Naalakkersuisoqarfiit pisortaqatigiivinut tunngasut

  § 1.  Naalakkersuisoqarfiit pisortaqatigiivi tassaapput suliassaqarfiit akimorlugit qitiusumik allaffeqarfimmi ataqatigiissaarinermut oqalliseqatigiittartui aamma qitiusumik allaffeqarfimmi pingaarnertut aqutsinermik suliaqartut.

  Imm. 2.  Suliassaqarfiit akimorlugit pissutsinik naalakkersuisoqarfiit pisortaqatigiivi Naalakkersuisunut siunnersuisarput, suliffeqarfimmilu suliat isumagineqarnerinut ataqatigiinnernik tamarmiussutimillu pilersitsinissamut ilapittuuteqartarlutik.

  Imm. 3.  Maannakkut pisut, periusissiat piffissamullu ungasinnerusumut ataatsimoorussamik allaffissornikkut pissutsit naalakkersuisoqarfinni pisortaaqatigiit suliarisarpaat aalajangiiffigisarlugillu.

  Imm. 4.  Naalakkersuisunit, ataqatigiissarinermut ataatsimiititaliamit aamma ataqatigiissaarisoqatigiinnit suliniutit ataqatigiissarneqarnissaat naalakkersuisoqarfinni pisortaaqatigiit qulakkeertarpaat kiisalu Naalakkersuisunit Inatsisartunillu aalajangiiffigineqartut suliarineqarnissaat qulakkeertarlugu.

  Imm. 5.  Naalakkersuisoqarfiit pisortaqatigiivisa ataatsimiinneranni aalajangikkat allaffeqarfik tamakkerlugu pituttuisuupput.

  § 2.  Naalakkersuisoqarfiit pisortaqatigiivi tassaapput Naalakkersuisut Naalakkersuisoqarfiini pisortat aamma Naalakkersuisut Siulittaasuata Naalakkersuisoqarfiani pisortaq.

  Imm. 2.  Naalakkersuisut Siulittaasuata Naalakkersuisoqarfiani Naalakkersuisoqarfimmut pisortaq Naalakkersuisoqarfiit pisortaqatigiivini siulittaasuuvoq. Siulittaasup pisinnaannginnerani Naalakkersuisut Siulittaasuata Naalakkersuisoqarfiani pisortaq sinniisuuvoq, taassumalu pisinnaannginnerani ataatsimeeqataasut akornanni ataatsimiinnermut aqutsisoq toqqarneqassaaq.

  Imm. 3.  Naalakkersuisoqarfiit pisortaqatigiivini ilaasortaasut saniatigut attaveqaqatigiinnermik pisortaq aamma HR-imi ineriartortitsinermik pisortaq ataatsimiinnerni aalajangersimasumik peqataasarput. Inuit allat ataatsimiinnernut aamma peqataasinnaanerannik Siulittaasoq aalajangiisinnaavoq.

Ataatsimiinnerni peqataasussaatitaaneq aamma sinniisussat

  § 3.  Naalakkersuisoqarfiit pisortaqatigiivisa ileqquusumik ataatsimiinnerinut pinngitsoorani takkuttussaaffiuvoq. Peqataaniannginneq ataatsimiinneq sioqqullugu siulittaasumut nalunaarutigineqassaaq.

  Imm. 2.  Utaqqiisaasumik peqannginnissami sinniisussaq ataatsimiigiaqqusaassanngilaq. Sivisunerusumik peqannginnissami susassaqarfimmeersumik sinniisussamik aalajangersimasumik ataatsimik ataatsimiigiartoqartassaaq.

  Imm. 3.  Inuit ullut 14-t sinnerlugit utaqqiisaasumik inissisimasut imaluunniit atorfimmut pineqartumut atorfininnissap tungaanut sulisuusut Naalakkersuisoqarfinni pisortaqatigiinni ilaasortanngortinneqassapput.

  Imm. 4.  Naalakkersuisoqarfiit pisortaqatigiivini ilaasortat pissutsit kinguartinneqarsinnaanngitsut naapertorlugit peqataanissamik periarfissaqanngikkunik, tak. § 5, oqaluuserisassatut immikkoortunut allakkatigut oqaaseqaatinik nassiussisinnaapput.

Ataatsimiinnerit ingerlanneqarnerat:

  § 4.  Naalakkersuisoqarfiit pisortaaqatigiivi Inatsisartut ataatsimiinnerisa avataani sisamanngornerit tamaasa nal. 14:00 aamma Inatsisartut ataatsimiinnerisa nalaani tallimanngornerit tamaasa nal. 14:00 Naalakkersuisut Siulittaasuata Naalakkersuisoqarfiani ileqquusumik ataatsimiittarput.

  Imm. 2.  Ataatsimiinnerit ukioq kaajallallugu sapaatit akunnikkaartumik taamaattorli juuli qaammataa minillugu ingerlanneqartarput.

  Imm. 3.  Ukiumoortumik ataatsimiinneq siulleq tassaavoq januarimi sisamanngornerit aappaat, aamma ukiumoortumik ataatsimiinneq kingulleq tassaavoq decemberimi sisamanngornerit aappaat.

