Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaat
Aalisarneq pillugu Inatsisartut inatsisaanni nr. 18, 31. oktober 1996-imeersumi, ilaatigut Inatsisartut inatsisaatigut nr. 12, 3. december 2012-imeersukkut, Inatsisartut inatsisaatigut nr. 18, 3. juni 2015-imeersukkut kingullermillu Inatsisartut inatsisaatigut nr. 28, 28. november 2016-imeersukkut allanngortinneqartumi § 8, imm. 2, § 9, imm. 1, § 10, § 10 a, § 10 b, imm. 1 aamma 2, § 11, § 13, imm. 2 aamma 3, § 14, imm. 2 aamma 5, § 21, imm. 2, §§ 23-25, § 26, imm. 1, § 33, imm. 1, nr. 2-4, aamma imm. 2 aamma 3, § 34, imm. 3 aamma § 38, imm. 3 malillugit aalajangersarneqarpoq:
Kapitali 1
Atuuffissaa nassuiaatillu
Atuuffii
§ 1. Nalunaarut atorneqassaaq inuussutissarsiutigalugu aalisarneq pineqartillugu:
1) Angallatit Kalaallit Nunaanni nalunaarsorsimasut atorneqarneranni.
2) Umiatsiaaqqat atorneqarneranni.
3) ATV-t, qamuteralaat qimussillu atorneqarneranni.
4) Angallatit nunanit allaneersut Kalaallit Nunaata aalisarnikkut oqartussaaffigisaani aalisartut atorneqarneranni
5) Angallatit nunanit allaneersut kalaallit pisassiissutaannik Kalaallit Nunaata aalisarnikkut oqartussaaffiata avataani aalisartut atorneqarneranni.
Imm. 2. Taakku saniatigut nalunaarut inuussutissarsiutiginagu aalisarnernut akuersissummik piumasaqarfiusunut atuutissaaq.
Nassuiaatit
§ 2. Nalunaarummi matumani paasineqassaaq:
1) "Aalisarneq pillugu inatsit" tassaavoq Kalaallit Nunaanni aalisarneq pillugu inatsit qaqugukkulluunniit atuuttoq.
2) "Kalaallit Nunaata aalisarnikkut oqartussaaffia" tassaavoq Kalaallit Nunaata aningaasarsiornikkut immikkut oqartussaaffia, Statsministereqarfiup tamanna pillugu nalunaarutaa aalajangersarneqarsimasoq naapertorlugu kiisalu Kalaallit Nunaata imartatut oqartussaaffigisaa.
3) ”Tunngaviusumik titarneq" ima paasineqassaaq, Kalaallit Nunaata aningaasarsiornikkut oqartussaaffigisaa pillugu Statsministereqarfiup nalunaarutaani aalajangersarneqarsimasut titarnerit tunngaviusut.
4) "Tunu" ima paasineqassaaq, Kalaallit Nunaata aalisarnikkut oqartussaaffigisaa inissisimasoq 59°N-ip avannaata tungaani 44°V-ip kangiani aamma 59°N-ip kujataata tungaani 42°V-ip kangiani tassungalu atasuit kangerluit.
5) "Avataasiorluni aalisarneq" imatut paasineqassaaq aalisarneq tunngaviusumik titarnermiit 3 sømilit avataanni aamma Kalaallit Nunaata aalisarnikkut oqartussaaffigisaata avataani ingerlanneqartoq.
6) "Sinerissamut qanittumi aalisarneq" tassaavoq aalisarneq Kalaallit Nunaata aalisarnikkut oqartussaaffigisaani tunngaviusumik titarnermiit 3 sømilit avataaniit timaani ingerlanneqartoq.
7) Uuttuinermi ”BRT” ima paasineqassaaq brutto register tonnage uuttuinermilu ”BT” ima paasineqassalluni bruttotonnage, umiatsiaaraq angallalluunniit BRT aamma BT malillugu uuttorneqarpat uuttueriaaseq BT atorneqassaaq.
8) ”T.t” tassaavoq uuttueriaaseq isumaqartoq tamakkerlugu takissusia. “T.t” tassaavoq narlorissumik titarlugu angallatip siuata siorpiaanut aquata aqorpiaanut tamakkerlugu takissusia.
9) ”Tulaassisussaatitaaneq” ima paasineqassaaq pisarineqartut, Kalaallit Nunaanni nunami suliffissuarmut piareersarlugit suliarineqanngitsut tunineqartussat.
10) ”Suliarineqartut” ima paasineqassaaq, pisat suliarineqartut, passunneqartut poortorneqartulluunniit pillugit killiliinertaqanngitsumilli sulineq, tisaneq, asiunaveersaaneq, qerititsineq, pujoorineq, tarajorterineq, uutsineq, tarajornitsumik "qajulerlugit" uninngatitsineq, panertitsineq imaluunniit allatut piareersaaneq. Suliarineqartunut ilaanngillat saliinerit, niaquiaanerit sikulersuineriluunniit.
11) "Taamaaqataanik akuersissut" ima paasineqassaaq, uumasoqatigiiaat assinginik aamma avataasiornermi imaluunniit sinerissamut qanittumi angallatini immikkoortut taamaaqataanit aalisarsinnaanermut akuersissut, ukiup siuliani qinnuteqartup pigisimasaa.
12) ”Nutaamik ingerlatsilersut” ima paasineqassapput, inuit imaluunniit inatsisitigut pisinnaatitaasut pisussaatitaasullu aalisartut ukiumi qaangiuttumi aalisarnermut qinnutigineqartumut taamaaqataanik akuersissummik peqarsimanngitsut.
13) "Angallat" ima paasineqassaaq, aalisarnermi atorneqartoq assartuut.
14) ”Umiatsiaaraq” ima paasineqassaaq, angallat sunaluunniit 6 meterinik takissusillit (t.t.) imaluunniit naannerusumik takissusilik aalisarnermut atorneqartoq.
15) "Attartornissamik isumaqatigiissut” ima paasineqassaaq angallammik attartorneq, inuttaqartillugu (akunnikkaarlugit attartorneq) imaluunniit inuttaqartinnagu attartorneq (bareboat-charter), aalisakkanut aalajangersimasunut piffissamilu aalajangersimasumut aalisarnermut atorneqartussaq.
