§ 1.  Naalakkersuisut kommuninik isumaqatiginninniareerlutik qarasaasiakkut akiliisitsisarnermi pisortani oqartussaasut maleruagassanik atuinissaat pillugu aalajangersaasinnaapput.
  Imm. 2. Digitalikkut akiliisitsisarnerup aqunneranut ilaapput qarasaasiakkut inniminniinerit aamma suleriaatsit periutsillu pisortanut pisortaniillu aningaasanut akiliutigineqartunut tunniunneqartunullu attuumassutillit.    
  Imm. 3. Naalakkersuisut suliffeqarfiit namminersortitat qarasaasiakkut akiliisitsisarnerup aqunneqarnera pillugu maleruagassanut ilaatinneqarnissaat pillugu maleruagassanik aalajangersaasinnaapput. 

§ 2. Naalakkersuisut suliffeqarfiit namminersortitat qarasaasiakkut akiliisitsisarnerup aqunneqarnera pillugu maleruagassanut ilaatinneqarnissaat pillugu maleruagassanik aalajangersaasinnaapput imaattoqarsimappat: 
1) suliffeqarfik imminut pigisoq aningaasaliissutinut inatsimmut ilanngunneqarsimassasoq, imaluunniit
2) suliffeqarfik imminut pigisoq Naalakkersuisunik kommunimilluunniit ingerlatsinermut isumaqatigiissusiorsimappat. 
  Imm. 2. Peqatigiiffiit aningaasaateqarfiillu qarasaasiakkut akiliisitsisarnerup aqunneqarnera pillugu maleruagassanut ilanngunneqarnissaat pillugu maleruagassanik Naalakkersuisut aalajangersaasinnaapput imaattoqarsimappat: 
1) suliffeqarfiup imminut pigisup aningaasartuutai imaluunniit naatsorsuutitigut amigartoorutai nunatta karsia aqqutigalugu imaluunniit tapitigut, akitsuutitigut allutulluunniit inatsit naapertorlugu isertitatigut akilerneqarsimappata, imaluunniit 
2)  suliffeqarfik imminut pigisoq aningaasanik aallarniutissanik, tapiissutinik, taarsigassarsianik, qularnaveeqqusiissutinik allatulluunniit tapiinernik Namminersorlutik Oqartussanit tunineqarsimappat. 
  Imm. 3.  Naalakkersuisut immikkorluinnaq pisoqarsimatillugu suliffeqarfiit imminut pigisut, peqatigiiffiit aningaasaateqarfiillu imm. 1 aamma 2-mi taaneqartut qarasaasiakkut akiliisitsisarnerup aqunneqarnera pillugu maleruagassanut ilaatinnginnissaat aalajangiiffigisinnaavaat.

§ 3.  Naalakkersuisut immikkorluinnaq pisoqarsimatillugu suliffeqarfiit namminersortut pisortani oqartussaasunut allanullu §§ 1 aamma 2-mut ilaasunut akiligassiinermikkut qarasaasiakkut aaqqiissutissanik atuinissamik pisussaaffilinngitsoorsinnaavaat.

§ 4.  Inatsisartut inatsisaat ulloq 1. januar 2018 atuutilissaaq.

Namminersorlutik Oqartussat, ulloq 23. november 2017

Kim Kielsen