Umiarsualivimmiinnermut akileraarutit pillugit Inatsisartut inatsisaanni nr. 20, 30. oktober 1992-imeersumi kingusinnerusukkut allannguuteqartartumi § 12 aamma § 14, imm. 2 naapertorlugit makku aalajangersarneqarput:

Umiarsualivinni talittarfinnit, kisarfiit ilanngullugit, makkunannga aallareernerup kingorna nalunaarutiginninneq akiliisitsinerlu

  § 1.  Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarut samt avatangiisinut aserfallatsaaliuinermullu akiliut umiarsuit akitsuuserneqartussaatitaasut umiarsualivinnut makkununnga tulanneranni imaluunniit taakkua avataanni kisarneranni (umiarsuit kisarsimasut) akiliisinneqassapput:

1)  Qaanaaq,

2)  Upernavik,

3)  Uummannaq,

4)  Qeqertarsuaq,

5)  Ilulissat,

6)  Qasigiannguit,

7)  Aasiaat,

8)  Kangaatsiaq,

9)  Sisimiut,

10)  Kangerlussuaq,

11)  Maniitsoq,

12)  Nuuk,

13)  Paamiut,

14)  Narsaq,

15)  Narsarsuaq,

16)  Qaqortoq,

17)  Nanortalik,

18)  Tasiilaq aamma

19)  Ittoqqortoormiit.

Najukkani umiarsualivimmi oqartussat suliassaat

  § 2.  Umiarsualivimmi oqartussaasoq umiarsualivimmiinnermut akileraarutit pillugit Inatsisartut inatsisaanni nr. 20, 30. oktober 1992-imeersumi kingusinnerusukkut allannguuteqartartumi Naalakkersuisunit suliakkiissutigineqartunik suliaqartussaavoq. 

  Imm. 2.  Suliassat imm. 1 naapertorlugu umiarsualivimmi oqartussaasumut suliassiissutigineqartut, akileraaruseriffik akuersiteqqaarnagu, allanit isumagisassanngorlugit umiarsualivimmi oqartussaasoq piginnaatitsisinnaanngilaq.

  Imm. 3.  Nalunaarut manna naapertorlugu umiarsualivimmi oqartussaasup aalajangiineri Akileraartarnermut ingerlatsivimmut naammagittaalliutigineqarsinnaapput.

  § 3. Umiarsuarmi aquttoq, imaluunniit inuttaq akisussaasuusoq alla, imaluunniit umiarsuarmut tuniniaasoq (agenti), umiarsuup umiarsualivimmiit aallannginnerani umiarsualivimmi oqartussaasup erseqqinnerusumik innersuussinera malillugu umiarsuup suussusaa, umiarsuup usitussusaa (tonsini tamakkiisuni uuttorlugu, naalisarlugu BT), umiarsualivimmiinnermi ullup unnuallu aallartinnerisa amerlassusaat umiarsualivimmi oqartussaasumut ilumoorluinnarluni uppernarsaalluni nalunaarutigissavaa kiisalu akitsuutit akiliutillu naatsorsorneqartut akuerissallugit, taamaattoq takuuk imm. 3. Umiarsualivimmi oqartussaasoq ilumoorluinnarluni uppernarsaalluni nalunaarutip tiguneqareernerata kinguninnguatigut imm. 1-imi akitsuutinut akiliutinullu naatsorsorneqartunut taakkununnga akiligassamik akileeqqusinermigut akissuteqassaaq.

  Imm. 2. Imm. 1-imi ilumoorluinnarluni uppernarsaalluni nalunaarummut tunniunneqartumut peqatigitillugu umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarut kiisalu avatangiisinut aserfallatsaaliuinermullu akiliut akiligassanngussaaq. Imm. 1-imi taaneqartutut akiligassamik tigusaqarnerup kingorna akitsuutit akilerneqartussat akiliutillu akilersinneqartussat ullut 14-it qaangiutsinnagit umiarsualivimmi oqartussaasumut akilerneqassapput, taamaattoq takuuk imm. 3. Taamaattorli akiligassap tiguneranut ulloq akiliiffissatut ullumut naleqqiullugu kingusinnerusumi inissinneqarsimasinnaanngilaq.