Kapitali 2
Akuersissut aamma atugassarititaasut
§ 3. Inuussutissarsiutigalugu aalisarneq kiisalu akuersissuteqartussaatitaalluni inuussutissarsiutiginagu aalisarneq taamaallaat ingerlanneqarsinnaavoq aalisarnermut akisussaasumit naalakkersuisoqarfimmit atulersinneqarsimasoq akuersissut atorlugu.
Imm. 2. Akuersissut piginnittumut aalajangersimasumut ataatsimut aamma angallaqateqarluni aalisarnissamut imaluunniit umiatsiaararsorluni aalisarnissamut atulersinneqartarpoq.
Imm. 3. Akuersissummik pigisaqartup angallat aalisarnermut atugarineqartoq pigissavaa, tamannali attartornissamik isumaqatigiissuteqarnermi atuuttanngilaq.
Imm. 4. Angallatit, umiatsiaaqqat, ATV, qimussit qamuteralaallu taamaallaat atorlugit aalisartoqarsinnaavoq.
§ 4. Aalisarnermut akisussasoq naalakkersuisoqarfik akuersissummik atulersitsinermi piumasaqaatinik atugassarititanillu aalajangersaasinnaavoq, tassunga ilanngullugit tulaassisussaatitaaneq pillugu piumasaqaatit.
Imm. 2. Piumasaqaatit atugassarititallu akuersissummi atulersinneqartumi takuneqarsinnaassapput.
§ 5. Angallammik aalisarnissamut akuersissummi atulersinneqartumi angallat angallatilluunniit aalisarnermik ingerlatsisussat allanneqassapput, taamaattorli takuuk imm. 2.
Imm. 2. Nipisanniarnermi aamma t.t. 6 meterit sinnerlugit takissusilinni angallatinik bundgarnersorluni aalisarnermi tapertatut umiatsiaaqqat atorneqarsinnaapput. Imm. 1 umiatsiaaqqat atorlugit aalisarnermi atorneqassanngilaq.
§ 6. Umiatsiaararsorluni aalisarnermut akuersissut inuup nammineq pigisaraa, akuersissummillu pigisaqartoq aalisarnermi pisallu tunineqarneranni peqataasassaaq.
§ 7. Aalisarnerup aallartinnginnerani, nanginneqannginnerani ingerlatileqqinnginneranilu akuersissummut tunngassuteqartunut allannguutit tamarmik aalisarnermut akisussaasumit naalakkersuisoqarfimmit akuerineqassapput, tassanilu ilaapput piginnittuunermut tunngasutigut allannguinerit aamma angallatinik sunilluunnit akuersissummut tunngassuteqartunik taarsiinerit.
§ 8. Inuk imaluunniit inatsisitigut pisinnaatitaasoq pisussaatitaasorlu umiatsiaaqqamik aamma angallammik sinerissamullu qanittumi aalisarnissamut akuersissummik ataatsikkut piginnittuusinnaanngilaq.
Imm. 2. Motorimik ajutoornerup, amutsivimmiinnerup, sikuunerata malitsigisaanik angallat ingerlatsisinnaanngippat, sinerissamut qanittumi angallammik aalisarnissamik akuersissutaatilik umiatsiaaqqamik aalisarnissamut immikkut akuerineqarnissamik aalisarnermut akisussaasumut naalakkersuisoqarfimmut allakkatigut qinnuteqarsinnaavoq. Immikkut akuersissut piffissami angallatip ingerlatsinnginnerata nalaani taamaallaat tunniunneqarsinnaavoq.
§ 9. Akuersissut taassumaluunniit assilinera, taakkununngalu ilanngullugu assilinera elektroniskiusoq, aalisarnerup nalaani akuersissutaatillip angallammiitissavaa imaluunniit umiatsiaaqqamiitissavaa.
Kapitali 3
Angallatit atorlugit inuussutissarsiutigalugu aalisarneq
§ 10. Angallatit inuussutissarsiutigalugu aalisarnermut atorneqartussat allakkatigut qinnuteqarnikkut aalisarnermut akisussaasumit naalakkersuisoqarfimmit akuerineqassapput.
Imm. 2. Aalisarnermut akisussaasup naalakkersuisoqarfiup angallatit taamaallaat akuerisinnaavai, uku tunngavigalugit:
1) Piginnittuunermut pissutsit tamanna pillugu aalisarnermut inatsimmi aalajangersakkanut naapertuuppata, aamma
2) angallatip aalisarsinnaassusia aalisarnissamut periarfissanut atuuttunut naleqqussagaasutut nalilerneqarpat.
Imm. 3. Inuiaassutsimut uppernarsaatip aammalu usitussutsimut uuttuutip assilineri qinnuteqaammut ilanngullugit nassiunneqassapput. Angallat tamatuma kingorna uuttortaqqinneqarpat, motooria pingaarneq taarserneqarpat allatulluunniit annertuumik allanngortinneqarpat, uuttuutaa eqqortoq nutaaq uuttuutaanut allagartap tiguneraniit ullut 14-it qaangiutsinnagit nassiunneqassaaq.
Imm. 4. Angallatip piginnittua, atia imaluunniit GR-normua tamatuma kingorna allanngorpat inuiaassutsimut uppernarsaat eqqortoq nutaaq inuiaassutsimut uppernarsaatip tiguneqarneranit ullut 14-it qaangiutsinnagit nassiunneqassaaq.
Imm. 5. Angallat avataasiortoq imaluunnit sinerissamut qanittorsiortoq allamit pigineqalerpat, pisinermut isumaqatigiissut, pisisumit tunisisumillu atsiorneqarsimasoq uppernarsaataagallartutut akuerineqassaaq, inuiaassutsimut uppernarsaatip nutaap tunniunneqarnissaata tungaanut.
§ 11. Angallatit uuttorneqarneri naapertorlugit 75 BRT/120 BT ataassimappagit taamatullu usitutigisut sinerissamut qanittumi taamaallaat aalisarsinnaapput, taamaattoq imm. 3-5 takukkit.
