Piniarneq aallaaniarnerlu pillugit Inatsisartut inatsisaat nr. 12, 29. oktober 1999-imeersumi § 2, imm. 4, § 8, §§ 11-13, § 15, imm. 4, kiisalu § 17, imm. 2, kingullermik Piniarneq aallaaniarnerlu pillugit Inatsisartut inatsisaata allanngortinnera pillugu Inatsisartut inatsisaat nr. 1, 16. maj 2008-imeersukkut allanngortinneqartoq aamma Pinngortitamik illersuineq pillugu Inatsisartut inatsisaat nr. 29, 18. december 2003-meersumi § 5, § 6, imm. 2, § 35, § 36, imm. 2, kiisalu § 60, imm. 2 naapertorlugit aalajangersarneqarput:

 

Kapitali 1

Atuuffii

 

  § 1.  Nalunaarut Kalaallit Nunaata nunataani aalisarnikkullu oqartussaaffigisaani atuuppoq.

 

Kapitali 2

Pininiarnermut mannissarnermullu tunngaviusumik piumasaqaatit

 

  § 2.  Piniarnermut atuuttumik allagartaqartut imaluunniit akiliuteqarluni piniartitsinermik aaqqissuussisartumit akuerisaasumit angallanneqartut kisimik timmissanik pisaqaqqusaapput timmissallu manniinik mannissarfigeqqusaaffiusuni katerseqqusaallutik.

 

  § 3. Timmissat piffissamik piniarfiusussamik aalajangersimasumik aalajangersaaffigineqartut kisimik piniaqqusaapput taamaallaallu timmissanut pineqartunut piffissap piniarfigeqqusaasutut aalajangersarneqartup iluani piniaqqusaallutik.

  Imm. 2.  Mannissarneq taamaallaat timmissanit piffissamik mannissarfiusussamik aalajangersaaffigineqartunit pisassaaq, tak. § 10, imm. 1, aamma § 11, imm. 2-5 aamma imm. 8, taamaallaallu piffissap mannissarfigeqqusaasutut aalajangersarneqartup iluani pisassalluni.

 

Kapitali 3

Aqutsiveqarfiit

 

  § 4.  Aqutsiveqarfiit nunap immikkoortuinik aamma zonenik killeqarfeqarput nassuiarneqarlutillu ilanngussaq 2 takuuk.

 

Nassuiaatit

 

  § 5.  Nalunaarummi matumani ukua imatut paasineqassapput:

1)  “Ulloq piniarfik” paasineqassaaq, unnuaq ullorlu aallartittoq piniarfigineqartoq.

2)  ”Ullormut pisassiissutit” paasineqassaaq, inummit piniarnermut allagartamik atuuttumik peqartumit, pisassiissutit ullormi tassani taamaallaat pisarineqarsinnaasut.

3)  ”Nammineq atugassat” paasineqassaaq, inoqutigiit iluanni namminermi atugassat.

4)  ”Ileqqutoqqat malillugit piaqqanik piniarneq” paasineqassaaq, aallaat atornagu piniarneq piaqqat immami timmissat ineqarfimmit qaninnerpaamik meterinik 1000-nik ungasissumiippata ungasinnerusumiippataluunniit.

5)  ”Timmissat ineqarfii paasineqassaaq, sumiiffik timmissat imarmiut aappariit ikinnerpaamik qulit piaqqiorfigisaat.

6)  “Flu-flu qarsoq paasineqassaaq, qarsoq timmissanut timmisunut piseriutissatut naatsorsuussaq.

7)  ”Qarsup nuua blunt-iusoq paasineqassaq, qarsup nuua sissuineq ajortoq ammaloqisaamik patittaatilik aalajangersimasumik diameterilik.

8)  ”Manniusiorneq” paasineqassaaq, mitit mannii ileqqutoqqat malillugit mikiarsiat.

 

Kapitali 4

Eqqissisimatitsineq

 

  § 6.  Timmissat tamarmik eqqissisimatitaapput, taamaattoq takuuk imm. 2.

  Imm. 2.  Timmissat ilanngussaq 1-imi nalunaarneqarsimasut, imm. 1-imi aalajangersakkamit mininneqarnikuupput.

 

Kapitali 5

Piniakkat pisassiissuteqarfiusut

 

  § 7.  Miteq siorartooq (Somateria mollissima) aamma miteq siorakitsoq (Somateria spectabillis) piffissami piniarfiusumi, tak. imm. 2, pisarineqaqqusaapput, taamaallaallu aqutsiveqarfinni ilanngussaq 2-mi sukumiisumik nassuiarneqartuni.

