Nunalerinermik inuussutissarsiuteqarnermut siuarsaaneq pillugu Namminersorlutik Oqartussat nalunaarutaanni nr. 28-mi, 23. maj 2024-meersumi § 2, imm. 2 aamma § 8, imm. 1, nr. 1 aamma 3 aamma imm. 2, nr. 2 naapertorlugit aalajangersarneqarpoq:

 

Kapitali 1

Inuussutissarsiutinik siuarsaanerit ilaannut aalajangersakkat immikkut ittut

 

Illut inuussutissarsiorfiusut

 

  § 1.  Naalakkersuisut illunik inuussutissarsiorfiusunik sananermut, alliliinermut tigusinermulluunniit inuussutissarsiutinik siuarsaanermut tapiissuteqarsinnaapput.

  Imm. 2.  Imm. 1 naapertorlugu inuussutissarsiutinik siuarsaanermi atortunut, nassiussinermut aningaasartuutinut, sanasunik ikiorteqarnermut aamma teknikkikkut siunnersorneqarnermut, illuni inuussutissarsiorfiusuni atorneqartussanut aningaasartuutissatut naatsorsuutigineqartunut imaluunniit aningaasartuutinut uppernarsarneqarsimasunut tunniussisoqartassaaq, imatut agguaaneq malinneqassalluni:

1)  Taarsigassarsiat erniaqanngitsut akilersugassaanngitsullu: 95%-it.

2)  Nammineerluni aningaasaliissut: 5 %-it.

  Imm. 3.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut 25-nut aalajangerneqassaaq.

 

Nammineerluni illuliat aamma illut inissiisarfiit

 

  § 2.  Naalakkersuisut nammineerluni illulianik najugaqarfissanik sananermut tigusinermulluunniit, imaluunniit illunik sulisunut inissiisarfissanik tigusinermut inuussutissarsiutinik siuarsaanermut tapiissuteqarsinnaapput.

  Imm. 2.  Taamaallaat nammineerluni illulianut, nunaleriffeqarfinni sananeqartunut inuussutissarsiutinik siuarsaanermut tapiisoqarsinnaavoq.

  Imm. 3.  Imm. 1 naapertorlugu inuussutissarsiutinik siuarsaanermi atortunut, nassiussinermut aningaasartuutinut, sanasunik ikiorteqarnermut aamma teknikkikkut siunnersorneqarnermut, nammineerluni illuliamut imaluunniit inissiisarfimmut atorneqartussanut aningaasartuutissatut naatsorsuutigineqartunut imaluunniit aningaasartuutinut uppernarsarneqarsimasunut tunniussisoqartassaaq, imatut agguaaneq malinneqassalluni:

1)  Taarsigassarsiat erniallit: 20 %-it.

2)  Taarsigassarsiat erniaqanngitsut akilersugassaanngitsullu: 75 %-it.

3)  Nammineerluni aningaasaliissut: 5 %-it.

  Imm. 4.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut 25-nut aalajangerneqassaaq.

 

Nukissiutinut ataavartunut innaallagissiorfiit

 

  § 3.  Naalakkersuisut sanaartukkanik, ataavartumik nukissiornermut atugassanik inuussutissarsiutinik siuarsaanermut aningaasaliisinnaapput, taakkununngalu erngup nukinganik innaallagissiorfeeqqat aamma seqernup qinngorneranik innaallagissiorfiit ilaatinneqarput.

  Imm. 2.  Imm. 1 naapertorlugu inuussutissarsiutinik siuarsaanermi atortunut, nassiussinermut aningaasartuutinut, sanasunik ikiorteqarnermut aamma teknikkikkut siunnersorneqarnermut, sanaartukkamut atorneqartussanut aningaasartuutissatut naatsorsuutigineqartunut imaluunniit aningaasartuutinut uppernarsarneqarsimasunut tunniussisoqartassaaq, imatut agguaaneq malinneqassalluni:

1)  Taarsigassarsiat erniallit: 40 %-it.

2)  Taarsigassarsiat erniaqanngitsut akilersugassaanngitsullu: 50 %-it.

3)  Nammineerluni aningaasaliissut: 10 %-it.

  Imm. 3.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut 25-nut aalajangerneqassaaq.

 

Maskiinat sanaartukkallu allat

 

  § 4.  Naalakkersuisut inuussutissarsiutinik siuarsaanermi ukuninnga pisinermut, sananermut tigusinermulluunniit tunniussisinnaapput:

1)  Maskiinat, sakkut, ungalut kiisalu ingerlatsinermi atortut pisariaqartut allat.

