Ilinniarnertuunngorniartarneq pillugu Inatsisartut inatsisaanni nr. 13, 22. november 2011-imeersumi Inatsisartut inatsisaat nr. 16, 27. november 2020-meersukkut allanngortinneqartumi § 5, imm. 2, aamma § 6, imm. 2, aamma § 8, imm. 3 aamma 4, § 11, imm. 5 kiisalu § 14 naapertorlugit aalajangersarneqarput:

Kapitali 1

Ilinniartunngorsinnaanermut ilinniartunngortitsinermullu piumasaqaatit immikkut ittut aamma karakterinik naatsorsueqqittarneq

  § 1.  Qinnuteqartut Kalaallit Nunaanni aalajangersimasumik najugaqanngitsut ilinniarnertuunngorniarfimmi ilinniartunngortinneqarsinnaapput qinnuteqartoq qinnuteqartunut Kalaallit Nunaanni aalajangersimasumik najugaqartunut piumasaqaatit qaffaseqataannik tunngaviusumik ilinniarnermi ilinniakkatigut pisinnaasaqartoq Ilinniartitaanermut Naalakkersuisoqarfik naliliippat.

  § 2.  Qinnuteqartunut Greenlandic Grading System-skala malillugu naliliiffigineqanngitsunut ilanngussami 1-imi naatsorsueqqinnermut tabeli aalajangersarneqartoq malillugu naatsorsueqqittoqassaaq.  
  Imm. 2.  Qinnuteqartunut ilanngussaq 1-imi naatsorsueqqinnermut tabelitut aalajangersarneqartumut ilaanngitsut Ilinniartitaanermut Naalakkersuisoqarfiup naliliinera tunngavigalugu naatsorsueqqittoqassaaq.

Kapitali 2

Qinnuteqarnermi periutsit

  § 3.  Ilinniarnertuunngorniarfinni ilinniartunngorniarluni qinnuteqarneq ukiumi ilinniarnerup aallartiffissaani kingusinnerpaamik 1. marts pisarpoq.

  § 4.  Qinnuteqarnermi immersugassaq Ilinniartitaanermut Naalakkersuisoqarfimmit akuerisaasoq atorlugu ilinniartunngornissamik qinnuteqartoqassaaq. 
  Imm. 2.  Ilinniarnertuunngorniarfimmi sorlermi ilinniartunngornissamik qinnuteqarnerluni qinnuteqartup qinnuteqarnermini ilinniakkap normua ilisimatitsissutigissavaa. Qinnuteqartoq arlalinnik kissaateqaruni taakku tulleriinnilersorneri qinnuteqartup allassavai. 
  Imm. 3.  Ilinniarnertuunngorniartarneq pillugu Inatsisartut inatsisaanni § 11, imm. 2-mi malittarisassat aallaaviginagit ilinniarnertuunngorniarfimmi allami ilinniartunngornissaq kissaatigineqarpat tamassumunnga ilinniakkatigut inuttullu tunngavilersuutit qinnuteqartup allassavai.
  Imm. 4.  Tunngaviusumik ilinniarnerup kingorna ilinniakkat sammiviini sorliup toqqarnissaanik ilimagisani siumut pituttuutaanngitsumik qinnuteqartup qinnuteqaammini nalunaarutigeriissavaa.
  Imm. 5.  Qinnuteqaat qinnuteqartumit atsiorneqassaaq. Qinnuteqartoq angajoqqaatut oqartussaassusilinnit oqartussaaffigineqarpat qinnuteqaat aamma angajoqqaatut oqartussaassusilinnit atsiorneqassaaq.