  Imm. 2.  Immikkoortuni (matuma kingorna zone) tulliuttuni piffissat piniarfiusussat makku atuupput:

1)  Zone 1: 15. septemberimiit 15. junimut

2)  Zone 2: 1. oktobarimiit 15. majimut

3)  Zone 3: 1. oktobarimiit 15. majimut

4)  Zone 4: 15. septembarimiit 31. majimut

5)  Zone 5: 15. septembarimiit 31. Majimut

  Imm. 3.  Inuussutissarsiutigalugu piniarnermut allagartallit Zone 1, 4 aamma 5-imi piffissami piniarfiusuni imm. 2-mi taaneqartuni miternik siorartuunik aamma miternik siorakitsunik pisaqaqqusaapput, tak. § 18, imm. 3.

  Imm. 4.  Inuussutissarsiutigalugu piniarnermut allagartallit Zone 2-mi aamma 3-mi piffissami piniarfiusumi 1. oktoberimiit 15. majimut, ullormut piniarfiusumi miternik siorartuunik aamma miternik siorakitsunik ataatsimut katillugit amerlanerpaamik 40-nik pisaqaqqusaapput.

  Imm. 5.  Inuit sunngiffimmi aallaaniarnermut allagartallit Zone 1, 4 aamma 5-imi piffissani imm. 1-imi taaneqartuni miternik siorartuunik aamma miternik siorakitsunik nammineq atugassanik pisaqaqqusaapput.

  Imm. 6.  Sunngiffimmi aallaaniarsinnaanermut allagartallit piffissami piniarfiusumi 1. oktobarimiit 15. majimut ullormut aallaaniarfiusumut miternik siorartuunik aamma miternik siorakitsunik zone 2-mi aamma 3-mi ataatsimut katillugit amerlanerpaamik 10-nik pisaqaqqusaapput.

  Imm. 7.  Ullormut pisassiissutit ullunut piniarfiusunut allanut nuunneqaqqusaanngillat.  Ullormut pisassiissutit inummut namminermut tunngasuupput allanullu tunniuteqqusaanatik.

 

  § 8.  Appat sigguttuut (Uria aalge) aamma appat (Uria lomvia) piffissami piniarfiusumi, tak. imm. 2, pisarineqaqqusaapput taamaallaallu aqutsiveqarfinni ilanngussaq 2-mi sukumiisumik nassuiarneqartuni.

  Imm. 2.  Zone-ni tulliuttuni piffissat piniarfiusussat makku atuupput:

1)  Zone 1: 15. oktobarimiit 28./29. februarimut

2)  Zone 2: 15. septembarimiit 15. novemberimut

3)  Zone 3: 1. novembarimiit 15. decembarimut

4)  Zone 4: 1. novembarimiit 31. decembarimut

5)  Zone 5: 1. novembarimiit 31. decembarimut

  Imm. 3.  Inuussutissarsiutigalugu piniarnermut allagartallit piffissani imm. 2-mi taaneqartuni ullormut aallaaniarfiusumut appanik aamma appanik sigguttuunik ataatsimut katillugit amerlanerpaamik 20-nik pisaqaqqusaapput.

  Imm. 4.  Sunngiffimmi aallaaniarnermut allagartallit piffissani imm. 2-mi taaneqartuni ullormut aallaaniarfiusumut appanik aamma appanik sigguttuunik ataatsimut katillugit amerlanerpaamik pingasunik pisaqaqqusaapput.

  Imm. 5.  Zone 1-imi, § 8, imm. 2, nr. 1-imi, piffissaq piniarfiusup taaneqareersup saniatigut, appat sigguttuut aamma appat piffissami 1. martsimiit 15. junimut aamma piniaqqusaapput. Piniarnermut allagartallit piffissami taaneqartumi ullormut aallaaniarfiusumut appanik sigguttuunik aamma appanik ataatsimut katillugit amerlanerpaamik 5-nik pisaqaqqusaapput taamaallaallu nammineq atugassanik, tamanna inuussutissarsiutigalugu piniartunut aamma sunngiffimmi aallaarniartartunut atuuppoq.

  Imm 6.  Zone 2-mi § 8, imm. 2, nr. 2-mi piffissap piniarfiusup taaneqareersup saniatigut appat sigguttuut aamma appat piffissami 15. aprilimiit 15. majimut aamma piniaqqusaapput. Piniarnermut allagartallit piffissami taaneqartumi ullormut aallaaniarfiusumut appanik sigguttuunik aamma appanik ataatsimut katillugit amerlanerpaamik pingasunik pisaqaqqusaapput taamaallaallu nammineq atugassanik, tamanna inuussutissarsiutigalugu piniartunut aamma sunngiffimmi aallaarniartartunut atuuppoq.