2)  Innaallagissiornermut atortunik sananeq pisinerluunniit.

3)  Suliamik ingerlatsinermut atatillugu angallammik ATV-milluunniit, inunnik inuussutissarsiornermilu assartuinermut atugassamik pisineq.

  Imm. 2.  Imm. 1 naapertorlugu inuussutissarsiutinik siuarsaanermi atortunut, nassiussinermut aningaasartuutinut, sanasunik ikiorteqarnermut aamma teknikkikkut siunnersorneqarnermut aningaasartuutissatut naatsorsuutigineqartunut imaluunniit aningaasartuutinut uppernarsarneqarsimasunut tunniussisoqartassaaq, imatut agguaaneq malinneqassalluni:

1)  Taarsigassarsiat erniallit: 90 %-it.

2)  Nammineerluni aningaasaliissut: 10 %-it.

  Stk. 3.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut qulinut aalajangerneqassaaq.

 

§ 5.  Naalakkersuisut nersutit inaanniit naggorissaatissanik siaruarterissummik aamma imermik milluaammik pisinissamut inuussutissarsiutinik siuarsaanermut tunniussisinnaapput.

  Imm. 2.  Imm. 1 naapertorlugu inuussutissarsiutinik siuarsaanermi pisinissamut aningaasartuutissatut naatsorsuutigisanut akileriikkanulluunniit uppernarsarneqarsimasunut inuussutissarsiutinik siuarsaanermi taarsigassarsititsisoqarsinnaavoq, taakkununngalu atortut, assartuussinermut aningaasartuutit, sanasunik ikiorteqarnerit teknikkikkullu siunnersorneqarnerit ilaatinneqarput, imatut agguarneqarlutik:

1)  Taarsigassarsiat erniallit: 50 %.

2)  Taarsigassarsiat erniaqanngitsut akilersugassaanngitsullu: 40 %.

3)  Nammineerluni aningaasaliissut: 10 %.

  Imm. 3.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut qulinut aalajangerneqassaaq.

 

Iluarsaassinerit

 

  § 6.  Naalakkersuisut illuni inuussutissarsiorfiusuni, nammineerluni illuliani, illuni inissiisarfinni aamma nukissiutini ataavartuni iluarsaassinernut inuussutissarsiornermi siuarsaanermut tunniussisinnaapput, iluarsaassineq nunaleriffiup ingerlaannarnissaanut, imaluunniit pigisaq nalilik iluarsaanneqanngikkuni siunertamut atorsinnaajunnaarnissaanut annertuumik sunniuteqassappat.

  Imm. 2. Imm. 1 naapertorlugu inuussutissarsiutinik siuarsaanermi atortunut, nassiussinermut aningaasartuutinut, sanasunik ikiorteqarnermut aamma teknikkikkut siunnersorneqarnermut, iluarsaassinernut atorneqartussanut aningaasartuutissatut naatsorsuutigineqartunut imaluunniit aningaasartuutinut uppernarsarneqarsimasunut tunniussisoqartassaaq, imatut agguaaneq malinneqassalluni:

1)  Taarsigassarsiat erniallit: 15 %-it.

2)  Taarsigassarsiat erniaqanngitsut akilersugassaanngitsullu: 75 %-it.

3)  Nammineerluni aningaasaliissut: 10 %-it.

  Imm. 3.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut 25-nut aalajangerneqassaaq.

 

  § 7.  Naalakkersuisut maskiinanik atortunillu allanik iluarsaassinernut inuussutissarsiutinik siuarsaanermut tunniussisinnaapput, iluarsaassineq nunaleriffiup ingerlanneqarnerani suliaanilu iluarsaassisoqartinnagu siunertaasumut naleqqukkunnaarnissaanut annertuumik isumaqartutut naliliiffigineqarpat.

  Imm. 2.  Imm. 1 naapertorlugu inuussutissarsiutinik siuarsaanermi atortunut, nassiussinermut aningaasartuutinut, sanasunik ikiorteqarnermut aamma teknikkikkut siunnersorneqarnermut, iluarsaassinernut atorneqartussanut aningaasartuutissatut naatsorsuutigineqartunut imaluunniit aningaasartuutinut uppernarsarneqarsimasunut tunniussisoqartassaaq, imatut agguaaneq malinneqassalluni:

1)  Taarsigassarsiat erniallit: 90 %-it.

3)  Nammineerluni aningaasaliissut: 10 %-it.

  Imm. 3.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut qulinut aalajangerneqassaaq.