  § 5.  Ilinniagalernissamik qinnuteqaat ugguuna pissaaq www.sullissivik.gl, imaluunniit qinnuteqaateqartup angerlarsimaffigalugu kommuniani Majoriamut qinnuteqaat immersorsimasoq nassiunneqarsinnaavoq. 
  Imm. 2.  Qinnuteqartut qinnuteqarnermi nalaanni Kalaallit Nunaata avataani aalajangersimasumik najugaqartut akuerisaanissaannut atatillugu kommuni ilaqutariittut attuumassuteqarfiginerusaq angerlarsimaffittut naatsorsuunneqassaaq. 
  Imm. 3.  Qinnuteqartut angajoqqaatut oqartussaassuseqartunit oqartussaaffigineqartut ilaqutariinnikkut attuumassuteqarfiat nalinginnaasumik tassaassaaq angajoqqaatut oqartussaassusillit aalajangersimasumik angerlarsimaffigisaat.
  Imm. 4.  Qinnuteqartut angajoqqaatut oqartussaassusilinnit oqartussaaffigineqanngitsut ilaqutariinnikkut attuumassuteqarfiat nalinginnaasumik tassaassaaq Kalaallit Nunaanni kingullermik aalajangersimasumik najugaqarfiat.

  § 6.  Ilinnialernissamik akuerineqarnermut tunngatillugu Avannaata Kommunianit qinnuteqartut Kommune Qeqertalik najugarisatut kommunerisaattut isigineqassaaq.

  § 7.  Qinnuteqaateqartup kommunerisaani Majoriami kingusinnerpaamik 15. martsimi immersuiffissami paasissutissat attuumassuteqartut tamaasa elektroniskimik paasissutissaasivimmut IT-regimut ikkussuunneqassapput.

  § 8.  Ilinniarnertuunngorniarfimmi qinnuteqartut ilinniartunngornissamik salliutillugu qinnuteqarfigisaanni rektorip ilinniartunngornissamik misilitsinneq aamma napparsimanerup kingorna misilitsinneq qaqugu ingerlanneqassanersut misilitsinnikkut ilinniartunngornissamik qinnuteqartut kingusinnerpaamik 22. marts nalunaarfigissavai, misilitsinneq sumi ingerlanneqassanersoq misilitsinnissamullu paasissutissat allat pillugit. 
  Imm. 2.  Qinnuteqaateqartut sumi pingaarnertut qinnuteqarfigisimasaani Ilinniarnertuunngorniarfimmi rektori elektroniskimik paasissutissaasivimmut IT-regimi ilinniarnertuunngorniartussanik ilinniartunngortuni killiffiit nutartertassavai. Tamanna ilutigalugu allakkat assilineqarnerat qinnuteqartup angerlarsimaffigisaani Majoriamut nassiutissavai.

  § 9.  Ilinniarnertuunngorniarfimmi qinnuteqaateqartup pingaarnertut qinnuteqarfigisimasaani rektor kingusinnerpaamik 1. maj imatut nalunaaruteqassaaq: 
1)  inatsisitigut piumasaqaatikkut qinnuteqartoq akuerineqarpoq, Ilinniartunngorniartarneq pillugu Inatsisartut inatsisaanni § 8, imm. 1 tak., taamaattorli imm. 2 aamma tak., 
2)  qinnuteqartoq immikkut ittumik akuersissuteqarnikkut ilinniarnertuunngorniarnissaminut akuerineqarpoq, Ilinniarnertuunngorniartarneq pillugu Inatsisartut inatsisaanni § 8, imm. 2 tak., taamaattorli imm. 2 tak.,  
3)  qinnuteqartoq ilinniartunngornissaminut misilitsikkami angusivoq, Ilinniartunngorniartarneq pillugu Inatsisartut inatsisaanni § 8, imm. 2 tak., aamma inissaqaruni ilinniartunngussaaq. Tamanna ilutigalugu qinnuteqartoq ilumut inaarutaasumik aamma sumi ilinniarnertuunngorniarfimmi aallartissanersoq pillugit nalunaarfigineqassaaq, Ilinniartunngorniartarneq pillugu Inatsisartut inatsisaanni § 9, imm. 1 tak.,
4)  qinnuteqartup akuerineqarnissaminut misilitsikkami angusinngilaq taamaattumik itigartitsineq nalunaarutigineqarpoq, Ilinniartunngorniartarneq pillugu Inatsisartut inatsisaanni § 9, imm. 1 tak., imaluunniit 
5)  qinnuteqaat ilinniarnertuunngorniarfimmut allamut tassani suliarineqartussanngorlugu nassiunneqarpoq, 
  Imm. 2. Qinnuteqartut piffissami qinnuteqarfiusumi suli meeqqat atuarfianni naammassinngitsut imaluunniit meeqqat atuarfianni nalinginnaasumik piumasaqaatit assinginik ilinniarnermik naammassinngitsut inaarutaasumik misilitsinnerni killiffinnilu karakterini minnerpaamik karakterissatut aalajangersakkat anguneqarnissaat piumasaqaatigalugu ilinniartunngorsinnaaneranik nalunaarfigineqarsinnaapput. 
  Imm. 3.  Tamanna ilutigalugu qinnuteqartut ilinniartunngornissamik nalunaarfigineqarsimasut ilinniarnertuunngorniarfimmi sorlermi aallartinnissartik pillugu nalunaarfigineqassapput, imm. 1, nr. 1 imaluunniit 2 tak..

