassavaat.

Eqaannerusumik suliffeqarneq

  § 15.  Atugassarititani nalinginnaasuni qulaajaaniarluni ingerlassap nalaani, imaluunniit piginnaanngorsaanermik suliaqarnerup kingornatigut pineqartoq suliffimmik pissarsinissamik imaluunniit attassinissamik angusaqarsinnaanngitsoq paasineqarpat inuk eqaannerusumik suliffeqalersillugu atorfinitsinneqarsinnaavoq.

  Imm. 2.  Atugassarititani pissusissamisoortuni suliffeqareersimalluni inuup sulisinnaassutsimi ilaanik tassanngaannartumik annaasaqartoq sulisitsisoq peqatigalugu sioqqutsisumik piginnaanngorsaaqqinneq ingerlateqqaarnagu sulisitsisumi tassani eqaannerusumik suliffeqarnissamut qinnuteqarsinnaavoq.

  Imm. 3.  Inuit eqaannerusumik suliffeqartuusut minnerpaamik ukiut pingasukkaarlugit sulisinnaassusertik nalilerseqqittassavaat, taamaattorli takuuk imm. 4.

  Imm. 4.  Inuit 40-t sinnerlugit ukiullit, imaluunniit inuit nakorsamit nalunaarutikkut sulisinnaassusiat inaarutaasumik aalajangiiffiusimasut sulisinnaassusertik nalilerseqqissanngilaat.

  § 16.  Eqaannerusumik suliffimmi sulisumut sulisitsisoq akissaasersuissaaq sulinermut naapertuuttumik. Kommuni sulisitsisumut toqqaannartumik akissarsianut tapiissuteqassaaq.

  Imm. 2.  Tapiissutit suliffimmi pineqartumi isumaqatigiissutit malillugit akissarsiat imaluunniit taamatut sulinermi akissarsiaritinneqartut 50 %-ii sinnernagit annertussusilerneqartassapput.

  Imm. 3.  Aningaasarsianut tapiissutit ukiut tallimat tikillugit tapiissutigineqartarput.

  Imm. 4.  Inunnut 40-t sinnerlugit ukiulinnut atajuartumik sulisinnaassusiat annikillimasunut, takuuk § 15, imm. 4, aningaasarsianut tapiissutit atajuartunngortinneqarsinnaapput.

  § 17.  Eqaannerusumik suliffeqalernissamut aningaasarsianullu tapiissuteqartarneq pillugit malittarisassat Naalakkersuisut aalajangersassavaat.

Allaffissornikkut aqutsineq

§ 18.  Taamatut aaqqissuussinermut aqutsineq kommunip akisussaaffigissavaa.

  Imm. 2.  Kommunip aqutsinerminut atatillugu peqqussut manna naapertorlugu piginnaanngorsaaqqinneq pillugu Naalakkersuisunut kisitsisitigut paasissutissiinissaq isumagissavaa.

Aningaasalersuineq

  § 19.  Peqqussummi § 13 malillugu piginnaanngorsaaqqinnermut ikiorsiissummut aamma aningaasarsianut tapiissuteqartarneq pillugu §§ 9 aamma 16 naapertorlugit aningaasartuutit aningaasanut inatsimmi aalajangersarneqassapput.

  Imm. 2.  Aningaasartuutinik matussusiisarneq, naatsorsuutinik saqqummiussineq, kukkunersiuineq nakkutilliinerlu pillugit malittarisassat Naalakkersuisunit aalajangersarneqassapput.

Naammagittaalliorsinnaaneq

  § 20.  Isumaginnittoqarfiup aqunneqarnera aaqqissuussaaneralu pillugit lnatsisartut peqqussutaanni §§ 3-mi, 10-mi aamma 15-mi kiisalu § 13, imm. 2-mi aalajangersakkat naapertorlugit kommunip aalajangiineri maalaarutigineqarsinnaapput.

  Imm. 2.  Peqqussummi matumani aalajangersakkat allat malillugit kommunip aalajangigai aqutsinikkut oqartussanut allanut naammagittaalliuutigineqarsinnaanngillat.

Atortuulersitsineq

  § 21.  Inatsisartut peqqussutaat manna atortuulerpoq 1. januar 2002 aallarnerfigalugu.

Inatsisartut peqqussutaat nr. 3, 1. juni 2006-eersoq (Piginnaanngorsaqqittussap periarfissai annertusarneqarput, piginnaanngorsartunut tamanut sungiusarnermut ilinniagaqarnermullu periarfissat annertusineqarput kiisalu piginnaanngorsarnermut piffissarititaq ukiunut marlunnut sivikillineqarluni)^[1] atuutilernissaanik aalajangersakkanik makkuninnga imaqarpoq:

§ 2

Inatsisartut peqqussutaat manna atuutilerpoq ulloq 1. juli 2006.

Inatsisartut inatsisaat nr. 10, 1. juni 2017-meersoq (Qulaajaaniarluni ingerlassaq, eqaannerusumik suliffeqarneq, aamma aningaasarsianut tapiissutit)^[2] atuutilernissaanik aalajangersakkanik makkuninnga imaqarpoq:

§ 2

Inatsisartut inatsisaat 1. juli 2017-imi atuutilerpoq.

Isumaginninnermut, Ilaqutariinnut, Suliffeqarnermut Nunamullu Namminermut

Naalakkersuisoqarfik, ulloq 24. februar 2025

Martha Abelsen (atsior.)

Departementschef

/ Mehdi Shams (atsior.)

[1] Inatsimmi allannguutit § 4, imm. 1, § 4, imm. 3, § 6, imm.1, nr. 4, § 7, § 10 imm. 1, § 10 imm. 2. nr. 1, § 10 imm. 2, nr. 2 aamma § 16, imm. 3.

[2] Inatsimmi allannguutit § 4 sioqqullugu qulequtaq, § 4, § 15, § 16, imm. 3 aamma § 16, imm. 4.