 

Nersutit erniortitat nersutaateqarnerlu

 

  § 8.  Naalakkersuisut nersutinik erniortitassanik nersutaatinillu pisinissamut inuussutissarsiutinik siuarsaanermut tunniussisinnaapput, imatut pisoqartillugu:

1)  pisinermi nersutaatit tamarmiusut ikinnerpaamik 20 %-inik amerlineqangaatsiarpata,

2)  nersutit erniortitat nersutaatillu pigineqareersut napparsimaneq, silap pissusiani pissutsit assigisaalluunniit peqqutigalugit annaasaqangaatsiarnerup kingunerisaanik pisinissaq pisariaqalersimappat,

3)  siornatigut nunaleriffiusimasumi nunalerinermik ingerlatsinermik aallartitseqqittoqarpat,

4)  nunalerivimmik nutaamik aallartitsisoqarpat

5)  nunami uumasunik nujuartanik, nunalerinermi atorneqartussanik pisinermi nunnigussinermilu, imaluunniit

6)  Naalakkersuisut inassuteqaataat nunalerinermullu politikki naapertorlugu nersutaatinik amerlisitsinermi.

  Imm. 2.  Imm. 1 naapertorlugu inuussutissarsiutinik siuarsaanermut taarsigassarsiat tunniunneqassapput, imatut agguarneqassallutik:

1)  Taarsigassarsiat erniallit: 90 %-it.

2)  Nammineerluni aningaasaliissut: 10 %-it.

  Imm. 3.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut qulinut aalajangerneqassaaq.

 

  § 9. Naalakkersuisut inuussutissanik siuarsaanermi nunalerisunut, ingerlatanik nutaanik aallartitsisunut, imaluunniit ingerlatanik pioreersunik tigusisunut nersutinik pisinissamut tunniussisinnaapput.

  Imm. 2.  Inuussutissarsiutinik siuarsaanermi imm. 1 naapertorlugu inuussutissarsiutinik siuarsaanermut taarsigassarsianik imatut agguarneqartunik tunniussisoqarsinnaavoq:

1)  Taarsigassarsiat erniallit: 65 %.

2)  Taarsigassarsiat erniaqanngitsut akilersugassaanngitsullu: 30 %.

3)  Nammineerluni aningaasaliissut: 5 %.

  Imm. 3.  Inuussutissarsiutinik siuarsaanermi imm. 1 naapertorlugu qinnuteqaat ingerlatamik aallartitsinermiit imaluunniit pioreersumik tigusinermiit ukiut marluk qaangiutsinnagit saqqummiunneqassaaq.

  Imm. 4.  Inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut qulinut aalajangerneqassaaq.

 

Ingerlatsinermut taarsigassarsiat

 

  § 10.  Naalakkersuisut nerukkaatissanut, naatitassanut, naggorissaatissanut assigisaannulluunniit aningaasartuutinut uppernarsarneqarsimasunut inuussutissarsiutinik siuarsaanermut taarsigassarsititsinikkut inuussutissarsiutinik siuarsaanermut tunniussisinnaapput. Ingerlatsinermut taarsigassarsiat aamma annikitsunik pisinermut aserfallatsaaliugassanullu annikitsunut uppernarsarneqarsinnaasunut atorneqarsinnaapput.

  Imm. 2.  Naalakkersuisut pisuni immikkut ittuni, imm. 1-imi taaneqartut saniatigut siunertanut allanut ingerlatsinermut taarsigassarsititsisinnaapput, tamatumunnga aningaasartutit nunalerinerup ingerlanneqarneranut attuumassuteqarpata, aningaasartuutillu taakku tassanngaannaq pisut kinguartinneqarsinnaanngitsullu peqqutigalugit akilerneqarnissaat pisariaqarpat.

  Imm. 3.  Imm. 1 aamma 2 naapertorlugu inuussutissarsiornermik siuarsaanermut aningaasaliissutissat inuussutissarsiornermi siuarsaanermut taarsigassarsiarititatut ernialittut 100%-inngorlugit tunniunneqarsinnaapput.

  Imm. 4.  Imm. 1 aamma 2 naapertorlugu inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut tallimanut aalajangerneqassaaq.

 

Nunagissaanermi suliat

 

  § 11.  Naalakkersuisut siunertanut ukununnga tapiissutitut inuussutissarsiutinik siuarsaanermut tunniussisinnaapput, suliassat nunaminertani atuisinnaatitaaffik nunalerivimmik piginnittumut tunniunneqarsimasumi ingerlanneqassappata:

1)  Nutaamik naggorissaaneq.