  § 10.  Ilinniarnertuunngorniarfimmi qinnuteqartut ilinniartunngornissamik salliutillugu qinnuteqarfigisaanni rektorip qinnuteqartut piumasaqaateqarluni ilinniartunngorsinnaanermik imaluunniit naammattumik inissaqarnersoq apeqqutaatillugu ilinniartunngorsinnaanermik siusinnerusukkut nalunaarfigineqarnikut inaarutaasumik ilinniartunngortinneqarnersut kingusinnerpaamik 1. juli inaarutaasumik nalunaarfigissavai.
  Imm. 2.  Qinnuteqartut naammattunik inissaqarnissaq apeqqutaatillugu ilinniartunngornissamik siusinnerusukkut nalunaarfigineqarsimasut inaarutaasumillu ilinniartunngunngitsut utaqqisuni salliutitassanut ilanngunneqartut nalunaarfigineqassapput. 
  Imm. 3.  Qinnuteqartut utaqqisunik tulleriiaarilluni allattuiffimmiittut ilinniartunngortinneqartunik ilinniartunngortinneqarnissamik kissaateqarnermik taamaatitsiinnartoqarpat imaluunniit ilinniarnerup aallartinnerani ilinniarnermi aallartittoqanngippat tulleriiaarineq malillugu ilinniartunngortinneqarnissamik neqeroorfigineqassapput, § 11 tak.

  § 11.  Qinnuteqartut ilinniartunngortinneqarnerminnik nalunaarfigineqarsimasut ilinniarnerup aallartinnerani ilinniarneq aallartissavaat. 
  Imm. 2.  Qinnuteqartoq ilinniarnerup aallartinnerani ilinniarnermik aallartitsinissamik kissaateqanngikkuni ilinniartunngornissamik nutaamik qinnuteqassaaq. 
  Imm. 3.  Pissutsit immikkut ittut tamassuminnga tunngavissaqartitsippata ilinniarnerup aallartinnerata kinguninngua ilinniarnerup aallartinneqarnissaa rektorip akuersissutigisinnaavaa.

Kapitali 3

Ilinnialernissamut misilitsinneq

  § 12.  Ilinniartunngorniarluni misilitsinneq, tassunga ilanngullugu napparsimareernermi misilitsinneq, tak. § 15, imm. 2, Ilinniartitaanermut Naalakkersuisoqarfimmit aaqqissuunneqassaaq nalilersorneqarlunilu. 
  Imm. 2.  Misilitsinnermi angusat misilitsinnerup kingorna kingusinnerpaamik sapaatit akunneri marluk qaangiunneranni nalilersorneqareersimassapput ilinniarnertuunngorniarfinnullu nalunaarutigineqareersimassallutik.

  § 13.  Ilinniartunngorniarluni misilitsinneq imaqarpoq allattarissamik misilitsinnermik ataatsimik ataatsimoortumik, meeqqat atuarfianni angajulliit ilinniagaanni qinnuteqartup pisinnaasaanik misiliinerusoq. 
  Imm. 2.  Ilinniartunngorniarluni misilitsinneq ilinniakkani tamani suliassanik imaqassaaq, pingaarnerutinneqassallutilli ilinniakkani kalaallisut, qallunaatut, tuluttut aamma matematikkimi suliassat. 
  Imm. 3.  Ilinniartitaanermut Naalakkersuisoqarfik suliassat pillugit ataatsimiititaliamik pilersitsissaaq taassumalu ilinniartunngorniarnermi misiligutissat suliarissavai. 
  Imm. 4.  Ilinniartitaanermut Naalakkersuisoqarfik ataatsimiititaliamut allattoqarfeqartitsissaaq.

