Kommunit Namminersorlutillu Oqartussat missingersuutaat naatsorsuutaallu pillugit Inatsisartut inatsisaanni nr. 26, 28. Novemberi 2016-meersoq § 13, imm. 3 aamma Kommunit Namminersorlutillu Oqartussat missingersuutaat naatsorsuutaallu pillugit Inatsisartut inatsisaata allanngortinneqarnisaa pillugu Inatsisartut inatsisaat nr. 63, 20. Novemberi 2023-meersoq § 20, imm. 6 aamma Pilersaarusiorneq aamma nunaminertat atorneqartarnerat pillugit Inatsisartut inatsisissaannik nalunaarut nr. 4, 25. Januaari 2024-meersoq § 5, imm. 5 naapertorlugu aalajangersarneqarpoq:

Kapitali 1

Immikkoortunut pilersaarutit

  § 1. Nalunaarummi uani paasineqassapput:

1) Immikkoortumut pilersaarut: Periusissianik saqqummiussineq ataqatigiissoq, tassa politikit, pilersaarutit, suliniutit sukumiisut il.il., immikkoortup ataatsip iluaniittut.

2) Immikkoortumut pilersaarummut nassuiaat: Pingaarnertut nassuiaat paasissutissanik erseqqinnerusunik aalajangersakkanik imaqartoq, tak. ilanngussaq 3.

3) Immikkoortoq: Ataqatigiissumik allaffissornermi aningaasaqarnermiluunniit immikkoortumi, kommunit Namminersorlutilluunniit Oqartussat maleruagassiornerat, aqutsinerat, tapiissutaat il.il., immikkoortumut taassumalu ineriartorneranut immikkut pingaaruteqartuni.

  § 2.  Kommunalbestyrelsit Naalakkersuisullu siunissami akunnattumik sivisussuilimmut (ukiut qulit) kommunip namminersorlutillu oqartussat pilersaarusiornerannut, pingaarnersiuinerannut missingersuusiornerannullu tunngavissatut immikkoortumut pilersaarutinik suliaqarlutillu nutarterisarput.   

  Imm. 2. Immikkoortumut pilersaarut, immikkoortup ineriartorneranut pingaarnertut takorluugaq tunuliaqutaralugu oqaasertalerneqassaaq.

  Imm. 3. Immikkoortumut pilersaarut pilersaarutip sunniutissaatut ilimagineqartunik pingaarnertut nassuiaammik imaqassaaq kiisalu pilersaarummi suliniutissatut allanneqartut qanoq malineqarsinnaanerannik imaqassalluni. Tassani suliniutip aningaasatigut silallu pissusaanut sunniutissaata uuttornissaat aamma ilaavoq.

§ 3.  Naalakkersuisut minnerpaamik immikkoortunut ilanngussaq 1-mi allattorsimasunut immikkoortunut pilersaarutinik suliaqassapput. Immikkoortuni taaneqartuni immikkoortunik pilersaaruteqartoqartinnagu, nalunaarutip atuutilerneranit ukiut pingasut qaangiutsinnagit taamaattoq suliarineqassaaq.

  Imm. 2.  Namminersorlutik Oqartussat immikkoortunut pilersaarutaat sanaartukkanik, illorsuarnik, illuutinik nunaminertanilluunniit atuinernik pilersitsinissanik atorunnaarsitsinissanilluunniit kissaatinik malitseqassappata, pisortatut oqartussaasut attuumassuteqartut akuliutsinneqassapput, tassani immikkoortunik pilersaarutinik suliaqarnerni kommunini oqartussaasut ilanngullugit.

  § 4.  Kommunalbestyrelsit minnerpaamik immikkoortunut ilanngussaq 2-mi allassimasunik immikkoortunut pilersaarusiortassapput. Immikkoortunut ilanngussami taaneqartunut immikkoortunut pilersaaruteqanngippat, nalunaarutip atuutilerneranit ukiut pingasut qaangiutsinnagit taamaattumik suliaqartoqassaaq.