2)  Naggorissaaqqinneq.

3)  Nunaminertat naggorissagassat piareersarneqarneri.

4)  Nunaminertat naggorissagassat imaarsarneqarneri.

5)  Kalkilersuineq.

6)  Narsaatinut aqquserniorneq.

7)  Narsaatinut aqqusinernik imaarsaaneq.

8)  Narsaatinut aqqusernit iluanni ruujorilersuineq.

9)  Sermernarujussuareernerani naatitassanik ikkussueqqinneq.

10)  Toqqaannartumik naatitassanik ikkussuineq.

  Imm. 2.  Imm. 1 naapertorlugu inuussutissarsiornermik siuarsaanermut aningaasaliissutissat ilanngussaq 1-imi akit Nunalerinermut aningaasaliissutissatut Naalakkersuisumit aalajangersarneqartut naapertorlugit toqqaannartumik tapiissutitut tunniunneqassapput.

  Imm. 3.  Ilanngussaq 1-imi akit Kalaallit Nunaanni Naatsorsueqqissaartarfiup ukiumi tunngaviusumi 2008-mi nioqqutissanut sullissinernullu tamanut atuisunut akinut naleqqersuutaasa ineriartornerat naapertorlugu ukiumoortumik naleqqussarneqarlutik iluarsineqartassapput. Ukiut tamaasa 1. januaarimi ukiumi qaangiuttumi oktobarimi atuisunut akinut naleqqersuutit naapertorlugit annertussusilerneqartunut iluarsiisoqartassaaq.

 

  § 12.  Naalakkersuisut inuussutissarsiutinik siuarsaanermi ukuninnga aserfallatsaaliuinissamut tapiissutitut ilusilikkanik tunniussisinnaapput:

1)  § 11, imm. 1, nr. 4 naapertorlugu nunaminertani naatitsivissani kuuffiliaasimasunut.

2)  § 11, imm. 1, nr. 6 naapertorlugu narsaatinut aqquserniaasimasunut.

3)  § 11, imm. 1, nr. 7 naapertorlugu narsaatinut aqqusinerni kuuffiliaasimasunut.

  Imm. 2. Imm. 1 naapertorlugu inuussutissarsiutinik siuarsaanermi tunniussat, ilanngussaq 1-imi akit, Nunalerinermut Naalakkersuisumit aalajangersarneqartut 50 %-ii toqqaannartumik tapiissutitut tunniunneqassapput.

 

  § 13.  §§ 11, imm. 1 aamma 12, imm. 1 naapertorlugit nunagissaanermut tapiissutit Nunalerinermut Naalakkersuisoqarfimmut qinnuteqaammik nassiussisoqareernerani tunniunneqassapput, qinnuteqaallu suliassat tapiissutinik qinnuteqarfiusut aallartinneqannginnerini nassiunneqassapput akuerineqassallutillu. Nunaminertap suliarineqartussap annertussusia suliassallu suuneri malillugit tunniussisoqassaaq.

  Imm. 2.  Nunagissaanissamut tapiissutinik qinnuteqaammut uppernarsaatit uku ilanngunneqassapput:

1)  § 11, imm. 1, nr. 1-10 naapertorlugit suliassatut naatsorsuutigineqartut allaaserineqarneri.

2)  Suliassap suliarineqarnissaanut tunngavilersuut

3)  Nunaminertap annertussusianut missingiut

4)  Nunaminertamik atuisinnaatitaanermut uppernarsaat.

 

  § 14.  §§ 11, imm. 1 aamma 12, imm. 1 naapertorlugit nunagissaanissamut tapiissutit akilerneqassapput, Nunalerinermut Naalakkersuisoqarfiup nunagissaanerup naammassineranut uppernarsaat tiguppagu.

  Imm. 2.  Suliap naammassineranut uppernarsaammut uku ilanngunneqassapput:

1)  Siunnersortip nunalerinermik ilisimasallip suliat pillugit oqaaseqaataa,

2)  Nunaminertap annertussusianut, siunnersortip/nunamik uuttortaasartup sulinerminut atatillugu atortoqarluni uuttuineranut uppernarsaat,

3)  Nunamik pitsanngorsaalluni suliat pillugit aningaasartuutinut uppernarsaatit

  Imm. 3.  Nunalerinermut Naalakkersuisoqarfiup nunagissaanermut tapiissutit akilerneqarnerini, qinnuteqartoq Namminersorlutik Oqartussanut akiitsoqarpat akiitsunut akiliisissinnaavaa.