  Imm. 4.  Pisariaqarnerani Siulittaasoq immikkut ittumik ataatsimiinnissamut aggersaassaaq.

Oqaluuserisassat imaqarniliornerlu

  § 5.  Naalakkersuisoqarfiit pisortaqatigiivi ileqquusunik ataatsimiinnerinut aalajangersimasumik oqaluuserisassanut immikkoortut uku ilaatinneqartassapput:

1)  Ataatsimiinnermut pineqartumut oqaluuserisassat kiisalu ataatsimiinnerup siuliani imaqarniliap akuerineqarnerat.

2)  Naalakkersuisunut ilasortat aamma naalakkersuisoqarfiit pisortaqatigiivisa suliassaat takkukkumaartut pillugit ilisimatitsissuteqarneq

3)  Naalakkersuisuni ataatsimiinnermi kingullermi immikkoortut pillugit ilisimatitsissuteqarneq.

4)  Siunnersuutit tiguneqartut.

5)  Susassaqarfiit akimorlugit pissutsinik ilisimatitsissuteqarnerit

  Imm. 2.  Ileqquusumik ataatsimiinnerit tamaasa aalajangiinernut imaqarniliaq suliarineqartassaaq.

  Imm. 3.  Naalakkersuisoqarfiit pisortaqatigiivisa ataatsimiinnerata siulianit imaqarniliamut missingiut ataatsimiinnissamut tullermut ullormut oqaluuserisassanut ilanngullugu nassiunneqassaaq, tak. § 6, imm. 4.

  Imm. 4.  Imaqarniliaq akuerineqareerpat naalakkersuisoqarfiit pisortaasa aalajangiinermut imaqarniliaq naalakkersuisoqarfinni agguaassinnaavaat.

  Imm. 5.  Ileqquusumik ataatsimiinneq siulleq qaammatit tamaasa immikkoortunik makkuninnga annertusineqassaaq:

1)  Aaqqissuussaaneq, aqutsineq atugarissaarnerlu

  Imm. 6.  Immikkoortoq annertusisaq, tak. imm. 5. suliarineqalerpat, naalakkersuisoqarfiit pisortai Naalakkersuisullu Siulittaasuata Naalakkersuisoqarfianni pisortaq kisimik peqataassapput aamma imaqarniliortoqassanngilaq.

Allatseqarfik, ataatsimiinnernut atortussat il.il.

  § 6.  Allattoqarfiup ingerlanneqarnera Naalakkersuisut Siulittaasuata Naalakkersuisoqarfianit isumagineqassaaq Naalakkersuisut Siulittaasuata Naalakkersuisoqarfiani pisortaq aqutsisoralugu.

  Imm. 2.  Ullormut oqaluuserisassanut ilannguttussat kiisalu taakkununnga atortussat tunniunneqarnerat allattoqarfimmut kingusinnerpaamik ataasinngornermi nal. 16:00 sioqqullugu DCGRUPPEN@nanoq.gl-mut tunniunneqassapput.

  Imm. 3.  Ullormut oqaluuserisassanut immikkoortut ilanngunneqarsinnaapput, piumasaqaatinik makkuninnga naammassinnittut:

1)  Naalakkersuisoqarfiit pisortaaqatigiivisa siunertarisaannut attuumassuteqartut, tak. § 1.

2)  Peqataasunit tamanit imaluunnit amerlanernit soqutigineqarnissaa piumasarineqarpoq.

3)  Allami pitsaanerusumik aaqqinneqarsinnaanngilaq.

  Imm. 4.  Ataatsimiinnissanut tullermut ullormut oqaluuserisassat atortussallu allattoqarfimmit marlunngornerit tamaasa nassiussuunneqassapput.

  Imm. 5.  Tunniussinissamut piffissaliussaq kingoqqullugu oqaluuserisassallu nassiutereernerisigut immikkoortut tuaviuussassatut pissusillit oqaluuserisassanut ilanngunneqarnissaat siulittaasup akuerisinnaavai.

Kaajallaasitap aaqqissuuteqqinnera

  § 7.  Kaajallaasitap matuma imarisai ukiut tamaasa qaammatit pingasut siulliit iluanni  naalakkersuisoqarfiit pisortaqatigiivinit nalilersugassanngorlugit qaqinneqartassapput.

Atortuulersitsinermut aamma ikaarsaariarnermi aalajangersakkat

  § 8.  Manna kaajallaasitaq ulloq 1. februaari 2024 atuutilissaaq.

  Imm. 2.  Peqatigitillugu naalakkersuisoqarfiit pisortaqatigiivini suleriaasissaq pillugu kaajallaasitaq 16. aggusti 2022-meersoq atorunnaarsinneqarpoq.

  § 9.  Ulloq 4. decembari 2024 naalakkersuisoqarfiit pisortaqatigiivini ataatsimiinnermi taamaalillugit akuerineqarpoq.

Naalakkersuisut Siulittaasuata Naalakkersuisoqarfia, ulloq 23. februaari 2024

Hans-Peder Barlach Christensen (atsior.)

Naalakkersuisoqarfimmi pisortaq

/ Simigaq Broberg (atsior.)