 

  § 9.  Taateraat (Rissa tridactyla) piffissani piniarfiusussani aamma nunap immikkoortuini taaneqartuni pisarineqaqqusaapput:

1)  Zone 1: 1. septembarimiit 31. oktobarimut aamma 1. martsimiit 31. martsimut

2)  Zone 2: 1. septembarimiit 31. oktobarimut aamma 1. martsimiit 31. martsimut

3)  Zone 3: 1. septembarimiit 31. martsimut

4)  Zone 4: 1. septembarimiit 31. martsimut

5)  Zone 5: 1. septembarimiit 31. martsimut

  Imm. 2.  Inuussutissarsiutigalugu piniarnermut allagartallit piffissani imm. 1-imi taaneqartuni ullormut piniarfiusumut taateraanik amerlanerpaamik qulinik pisaqaqqusaapput,  tak. § 18, imm. 3.

  Imm. 3.  Sunngiffimmi aallaaniarnermut allagartallit piffissami imm. 1-imi taaneqartuni taateraanik amerlanerpaamik qulinik nammineq atugassatut piniaqqusaapput.

 

Timmissanut pisassiiffigineqanngitsunut piffissat piniarfiusussat

 

  § 10.  Timmissat tulliuttut piffissani piniarfiusussatut taaneqartut iluini pisarineqaqqusaapput:

1)  Appaliarsuk (Alle alle): 1. septembarimiit 30. aprilimut

2)  Qeerlutooq (Anas platyrhynchos): 1. septembarimiit 28/29. februaari

3)  Nerleq siggukitsoq (Anser brachyrhynchus): 1. septembarimiit 30. aprilimut

4)  Kangoq (Anser caerulescens): 1. septembarimiit 15. oktobarimut

5)  Nerlernaarsuk (Branta Canadensis): 1. augustimiit 15. oktobarimut

6)  Nerlernarnaq (Branta leucopsis): 1. septembarimiit 30. apriilimut

7)  Serfaq (Cepphus grylle): 1. septembarimiit 31. martsimut

8)  Alleq (Clangula hyemalis): 1. septembarimiit 28./29. februaarimut

9)  Tulugaq (Corvus corax): 1. septembarimiit 28/29. februaarimut, taamaattoq tak. imm. 6.

10)  Qaqulluk (Fulmarus glacialis): 1. septembarimiit 31. oktobarimut

11)  Tuullik (Gavia immer): 1. septembarimiit 15. oktobarimut

12)  Aqisseq (Lagopus mutus): 1. septembarimiit 30. apriilimut

13)  Naajaannaq (Larus glaucoides): 1. septembarimiit 30. apriilimut

14)  Naajarujussuaq (Larus hyperboreus): 1. septembarimiit 30. apriliimut, taamaattoq imm. 6 takuuk.

15)  Naajarluk (Larus marinus): 1. septembarimiit 30. apriliilimut, taamaattoq imm. 6 takuuk.

16)  Oqaatsoq (Phalacrocorax carbo): 1. septembarimiit 31. martsimut.

  Imm. 2.  Zone 2-mi, ileqqutoqqat malillugit qaqulluit piaraat 15. augustimiit 31. oktobarimut piniaqqusaapput.

  Imm. 3.  Zone 1, Zone 4 aamma Zone 5-imi, appaliarsuit piaraat ukioq kaajallallugu piniaqqusaapput katersorneqaqqusaallutillu.

  Imm. 4.  Zone 4 amma Zone 5-imi, nerleq siggukitsoq aamma nerlernarnaq piffissami 1. septembarimiit 31. majimut piniaqqusaapput.

  Imm. 5.  Zone 2-mi, aqissit piffissami 1. septembarimiit 31. majimut piniaqqusaapput.

  Imm. 6.  Nalunaarutip matuma atuutilerneraniit ukiuni tallimani misileraataasumik tulugaq (Corvus corax), naajarujussuaq (Larus hyperboreus) aamma naajarluk (Larus marinus) piffissami 1. januarimiit 31. decembarimut killeqanngitsumik piniaqqusaapput.

 

Kapitali 6

Mannissarneq

 

  § 11.  Mannissarneq inerteqqutaavoq, taamaattorli tak. imm. 2-5 aamma imm. 8.

  Imm. 2.  Piniarnermut allagartallit nammineq atugassanik qaqulluit, tulukkat, naajarujussuit aamma naajarluit manniinik piffissami 1. apriilimiit 15. junimut mannissaqqusaapput.

  Imm. 3.  Piffissami mannissarniarfiusinnaasumi apriilip aallaqqaataaniit juunip 15-iata tungaanut inuit piniarnermut allagartallit nammineq atugassatut mitip siorartuup imaluunniit mitip siorakitsup ulluanit ataatsimit amerlanerpaamik marlukkaarlugit mannissarsinnaapput. Mitip ullua tukernikuunngitsunik mannitalik mannissarniarfiup nalaani mannii nungullugit imaarneqassanngilaq.

