§ 1

Nioqqutissanik eqqussuineq annissuinerlu pillugit Inatsisartut inatsisaanni nr. 18, 30. oktober 1992-imeersumi, Inatsisartut inatsisaatigut nr. 38, 9. december 2015-imeersukkut kingullermik allanngortinneqartumi makku allannguutigitinneqarput:

1. Inatsimmi tamarmi peerneqarpoq: ”nr. 19, 30. oktober 1992-imeersoq”.

2. Kapitali 2-p qulequtaa ima oqaasertaqarpoq:

”Akitsuuteqarfiusoq aamma akitsuutit akilerneqartussanngorfiat”

3. § 6-ip kingornanut ilanngunneqarpoq:

”  § 6 a.  Akitsuutit akitsuuteqarfiusumut tikinnermi akilerneqartussanngussapput, taamaattorli tak. imm. 2 aamma § 40.

  Imm. 2.  Danmarkimiit Kalaallit Nunaat ornillugu umiarsuakkut usinik assartuinermi nioqqutissanillu nassiussinermi akitsuutit akilerneqartussanngussapput piffissami, umiarsuup Danmarkimi umiarsualivinni aallarfissaani tamani aammalu aqqutaani ingerlaarfiani usit nioqqutissalluunniit usilersuunneqarfiini.”

4. § 7 ima oqaasertaqarpoq:

”  § 7.  Immiaaqqat, viinnit, imigassallu kimittuut ethanolimik akullit Nioqqutissanik eqqussuinermi akitsuutit pillugit Inatsisartut inatsisaanni § 1, imm. 1, nr. 3-mi pineqartut taamaallaat akileraaruseriffiup akuersissuteqarneratigut akitsuuteqarfiusumut eqqunneqarsinnaapput, akitsuuteqanngitsumik eqqussineq inatsimmi uani § 11 imaluunniit § 17, imaluunniit Nioqqutissanik eqqussuinermi akitsuutit pillugit Inatsisartut inatsisaanni § 2, imm. 2, aamma § 3, nr. 2 aamma 3, naapertorlugit pinngippat.

  Imm. 2.  Akileraaruseriffiup imigassanik aalakoornartortalinnik sassaalliisinnaanermut akuersissummik peqartut immiaaqqanik, viinninik imigassanillu kimittuunik ethanolimik akulinnik imm. 1-imi taaneqartunik, inuussutissarsiutigalugu tuniniaqqitassatut eqqussisinnaanerannik akuersissuteqarfigisinnaavai.

  Imm. 3.  Akileraaruseriffiutaaq inuit 18-inik ukiullit ukioqqortunerusulluunniit Kalaallit Nunaanni najugaqartut piffissalluunniit qanittup ingerlanerani Kalaallit Nunaanni najugaqalersussat immiaaqqanik, viinninik imigassanillu kimittuunik ethanolimik akulinnik nammineq atugassaminnik eqqussisinnaanerannik ataasiartumik akuersissuteqarfigisinnaavai. Ataasiartumik akuersissut atorunnaassaaq nassiussat akuersissummi pineqartut tigusisussamut tunniunneqarpata. Akileraaruseriffik ataasiartumik akuersissummik tunniussiumanngissinnaavoq, akileraaruseriffik siusinnerusukkut akuersissutaasut qassiuneri, eqqunneqartut annertussusii il.il. eqqarsaatigalugit isumaqaruni eqqussuineq nammineq atugassaannarnut tunngasuunngitsoq.

  Imm. 4.  Ataasiartumik akuersissutinik imm. 3-mi taaneqartunik tunniussinnginnermi piumasaqaatit makku naammassineqarsimassapput:

1)  Akileraaruseriffiup elektroniskiusumik qinnuteqaat nioqqutissat Kalaallit Nunaannut nassiussassatut tunniunneqarnissaat ullunik suliffiusunik ikinnerpaamik 5-inik sioqqullugu tigusimassavaa. Qinnuteqaat elektroniskiusumik immersugassaq akileraaruseriffiup suliarisimasaa atorlugu tunniunneqassaaq, nioqqutissallu nassiussaniittussat pillugit paasissutissanik erseqqissunik immersorneqassalluni, akileraaruseriffiup tamatuminnga ilitsersuinera naapertorlugu.

2)  Nioqqutissat eqqunniarneqartut akitsuutaat, aamma imm. 5 naapertorlugu akiliisitsissut akileraaruseriffimmut akilerneqarsimassapput.

3)  Nioqqutissat umiarsuakkut timmisartukkulluunniit imaluunniit allakkatigut nassiussatut eqqunneqassapput.