Imm. 2. Angallatit uuttorneqarneri malillugit 75 BRT/120 BT sinnerlugit nalunaarneqarsimasut taamaallaat avataani aalisarsinnaapput, taamaattoq imm. 4 aamma 5 takukkit.
Imm. 3. Imm. 1 saattuarniarnermi kapisilinniarnermilu atuutinngilaq.
Imm. 4. Imm. 1 aamma 2 uiluinniarnermi atuutinngillat.
Imm. 5. Raajarniarsinnaatitaaneq imartani Kalaallit Nunaata aalisarnikkut oqartussaaffigisaani sumiiffinnut periarfissiinermut atatillugu raajarniarneq pillugu nalunaarut qaqugukkulluunniit atuuttoq malillugu malittarisassaqartinneqarpoq.
§ 12. Angallatip takissusia nalornissutigineqarpat oqartussaasunit piginnaatinneqartunit Søfartsstyrelsenimit akuerisaasunit, angallatip nutaamik uuttortarneqarnissaanik piginnittoq Kalaallit Nunaanni Aalisarsinnaanermut Akuersissutinik Nakkutilliisoqarfimmit peqquneqarsinnaavoq.
Kapitali 4
Akuersissuteqariaatsit
Piffissamik killiliilluni akuersissut pisarineqarsinnaasut annertunerpaaffilerlugit
§ 13. Piffissamut killeqartumut pisarineqarsinnaasut annertunerpaaffilerlugit akuersissut, tassaavoq inuussutissarsiutigalugu aalisarnissamut tunngaviusoq:
1) Angallatit 75 BRT/120 BT-it sinnerlugit usitussusillit atorneqarneranni
2) uiluinniarnermi, angallatit angissusiat apeqqutaatinnagit,
3) aalisarneq pillugu oqartussaaffinni nunat allat imaluunniit nunarsuup immikkoortuini aalisarneq pillugu suleqatigiiffiit aalisarnermik malittarisassiorsinnaanermut pisinnaatitaaffigisaanni angallatit Kalaallit Nunaanni nalunaarsorneqarsimasut atorneqarneranni, aamma
4) angallatit nunat allaneersut Kalaallit Nunaata aalisarnikkut oqartussaaffigisaaniittut atorneqarneranni.
Imm. 2. Piffissamut killeqartumut pisarineqarsinnaasut annertunerpaaffilerlugit akuersissut, tassaavoq nunat tamalaat imartaanni malittarisassaqartitsiviunngitsuni inuussutissarsiutigalugu aalisarnermut tunngaviusoq.
Imm. 3. Akuersissummik tunniussinermut tunngavigineqarput aalisagaqatigiit pillugit pisassiissutitut aalajangersarneqartut nalilerneqarnerat, qinnuteqartut akornanni piginnaasat annertussusiat, aamma tunniussinermi piumasaqaatit Naalakkersuisunit aalajangersarneqartut, takuuk § 28.
Imm. 4. Akuersissut ukiut pisassiiffiusut ataasiakkaarlugit atulersinneqartarpoq. Ilisimatuussutsikkut siunnersuineq ukiunut arlalinnut atuuppat akuersissummik ukiunut pisassiiffiusunut arlalinnut atuuttumik tunniussisoqarsinnaavoq.
Piffissamik killiliilluni akuersissut pisarineqarsinnaasut annertunerpaaffilernagit
§ 14. Piffissamut killeqartumut pisarineqarsinnaasut annertunerpaaffilernagit akuersissut, tassaavoq akuersissut inuussutissarsiutigalugu aalisarnermut tunngaviusoq:
1) uumasoqatigiinnik angallatinit Kalaallit Nunaanni nalunaarsorneqarsimasunit ataatsimoorullugu aalisarneqarsinnaasunik pisassiisoqartillugu,
2) immikkut pisoqarnerani angallatit Kalaallit Nunaanni nalunaarsorneqarsimasut atorlugit, tamatumani pisassiissutinik aalajangersaanissamut ilisimatuussutsikkut siunnersuinermik tunngavissaqartitsinnginnermi, aamma
3) angallatit nunanit allaneersut Kalaallit Nunaata aalisarnikkut oqartussaaffigisaaniittut atorlugit.
Imm. 2. Imm. 1, nr. 1 aamma 2 naapertorlugit akuersissut atulersinneqartoq § 20 aamma § 22 tunngavigalugit pisassaaq.
Imm. 3. Imm. 1, oqaaseqatigiit 3 naapertorlugu akuersissummik tunniussineq nunat tamalaat isumaqatigiissutaat tunngavigalugit pisassaaq.
Imm. 4 Akuersissut ukiut ataasiakkaarlugit tunniunneqartassaaq. Ilisimatuussutsikkut siunnersuineq ukiunut arlalinnut atuuppat akuersissummik ukiunut arlalinnut atuuttumik tunniussisoqarsinnaavoq.
§ 15. Piffissamut killeqartumut pisarineqarsinnaasut annertunerpaaffilernagit akuersissut tassaavoq umiatsiaararsorluni inuussutissarsiutigalugu aalisarnissamut tunngaviusoq.
Imm. 2. Imm. 1 naapertorlugu akuersissummik atulersitsineq § 20 aamma § 22 tunngavigalugit pisassaaq.
Piffissamik killiligaanngitsumik akuersissut pisarineqarsinnaasut annertunerpaaffilerlugit
§ 16. Piffissamik killiliinani pisarineqarsinnaasunik amerlanerpaaffiliinerit raajarniarnermi angallatillu atorlugit sinerissamut qanittumi qaleralinniarnermi tunngaviussapput.
Imm. 2. Piginnittup pisassiissutinit pigisai akuersissummi allaqqasarput. Pisassiissutinit pigisat tassaapput pisassiissutit tamarmiusut pisassiiffiusumi uumasoqatigiinnik pineqartunik Naalakkersuisut aalajangersarsimasaasa procentinngorlugit ilaat.
Imm. 3. Piffissamik killiliinani pisarineqarsinnaasut annertunerpaaffilerlugit akuersissummut atatillugu ukiut tamaasa ukioq pisassiiffiusoq aallartitsinnagu ukiumoortumik pisassiissutit pillugit nalunaarut tunniunneqassaaq, ukiumi pineqartumi annertussutsit tunisassiornissamullu akuersissutaasinnaasut taaneqarlutik.