  Imm. 4.  Zone 1-imi piniarnermut allagartallit nammineq atugassatut mitit siorartuut aamma mitit siorakitsut manniinik manniusiornermut piffissami 15. junimiit 25. juni ilanngullugu mannissaqqusaapput.

  Imm. 5. Mittarfiit, eqqaaviit eqqaavissuillu eqqaanni tulukkat naajallu akornutaanerannut atatillugu Mittarfeqarfiit kommuniluunniit Aalisarnermut Piniarnermullu Naalakkersuisoqarfik akuersiseqqaarnagu, tulukkat naajaallu manniinik katersisitseqqusaapput imaluunniit manniit uuliamik tukersinnaajunnaartussanngorlugit serpartaatitseqqusaapput.

  Imm. 6.  Naajat mannii imm. 5 naapertorlugu katersorneqartut, ullormi katersorneqarfianni pisortat suliffeqarfiutaannut tunniunneqarsinnaapput.

  Imm. 7.  Mannissarniarnermi allunaasat, majuartarfiit, allunaasat innartornermi atortartut innartornermilu atortut allat atornissaat inerteqqutaavoq.

  Imm. 8.  Zone 1, Zone 4 aamma Zone 5-imi, appaliarsuup manniinik piffissaq manniliorfiusoq tamaat mannissarneq akuerisaavoq.

 

Kapitali 7

Timmiaqarfiit

 

  § 12.  Timmissat ineqarfiisa eqqaanni aallaammik eqqarneq allatulluunniit ajoqusersuineq angallammillu knob-inik 3-nik sukkanerusumik angalaneq sunaluunniit piffissami 15. apriilimiit 15. septembarimut inerteqqutaavoq, timmissat ineqarfii ima ungasitsigalugit qaninnerullugilluunniit:

1)  1000 meter, timmissat ineqarfiat appanit, appanit sigguttuunit, apparlunnit, qilannganit, appaliarsunnit, taateraanit, qaqullunnit oqaatsunilluunniit najorneqarpat, aamma

2)  200 meter, timmissat ineqarfiat timmissanit allanit najorneqarpat.

  Imm. 2.  Naak imm. 1-imi aalajangersagaqaraluartoq angallammik knob-inik 3-nik sukkaannerusumik angalasoqaqqusaavoq, tamanna pisariaqanngitsumik akornusersuinermik pilersitsinngippat.

  Imm. 3.  Timmisartumik suluusalimmik qulimiguulimmilluunniit timmissat ineqarfiat appanit najorneqarpat siumut sanimulluunniit 3000 meterinit qaninnerullugit timmisartorneq inerteqqutaavoq, aammalu timmissat ineqarfiat timmissanit allanit najorneqarpat siumut sanimulluunniit 500 meterinit qaninnerullugit timmisartorneq inerteqqutaavoq.

  Imm. 4.  Timmissat ineqarfii drone-t atorlugit timmissat ineqarfiinut siumut sanimulluunniit 100 meterinit qaninnerutillugit timmiffiginissaat inerteqqutaavoq.

  Imm. 5.  Naak imm. 1, nr. 2-mi aalajangersagaqaraluartoq, mannissarneq akuerisaavoq, tak. § 11.

  Imm. 6.  Naak imm. 1, nr. 1-imi aalajangersagaqaraluartoq, appaliarsuit manniinik mannissarneq akuerisaavoq piaraannillu katersisoqaqqusaalluni, tak. § 11, imm. 8.

  Imm. 7.  Naak imm. 1-imi aalajangersagaqaraluartoq, aqqutit nalunaaqutsikkat aqqutigalugit angallammik angalasoqaqqusaavoq.

 

Kapitali 8

Sumiiffiit timmissanik illersuiffiusut

 

  § 13.  Sumiiffinni ilanngussaq 3-mi allassimasuni ilanngussaq 4-milu nunap assingami takutinneqartuni kiisalu taakkuninngaanniit 500 meterimik ungasitsigisumi qaninnerusumiluunniit, nunamut ikaarneq angallannerlu sunaluunniit piffissami 1. majimiit 31. augustimut inerteqqutaavoq.

  Imm. 2.  Naak imm. 1-imi aalajangersagaqaraluartoq, aqqutit nalunaaqutsikkat aqqutigalugit angallammik angalasoqaqqusaavoq.

 

Timmissat inaanik, manniinik piaqqanillu illersuineq

 

  § 14.  Timmissat ineqarfiinut aamma nunap immikkoortuani timmissat illersugaaffiinut immikkut ittumik eqqissisimatitsinermut aalajangersakkat §§-ini 12-13-imiittut saniatigut, Kalaallit Nunaat tamakkerlugu timmissat inaat nutaat inigineqartulluunniit kiisalu timmissat nujuartat mannii piaraallu allatulluunniit ajoqusernissaat akornusersorneqarnissaalluunniit inerteqqutaavoq.

