Qarasaasiakkut akiliisitsisarnerup aqunneqarnera pillugu Inatsisartut inatsisaat nr. 50 23. Novembari 2017-imeersumi § 1-imi allassimasut malillugit kommunini isumaqatigiissusioreernerup kingorna aalajangerneqarpoq:

  § 1.  Digitalimik akiligassiaq tassaasoq, akiligassaq aaqqissuussamik iluseqarluni suliaq, nassiussaq tigusarlu, akiligassarlu taamaalilluni nammineerluni digitalimik suliarineqarsinnaalissaaq.

  Imm. 2.  Digitalimik akiligassami ukua suliarineqarsinnaapput:

1)  akiligassaq, 

2)  kreditnota,

3)  akileeqqusissut aammalu

4)  suliffeqarfimmit allagartaq.

  Imm. 3.  Digitalimik akiligassat teknikkitigut ilusissaatut aalajangiussat Inussuk-IT-p nittartagaatigut takuneqarsinnaapput.

  § 2.  Inuk inatsisitigut pisinnaatitaasoq inuillu pisortaqarfinnut tunisisimatillutik arlaatigulluunniit kiffartuussisimatillugit akiligassiileraangamik akiligassamik digitaliusumik nassiussisassapput takuuk §3 aamma 4.

  § 3.  §2-mi piumasaqaatitut allassimasut malillugit inuk inatsisitigut pisinnaatitaasoq iniullu akiligassamik nassiussileraangata kommunimi annerpaamik kaaviaartissinnaasaat pillugit kommunalbestyrelse annertussusissamik nammineq aalajangiissaaq.

  Imm. 2.  Kommunalbestyrelseminngaanniit annertussuseq aalajangiussaq takuuk imm. 1, akiliisoqarnissaanut piumasaqaatit kiisalu inuit inatsisitigut pisinnaatitaasut inuillu imm. 1-imi allassimasunut attuumassuteqartinneqanngitsut tunisisimatillutik kiffartuussisimatillutillu qanoq akiligassamik nassiussisassanersut nittartakkaminnut tamanut takusassiaralugu saqqummiutissavaat.

§ 4. Namminersorlutik Oqartussanut akiligassiinermi inuit inatsisitigut pisinnaatitaasut inuillu annerpaamik kaaviiaartissinnaasaat pillugit Aningaasaqarnermut Sulisoqarnermullu Aqutsisoqarfik annerpaaffissamik aalajangiissapput, kiisalu inuit inatsisitigut pisinnaatitaasut inuillu qaqugukkut § 2-mi piumasaqaatitut allassimasumut attuumassuteqassannginnersut aalajangiissallutik.

  Imm. 2.  Aningaasaqarnermut Sulisoqarnermullu Aqutsisoqarfimmit annertussuseq aalajangiussaq takuuk imm. 1, akiliisoqarnissaanut piumasaqaatit kiisalu inuit inatsisitigut pisinnaatitaasut inuillu imm. 1-imi allassimasunut attuumassuteqartinneqanngitsut tunisisimatillutik kiffartuussisimatillutillu qanoq akiligassamik nassiussisassanersut nittartakkaminnut tamanut takusassiaralugu saqqummiutissavaat.

§ 5. Pisortaqarfiit ataatsimut tigusisinnaasut nalunaarsorfianni NemHandelsRegisterimi Danmarkimi Erhvervsstyrelsenimit suliarineqartumi nalunaarsorsimassapput.

§ 6. Isumaqatigiissusiortoqarneratigut imaluunniit suliakkiisoqarneratigut allatsitsinermiluunniit oqartussaqarfiup minnerpaamik tulliuttut nalunaarutigissavai:

1)  Pisortaqarfiup CVR-normua.

2)  Pisortaqarfiup GLN-normua.

3)  Attavigisimasaq imaluunniit attavigisinnaasaq alla.

4)  Suliakkiissummut imaluunniit allatsitsinermut normu ilanngunneqarsinnaavoq.

5)  Pisariaqassappat pisortaqarfiup akiligassiinermut atatillugu kontumut nalunaarsugassat ilanngunneqarsinnaapput.

  § 7.  Digitalimik akiligassami pisortaqarfiup paasissutissai §6-imi allassimasut ilanngunneqassapput.

  Imm. 2.  Digitalimik akiligassaq taamaallaat pisortaqarfiup ataatsip GLN-normuanik allassimasulimmut nassiunneqarsinnaavoq.

  § 8.  Digitalimik akiligassaq pilersuisumit pisortaqarfimmut nassiunneqarpat, naatsorsuutigineqassaaq tiguneqarsimasoq, taamaalilluni akiligassaq pisortaqarfiit akiliinissaanut aningaasaqarnermullu systemianni suliarineqartussanngussalluni.

  Imm. 2.  §§1, aamma 6 imaluunniit 7-mi allassimasut malillugit digitalimik akiligassaq suliarineqarsinnaanngippat, taava akiligassaq itigartitsissutigineqassaaq. Itigartitsineq isumaqarpoq, akiligassamik digitaliusumik nutaamik nassiussisoqareerpat aatsaat akiliiffissaq ullulerneqareerpat, akiliisoqarsinnaasoq.

Atuuttuulerfia

  § 9.  Nalunaarut 1. marsi 2025 atuuttuulersinneqassaaq.

Namminersorlutik Oqartussat, ulloq 8. november 2024

Múte Bourup Egede (atsior.)

Naalakkersuisut Siulittaasuat

/ Hans-Peder Barlach Christensen (atsior.)