  Imm. 3. Umiarsuarnut umiarsualivimmi ataatsimi arlalinniluunniit aalajangersimasumik angalasartunut, allatut akileeriaaseqarnissaq pillugu akileraaruseriffimmut isumaqatigiissuteqartoqarsinnaavoq, aamma takuuk § 4.

  § 4. Umiarsuit suliffeqarfimmit allatut nalunaaruteqariaaseqarnissamik akileeriaaseqarnissamillu akileraaruseriffimmut isumaqatigiissuteqarsimasunit pigineqartut imaluunniit attartorneqartut, § 3-miunngitsoq, kisianni taamaattoq § 5, imm. 2-mi, pineqartunut ilaatinneqassapput.

  § 5. Umiarsualivimmi oqartussaasup § 3, imm. 1 naapertorlugu qaammatip siuliani ilumoorluinnarluni uppernarsaalluni nalunaarutinut takussutissiat kingusinnerpaamik qaammatip tulliata 15-iani akileraaruseriffimmut nassiutissavai. Takussutissiamut immersugassaq akileraaruseriffimmit tamatumunnga atugassatut suliarineqarsimasoq atorneqassaaq. Takussutissiamut ilumoorluinnarluni uppernarsaalluni nalunaarutit assilineri ilanngunneqassapput. Peqatigisaanik umiarsualivimmi oqartussaasup akitsuutit akiliutillu qaammatip siuliani tiguneqartut akilissavai. Umiarsualivimmi oqartussaasoq aningaasanik akilerneqanngitsunik sunniuteqarluartumik akiliisitsiniarnissamut pisussaaffeqarpoq, aammattaarlu akileraaruseriffiup tamatuma kingorna pisassanik akiliisitsiniarnissaa siunertaralugu akilerneqarsimanngitsut akileraaruseriffimmut nalunaarutiginissaannik pisussaaffeqarluni.

  Imm. 2. Suliffeqarfiit § 4-mi taaneqartutut akitsuutit akilerneqartussat aammalu akiliutit akilersinneqartussat ataatsimoortillugit qaammatikkaartumik naatsorsortassavaat aammalu naatsorsukkat nassiuttassallugit kiisalu akitsuutit akilerneqartussat aamma akiliutit akilersinneqartussat kingusinnerpaamik qaammatip tulliata 15-iani akileraaruseriffimmut akilissallugit.

Kukkunersiuisup uppernarsaalluni nalunaarutaa, ukiumi ataatsimoortumik nalunaarutiginninnernut akiliisitsinernullu takussutissiaq ilanngullugu

  § 6.  Suleriaasissat pilersinneqarsimasut, umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutinik kiisalu avatangiisinut aserfallatsaaliuinermullu akiliutinik akiligassiinerit, naatsorsuereernermi akiliisitsinerit allaffissornikkullu aqutsinerup, umiarsualivimmiinnermut akileraarutit pillugit Inatsisartut inatsisaat nr. 20, 30. oktober 1992-imeersoq kingusinnerusukkut allannguuteqartartumi aalajangersakkanut aammalu nalunaarummi matumani aalajangersakkanut naapertuuttumik, ingerlanneqartarnissaannik qulakkeerinerat pillugu umiarsualivimmi oqartussaasup kukkunersiuisua qaammatisiutit malillugit ukiut naareerneri tamaasa akileraaruseriffimmut uppernarsaalluni nalunaaruteqartassaaq.

  Imm. 2.  Uppernarsaalluni nalunaarummik imm. 1-imi taaneqartumik nassiussinermi ukiumi nalunaarutiginninnernut ataatsimoortunut aammalu akitsuutinut akiliutinullu naatsorsuereernermi akiliisitsinernut takussutissiaq umiarsualivimmi oqartussaasup ilannguttassavaa.

Kommunit sumiiffinnik aamma akiliutit annertussusaannik nalunaarutiginninnerat

  § 7.  Avatangiisinut aserfallatsaaliuinermullu akiliutinik tamatuma kingorna akiliisitsiniarnissaq siunertaralugu, ukiumut aggersumut sumiiffiit attuumassuteqartut tassungalu atasut akiliutit annertussusissaat ukiup siuliani kingusinnerpaamik ulloq 1. oktobari kommunit akileraaruseriffimmut nalunaarutigissavaat, taamaattoq takuuk imm. 2.