  Imm. 4.  Imm. 2 naapertorlugu akiliisitsinermi akiliutigitinneqartut annerpaamik nunalerinermut tapiissutitut tunniunneqartut tamarmiusut 33 %-iinik annertussuseqassapput.

 

Kapitali 2

Qinnuteqartitsinerit taarsigassarsititsinissamullu piumasaqaatit

 

Qinnuteqartitsinerit

 

  § 15.  Nunalerinermut Naalakkersuisoq ukiumi taasami inuussutissarsiutinik siuarsaanermut imaluunniit inuussutissarsiutit ilaasa aalajangersimasut siuarsarneqarnissaannut qinnuteqartitsinissamut piumasaqaatinik aalajangersaasinnaavoq.

  Imm. 2.  Nunalerinermut Naalakkersuisoq qinnuteqartitsinissanut piumasaqaatinik aalajangersaaniarluni aalajangerpat, tamanna pillugu nunalerinermi suliniaqatigiiffiit kingusinnerpaamik ukiup siuliani 30. novembarimi ilisimatinneqassapput.

 

Inuussutissarsiutinik siuarsaanermut akiliisarnerit

 

  § 16.  Inuussutissarsiutinik siuarsaanermut taarsigassarsiat fakturap Nunalerinermut Naalakkersuisoqarfimmut, taarsigassarsisoq sinnerlugu fakturamik akiliisussamut nassiunneqarneratigut, imaluunniit taarsigassarsisup nunalerinermik ingerlataqarnerminut NemKonto-anut nalunaarsorsimasumut nuussinikkut akilerneqassapput.

 

  § 17.  Tapiissutit taarsigassarsisup nunalerinermik ingerlataqarnerminut NemKonto-anut nalunaarsorsimasumut nuussinikkut akilerneqassapput.

 

Inuussutissarsiutinik siuarsaanermut taarsigassarsiat akilersorneqarnissaat

 

  § 18.  Inuussutissarsiutinik siuarsaanermut taarsigassarsiat, taarsigassarsiatut ernialittut tunniunneqartut taarsigassarsiatut amerlaqatigiinnik aalajangersimasunik erniaqartinneqarlutik akilersorneqassapput.

  Imm. 2.  Inuussutissarsiutinik siuarsaanermut taarsigassarsiat erniaat ukiumut 4 %-inut Naalakkersuisuniit aalajangerneqarput.

 

  § 19.  Taarsigassarsiat erniallit, inuussutissarsiutinik siuarsaanermut taarsigassarsiatut tunniunneqartut ukiumoortumik ataasiarluni akiligassanngortinneqarlutik akilersorneqassapput. Nunalerinermut Naalakkersuisoqarfiup ukiut tamaasa novembarimi akiligassaq nassiuttassavaa, taamaattorli tamanna taarsigassarsiat akilerneqarneriniit siusinnerpaamik ukiup tulliani pissaaq.

  Imm. 2.  Akiligassat piffissalikkat piffissaq eqqorlugu akilerneqarsimassapput, akiligassat piffissalikkat nassiunneqarneriniit kingusinnerpaamik ullut 30-t qaangiunnerini akilerneqarsimappata.

  Imm. 3. Akiligassat piffissalikkat, taakkununngalu erniat akilersuutillu ilanngullugit, piffissaq eqqorlugu akilerneqanngippata, ikinnerpaamik qaammatini arfinilinni taamaatitsinissamut piffissarititap iluani, Nunalerinermut Naalakkersuisup inuussutissarsiutinik siuarsaanermut taarsigassarsiarititat taamaatissinnaavai, taamaattorli tak. § 28.

  Imm. 4. Nunalerinermut Naalakkersuisup qinnuteqartoqareernerani taarsigassarsisup piffissamut akiligassanut akiliinissaanik ukiut marluk tikillugit kinguartitsisinnaapput:

1)  qularnaveeqqusiissutaasup nalinga inuussutissarsiutinik siuarsaanermut taarsigassarsiat tamarmiusut inernerisa 60 %-ii sinnerlugit naleqartutut missiliorneqarpat, aamma

2)  akiliisinnaannginneq akiliisinnaanngikkallarnertut naliliiffigineqarpat.

  Imm. 5.  Akiligassat piffissalikkat imm. 4 naapertorlugu kinguartinneqarnissaannik qinnuteqaat kingusinnerpaamik 15. oktobarimi Nunalerinermut Naalakkersuisoqarfimmut tunniunneqassaaq.