  Imm. 2.  Qaqulluit appaliarsuillu piaraannik katersineq, tak. § 10, imm. 2 aamma imm. 3, aammalu mannissarneq tak. § 11, imm. 8 mininneqarput.

 

Kapitali 9

Timmiarniarneq

 

  § 15.  Angallammit ingerlasumiit timmissanik timmisunik malersuineq piniarnerlu inerteqqutaavoq.

  Imm. 2.  Qeerlutuunik nerlernillu isasunik ungoorineq piniarnerlu inerteqqutaavoq.

  Imm. 3.  Timmisartuniit, qamutinit motoorimik ingerlatilinniit qamuteralanniillu timmiarniarneq inerteqqutaavoq.

  Imm. 4.  Pisassiissutit inummut namminermut atuupput, allamut tunniuteqqusaanngillat aqaguanulluunniit sipaarneqaqqusaanatik.

 

  § 16.  Timmissanik piniarnermi aallaasit, timmiarsiutit singissaartullit timmiarsiutillu marlulillit, saaqqutit nuffisit imaluunniit timmissanut qarsut, qalut aamma naperniutit ipullit kiisalu pisisseq qarsorlu atornissaat akuerisaavoq.

  Imm. 2.  Timmiarsiut sakkortunerpaamik kaliber 12-iussaaq, qoorortuuararlu sakkukinnerpaamik kaliber 0.17-iussalluni. Timmiarsiutit singissaartullit timmiarsiutillu marlullit taamaallaat atoqqusaapput, amerlanerpaamik marlunnik imassanik imaqarsinnaagunik.

  Imm. 3.  Qalut aamma naperniutit ipullit Zone 1, Zone 4 aamma Zone 5-imi appaliarsunnik piniarnermi kiisalu ileqqutoqqat malillugit qaqulluit piaraannik piniarnermi atoqqusaapput.

  Imm. 4.  Pisisseq qarsorlu inunnit Kalaallit Nunaanni Danmarkimiluunniit pisissimik atuinermut misilitsinnermik imaluunniit nunani allani misilitsinnermik assingusumik angusaqarsimasunit atoqqusaapput. Pisissimik piniarnermut allagartaq pisissimik piniarnermi nassarneqartassaaq.

  Imm. 5.  Pisisseq qarsorlu atorlugit piniarnermi piumasaqaatit makku naammassineqarsimassapput:

1)  Pisisseq Compound-iussaaq aalajangersimasumillu inissinneqarsinnaasumik umerfeqassalluni.

2)  Nerlernik siggukitsunik, kangunik, nerlernaarsunnik aamma nerlernanik piniartilluni eqquinermi nukissaq minnerpaamik 40 Joule-iussaaq, qarsorlu 40 gram-inik oqinnerpaaffeqassaaq, taamaattoq qarsumik mekanisk-iusumik naqqulimmik atuisoqartillugu eqquinermi nukissaq minnerpaammik 70 Joulee-iussaaq. Qarsup naqqua akertaqaqqusaanngilaq akuutissanillu qaartartortalinnik toqunartunilluunniit imaqaqqusaanani. Qarsoq saviminermik sanaajussaaq, savissaalu ikinnerpaamik pingasuussapput minnerpaamik 25 mm-nik ipittunik aatsaangaaffillit. Qarsut blunt-iusut atoqqusaanngillat.

3)  Timmissat § 10, imm. 1-imi taaneqartut saniasigut timmissanik allanik piniarnermi eqquinermi nukissaq minnerpaamik 40 Joule-iussaaq, qarsullu oqimaassusia minnerpaamik 20 gram-iussaaq, taamaattoq blunt-imik atuilluni eqquinermi, nukissaq minnerpaamik 70 Joule-iussaaq. Qarsup naqqua akertaqaqqusaanngilaq aamma qaartartunik toqunartunilluunniit imaqaqqusaanngilaq. Qarsup naqqua saviminermik sanaajussaaq marlunnillu ipittunik 20 mm-iusunik naqqoqassaaq imaluunniit blunt-imik minnerpaamik 16 mm-mik diameter-limmik naqqoqassaaq.

4)  Timmissanik timmisunik piniarnermi flu-flu qarsut atorneqassapput.

 

Kapitali 10

Akiliuteqarluni piniarnermut piumasaqaatit

 

  § 17.  Timmissanik assigiinngitsunik nalunaarummi matuma pineqartunik akiliuteqarluni aallaaniartarnermut piumasaqaatit, sunngiffimmi piniarnermut allagartamut piumasaqaatit assigivaat, tak. § 7, imm. 4, § 8, imm. 4 aamma § 9, imm. 3. Timmissat akiliuteqarluni aallaaniarnermi pisarineqartut taamaallaat nammineq atugassaapput.