  § 14.  Ilinniartitaanermut Naalakkersuisoqarfimmi misilitsinnissanut aaqqissuisoqassaaq. 
  Imm. 2.  Misilitsinneq qinnuteqartup kommunimi angerlarsimaffiani Piareersarfimmi ingerlanneqassaaq, kisiannili imm. 3 aamma 4 takukkit. 
  Imm. 3.  Ilinniartitaanermut Naalakkersuisoqarfiup misilitsinneq qinnuteqartup aalajangersimasumik najugaqarfiani meeqqat atuarfianni ingerlanneqassasoq aalajangersinnaavaa.
  Imm. 4.  Ilinniartitaanermut Ilisimatusarnermullu Naalakkersuisup misilitsinneq sulisoqarfimmi Naalakkersuisoqarfimmit tassunga atorneqarsinnaasutut akuerineqartumi ingerlanneqassasoq aalajangersinnaavaa.

  § 15.  Ilinniarnertuunngorniarluni misilitsinneq ukiut tamaasa Ilinniartitaanermut Naalakkersuisoqarfiup ullormi aalajangigaani, tamanullu takusassiarineqartumi ingerlanneqartassaaq, nalinginnaasumik piffissami 1. – 14. aprilimi. Ulloq misilitsiffiusussaq aalajangerneqassaaq tamanullu takusassiarineqarluni kingusinnerpaamik 1. november misilitsinnissaq sioqqullugu.
  Imm. 2.  Qinnuteqartunut napparsimaneq pissutigalugu allamilluunniit utoqqatsissutaasinnaasumik misilitsissinnaannginnermut peqquteqartut eqqarsaatigalugit nutaamik misilitsittoqassaaq (napparsimasunut ilinniarnertuunngorniarluni misilitsinneq). 
  Stk. 3.  Napparsimaneq uppernarsaaserneqassaaq nakorsamit allagartakkut, ullormi misilitsiffiusumi suliarineqarsimasukkut. Qinnuteqartoq napparsimasunut ilinniarnertuunngorniarluni misilitsinnissamut inassutigineqarnissaminut piumasaqaatinik naammassinnissimanersoq Ilinniartitaanermut Naalakkersuisoqarfimmi aalajangerneqassaaq.
  Imm. 4.  Napparsimasunut ilinniarnertuunngorniarluni misilitsinneq ukiut tamaasa ullormi Ilinniartitaanermut Naalakkersuisoqarfiup aalajangigaani tamanullu takusassiarisimasaani ingerlanneqartassaaq, nalinginnaasumik piffissami 15.-26. april. Ulloq misilitsiffiusussaq aalajangerneqassaaq tamanullu takusassiarineqarluni kingusinnerpaamik 1. november misilitsinnissaq sioqqullugu.

Kapitali 4

Inissaqartitsineq aamma agguaasarneq

  § 16.  Ilinniarnertuunngorniarfiit ataasiakkaat tamassumunnga aningaasaliissutini killiliussat aammalu init ilinniartitsiviusut inissaqartitsinermullu periarfissat eqqarsaatigalugit ilinniarfiit inissaqartitsinerannut naleqquttunik amerlassusilinnik ilinniartunngortitsisinnaapput, tak. imm. 2. 
  Imm. 2.  Inissat sulisussaqarnerlu periarfissaqartitsippata, killilimmik amerlanerusut ilinniartunngortinneqarnissaannik Ilinniartitaanermut Naalakkersuisoqarfimmit akuersissutigineqarsinnaavoq.