  Imm. 6.  Piffissamut akiligassat kinguartinneqareernerini taarsigassarsisup piffissamut akiligassani akilersoqqilerpagit, piffissaq akilersuiffiusoq piffissamut akiligassat kinguartinneqarfiisa annertoqataanik sivitsorneqassaaq.

  Imm. 7.  Nunalerinermut Naalakkersuisoq pisuni immikkut ittuni piffissamut akiligassat akilerneqarnissaannut ukiut marluk sinnerlugit sivitsuisinnaavoq.

 

  § 20.  Naalakkersuisut inuussutissarsiutinik ineriartortitsinissamut taarsigassarsiat akilersornissaannut tapiissuteqartarsinnaapput, taarsigassarsisup akilersugassani taarsigassarsinermut isumaqatigiissummi inuussutissarsiutinik siuarsaanermut taarsigassarsiat akilersorneqarfissaattut aalajangersarneqartut naapertorlugit piffissaq eqqorlugu akiliisarnera malillugu. Erniat akilersornerinut tapiissuteqartoqarsinnaanngilaq.

  Imm. 2.  Naalakkersuisut inuussutissarsiutinik siuarsaanermut taarsigassarsiat akilersornerinut tapiissutit 35 %-inut aalajangerneqarput.

 

Nammineerluni akilikkat

 

  § 21.  Naalakkersuisut inuussutissarsiutinik siuarsaanermut taarsigassarsititsinerminni qinnuteqartup nammineerluni akilikkaminik aallarniuteqarnissaa piumasarissavaat.

  Imm. 2.  Inuussutissarsiutinik siuarsaanermut taarsigassarsiarititassat tunniunneqannginnerini, taarsigassarsisup nammineerluni akiligassai Namminersorlutik Oqartussanut akilerneqassapput.

  Imm. 3.  Nunalerisutut aallartinnermut atatillugu Naalakkersuisut inuussutissarsiutinik siuarsaanermut taarsigassarsititsinerminni taarsigassarsisup nammineerluni akiligassai minnerpaamik 5%-inut appartissinnaavaat, aammalu taarsigassarsiat erniallit amerlaqataannik qaffatsissinnaavaat, taarsigassarsisoq aallartinnermini imaluunniit nunalerinermik ingerlatsivimmi piginneqataassutinik pisinermini minnerpaamik ingerlatap 33 %-iinik pigisaqarpat.

  Imm. 4.  Taarsigassarsisup nammineerluni akiligassai imm. 3 naapertorlugu appartinneqarsinnaanngillat, taarsigassarsisoq nunalerinermik ingerlatsivimmi piginneqataareerpat, aammalu nunalerinermik ingerlatsivimmi tassani piginneqataassutinik allanik pisisimappat.

  Imm. 5.  Aningaasaliinermut tunngatillugu imm. 3 naapertorlugu taarsigassarsianik qaffatsitsineq taamaallaat aningaasaliissutinut, taarsigassarsisup nunalerisutut aallartinneranut ukiunut tallimanut siullernut aningaasaliissutissanut pilersaarummut, Nunalerinermut Naalakkersuisoqarfimmit akuerisamut ilanngunneqarsimasunut atorneqarsinnaavoq.

 

Taarsigassarsiat kattussat piffissarlu akileraarfiusoq

 

  § 22.  Taarsigassarsiani kattussiffiusuni, ernialinnik aamma erniaqanngitsunik akilersugassaanngitsunillu taarsigassarsiffiusuni piffissaq akiitsut akilersorneqarfissaat taarsigassarsianut marlunnut taakkununnga assigiimmik aalajangerneqassaaq, taamaattorli tak. § 27.

 

Qularnaveeqqusiineq

 

  § 23. Inuussutissarsiutinik siuarsaanermut taarsigassarsiat, pigisamut aalaakkaasumut atorneqartussat tamatigut uppernarsaammik, pigisap nalunaarsuisarfimmi allattaavianut nalunaarsorneqarsimasumik qularnaveeqquserneqartassapput.

  Imm. 2.  Inuussutissarsiutinik siuarsaanermut aamma pitsaanerpaamik qularnaveeqquserneqartassapput, taakkulu pigisami, inuussutissarsiutinik siuarsaanermut taarsigassarsiffigineqartumi uppernarsaammik nalunaarsorneqarsimasumik qularnaveeqquserneqarsinnaapput.