  Imm. 2.  Imm. 1-imi akiliutit annertussusissaat nalunaarutigineqartut niunermi ataatsimi ilaasumut ataatsimut annerpaamik 50 kr.-nik annertussuseqarsinnaapput. Ilaasut niunersut niunnginnersulluunniit apeqqutaatinnagit nunamut niunermi ilaasut umiarsuarmiittut amerlassusaannut akiliutissaq akileqquneqassaaq.

Kommunit akiliutinit isertitanik atuinerat

  § 8.  Kommunit avatangiisinut aserfallatsaaliuinermullu akiliutinit isertitat, akiliutip siunertaanut, tassaasumut najukkami nunallu immikkoortuani takornariaqarnermut tunngavissiinissaq siuarsaanissarlu, kiisalu tamatumani sunniutaanerlussinnaasunik pakkersimaarnissaq, naapertuuttumik taamaallaat atorsinnaavaat.

  Imm. 2.  Akiliutinit isertitat kommunit ilaatigut pitsaaliuinermut iliuusissanut, atortorissaarutinik pioreersunik aserfallatsaaliuinermut imaluunniit pitsanngorsaanermut kiisalu atortorissaarutinik nutaanik sanaartornissamut atorsinnaavaat. Taakkua assersuutigalugu tassaasinnaapput tassaasinnaapput umiarsualivimmi, talittarfeqarfimmi, niusarfinni puttasuni il.il. imaluunniit eqqaanni imaluunniit sinerissami imaluunniit pinngortitami niusarfinni akulikitsumik orninneqartartuni takornariartarfiit imaluunniit perusuersartarfiit.

  Imm. 3.  Sumiiffiit avataanniittut avatangiisinut aserfallatsaaliuinermullu akiliummik akiliisitsinissaq siunertaralugu, takuuk § 7, kommuninit toqqarneqartut aammalu akileraaruseriffimmut nalunaarutigineqartut, sumiiffik takornariat amerlinerannit sunnerneqarsimappata, akiliutinit isertitat iluaqutigisinnaavaat. 

  Imm. 4.  Kommunit isertitanut aammalu aningaasartuutinut taakkunannga isertitanit matussuserneqartunut naatsorsuutinik allattuissapput. Kommunit naatsorsuutaannik saqqummiinermi akiliutinit isertitat atorneqarnerat nassuiarneqassaaq.

Pillaanissamut aalajangersakkat

  § 9.  Piaaraluni, imaluunniit mianersuaalliorujussuarluni § 3, imm. 1, 1. imm., § 5, imm. 1, 1., 4. aamma 5. imm., § 5, imm. 2, imaluunniit § 6, imm. 1-imik unioqqutitsisoq, allatulluunniit iliuuseqartoq akiliisitsinermik pineqaatissinneqassaaq, tassalu inatsisit allat malillugit allatut pineqaatissiisoqartussaasimanngippat.

  Imm. 2.  Unioqqutitsisoq aktiaatileqatigiiffiuppat, piginneqatigiiffiuppat, piginneqatigiilluni ingerlatseqatigiiffiuppat assigisaanilluunniit, ingerlatseqatigiiffik taamatut akiliinissamik akisussaatinneqarsinnaavoq.

Atuutilersitsinermut, ikaarsaarnermut atorunnaarsitsinermullu aalajangersakkat

  § 10.  Nalunaarut manna ulloq 21. december 2023 atuutilerpoq.

  Imm. 2.  Peqatigisaanik umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit nalunaarut nr. 5, 7. marts 2003-meersoq atorunnaarsinneqarpoq.

  Imm. 3.  § 7, imm. 1-imi akileraaruseriffimmut nalunaarutiginninnissamut killigititaq, 2023-mi ulloq decembarip aallaqqaataanut allanngortinneqarpoq.

Namminersorlutik Oqartussat, ulloq 20. december 2023

Erik Jensen (atsior.)

Aningaasaqarnermut Akileraartarnermullu Naalakkersuisoq

/ Nikolai S. Christensen (atsior.)