Naalakkersuisut Suleriaasianni § 1, imm. 4 naapertorlugu aalajangersarneqarput:

Naalakkersuisut politikkikkut sulinerannik ataqatigiissaarineq

  § 1.  Ataqatigiissaarinermut ataatsimiititaliaq ataaseq aamma ataqatigiissaarinermut immikkoortortat pingasut Naalakkersuisut politikkikkut sulinerannik ataqatigiissaarisussatut pilersinneqassapput.
  Imm. 2.  Ataqatigiissaarinermut ataatsimiititaliap aamma ataqatigiissaarinermut immikkoortortat politikkikkut akisussaaffeqarfiit akimorlugit, innuttaasut inuiaqatigiillu pisariaqartitaasa ataatsimoortutut isiginerat aallaavigalugu, Naalakkersuisut politikkikkut siunnerfiisa ataqatigiissaariffiginissaat suliassaraat.
  Imm. 3.  Taamatuttaaq politikkikkut akerleriiffiusinnaasut isumaqatigiinngiffiusinnaasullu, suliassat Naalakkersuisuni ataatsimiissutigineqannginneranni oqaluuserineqarsimanissaat aaqqiiviginiarneqarsimanissaallu, taakkua qulakkiissavaat.
  Imm. 4.  Naalakkersuisut Siulittaasuat politikkikkut suliassat ataasiakkaat aaqqiiviginissaannut, ataqatigiissaarinermut immikkoortortanik allanik pilersitsisinnaavoq.

Ataqatigiissaarinermut ataatsimiititaliaq

  § 2.  Ataqatigiissaarinermut ataatsimiititaliamiipput:
1)  Naalakkersuisut Siulittaasuat.
2)  Naalakkersuisut Siulittaasuata tullia.
3)  Aningaasaqarnermut, Naligiissitaanermullu Naalakkersuisoq.
4)  Nunanut Allanut, Inuussutissarsiornermut Niuernermullu Naalakkersuisoq.

Ataqatigiissaarinermut ataatsimiititaliap suliassai

  § 3.  Naalakkersuisut ataqatigiissaagaasumik suliniuteqarnissaat aammalu naalakkersuisooqatigiinnissamut isumaqatigiissummi siunnerfiit anguneqarnissaasa qulakkeernissaat, ataqatigiissaarinermut ataatsimiititaliap suliassaraa.
  Imm. 2.  Aamma Naalakkersuisut sulinermi pisussanut pilersaarutaata malinnaaviginissaa ataqatigiissaarinermut ataatsimiititaliap suliassaraa.
  Imm. 3.  Suliassat suliassaqarfiit akimorlugit suleqatigiinnissamik pisariaqartitsiviusut, ataqatigiissaarinermut ataatsimiititaliap suliarissavai.
  Imm. 4.  Suliassat politikkimut imaluunniit aningaasaqarnermut tunngasut pingaaruteqartut, avataaneersut suleqatigisat akuliutsinnginneranni, tamatigut ataqatigiissaarinermut ataatsimiititaliami suliarineqartassapput.
  Imm. 5.  Suliassat suut ataqatigiissaarinermut ataatsimiititaliap suliarissanerai, kiisalu suliassat suut ataqatigiissaarinermut immikkoortortanit suliarineqassanersut, ataqatigiissaarinermut ataatsimiititaliap aalajangissavai.

  § 4.  Ataqatigiissaarinermut ataatsimiititaliap suleriaasissani nammineerluni aalajangersassavaa.
  Imm. 2.  Naalakkersuisut Siulittaasuata Naalakkersuisoqarfiani naalakkersuisoqarfimmut pisortaaneq Ataqatigiissaarinermut ataatsimiititaliamut allattaavoq.

Ataqatigiissaarinermut immikkoortortat

  § 5.  Inunnut Ataqatigiissaarinermut immikkoortortat tassaapput:
1)  Meeqqanut, Inuusuttunut, Ilaqutariinnut Peqqissutsimullu Naalakkersuisoq, siulittaasoq.
2)  Isumaginninnermut Sulisoqarnermullu Naalakkersuisoq.
3)  Ilinniartitaanermut, Kultureqarnermut, Timersornermut Ilageeqarnermullu Naalakkersuisoq.
4)  Ineqarnermut Attaveqaasersuutinullu Naalakkersuisoq.
5)  Aningaasaqarnermut, Naligiissitaanermullu Naalakkersuisoq.