Kapitali 5
Pisassiissutinik nuussineq
§ 17. Angallateqarluni raajarniarnermut imaluunniit sinerissamut qanittumi qaleralinniarnermut atatillugu piffissamut killiligaanngitsumut akuersissuteqartoq umiarsuaatileqatigiiffik, takuuk § 16, imm. 1, ukiumoortumik pisassiissutaatiminik tamakkerlugit aalisarsimasoq, imm. 2 naapertorlugu qinnuteqartoqarneratigut ukiumi pineqartumi novembarip 15-iata kingorna aalisarnerup ingerlatiinnarnissaanut akuerineqarsinnaavoq. Ukiumoortumik pisassiissutit saniatigut pisarineqartut annertussusii ukiup tulliani aalisariutaatileqatigiiffimmut ukiumoortumik pisassiissutigineqartunit ilanngaatigineqassapput.
Imm. 2. Qinnuteqaat aalisarnerup kissaatigineqartutut nanginneqarnissaa kingusinnerpaamik sapaatit akunneri marluk sioqqullugit aalisarnermut akisussaasumut naalakkersuisoqarfimmut nassiunneqassaaq aamma aalisarusutat annertussusii allanneqarsimassallutik.
§ 18. Raajarniarnermut imaluunniit sinerissamut qanittumi qaleralinniarnermut atatillugu piffissamik killiligaanngitsumik akuersissutaatilik umiarsuaatileqatigiiffik, takuuk § 16, imm. 1, ukiumut pisassiissutaatimi ilaannik tamakkerlugit aalisarsimanngitsoq, ukiup siuliani pisarineqanngitsut amerlaqataannik ukiumi tulliuttumi ukiumut pisassiissutinik qaffaaffigineqarsinnaavoq. Pisassiissutinit annertussutsit nuunneqartut raajarniarnermi kingusinnerpaamik 30. april pisarineqarsimassapput qaleralinniarnermilu kingusinnerpaamik 1. juli pisarineqarsimassallutik. Ukiumut raajat qaleralillu pisassiissutit nuunneqartut annertussusii aalisarneqanngitsoortut tulleriinneri malillugit 30. april aamma 1. julimi atorunnaassapput.
Imm. 2. Ukiup siuliani pisassiissuteqarfiusumiit ukiumut pisassiissutinit sinerissamut qanittumi qalerallit nuunneqarsimasut annertussusillit ulloq 1. juulip kingorna aalisarneqanngitsut atorunnaarsinneqarsimappata sumiiffimmi 47-mi sinerissamut qanittumi angallateqatigiit marluusut akornanni ukiumut pisassiissutit taakku Naalakkersuisunit agguaateqqinneqarsinnaapput.
§ 19. Ukiumut pisassiissutinit nuunneqartut, takuuk §§ 17 aamma 18, niiverutigineqarsinnaanngillat ukiumullu pisassiissutinik nuussiffigineqarsimasumit umiarsuaatileqatigiiffimmit aalisartumilluunniit aalisarneqassallutik.
Kapitali 6
Akuersissummik qinnuteqarneq
Sinerissamut qanittumi aalisarnermi akuersissutinik tunniussisarneq
§ 20. Akuersissut, takuuk § 14, imm. 1, nr. 1 aamma 2 aamma § 15, taamaallaat ukiup siuliani taamaaqataanik akuersissuteqarsimasumut ingerlatsisumut kiisalu imm. 3 imaluunniit § 22 naapertorlugu immikkut akuerineqarsimasumut ingerlatsisumut atulersinneqarsinnaavoq. Akuerissutip atulersinnissaanut tunngaviuvoq qinnuteqarsimaneq, takuuk § 21.
Imm. 2. Akuersissut, takuuk § 14, imm. 1, nr. 1 aamma 2, aamma § 15, decembarip aallaqqaataatinnagu iluaqutigineqarsimanngippat ukiumi tulliuttumi akuersissutip atulernissaanut pisinnaatitaaffik atorunnaassaaq.
Imm. 3. Qinnuteqarsimannginneq pissutigalugu, takuuk imm. 1, imaluunniit iluaqutigisimannginneri pissutigalugit, takuuk imm. 2, akuersissutip atulernissaanut pisinnaatitaaffimmik annaasaqarsimasoq qinnuteqartoq immikkut akuerineqarnissaq pillugu qinnuteqaateqarsinnaavoq, takuuk § 22, tamanna ima peqquteqarpat
a) qinikkatut pisortanillu toqqakkatut suliaqarneq,
b) inuussutissarsiutigalugu kattuffinni siulersuisuni sulineq,
c) ilinniartitaaneq imaluunniit qanigisap ilinniartitaanera,
d) umiiarneq,
e) amutsivimmiinneq,
f) napparsimaneq,
g) ilaquttani qanigisani toqusoqarnera imaluunniit ilungersunartumik napparsimasoqarnera, imaluunniit
h) tunitsivissaqannginneq.
Imm. 4. Pisup pineqartup pisimaneranut peqqissaarussamik uppernarsaat nassiunneqarsimappat taamaallaat immikkut akuersisoqarsinnaavoq.
§ 21. Umiatsiaaqqamik sinerissamut qanittumi aalisarsinnaanermut akuersissummik qinnuteqaat qinnuteqartup kommunimi najugaanut qinnutigineqassaaq. Qinnuteqarnermut immersugassaq www.sullissivik.gl aqqutigalugu pissarsiarineqarsinnaasoq qinnuteqartup atussavaa.
Imm. 2. Angallammik sinerissamut qanittumi akuersissummik qinnuteqaat aalisarnermut akisussaasumut naalakkersuisoqarfimmut tunniunneqassaaq. Qinnuteqarnermut immersugassaq www.sullissivik.gl aqqutigalugu pissarsiarineqarsinnaasoq qinnuteqartup atussavaa.
§ 22. § 20-mi piumasaqaammiit ingerlatsisussat nutaat immikkut akuerineqarnissaq pillugu qinnuteqassapput. Siunertamut tassunga www.sullissivik.gl-imi nassaarineqarsinnaasoq qinnuteqarnermut immersugassaq qinnuteqartumit atorneqassaaq.