  Imm. 2.  Akiliuteqarluni piniartitsinermik aaqqissuisut pisarineqartut pissatarineqartut ilanngullugit Aalisarnermut Piniarnermullu Naalakkersuisoqarfimmut nalunaarutigisassavaat.

  Imm. 3.  Akiliuteqarluni piniartitsinermik aaqqissuisut imm. 2-mi taaneqartutut nalunaarusiornissaasa saniatigut akiliuteqarluni piniarnermi timmissat pisarineqartut pillugit ukiumoortumik Aalisarnermut Piniarnermullu Naalakkersuisoqarfimmut nalunaaruteqartassapput. Nalunaaruteqarneq nammineerluni www.sullissivik.gl aqqutigalugu imaluunniit piniarnermut nalunaarsuiffik Piniarneq aqqutigalugu saqqummersitap immersorneratigut nassiunneratigullu pisinnaavoq.

 

Kapitali 11

Timmissanik manninnillu tuniniaaneq

 

  § 18.  Inuussutissarsiutigalugu piniarnermut allagartallit kisimik timmissanik pisarineqartunik suliarineqanngitsunik, erisakkanik saleriikkanilluunniit atuisumut tuniniaaqqusaapput taamaallaallu nammineq aqutsiveqarfittut angerlarsimaffigisaminni.

  Imm. 2.  Aalisarluni qassusersornermi ningittagarsornermilu timmissat pisarisuukkat taamaallaat nammineq atugassatut atorneqaqqusaapput.

  Imm. 3.  Timmissanik appanik, appanik sigguttuunik, miternik siorartuunik miternillu siorakitsunik kiisalu taateraanik tuniniaaneq aqutsiveqarfimmi pineqartumi piniarnissamut piffissap aalajangersarneqartup § 7, imm. 2-mi aamma § 8, imm. 2-mi kiisalu § 9, imm. 1-imi, taaneqartut iluanni taamaallaat pisassaaq taamaallaallu tuniniaavinni uumasut nakorsaqarfiannit akuerineqartuni pisassalluni, matumani Kalaalimineerniarfiit ilanngullugit. Timmissat killilersugaanngitsut allat eqqarsaatigalugit aqutsiveqarfigisami najugaqarfigisami timmissat pineqartut piffissat piniagaaffiini tamani tuniniaaqqusaapput, tak. § 10.

  Imm. 4.  Inuussutissarsiutigalugu piniarnermut allagartallit kisimik aqutsiveqarfimmi najugaqarfigisami ooqanngitsunik suliarineqanngitsunillu naajat manniinik atuisunut tuniniaaqqusaapput.

  Imm. 5.  Timmissat pisarineqartut Aalisarnermut Piniarnermullu Naalakkersuisumit akuersissummik pissarsisimanngikkaanni, inuussutissarsiornermik siunertalimmik tunisassiarineqaqqusaanngillat, suliarineqaqqusaanatik qeritinneqaqqusaanatilluunniit.

  Imm. 6.  Najukkami timmiaqatigiit illersorniarlugit imm. 5 malillugu akuersissummi piffissamut aamma sumiiffimmut tunisinermilu pisassiissutinut piumasaqaatinik aalajangersaasoqarsinnaavoq. Akuersissummi aammattaaq tunisinermi piumasaqaatinik aalajangersaasoqarsinnaavoq, tamanna najukkami timmiaqatigiit illersorneqarnissaannut sunniuteqaqataasinnaappat.

 

Nalunaaqutsersuutit, nalunaaquttat nassitsissutillu timmissani nassaarineqartut

 

  § 19.  Nalunaaqutsersuutit, nalunaaquttat, radiukkut aamma qaammataasakkoortumik nassitsissutit sumi qangalu timmissap pisarineqarsimaneranut nassaarineqarsimaneranulluunniit paasissutissartallit uunga nassiunneqartassapput: Pinngortitaleriffik, Postbox 570, 3900 Nuuk.

 

Kapitali 12

Piniarnermi mannissarnermilu nalunaaruteqarneq

 

  § 20.  Timmissat pisarineqartut, taakkununnga timmissat aalisarnermi pisarisuukkatut pisat ilanngullugit, ukiumoortumik Aalisarnermut Piniarnermullu Naalakkersuisoqarfimmut nalunaarutigineqartassapput. Nalunaaruteqarneq nammineerluni www.sullissivik.gl aqqutigalugu imaluunniit piniakkanut nalunaarsuisarfik Piniarneq aqqutigalugu immersugassaq immersorlugu nassiunneratigut pisinnaavoq.