  Imm. 2. Immikkoortumut pilersaarut maleruagassanik atuuttunik imaluunniit namminersorlutik oqartussat immikkoortunut pilersaarutaanni, namminersorlutik oqartussat aningasalersuinermut ilapittuutaannik imaluunniit allanit avataaneersunit suleqatinit allannguinissamik tunngavissaqartitsippat, immikkoortunut pilersaarutinik suliaqarnermi pisortatut oqartussaasut attuumassuteqartut akuliutsinneqassapput.

  Imm. 3. Kommunalbestyrelsit immikkoortunut pilersaarusiornerat kommunimut pilersaarutip pingaarnerup ilaatut imaluunniit kommunini namminerisamik immikkoortunut pilersaarutit ilaattut tamanna pisinnaavoq.

  § 5.  Immikkoortumut pilersaarut pilersaarutip ilaata pingaarutillit eqikkarneqarneranik imaqassaaq (immikkoortumut pilersaarummut nassuiaat).

  Imm. 2.  Immikkoortumut pilersaarummut nassuiaat minnerpaamik ilanngussaq 3-mi paasissutissatut taaneqartunik imaqassaaq.

  § 6.  Immikkoortunut pilersaarutit immikkoortunullu pilersaarummut nassuiaatit sivikinnerpaamik sapaatip akunnerinik 8-nik sivisussusilimmik tamanut tusarniutigineqarta ssapput, Naalakkersuisullu immikkoortunut pilersaarutaat immikkoortumullu pilersaarutinut nassuiaataat tusarniaanerup kingorna Naalakkersuisunut akuerineqartussanngorlugit saqqummiunneqartassapput, kommunalbestyrelsillu immikkoortunut pilersaarutaat immikkoortumullu pilersaarutinut nassuiaataat tusarniaanerup kingorna akuerineqartussanngorlugit saqqummiunneqartassapput.

  Imm. 2.  Immikkoortoq 1-mi oqaatigineqartutut akuersissut immikkoortumut pilersaarutip immikkoortumullu pilersaarummut nassuiaatip imarisaanik periusissianik tunngaviusumik tapersiinermik oqaatiginnittuuvoq, taamaattoq aningaasaliissutitut allatulluunniit sukumiisumik aalajangikkatut iluseqarnani.

  § 7.  Immikkoortumut pilersaarummut akisussaasoq immikkoortumik pilersaarummik immikkoortumullu pilersaarummut nassuiaammik naalakkersuisoqarfimmut sanaartorfissanut pilersaarusiornermut akisussaasumut, akuersinerup kingorna kingusinnerpaamik sapaatip akuerisa arfineq pingasut qaangiunneranni tamanut saqqummiussinissaq siunertaralugu tunniunneqartassapput

  Imm. 2. Immikkoortumut pilersaarutit immikkoortumullu pilersaarummut nassuiaatit nutartikkat portalimi akuerisami tamanut saqqummiunneqartassapput.

  Imm. 3.  Aningaasaqarnermut Naalakkersuisoqarfik portalimi tamanut saqqummiunneqartut oqaasertat, paasissutissat titartakkat il.il. ilusaannut malitassianik  erseqqinnerusunik aalajangersaasinnaavoq.

Kapitali 2

Malitseqartitsineq

  § 8.  Minnerpaamik ukiut qulikkaarlugit immikkoortunut pilersaarutinik nutartikkanik suliaqartoqartassaaq, imaluunniit suliami, sanaartukkani, aningaasaqarnikkut il.il. immikkoortumut pilersaarummi aalajangersimasumi tunngavissat pingaarutilimmik allanngorsimagaangata.

  Imm. 2.  Immikkoortumut pilersaarummi nutaami immikkoortumi pilersaarutip siuliani piffissap ingerlanerani sunniutissatut ilimagineqartut suut naammassineqarsimanerat, suullu naammassineqarsimannginnerat allassimassaaq.

Kapitali 3

Atuutilerfia

  § 9.  Nalunaarusiaq una ulloq 1. juli 2025 atuutilerpoq.

Kalaallit Nunaanni Namminersorlutik Oqartussat, ulloq 6. Juni 2025

Múte B. Egede (atsior.)

Aningaasaqarnermut akileraartarnermullu Naalakkersuisoq

/Nikolai S. Christensen (atsior.)