Imm. 2. Sumut atassuteqarnermut akileraartussaanermullu aalisarneq pillugu inatsimmi piumasaqaatinik naammassinnittunut qinnuteqartunut 18-inik ukioqalersimasunut immikkut akuersisoqarsinnaavoq, taamaattorli takuuk §§ 23 aamma 24. Sinerissamut qanittumi qaleralinniarneq eqqarsaatigalugu 18-inik ukioqalersimasunut 29-illu ukioqalersimasunut qinnuteqartunut taamaallaat immikkut akuersisoqarsinnaavoq. Tamatuma saniatigut qinnuteqartup piumasaqaatit uku naammassisimassavai:
1) imarsiornermi aalisarnermik ilinniarsimaneq imaluunniit allatigut assingusumik piginnaasaqalersimaneq, aamma
2) pigineqassapput angallat kiisalu aalisaatit aalisarnermi atugarineqartussat.
Imm. 3. Assingusunik piginnaaneqarnissaq, takuuk imm. 2, oqaaseqatigiit 1, qinnuteqartup aalisarnermik piginnaasai pillugit makkunanit oqaaseqaateqartitsinikkut uppernarsarneqarsinnaapput:
1) kommunimit najukkamit,
2) najukkami aalisarnermut piniarnermullu peqatigiiffimmit,
3) inuup qinnuteqartup aalisaqatigisimasaanit, imaluunniit
4) maanna sulisitsisumit siusinnerusukkulluunniit sulisitsisuusimasumit.
Imm. 4. Qinnuteqartoq inuussutissarsiutigalugu piniarnermut imaluunniit inuussutissarsiutigalugu aalisarnermut akuersissutaateqarpat siornatigulluunniit akuersissutaateqarsimappat qinnuteqartup assingusunik piginnaasaqarneranik nalilersuinermi tamanna ilaassaaq.
§ 23. Qinnuteqartoq aalisariummi ukiuni 15-ini kingullerni sumiissusersiortutut aalisartutulluunniit ukiut tallimat sinnerlugit assingusumik suliffeqarsimasoq § 22, imm. 2-mi qanoq ukioqarnissamik piumasaqaammut ilaatinneqanngillat. Akuersissummik qinnuteqarnermi suliffeqarnikuunermik uppernarsaatit nassiunneqarnerisigut tamanna uppernarsarneqassaaq.
§ 24. Allakkatigut qinnuteqareernerup kingorna aalisarnermut akisussaasoq naalakkersuisoqarfik Qaanaami Tunumilu najugalinnut § 20, imm. 1 aamma § 20, imm. 2-mi nr. 1-mi aamma 2-mi piumasaqaatinit immikkut akuersissummik tunniussisinnaavoq.
§ 25. Naalakkersuisoqarfiup aalisarnermut akisussaasup §§ 20-24-mi naliliinermi atugassanik qinnuteqartoq pillugu paasissutissat pisariaqartinneqartut ukunannga pissarsiarisinnaavai:
1) kommuni najugaqarfigisaq,
2) najukkami aalisarnermut piniarnermullu peqatigiiffik,
3) qinnuteqartup sulisitsisorisimasai.
§ 26. Aalisagaqatigiit pillugit qinnuteqartumut akuersissutip atulersinnissaanut naammassisimasassaanik immikkut piumasaqaateqarsinnaavoq.
Imm. 2. Piumasaqaatit, takuuk imm. 1, aalisagaqatigiinnik pineqartunik aalisarnissamut nalunaarummi qaqugukkulluunniit atuuttumi allassimassapput.
Avataasiorluni aalisarnermi akuersissutinik atulersitsisarneq
§ 27. Avataasiorluni aalisarsinnaanermut akuersissummik qinnuteqaat aalisarnermut akisussaasumut naalakkersuisoqarfimmut tunniunneqassaaq. Avataasiorluni aalisarsinnaanermut qinnuteqarnermut immersugassaq www.sullissivik.gl aqqutigalugu pissarsiarineqarsinnaasoq qinnuteqartup atussavaa.
Imm. 2. Qaammatisiutit ukiuannut tullermut aalisarsinnaanermut akuersissummik qinnuteqaat, takuuk imm. 1, aalisarnermut akisussaasup naalakkersuisoqarfiup novembarip aallaqqaataa nallertinnagu tigoreersimassavaa.
§ 28. Pisassiissutinik agguaaneq, takuuk § 13, imm. 3, atugassarititat makku tunngavigalugit pissaaq:
1) Ukiup siuliani pisassiissuteqarsimasunut umiarsuaatileqatigiiffinnut aamma aalisagasaqatigiinnut ataasiakkaanut TAC-p ilaanut umiarsuaatileqatigiit ataasiakkaat pisassaat aallaavigalugit pisassiissutit agguaanneqassapput, tassa umiarsusaatileqatigiit pisassiissutinit piviusumik qaqitaat eqqarsaatigineqarsinnaammata.
2) Agguaassinerup kingorna pisassiissutinit sinneruttoqarpat, takuuk nr. 1, pisassiissutit umiarsuaatileqatigiinnut pioreersunut imaluunniit naalakkersuisoqarfimmit akisussaasumiit naliliisoqarneratigut umiarsuaatileqatigiinnut nutaanut agguaanneqarsinnaallutik. Naliliinermi ilaatigut umiarsuaatileqatigiit immikkut pisassiissutinik pisariaqartitsisinnaanerat, aalisarnerup nunap ilaani ineriartornera, aningaasarsiornikkut piujuartitsisumik umiarsuaatileqatigiit qulakkeerneqarnissaat eqqarsaatigineqarsinnaapput, tassunga ilanngullugu umiarsuaatileqatigiit nutaat ukioq naallugu aningaasarsiornikkut piujuartitsisinnaanerat kiisalu inuiaqatigiit aningaasarsiornikkut sapinngisamik annertunerpaamik iluanaaruteqarnissaat.