  § 17.  Ilinniarnertuunngorniarfiit ataasiakkaat ilinniarnertuunngorniarfinni klassinut holdinullu ilinniartitsineq aaqqissuutissavaat. 
  Imm. 2.  Klassi imatut paasineqassaaq, ilinniartinneqartut (ilinniartoqatigiit) 1.semesterip aallartinnerani aammalu ilinniakkap sammivianik ilinniarnerup aallartinnerani pilersinneqartut, tassanilu ilinniartut ataatsimut ilinniakkanik ataatsimut ilinniartinneqarlutik. Klassi aamma pilersinneqarsinnaavoq klassit pioreersut katinnerisigut. 
  Imm. 3.  Holdi imatut paasineqassaaq, ilinniartinneqartut ilinniarnertuunngorniarfimmi qaqugukkulluunniit pilersinneqartut, tassanilu ilinniartut ilinniakkami ataatsimi ataatsimut ilinniartinneqarlutik. Holdit tassaasinnaapput klassimi ataatsimi ilinniartut, klasseqatigiit arlariinneersut arlallit aamma klasseqatigiinnit arlariinneersunit assigiinngitsuneersut.

  § 18.  Klassimi ataatsimi holdimilu ataatsimi ilinniartut amerlanerpaamik 24-ussapput, taamaattorli imm. 4 aamma 5 tak.
  Imm. 2.  Ilinniartut ikinnerpaamik 16-iuppata ilinniarnertuunngorniarfiit ataasiakkaat klassimik ataatsimik pilersitsisinnaapput, taamaattorli § 19, imm. 2 tak.
  Imm. 3.  Ilinniartut ikinnerpaamik arfineq pingasuuppata ilinniarnertuunngorniarfiit ataasiakkaat holdimik ataatsimik pilersitsisinnaapput, taamaattorli § 22, imm. 2 tak. 
  Imm. 4.  Inissat aningaasaliissutit iluanni periarfissaqartitsippata Ilinniartitaanermut Naalakkersuisoqarfiup killiliussat iluanni imm. 1 sanioqqussinnaavaa, avatangiisinut sulisoqarnermullu tunngasut tamanna periarfissaqartippassuk. 
  Imm. 5.  Tamassuminnga rektorip qinnuteqaateqareerneratigut imm. 2-mi 3-milu ikinnerpaaffissanik piumasaqaatit sanioqqunnissaannik pissutsit immikkut ittut tamatumunnga pissutissaqartitsigaangata Ilinniartitaanermut Naalakkersuisoqarfik akuersisinnaavoq.

  § 19.  Ilinniartitaanermut Naalakkersuisoqarfimmi agguaasarnermut ataatsimiititaliamik ilinniarnertuunngorniarlutik qinnuteqarsimasut ilinniartunngortut ataasiakkaat ilinniarnertuunngorniarfimmi sorlermiinnissaannik Naalakkersuisoqarfimmut inassuteqartussanik pilersitsisoqarpoq.
 Imm. 2.  Agguaasarnermut ataatsimiititaliaq ilinniarnertuunngorniarfinni ataasiakkaani rektorimik imaluunniit rektorimit taamatut pisinnaatinneqartumik ilaasortalerneqassaaq.

  § 20.  Agguaasarnermut ataatsimiititaliap ilinniarnertuunngorniartarneq pillugu Inatsisartut inatsisaanni agguaasarneq pillugu malittarisassat inassuteqaateqarnermini aallaavigissavai.
  Imm. 2.  Ataatsimiititaliap qinnuteqartut ilinniartunngortinneqartut illoqarfimmi ilinniarnertuunngorniarfiup inissisimaffigisaata avataani najugaqartut ilinniartut inaanni assigisaanniluunniit ineqarnissamik neqeroorfigineqassasut eqqumaffigissavaa.
  Imm. 3.  Qinnuteqartut piffissap qinnuteqarfiusup nalaani Kalaallit Nunaanni aalajangersimasumik najugaqanngitsut ilinniartut inaanni najugaqarnissamik neqerooruteqarnermut tunngatillugu Kalaallit Nunaanni kingullermik aalajangersimasumik najugaqarfimminni najugaqartutut isigineqassapput. 
  Imm. 4.  Tamatuttaaq inissat pillugit najoqqutassat Ilinniartitaanermut Naalakkersuisoqarfiup aalajangersagarisinnaasai ataatsimiititaliap aammattaaq malissavai.
  Imm. 5.  Tamatuttaaq 1.semesterip kingorna qinnuteqartut ilinniartunngortinneqartut ilinniakkap sammivianik pituttuutaanngitsumik siumut nalunaarutaat ataatsimiititaliap aammattaaq pingaartissavai, § 4, imm. 5 tak. 
 Imm. 6.  Tamatuttaaq qinnuteqartut tulleriiaarinermik nalunaarutaat aamma ilinniarnertuunngorniartarneq pillugu Inatsisartut inatsisaanni agguaasarneq pillugu malittarisassat sanioqqunneqarnissaannik immikkut tunngavilersuutigisinnaasaat ataatsimiititaliap aammattaaq pingaartissavai.
  Imm. 7.  Taamatuttaaq qinnuteqartut ilinniartunngortinneqartut agguarneranni inissat tamarmiusut pitsaanerpaamik atorluarneqarnissaat ataatsimiititaliap aammattaaq anguniassavaa.