  § 6.  Aningaasaqarnermut Inuussutissarsiornermullu Ataqatigiissaarinermut immikkoortortat tassaapput:
1)  Aningaasaqarnermut, Naligiissitaanermullu Naalakkersuisoq, siulittaasoq.
2)  Nunanut Allanut, Inuussutissarsiornermut Niuernermullu Naalakkersuisoq.
3)  Nunalerinermut, Imminut Pilersornermut, Nukissiutinut Avatangiisinullu Naalakkersuisoq.
4)  Aatsitassanut Inatsisillu Atuutsinneqarnerannut Naalakkersuisoq.
5)  Aalisarnermut Piniarnermullu Naalakkersuisoq.

  § 7.  Pisuussutinut uumassusilinnut Avatangiisinullu Ataqatigiissaarinermut immikkoortortat tassaapput:
1)  Aalisarnermut Piniarnermullu Naalakkersuisoq, siulittaasoq.
2)  Nunalerinermut, Imminut Pilersornermut, Nukissiutinut Avatangiisinullu Naalakkersuisoq.

Ataqatigiissaarinermut immikkoortortat suliassaat

  § 8.  Ataqatigiissaarinermut immikkoortortat ataasiakkaat akisussaaffeqarfiisa iluanni Naalakkersuisut siunnerfiisa ataqatigiissaarneqarnissaannik qulakkeerinissaq, ataqatigiissaarinermut immikkoortortat suliassaraat. 
  Imm. 2.  Ataqatigiissaarinermut immikkoortortap akisussaaffeqarfiisa iluanni politikkikkut pingaarnersiuinerit, ataqatigiissaarinermut immikkoortortani ataasiakkaani suliassanik ataqatigiissaarinermi ingerlaavartumik oqaloqatigiissutigineqartassapput.
  Imm. 3.  Naalakkersuisup Naalakkersuisut isummernissaannut tunngavissiamik suliaqartup, isummernissamut tunngavissiap Naalakkersuisuni ataatsimiinnissamut oqaluuserisassani ilanngunneqannginnerani, ataqatigiissaarinermut immikkoortortami politikkikkut tusarniaassutigineqarnissaa qulakkiissavaa.
  Imm. 4.  Ataqatigiissaarinermut immikkoortortat ataqatigiissaarinermut ataatsimiititaliap ataaniipput.

  § 9.  Ataqatigiissaarinermut immikkoortortat nammineerlutik suleriaasissartik aalajangersassavaat aammalu siulittaasortik aamma siulittaasup tullia nammineerlutik toqqassallugu.
  Imm. 2.  Ataqatigiissaarinermut immikkoortortanut ataasiakkaanut allattoqarfeqarneq, ataqatigiissaarinermut immikkoortortanut ataasiakkaanut siulittaasutut toqqarneqarsimasumut Naalakkersuisoqarfimmi pisortaanermit isumagineqassaaq.
  Imm. 3.  Akisussaaffeqarfimmik iluanni suliassaqarfiit akimorlugit suliassat oqaluuserisassaniilernissaat, Naalakkersuisunut ilaasortat ataasiakkaat akisussaaffigaat.
  Imm. 4.  Suliassaq ataqatigiissaarinermut ataatsimiititaliamut saqqummiunneqartariaqartoq ataqatigiissaarinermut immikkoortortaq naliliippat, suliassaq ataqatigiissaarinermut immikkoortortap ataqatigiissaarinermut ataatsimiititaliamut nassiutissavaa.

Ataatsimiittarnerit

  § 10.  Ataqatigiissaarinermut ataatsimiititaliaq aamma ataqatigiissaarinermut immikkoortortat qaammammut minnerpaamik ataasiarlutik ataatsimiittassapput.
  Imm. 2.  Ataqatigiissaarinermut ataatsimiititaliami Naalakkersuisut Siulittaasuata Naalakkersuisoqarfia ataatsimiigiaqqusisuussaaq.
  Imm. 3.  Ataqatigiissaarinermut immikkoortortani siulittaasuusoq ataaatsimiigiaqqusisuussaaq.

Atuutilersitsineq

  § 11.  Kaajallaassitaq ulloq 3. septembari 2022 atuutilissaaq.

Naalakkersuisut Siulittaasuata Naalakkersuisoqarfia, ulloq 2. septembari 2022

Múte Bourup Egede
Naalakkersuisut Siulittaasuat

/ Simigaq Broberg