Kapitali 7
Misileraalluni aalisarneq
§ 29. Inuussutissarsiutigalugu misileraalluni aalisarsinnaanermut kiisalu tassunga akuersissummik qinnuteqaat aalisarnermut akisussaasumut naalakkersuisoqarfimmut tunniunneqassaaq. Qinnuteqarnermut immersugassaq www.sullissivik.gl aqqutigalugu pissarsiarineqarsinnaasoq qinnuteqartunit atorneqassaaq.
Imm. 2. Misileraalluni aalisarnermik pilersitsinermut inassut, takuuk § 30, allaffissornikkut naliliineq malillugu pissaaq, tamatumanilu tunngavissat tullinnguuttut pingaartinneqarsinnaapput:
1) Misileraalluni aalisarnerup siunertaa,
2) uumasoqatigiit sorliit qinnuteqarfiuppat,
3) sumiiffik suna piffissamilu qaqugukkut taakku qinnuteqarfiuppat,
4) pisassatut naatsorsuutigineqartut amerlassusiat,
5) atortuutit periutsillu suut atorneqassappat,
6) uumasoqatigiit qinnuteqaatigineqartut amerlassutsinut tunngasutigut inuussutissarsiutigalugu misileraalluni aalisarnerup nammassinnaaneraat,
uumasoqatigiinnik pineqartunik, sumiiffimmik pineqartumik, atortuutinik imaluunniit teknologiimik nutaamik misissuinissamik pisariaqartitsisinnaanerup nalilernissaa, aamma
7) Pinngortitaleriffiup immami uumassuseqarfiusunik naliliinera.
§ 30. Aalisarnermut akisussaasumit naalakkersuisoqarfimmit inassuteqareernikkut inuussutissarsiutigalugu misileraalluni aalisarnermut akuersissutinik Naalakkersuisut pilersitsisinnaallutillu atulersitsisinnaapput, takuuk § 29.
Imm. 2. Misileraalluni aalisarnerup pilersinnissaanut minnerpaamik uku arlaat siunertaasariaqarpoq:
1) uumasoqatigiit ilisimasaqarfiunngitsut pisassiissutaasimanngitsullu,
2) sumiiffiit ilisimasaqarfiunngitsut imaluunniit uumasoqatigiit aalajangersimasut ilisimasaqarfiunngitsut misissuiffigineqarnissaat,
3) periutsit atortulluunniit nutaat atorlugit aalisarnerup ilisimatusarfigineqarnissaa,
4) aalisarnermi nalilinnik annertusaanerup annertuseriarnissaanut imaluunniit uumassuseqarfiusut kissaatiginngisatut sunnigaanerat annikilliniarlugu ilapittuuteqarniarnermi, tamatumunngalu atatillugu uumasoqatigiit amerlisaqqinnissaat pissutigalugu aalisarneq unitsinneqarsimappat, ilisimasanik nutaanik pilersitsiniarneq, imaluunniit
5) tamanna naleqquttutut nalilerneqarpat aalisarnerit misileeqqiffiusinnaanerat.
Imm. 3. Inuussutissarsiutigalugu misileraalluni aalisarnermik pilersitsinermi misileraalluni aalisarnermi peqataasinnaanermut siunertat aamma tunngavissat atugassarititaasullu immikkut nassuiarneqassapput. Piumasaqaatit atugassarititallu tassaasinnaapput:
1) aalisakkat suut aalisarneqassanersut,
2) pisassiissutit annertussusaat,
3) sumiiffiit,
4) atortut,
5) qinnuteqarnissamut piffissaliussat, kiisalu
6) nalunaarusiortarnerit akuttussusissaat misiligutissanillu tigusisarnissaq pillugu piumasaqaatit.
§ 31. Inuussutissarsiutigalugu misileraalluni aalisarsinnaanermut akuersissummik pisassiissutissallu amerlassusissaannut qinnuteqaat § 30 naapertorlugu aalisarnermut akisussaasumut naalakkersuisoqarfimmut tunniunneqassaaq. Qinnuteqartoq inuussutissarsiutigalugu aalisartuussaaq, umiarsuaatileqatigiiffimmiluunniit piginneqataassalluni imaluunniit ingerlatseqatigiiffiussalluni. Qinnuteqarnermut immersugassaq www.sullissivik.gl aqqutigalugu pissarsiarineqarsinnaasoq qinnuteqartut atussavaat.
Imm. 2. Qinnuteqaat, takuuk imm. 1, itigartitsissutigineqassaaq misileraalluni aalisarnissamut siunertaq kiisalu piumasaqaatit atugassarititaasullu qinnuteqartup naammassisinnaanngikkunigit, takuuk § 30, imm. 2 aamma 3.
Imm. 3. Akuersissummik pisassiissutillu amerlassusaanik tunniussinermut qinnuteqaatit ataasiakkaat nalilersornerisigut pisassaaq, immikkoortut makku pingaartinneqassallutik:
1) Qinnuteqartut qassiunerat pisassiissutit ataatsimut amerlassusiannut naleqqiullugit.
2) Angallatip atortulersuutillu piukkunnassusai inuussutissarsiutigalugu misileraalluni aalisarnermi siunertamik pitsaanerpaamik naammassinnissinnaaneq isiginiarneqarluni.
3) Qinnuteqartup piginnaasai misilittagaalu, inuussutissarsiutigalugu misileraalluni aalisarnermi siunertamik pitsaanerpaamik naammassinnissinnaanera isiginiarneqarluni.
§ 32. Misileraalluni aalisarnissamut akuersissutit assigiinngitsut piffissamut killilimmut atuupput, tassaasinnaallutik pisarineqarsinnaasut amerlanerpaaffilerlugit imaluunniit pisarineqarsinnaasut amerlanerpaaffilernagit.
§ 33. Misileraalluni aalisarsinnaanermut akuersissut ukiut pisassiiffiusut ataasiakkaarlugit tunniunneqartarpoq.
§ 34. Misileraalluni aalisarnermit angusat pillugit nalunaaruteqarnerit akuersissummik pigisaqartumit aalisareernerup kingornatigut kingusinnerpaamik qaammatip ataatsip qaangiunnerani aalisarnermut akisussaasumut naalakkersuisoqarfimmut nassiunneqassapput.
§ 35. Naalakkersuisut ukiut tamaasa misileraalluni aalisarnernik arlaqartunik pilersitsisarput.