  Imm. 5.  Immiaaqqanik, viinninik imigassanillu kimittuunik ethanolimik akulinnik imm. 1-imi taaneqartunik nammineq atugassanik eqqussiniarluni ataasiartumik akuersissuteqarfigineqarnissamik qinnuteqarnermi, qinnuteqartup akiliisitsissut 250 kr.-iusoq, kiisalu tapiliussatut akitsuut eqqussuinermi akitsuutit naatsorsorneqartut 50 pct.-iattut angitigisoq akilissavai. Akiliisitsissut tapiliussatullu akitsuut kingusinnerpaamik akilerneqassapput qinnuteqaatip tunniunneqarnerani.”

5. § 8 atorunnaarsinneqarpoq.

6. § 12, imm. 1, ima oqaasertaqarpoq:

”  Akuersissutit § 7-imi taaneqartut, inatsisit allat naapertorlugit tuniniaaqqusiunnaartoqarnerani imaluunniit killilersuinermik aaqqissuussisoqarnerani Naalakkersuisunit atorunnaarsinneqarsinnaapput uterteqquneqarsinnaallutilluunniit.”

7. § 15, imm. 1, ima oqaasertaqarpoq:

”  Nioqqutissat Kalaallit Nunaanni inuussutissarsiutigalugu nioqqutissianut allanut, aamma nioqqutissanut akitsuusigassanut atorneqartut akitsuutaat, § 14 aamma Nioqqutissanik eqqussuinermi akitsuutit pillugit Inatsisartut inatsisaat naapertorlugit akilerneqarsimasut Naalakkersuisunit utertinneqarsinnaapput.”

8. § 15, imm. 2, atorunnaarsinneqarpoq.

9. § 16-ip kingornanut ilanngunneqarpoq:

”  § 16 a.  Nioqqutissat kukkusumik akitsuusertinneqarsimasut, tammarsimasut, ajoqusersimasut, tillinneqarsimasut, suujunnaarsinneqarsimasut imaluunniit sumiiffinnut, Kalaallit Nunaata illersorneqarnissaa pillugu isumaqatigiissut 27. april 1951-imeersoq naapertorlugu illersornissamut sakkutooqarfiusunut anninneqartut akitsuutaannik utertitsisarneq pillugu maleruagassat Naalakkersuisunit aalajangersarneqarsinnaapput.

  Imm. 2.  Imm. 1 naapertorlugu utertitsinerni akiliisitsissummik 1.000 kr.-it qaangernagit angissusilimmik aammalu aningaasat utertinneqartut procentinngorlugu ilaannik akiliisitsinissaq pillugu maleruagassat Naalakkersuisunit aalajangersarneqarsinnaapput.

  Imm. 3.  Akitsuutinik utertitsinermi qinnuteqaatip, immersugassaq assigisaaluunniit akileraaruseriffimmit atoqquneqartoq atorlugu digitaliusumik akileraaruseriffimmut tunniunneqarnissaa, uppernarsaammillu, soorlu fakturamik, nassiussat allagartaannik, akitsuutit allagartaannik uppernarsaataasinnaasunillu allanik qinnuteqaammut ilanngussisoqarnissaa Naalakkersuisut aalajangersinnaavaat.”

10. § 22, imm. 1, ima oqaasertaqarpoq:

”  Nioqqutissanik eqqussuinermi akitsuutit pillugit Inatsisartut inatsisaat naapertorlugu akitsuutit, nioqqutissat akitsuuteqarfiusumut eqqunneqarneranni akiligassanngussapput, taamaattorli tak. § 7, imm. 4, nr. 2.”

11. § 26, imm. 2, ima oqaasertaqarpoq:

”  Imm. 2.  Akitsuutinut pillaammillu akiliisitsissummut akiligassat aamma suliap suliarineqarnerani aningaasartuutit akilerneqareerpata nioqqutissat tigummigallarneqartut arsaarinnissutigineqartulluunniit, eqqussuinermi maleruaqqusat nalinginnaasumik atuuttut malilluinnarlugit inummut nioqqutissanik pisassaqarnerminik uppernarsaasumut tunniunneqassapput.”