 

Inuussutissarsiutinik siuarsaanermut aningaasaliissutinik unitsitsineq

 

  § 24.  Taarsigassarsisoq pisinnaatitaavoq, piffissaq sioqqullugu inuussutissarsiutinik siuarsaanermut taarsigassarsiat tamakkerlugit akilernerisigut atorunnaarsissallugit, tamatumani taarsigassarsinermut isumaqatigiissummi aalajangersimasumik allamik allassimasoqanngippat. Piffissaq sioqqullugu akiliineq taarsigassarsiat piffissami akilersorneqarfigisaanni sukkulluunniit pisinnaavoq.

 

  § 25.  Nunalerinermut Naalakkersuisup inuussutissarsiutinik siuarsaanermut taarsigassarsiat tamakkiisumik ikinnerpaamik qaammatini arfinilinni taamaatitsinissamut piffissarititap iluani akiligassanngorlugit taamaatissinnaavai:

1)  taarsigassarsisup ukiuni tulleriinni marlunni inuussutissarsiutigalugu nunalerineq  pingaarnertut inuussutissarsiutigisimanngippagu, tak. nunalerinermik inuussutissarsiuteqarnerup siuarsarneqarnissaa pillugu Inatsisartut inatsisaanni § 4, imm. 2 aamma 3,

2)  taarsigassarsisup nunalerinermik ingerlatsinissamut piumasaqaatit naammassisinnaajunnaarpagit, imaluunniit nunalerinermut pineqartumut oqartussaasuniit akuersissummik allamik amigaateqarpat, imaluunniit

3)  taarsigassarsisup taarsigassarsinermut piumasaqaatit atugassarititaasut annertuumik sumiginnarpagit.

  Imm. 2.  Nunalerinermut Naalakkersuisup illunik inuussutissarsiorfiusunik, nammineerluni illulianik, illunik inissiisarfinnik imaluunniit nukissiutinik sananissamut tigusinissamulluunniit inuussutissarsiutinik siuarsaanermut taarsigassarsiat taamaatissinnaavai, taakku inussutissarsiutinik siuarsaanermut taarsigassarsiat tunniunneqarneriniit ukiut qulit iluanni tunineqarpata.

 

  § 26.  Nunalerinermut Naalakkersuisup taarsigassarsiat taamaatippagit, tak. § 19, imm. 3 imaluunniit § 25, taamaatitsinerup saqqummiunneqarneraniit inuussutissarsiutinik siuarsaanermut taarsigassarsiat ernialersorneqarnerat unissaaq.

 

  § 27.  Taarsigassarsiat erniaqanngitsut akilersugassaanngitsullu piffissamut taarsigassarsiat nungukkiartorfiinut aallaqqaammut aningaasartaliussat ukiumut 4 %-inik appartinneqartassapput.

 

Kapitali 3

Allannguisarneq isumakkeerinnittarnerlu

 

Aningaasaleeqqinnerit

 

  § 28.  Naalakkersuisut inuussutissarsiutinik siuarsaanermut taarsigassarsianit tunniunneqartuniit nalunaarut manna, imaluunniit nunalerinerinermik inuussutissarsiornerup siuarsarneqarnissaanut siornatigut maleruagassiaasimasuni §§ 1-10 naapertorlugit nutaanik inuussutissarsiutinik siuarsaanermut taarsigassarsititsinikkut akiitsunut akilinngitsuukkanut aningaasaleeqqissinnaapput:

1)  aningaasaleeqqinnissaq nunaleriffiup ingerlaannarnissaannut annertuumik isumaqartutut naliliiffigineqarpat,

2)  taarsigassarsisup taarsigassarsiat nutaat akilersorsinnaagai naliliiffigineqarpat, aamma

3)  nunaleriffiup ineriartornissaanut aamma akiitsut akilersornissaanut ukiunut tallimanut pilersaarummit, Nunalerinermut Naalakkersuisoqarfimmit akuerineqartumik peqarpat.

  Imm. 2.  Akiitsunut aningaasaleeqqinnermut inuussutissarsiutinik siuarsaanermut taarsigassarsiat piffissaq akilersorneqarfissaat sivisunerpaamik ukiunut qulinut aalajangerneqassaaq.

 

Taarsigassarsianik allannguineq

 

  § 29.  Nunalerinermut Naalakkersuisup inuussutissarsiutinik siuarsaanermut taarsigassarsiat inuussutissarsiutinik siuarsaanermut taarsigassarsianut allanut allanngortissinnaavai, piffissamut akilersorneqarfissaannut pigisap inuussutissarsiutinik siuarsaanermut taarsigassarsititsiffigineqartup atasinnaaffissaatut naatsorsuutigineqartumit sivisunerunngitsumik sivisussusiliilluni:

1)  inuussutissarsiutinik siuarsaanermut taarsigassarsiarineqartut ukiut tallimat sinnerlugit akilersorneqarsimappata, aamma

2)  taarsigassarsisup inuussutissarsiutinik siuarsaanermut taarsigassarsiat nutaat akilersorsinnaagai nalilerneqarpat.