Imm. 2. Misileraalluni aalisarnerit, takuuk imm. 1, aalisarnermut akisussaasumit naalakkersuisoqarfimmit tusagassiorfinnut nalunaarutikkut tamanut saqqummiunneqartarput, tassanilu takuneqarsinnaassaaq piffissaq qinnuteqarnissamut killigititaasoq, kiisalu misileraalluni aalisarnerni assigiinngitsuni tunngaviit suut atorneqarnersut.
Kapitali 8
Angallatinik attartorneq
§ 36. Attartornissamik isumaqatigiissutit taamaallaat ataasiakkaaginnarlugit kalaallit angallataannit isumaqatigiissutaasinnaapput. Taamaammat angallat attartornissamik isumaqatigiissutinut arlalinnut atatillugu aalisarnermik ingerlatsisinnaanngilaq, imaluunniit ataatsikkoortitsilluni saniatigut attartornissamik isumaqatigiissuteqarsinnaanani.
§ 37. Umiarsuaatileqatigiit immikkut pisuni, soorlu ajutoornerni assingusuniluunniit, inuussutissarsiutigalugu aalisarnerup ingerlannissaanut kalaallit angallataannik utaqqiisaasumik attartornissaq pillugu aalisarnermut akisussaasumut naalakkersuisoqarfimmut qinnuteqarsinnaapput.
Imm. 2. Qinnuteqaammi ilanngunneqassapput:
1) tunngavilersuut,
2) immikkut pisut pillugit nassuiaat, aamma
3) attartornissamik isumaqatigiissut atsiugaq, tassanilu ilanngunneqassapput peqatigisaq attartortitsisoq aamma peqatigisaq attartortuusoq, angallat pineqartoq, akuersissutit sunniuteqarfigineqartut, kiisalu piffissaq angallammik attartorfiusussaq, tassanilu ilanngunneqassaaq piffissaq aallartiffissaq naammassiffissarlu.
§ 38. Attartornerup aallartinnerata naammassineratalu nalaani angallatit attartorneqartut tamarmik usilersortarfii imaqassanngillat.
§ 39. Aalisarnermut akisussaasumit naalakkersuisoqarfimmit akuerineqarluni qinnuteqartoq inuussutissarsiutigalugu aalisarnermik imaluunniit inuussutissarsiutigalugu misileraalluni aalisarnermik ingerlatsinissamut angallammik nunami allameersumik attartorsinnaavoq. Piginnaasanik pisariaqartunik, atortuutinik pisariaqartunik imaluunniit teknologiimik pisariaqartumik kalaallit angallataanni periarfissaqartoqannginnerani akuersissummik tunniussisoqarsinnaavoq, taakkununngalu atatillugu piumasaqaatit uku naammassineqarsimassapput:
1) Attartornissamik isumaqatigiissutip assilineqarnera qinnuteqartup nassiutissavaa, tassanilu taaneqarsimassaaq isumaqatigiissummi peqatigisaq attartortitsisoq, peqatigisaq attartortoq, attartornissamik isumaqatigiissutip sivisussusia ulloq aallartiffissaa naammassiffissaalu ilanngullugit, angallatip atia aamma siusinnerusukkut atia/atii, angallatip piginnittuata atia, najugaalu, angallatip nuna erfalasoqarfia. Ulloq naammassiffissatut nalunaarutigisaq sioqqullugu attartornissamik isumaqatigiissut atorunnaarsinneqarsimassappat, qinnuteqartup tamanna aalisarnermut akisussaasumut naalakkersuisoqarfimmut ingerlaannaq nalunaarutigissavaa.
2) Qinnuteqartup angallatip naalagaaffimmi sumi angerlarsimaffeqarneranut uppernarsaat, usitussutsimut uuttuutip kiisalu angallatip VMS-imik atortoqarnera IMO-millu normuata uppernarsaataasa assilinerat nassiutissavai.
3) Angallatip arlaannaatigulluunniit UNK pillugu allattuiffimmiinnginneranik uppernarsaat qinnuteqartup nassiutissavaa, naalagaaffiup erfalasoqarfiusup aalisarnermut oqartussaatitaaniit attuumassuteqartumiit tamatuminnga uppernarsaammik qinnuteqartup pissarsineratigut.
4) Naalagaaffik erfalasoqarfiusoq uku arlannut ilaasortaanera pillugu uppernarsaammik qinnuteqartoq nassiussissaaq:
a) Northwest Atlantic Fisheries Organization-imut (NAFO),
b) North-east Atlantic Fisheries Commission-imut (NEAFC), imaluunnit
c) Nunarsuup immikkoortuani aalisarnermik aqutsinermut suleqatigiiffimmik (RFMO), Naalagaaffiit Peqatigiit inuussutissat nunalerinerlu pillugit suleqatigiiffimmik (FAO), Port State Measures Agreement-imik (PSMA) aamma FAO-ip atuutilertissimasaanut International Plan of Action to Prevent, Deter and Eliminate Illegal, Unreported and Unregulated Fishing-imik (IUU) isumaqatigiissuteqarnikuusunut.
§ 40. Kalaallit Nunaata aalisarneq pillugu oqartussaaffigisaata avataani kalaallit angallataannik aalisarnermut nunanit allanit attartorneq aalisarnermut akisussaasumut naalakkersuisoqarfimmut qinnuteqareernikkut taamaallaat pisinnaavoq, piumasaqaatit uku malillugit:
1) Kalaallit angallatai attartornissamik isumaqatigiissummut atatillugu aalisaqqusaanngillat, sumiiffimmi pineqartumi aalisarnermut isumaqatigiissut atuussimassappat, aalisarnermullu isumaaqatigiissummi attuumassutilimmi allatigut aalajangiisoqarsimanngippat.
2) Kalaallit aalisariutaat attartornermik isumaqatigiissummut ilaatinneqartut piffissami pineqartumi kalaallit akuersissutaannik peqassanngillat. Piffissami attartornissamik isumaqatigiissuteqarfiusumi kalaallit akuersissutaat atorunnaarallassapput. Kalaallit angallataannit pisat attartornissamut isumaqatigiissummut ilaatinneqartut peqatigisap attartorfiusup naalagaaffiata aalisakkanik pisassiissutaannit ilanngaatigineqassapput.