12. § 26, imm. 2-p kingornanut ilanngunneqarpoq:

”  Imm. 3.  Nioqqutissat tigummigallarneqartut akitsuutaat akitsuutit akilerneqartussanngorfiisa kingorna qaammatit marluk qaangiutsinnagit akilerneqanngippata, nioqqutissat akitsorterussinikkut nalunaarutigineqareersimasukkut Kalaallit Nunaanni ileqquusut malillugit tuniniarneqassapput. Nioqqutissalli akileraaruseriffiup isumaa malillugu atorsinnaanngitsut tunineqarsinnaanngitsulluunnit piffissaliussap qaangiunnerani nakkutigisaasumik suujunnaarsinneqarsinnaapput. Aningaasat akitsorterussinermi isertinneqartut siullermik pisortat toqqortarinninneranni tuniniaanerannilu aningaasartuutinut matussutigineqassapput, tulliullugit akitsuutinut pillaammillu akiliisitsissummut akiligassat aamma suliap suliarineqarnerani aningaasartuutit. Sinneqartoorutaajunnartut piginnittumut tunniunneqassapput, taanna akitsorterussinerup kingorna ukioq ataaseq qaangiutsinnagu saaffiginnippat nioqqutissanillu tunineqartunik piginnittuunerminik uppernarsaappat. 

  Imm. 4.  Nioqqutissat anngiortumik eqqussinermi eqqusseriaraluarnermiluunniit nassatarineqartut tigummigallarneqassapput. Nioqqutissat anngiortumik eqqussat nioqqutissalluunniit allat akitsuutaat pisortanut akilinngitsoorneqartut akilinngitsoorneqariaraluartulluunniit aamma tigummigallarneqarsinnaapput arsaarinnissutigineqarlutilluunniit, arsaarinnissutaasariaqartut pillugit maleruagassat eqqartuussisarnermi inatsimmi aalajangersarneqarsimasut malilluinnarlugit.”

13. § 29, imm. 1, ima oqaasertaqarpoq:

”  Suliffeqarfiit timmisartukkut umiarsuakkullu angallassinermik ingerlataqartut, aamma angallatip naalagaa paasissutissat nakkutilliinerup isumagineqarnissaanut pisariaqartut, matumani aamma angallammut, inuttanut, ilaasunut taakkulu nassataannut nalunaarsorneqartunut kiisalu usinut tunngasut paasissutissiissutigissallugillu uppernarsassallugit, kiisalu lastimut, ininut toqqorsivinnullu iserfissat tamaasa takutissallugit ammassallugillu imaluunniit qulaassallugit pisussaapput. Akileraaruseriffiup eqqartuussivimmit akuersissummik peqanngikkaluarluni iserfissat taakku takutinneqarnissaat, ammarneqarnissaat qulaarneqarnissaalluunniit aammalu misissuiffiginissaat piumasarisinnaavaa.”

14. § 29, imm. 3, ima oqaasertaqarpoq:

”  Imm. 3.  Akileraaruseriffik inuit akitsuuteqarfiusumut akitsuuteqarfiusumiillu angalasut pillugit paasissutissanik selskabimut angallassisuusumut piumasaqarsinnaatitaavoq, matumani aamma selskabip angallassisup elektroniskiusumik paasissutissiiviinut isernikkut. Paasissutissat akileraaruseriffiup selskabip angallassisuusup paasissutissiiviinut toqqaannartumik isersinnaanermigut pissarsiai akileraaruseriffiup qarasaasiatigut atortuinut elektroniskiusumik nuunneqassanngillat toqqaannartumilluunniit toqqorneqassanatik.”

15. § 29, imm. 7, ima oqaasertaqarpoq:

”  Imm. 7.  Akileraaruseriffiup inuit angallammut isernissaat tassanngaluunniit aninissaat kiisalu nioqqutissanik eqqussisoqarnissaa annissisoqarnissaaluunniit, nakkutilliinerup naammassinissaata tungaanut inerteqqutigisinnaavaa.”

16. § 32 a, imm. 2, ima oqaasertaqarpoq:

“  Imm. 2.  Nunani allani sumiiffiit sumiiffiillu Kalaallit Nunaanni akitsuuteqarfimmiittut akornanni ilaasunik angallassisarnissanik pilersitsisoqartillugu ininik pisariaqartunik atortulersugaasunik pisatsersugaasunillu, ilaasut il.il. misissorneqarnissaanni atugassiisoqarnissaa akileraaruseriffiup imminut aningaasartuutaanngitsumik peqqussutigisinnaavaa. Akileraaruseriffiulli isumagissavai atortunut, matumani aamma teknikkimut atortunut, ilaasut il.il. eqqussuinerannik nakkutilliinermi taamaallaat atorneqartussanut aningaasartuutit.”