  § 21.  Agguaasarnermut ataatsimiititaliap inassuteqaataa kingusinnerpaamik 7. juli Ilinniartitaanermut Naalakkersuisoqarfimmut nassiunneqassaaq.
  Imm. 2.  Ilinniartut ilinniartunngortinneqartut agguaasarnermut ataatsimiititaliap inassuteqaataani ilaasut agguarneqarnissaat pillugu Ilinniartitaanermut Naalakkersuisoqarfik kingusinnerpaamik 14. juli aalajangiissaaq. Ilinniarnertuunngorniarfimmi ilinniartut ilinniartunngortinneqarfianni rektorip ilinniartut sumi ilinniartunngortinneqarnerannik tamassuma kinguninngua allaganngorlugu nalunaarfigissavai.

Kapitali 5

Naammagittaalliorneq

  § 22.  Ilinniarnertuunngorniarfimmi ilinniartunngornissaq ilinniartunngoqqinnissarlu pillugit qinnuteqaatit pillugit rektorip aalajangiineri ilinniarnertuunngorniarfimmut qinnuteqartut Ilinniartitaanermut Naalakkersuisoqarfimmut naammagittaalliuutigisinnaavaat. 
  Imm. 2.  Qinnuteqartoq angajoqqaatut oqartussaassuseqartunit oqartussaaffigineqarpat angajoqqaatut oqartussaassuseqartut aamma naammagittaalliuuteqarsinnaapput.

  § 23.  Naammagittaalliuut rektorimut nassiunneqassaaq, aalajangiinerullu qinnuteqartumut nalunaarutigineqarnerata kingorna kingusinnerpaamik sapaatit akunneri marluk qaangiuppata rektorip tigusimassavaa. 
  Imm. 2.  Suliami oqaaseqaat rektorip suliarissavaa, naammagittaalliortorlu oqaaseqaatip sapaatip akunnerata ataatsip iluani oqaaseqaateqarfiginissaanut periarfissinneqassaaq. Oqaaseqaat naammagittaalliortullu oqaaseqaatigisinnaasai ilanngullugit rektorip suliaq Ilinniartitaanermut Naalakkersuisoqarfimmut tamassuma kingorna ingerlateqqissavaa.
  Imm. 3.  Rektorip aalajangiinerata allanngortinneqannginnissaa pillugu imm. 1-imi piumasaqaatit eqqortinneqanngippata naammagittaalliuutip itigartinneqarnissaanik, naammagittaalliortoq ilalerlugu aalajangiinerup allanngortinneqarnissaanik imaluunniit aalajangiineq suliareqqitassanngorlugu rektorimut uterteqqinnissaanik Ilinniartitaanermut Naalakkersuisoqarfik aalajangiisinnaavoq.

Kapitali 6

Atuutilersitsinermut atorunnaarsitsinermullu aalajangersakkat

  § 24.  Nalunaarut ulloq 1. august 2022-mi atuutilissaaq.
  Imm. 2.  Tamanna ilutigalugu ilinniarnertuunngorniartunik ilinniartunngortitsisarneq pillugu Namminersorlutik Oqartussat nalunaarutaat nr. 3, 31. januar 2013-imeersoq atorunnaarsinneqarpoq.

Namminersorlutik Oqartussat, ulloq 5. juli 2022

Peter Olsen
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

/ Karsten Peter Jensen