  Imm. 2.  Manniit katersukkat pillugit nalunaaruteqarneq Aalisarnermut Piniarnermullu Naalakkersuisoqarfimmut ukiumoortumik pisassaaq, nammineerluni www.sullissivik.gl aqqutigalugu imaluunniit piniakkanut nalunaarsuisarfik Piniarneq aqqutigalugu immersugassap immersorlugu nassiunneratigut pisinnaavoq.

 

Timmissanik taakkunanngalu nioqqutissianik il.il. nioqquteqarneq annissinerlu

 

  § 21.  Timmissanik eqqissisimatitaasunik uumasunik toqungasunilluunniit kiisalu timmissanik immikkanik taakkualu ilaannik taakkunanngalu nioqqutissianik tamanut saqqummiussilluni tuniniaanissaq, tunisinissaq pisinissarlu inerteqqutaavoq.

 

  § 22.  Timmissat eqqissisimatitat uumaannartut toqungasulluunniit, taakkununngalu ilanngullugit timmissat immikkat, taakkualu ilamerngi taakkunanngaluunniit nioqqutissiat Kalaallit Nunaanniit anniseqqusaanngillat imaluunniit Kalaallit Nunaannut eqquteqqusaanngillat.

  Imm. 2.  Timmissanik eqqissisimatitaasunik taakkualu ilaannik nioqqutissianillu nuunnermi pequtinik nassiussinermi annissisoqassappat Aalisarnermut Piniarnermullu Naalakkersuisoqarfiup akuersissuteqaqqaarsimanissaa piumasaqaataavoq.

  Imm. 3.  Timmissanik nujuartanik uumaannartunik toqungasunillu taakkualu ilaannik, taakkuninngalu nioqqutissianik ilisimatusarnermi imaluunniit ilinniartitsinermi siunertanut atorneqartussanik annissisoqassappat Aalisarnermut Piniarnermullu Naalakkersuisoqarfiup akuersissuteqaqqaarsimanissaa piumasaqaataavoq.

  Imm. 4.  Timmissat eqqissisimatitaasut toqungasut nassaat taakkualu ilaat, pinngortitamut maangaannaq qimanneqanngippata, ingerlaannartumik Pinngortitaleriffimmut imaluunniit piniarnermik aalisarnermillu nakkutilliisunut qaninnerpaanut tunniunneqartassapput.

 

Timmiaateqarneq, timmissanik iperaaneq nalunaaqutsersuinerlu

 

  § 23.  Timmissanik assigiinngitsunik nujuartanik uumasuuteqarnissaq Kalaallit Nunaanni inerteqqutaavoq.

  Imm. 2.  Timmissat eqqissisimatitat ikillit Aalisarnermut Piniarnermullu Naalakkersuisoqarfimmut nalunaarutigineqartassapput.

 

  § 24.  Timmissanik Kalaallit Nunaannut eqqunneqartunik taakkulu piaraannik pinngortitamut iperaaneq inerteqqutaavoq.

 

  § 25.  Timmissanik nujuartanik nalunaaqutsersuisoqassappat, ilisimatusaatigalugu timmissanik nujuartanik pisaqartoqassappat imaluunniit timmissanit nujuartanit misissugassanik taakkualu manniinik katersisoqassappat Aalisarnermut Piniarnermullu Naalakkersuisoqarfiup akuersissuteqaqqaarsimanissaa piumasaqaataavoq.

  Imm. 2.  Allakkatigut qinnuteqartoqarnerani siunertaq, sumiiffik, piffissaq atorneqartussaq, angallatigineqartoq periuserineqartussarlu erseqqissaatigineqartassapput, taakkununngalu angallatip normua imaluunniit GR-normu atorneqartoq ilanngunneqartassapput.

  Imm. 3.  Misissuiartornerup kingorna angusarineqartut pillugit Aalisarnermut Piniarnermullu Naalakkersuisoqarfimmut apn@nanoq.gl-imut allakkatigut nalunaarusiamik tunniussisoqartassaaq.

 

Kapitali 13

Immikkut akuersissuteqarneq

 

  § 26.  Nalunaarummi matumani aalajangersakkanit Aalisarnermut Piniarnermullu Naalakkersuisoqarfik uumasunut nakorsaqarnermut tunngasunik, ilisimatusarnermik atuartitsinermillu siunertanut, imaluunniit Kalaallit Nunaata piniagassatigut pisuussutaasa nalunaarsorneqarnerannut atatillugu kiisalu attaveqaqatigiinnermut pissutsinut aamma timmisartukkut angallannerup isumannaatsuunissaata qulakkeernissaanut immikkut akuersissuteqarsinnaavoq.