3) Kalaallit aalisariutaat uumasoqatigiinnik nunat allat imartaanni taamaallaat aalisarsinnaapput taakku RFMO-mit aqunneqarsimassappata, RFMO-milu attuumassuteqartumi nuna pineqartoq atsioqataasutut atsioqataanngitsutulluunniit suleqataasutut peqatigineqarsimappat.
Kapitali 9
Sunngiffimmi aalisarnermut
§ 41. Sunngiffimmi aalisarneq akuersissummik piumasaqarfiunngilaq, taamaattorli takuuk §§ 42 aamma 43.
Imm. 2. Sunngiffimmi aalisartup pisat tunisinnaanngilai, tassami tunisinermi akuersissut piumasaqaataammat, taamaattorli takuuk § 43.
§ 42. Sunngiffimmi kapisilinniarnermi akuersissut piumasaqaataavoq.
Imm. 2. Sunngiffimmi kapisilinniarneq Namminersornerullutik Oqartussat kapisilinniarneq pillugu nalunaarutaatigut malittarisassaqartinneqarpoq.
§ 43. Sunngiffimmi aalisartunut saarullittassiissutinik tunineqarsinnaasunik Naalakkersuisut aalajangersaasinnaapput. Taakkuninnga pisassiissutinut akuersissut piumasaqaataavoq.
Imm. 2. Saarullinnik tunisinissamut akuersissummik qinnuteqartoq kommunimi angerlarsimaffigisamini qinnuteqassaaq, takuuk imm. 1.
Imm. 3. Qinnuteqartut, takuuk imm. 2, akuersissut pissarsiariniarlugu piumasaqaatit uku naammassisimavaat:
1) Qinnuteqartoq Kalaallit Nunaanni inuit nalunaarsorsimaffianni najugaqarfeqassaaq, ukiunilu marlunni siuliini Kalaallit Nunaanni inuit nalunaarsorsimaffianni najugaqarfeqarsimassalluni,
2) Kalaallit Nunaannut tamakkiisumik akileraartartussaatitaassaaq, qaammatisiutillu ukiuini kingullerni marlunni Kalaallit Nunaanni tamakkiisumik akileraartartussaatitaasimassalluni,
3) qinnuteqartoq inuussutissarsiutigalugu aalisartuussanngilaq,
4) akuersissut tunniunneqartoq tunitsivimmi takutinneqartassaaq,
5) uppernarsaatit tamarmik ersarissumik atuarneqarsinnaasumillu immersorneqassapput, aamma
6) saarullinnik tunisineq sunngiffimmi aalisartutut akuersissutaateqarfiusussaq taamaallaat pisinnaavoq inuussutissarsiutigalugu aalisartunut tunisineq unitsinneqarsimatinnagu.
Kapitali 10
Aalisarnerup unitsinnera
§ 44. Pisassiissutit imaluunniit ukiumut pisassiissutit tamakkerlugit aalisarneqaraangata, imaluunniit piffissaq aalisarfiusussaq naammassigaangat, aalisarneq ingerlaannartumik unitsinneqassaaq, aamma atortuutit tamarmik qaqinneqarlutik.
Imm. 2. Kalaallit angallataat umiatsiaaraallu ataatsimoorussamik pisassiissuteqarfiusunik aalisartut aalisarnerup unitsinneqarneranik Naalakkersuisut nittartagaatigut, peqataasutullu attuumassuteqartut, toqqaannartumik nalunaarfigineqassapput.
Imm. 3. Nunat allamiut angallataat Kalaallit Nunaata aalisarnermut oqartussaaffigisaani aalisartut aalisarnerup unitsinneqarnera pillugu aalisariutinut toqqaannartumik nalunaarfigineqassapput. Angallatinut EU-meersunut nalunaarutip assinga EU-Kommissionimut nassiunneqassaaq. Kalaallit angallatiginngisaannut sinneruttunut taamatut nalunaarut nunap pineqartup aalisarnikkut oqartussaasuinut nassiunneqassaaq.
Imm. 4. Aalisarneq tamarmi unitsinneqassaaq Naalakkersuisut piffissaliussamik aalajangiinerisigut.
Kapitali 11
Pineqaatissiissutit
§ 45. § 3-mik, §§ 4-7-mik, § 9-mik, § . 10, imm. 1, 3 aamma 4-mik, § 11, imm. 1 aamma 2-mik, § 12-mik aamma § 17, imm. 1-imik, § 19-mik, § 36-mik, § 38-mik, 39-mik, § 42, imm. 1-imik aamma § 44, imm. 1 aamma 4-mik unioqqutititsineq pinerluttulerineq pillugu inatsimmi malittarisassat naapertorlugit akiliisitsinermik arsaarinninnermilluunniit pineqaatissiisoqarsinnaavoq.
Imm. 2. Imm. 1 malillugu akiligassiinerit Pinerluttulerinermik inatsimmi kapitali 5-imi malittarisassat naapertorlugit inatsisitigut attuumassutilittut isigineqarsinnaasunut akiliisitsissutigineqarsinnaapput.
Imm. 3. Akiliisitsinerit arsaarinninnerillu imm. 1 aamma 2 malillugit aalajangersarneqartut Nunatta Karsianut tutsinneqassapput.
Kapitali 12
Atortuulersitsineq
§ 46. Nalunaarut 1. decembari 2023-mi atuutilissaaq.
Imm. 2. Peqatigisaanik atorunnaarsinneqarput:
1) Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaat nr. 47 18. december 2020-meersoq.
2) Saarullinniarnermi tunisinermi killilersuineq pillugu Kalaallit Nunaannut nalunaarut nr. 305, 26. juli 1980-imeersoq.
§ 47. § 20, imm. 2-mi allassimasut akuersissutip atorneqarnissaa pillugu piumasaqaatit ulloq 1. januar 2025-mi atuutilissapput.
Namminersorlutik Oqartussat, 27. novembari 2023
Kim Kielsen (atsior.)
Aalisarnermut Piniarnermullu Naalakkersuisoq
/ Emanuel Rosing (atsior.)