 

Isumakkeerineq

 

  § 30.  Akiitsut, nalunaarut manna imaluunniit siornatigut aalajangersagaasimasut assingusut naapertorlugit inuussutissarsiutinik siuarsaanermut taarsigassarsiaasimasut pillugit taarsigassarsisup qinnuteqareernerani, pissutsit immikkut ittut tunngavigalugit tamanna naammaginartutut isumaqarfigineqarpat, aammalu taarsigassarsisup akiliisinnaanani uppernarsarsinnaappagu, Nunalerinermut Naalakkersuisoq akiitsunik tamakkiisumik ilaannaasumilluunniit isumakkeerinnissinnaavoq. Taarsigassarsisoq akiliisinnaanngitsutut isigineqassaaq, taarsigassarsisoq akiliisinnaanngippat, aammalu ukiuni qaninnerni inuussutissarsiutinik siuarsaanermut taarsigassarsiaminik appartitsisinnaanera ilimanaateqanngippat. Aamma isumakkeerinnittoqassappat, isumakkeerinninnerup taarsigassarsisup aningaasaqarnikkut atugaanik ataavartumik pitsannguiffiunissaata ilimanaateqarnissaa piumasarineqarpoq.

  Imm. 2.  Akiitsunik isumakkeerinninneq nalinginnaasumik pisinnaanngilaq:

1)  Taarsigassarsisoq aningaasaqarnikkut mianersuaalliorluni iliuuseqarsimappat, taakkununngalu ilanngullugu ikinngitsunik akiitsoqalersimappat: 

a)  piffissami taarsigassarsisup aningaasaqarnikkut pisussaaffimminik naammassinnissinnaanngiffianni akiitsut pilersinneqarsimappata, tamatumani inuussutissarsiornermut akiitsut niuernikkut tunngavilersugaalluartut imaluunniit taarsigassarsianik allannguineq tunngavilersugaalluartoq pineqanngippat,

b)  taarsigassarsisup aningaasaqarnikkut annaasaqarfiusinnaasunik, taarsigassarsisup aningaasaqarnikkut atugaanut naleqqutinngitsunik iliuuseqarneratigut pilersimappata,

c)  pisariaqanngitsumik atuinissaq siunertaralugu pilersinneqarsimappata, tamatumani pissutsit immikkut peqqutaallutik naammaginartutut isigineqarsinnaanerisa kingunerisaanik akiitsortoqarsimanngippat, imaluunniit

d)  pisortanut namminersortunulluunniit amerlasuunik allanik, piffissap ingerlaneranik,

2)  Taarsigassarsisoq nunalerivimminik ingerlatsinermi niuernikkut mianersuaalliorujussuarsimappat,

3)  Taarsigassarsisoq isertitaqartarnermini imaluunniit allatigut isertitaqartarnermini periarfissaqaraluarluni akiitsuminut akilersuinngitsoorsimappat.

  Imm. 3.  Aamma taarsigassarsisup kingusinnerpaamik isumakkeerinninnermut peqatigitillugu pigisaminik, nunalerivimmik ingerlatsinermut attuumassuteqartunik tamanik tunisisimanissaa, isumakkeerinninnissamut piumasarineqarpoq.

  Imm. 4.  Nunalerinermut Naalakkersuisup isumakkeerinninnissamik aalajangiinermini akiitsut pisoqaassusii pingaartissavai.

  Imm. 5.  Isumakkeerinninneq taamaallaat inuinnarnut suliffeqarfinnullu, piginneqataasut tamarmik immikkut suliffeqarfiup pisussaaffiinut killeqanngitsumik nammaqatigiillunitillu akiliisussaaffigisaannut atorneqarsinnaavoq.

 

Kapitali 4

Atuutilerfia

 

  § 31.  Nalunaarut manna 1. januaari 2025-mi atuutilerpoq.

 

 

Namminersorlutik Oqartussat, ulloq 19. december 2024

 

 

Kalistat Lund (atsior.)

Nunalerinermut, Imminut Pilersornermut, Nukissiutinut Avatangiisinullu Naalakkersuisoq

 

 

/ Natuk Lund Meire (atsior.)