 

Kapitali 14

Nakkutilliineq

 

§ 27.  Kinaluunniit politiit imaluunniit piniarnermik aalisarnermillu nakkutilliisut piumasaqarnerisigut piniarnermut allagartaq atuuttoq aqqutigalugu piniaqqusaatitaanerminut uppernarsaammik, immikkut akuersissummik Aalisarnermut Piniarnermullu Naalakkersuisoqarfimmeersumik imaluunniit immikkut akuersissummik naalakkersuisoqarfimmiit allameersumik takutitsissaaq.

 

Kapitali 15

Kommunimi ileqqoreqqusat

 

  § 28.  Kommunalbestyrelsi nunaqarfinni siulersuisunik aamma najukkami aalisartut piniartullu peqatigiiffiinik tusarniaareerluni ileqqoreqqusakkoortumik piumasaqaatinik aalajangersimasunik aalajangersaasinnaavoq §§ 7-8, § 11, § 16, aamma § 18 aalajangersakkanik sukannernerusunik aalajangersarneqarsimasunit.

  Imm. 2.  Kommunini ileqqoreqqusat, tak. imm. 1, Aalisarnermut Piniarnermullu Naalakkersuisumit akuersissutigineqartassapput, www.naalakkersuisut.gl-ilu aqqutigalugu nalunaarutigineqartassallutik.

 

Kapitali 16

Pineqaatissiisutit

 

  § 29.  Kalaallit Nunaannut pinerluttulerinermi inatsit malillugu akiligassiinermik kinguneqarsinnaavoq:

1)  Nalunaarummi matumani §§ 2-3, §§ 6-12, § 13, imm. 1, § 14, imm. 1, §§ 15-18, §§ 21-22, § 23, imm. 1 aamma §§ 24-25-mik unioqqutitsisoqartillugu,

2)  § 2, §§ 6-18 aamma §§ 20-24 naapertorlugu peqqussut imaluunniit inerteqqut naalakkumaneqanngippat,

3)  § 17, § 18, imm. 5, § 22, imm. 2 kiisalu § 25 naapertorlugu akuersissummik tunineqarnermi piumasaqaatinik qaangiiginnaasoqartillugu,

4)  Pisortanut paasissutissanik eqqunngitsunik paatsiveerussaataasunilluunniit tunniussineq imaluunniit uppernarsaatinik paasissutissanillu nalunaarummi § 17, imm. 2-3 aamma § 20 naapertorlugit piumasaqaatigineqartunik tunniussinnginneq,

5)  § 17, imm. 2-3, § 20, §§ 25-26 naapertorlugu immikkut akuerisaanermi imaluunniit akuersissut tunniunneqartumi piumasaqaatinik qaangiiginnaasoqartillugu.

  Imm. 2.  Nalunaarut manna malillugu kommunit ileqqoreqqusaannik unioqqutsitsisoqarsimappat Kalaallit Nunaannut Pinerluttulerinermik Inatsit malillugu akiliisitsisoqarsinnaavoq pisarineqartunillu arsaarinnittoqarsinnaalluni.

  Imm. 3.  Nalunaarut manna malillugu nalunaarutinut allatulluunniit malitassanut aalajangersarneqartut akileeqqusissummik aalajangersaanissamik tunngavissaqartitsippata, akileeqqusissut Kalaallit Nunaannut Pinerluttulerinermik inatsimmi malittarisassat malillugit inatsisitigut inuttut pisinnaatitaaffeqartoq akileeqqusissummik pisussaaffilerneqarsinnaavoq.

  Imm. 4.  Imm. 1-3 malillugu akiliisitsinernit pineqaatissiissutinit isertitarineqartut Nunap karsianut pisassanngortinneqassapput.

 

  § 30.  Arsaarinnittoqartarnissaq pillugu pinerluttulerinermi inatsimmi aalajangersakkat atuupput.

  Imm. 2.  Pisarineqartut ilaannik arsaarinnissutigineqartut atornissaat Aalisarnermut Piniarnermullu Naalakkersuisumit aalajangerneqartassaaq.

 

Kapitali 17

Atuutilersitsinermut aamma ikaarsaariartitsinermut aalajangersakkat

 

  § 31.  Nalunaarut manna atuutilerpoq ulloq 30. maj 2023.

  Imm. 2.  Peqatigitillugu Timmissanik illersuineq piniarnerlu pillugit Namminersorlutik Oqartussat nalunaarutaat nr. 17, 28. oktober 2019-imeersoq atorunnaarpoq. 

 

 

Namminersorlutik Oqartussat, ulloq 30. maj 2023

 

 

Karl Tobiassen (atsior.)

Aalisarnermut Piniarnermullu Naalakkersuisoq

 

 

/ Jørgen Isak Olsen (atsior.)