17. Kapitali 8-p qulequtaa imaa oqaasertaqarpoq:

”Timmisartunut ilaasut nammineq piumassutsiminnik akitsuusiisitsisinnaanerat”

18. Kapitali 8-p qulequtaata kingornanut ilanngunneqarpoq:

”  § 35 a.  Nunamut maanga tikinnermi timmisartunut ilaasut nioqqutissat akitsuusigassat nammineq atugassamittut nassatatik nammineq piumassutsiminnik akitsuusertissinnaavaat, taamaattorli tak. imm. 2.

  Imm. 2.  Nioqqutissanik, Nioqqutissanik eqqussuinermi akitsuutit pillugit Inatsisartut inatsisaanni § 1, nr. 3-mi, nr. 7-imi, nr. 8-mi, nr. 9-mi nr. 10-milu taaneqartunik nammineq piumassutsimik akitsuusiisitsinermi amerlassutsit tikinnermi akitsuuteqanngitsumik eqqunneqarsinnaasut tallimariaataannit amerlanerusinnaanngillat. Amerlassutsit tikinnermi akitsuuteqanngitsumik eqqunneqarsinnaasut tallimariaataannit amerlaneruppata, amerlanaarlugit eqqussat arsaarinnissutigineqassapput. Arsaarinnissutit Nunatta karsianut iluaqutissanngortinneqassapput.

  Imm. 3.  Nioqqutissanik imm. 2 naapertorlugu nammineq piumassutsimik akitsuusiisitsisinnaapput inuit 18-inik ukiullit ukioqqortunerusulluunniit.

  Imm. 4.  Nammineq piumassutsimik akitsuusiisitsinermi nioqqutissat akitsuusigassat nassarneqartut eqqussuinermi akitsuutaat kiisalu sullissinermi akiliisitsissut Naalakkersuisunit aalajangersarneqartoq 1.000 kr.-inillu anginerunngitsoq akilerneqassapput. Tikittup akitsuut, sullissinermi akiliisitsissut immaqalu pillaammik akiliisitsissut pineqartup nakkutilliivimmik qimatsisinnani akilinngippagit nioqqutissat Nunatta karsianut iluaqutissanngorlugit arsaarinnissutigineqassapput.”

19. § 46, imm. 1, ima oqaasertaqarpoq:

”  Kinaluunniit akuersissummik pisariaqartumik peqarani piaaraluneerluni mianersuaalliorujussuarluniluunniit nioqqutissanik § 7-imi, § 9-mi § 10-milu pineqartunik eqqussisoq imaluunniit nioqqutissanik § 35 a, imm. 2-mi pineqartunik nammineq piumassutsiminik akitsuusiisitsinani eqqussisoq pillaammik akiliisinneqarsinnaavoq.”

20. § 46, imm. 3, ima oqaasertaqarpoq:
”  Imm. 3.  Akuersissummik pisariaqartumik peqarani nioqqutissat § 7-imi § 9-milu pineqartut eqqunneqarpata, nioqqutissalluunniit taamaattut nammineq piumassutsimik akitsuusertinnagit imaluunniit amerlassusissat § 35 a, imm. 2 naapertorlugu eqqunneqarsinnaasut sinnerlugit eqqunneqarpata nioqqutissat taakku, nioqqutissalluunniit peqanngippata taakku aningaasanngorlugu nalingat arsaarinnissutigineqassapput.”

21. § 46, imm. 5, ima oqaasertaqarpoq:

”  Imm. 5.  Aningaasat atoriaannaat 50.000 kr.-t sinnerlugit nalillit, akileraaruseriffiullu § 30, imm. 4 aamma 5 naapertorlugit nakkutilliinerani nassaarineqartut akileraaruseriffimmit tigummigallarneqarsinnaapput. Tigumminnikkallarneq pisinnaavoq aningaasat atoriaannaat pinerluttulerinermik inatsimmik unioqqutitsinikkut pissarsiaasimasinnaanerat unioqqutitsinissamulluunniit atorneqarsinnaanerat pasitsaassimaneqarpat. Tigumminnikkallartoqartillugu eqqartuussisarnermi inatsimmi kapitali 37, arsaarinnissuteqartarnermut tunngasoq atuutissaaq.”

§ 2

Inatsisartut inatsisaat atortuulerpoq ulloq 1. januar 2024, taamaattorli tak. imm. 2.

  Imm. 2.  § 1, nr. 18, nalunaarutikkut atortuulerpoq. Ullut atortuulerfiit assigiinngitsut timmisartoqarfinnut assigiinngitsunut attuuttussat Naalakkersuisunit aalajangersarneqarsinnaapput.

Namminersorlutik Oqartussat, ulloq 20. novembari 2023

Múte Bourup Egede (atsior.)

Naalakkersuisut Siulittaasuat