Ilinniarnertuunngorniartarneq pillugu Inatsisartut inatsisaat nr. 13, 22. november 2011-meersumi § 5, imm. 2, § 6, imm. 2, § 8, imm. 3 aamma 4, § 11, imm. 3 aamma 4 kiisalu § 14 naapertorlugu aalajangersarneqarpoq:

Kapitali 1
Ilinniartunngorsinnaanermut ilinniartunngortitsinermullu piumasaqaatit immikkut ittut aamma karakterinik naatsorsueqqittarneq

§ 1.  Qinnuteqartut Kalaallit Nunaanni aalajangersimasumik najugaqanngitsut ilinniarnertuunngorniarfimmi ilinniartunngortinneqarsinnaapput qinnuteqartoq qinnuteqartunut Kalaallit Nunaanni aalajangersimasumik najugaqartunut piumasaqaatit qaffaseqataannik tunngaviusumik ilinniarnermi ilinniakkatigut pisinnaasaqartoq Ilinniartitaanermut Naalakkersuisoqarfik naliliippat.

§ 2.  Qinnuteqartunut Greenlandic Grading System-skala malillugu naliliiffigineqanngitsunut ilanngussami 1-imi naatsorsueqqinnermut tabeli aalajangersarneqartoq malillugu naatsorsueqqittoqassaaq.
Imm. 2.  Qinnuteqartunut ilanngussaq 1-imi naatsorsueqqinnermut tabelitut aalajangersarneqartumut ilaanngitsut Ilinniartitaanermut Naalakkersuisoqarfiup naliliinera tunngavigalugu naatsorsueqqittoqassaaq.

Kapitali 2
Qinnuteqarnerup ingerlanneqartarnera

§ 3.  Ilinniarnertuunngorniarfinni ilinniartunngorniarluni qinnuteqarneq ukiumi ilinniarnerup aallartiffissaani kingusinnerpaamik 1. marts pisarpoq.

§ 4.  Qinnuteqarnermi immersugassaq Ilinniartitaanermut Naalakkersuisoqarfimmit akuerisaasoq atorlugu ilinniartunngornissamik qinnuteqartoqassaaq.
Imm. 2. Ilinniarnertuunngorniartarneq pillugu Inatsisartut inatsisaanni nr. 13, 22. november 2011-meersumi § 8, imm. 1-imi piumasaqaatit eqqortinneqarnerisigut tassungaluunniit taarsiullugu § 8, imm. 2 malillugu immikkut akuerineqarnissamik imaluunniit ilinniartunngornissamut misilitsinnikkut ilinniartunngornissamik qinnuteqarnerluni qinnuteqartup qinnuteqarnermini ilisimatitsissutigissavaa, takuuk kapitali 3.
Imm. 3.  Ilinniarnertuunngorniarfimmi sorlermi ilinniartunngornissamik qinnuteqarnerluni qinnuteqartup qinnuteqarnermini ilisimatitsissutigissavaa. Qinnuteqartoq arlalinnik kissaateqaruni taakku tulleriinnilersorneri qinnuteqartup allassavai.
Imm. 4. Ilinniarnertuunngorniartarneq pillugu Inatsisartut inatsisaanni nr. 13, 22. november 2011-meersumi § 11, imm. 1-imi 2-milu malittarisassat aallaaviginagit ilinniarnertuunngorniarfimmi allami ilinniartunngornissaq kissaatigineqarpat tamassumunnga ilinniakkatigut inuttullu tunngavilersuutit qinnuteqartup allassavai.
Imm. 5.  Tunngaviusumik ilinniareernerup kingorna ilinniakkat sammiviini sorliup toqqarnissaanik ilimagisani siumut pituttuutaanngitsumik qinnuteqartup qinnuteqaammini nalunaarutigeriissavaa.
Imm. 6.  Qinnuteqaat qinnuteqartumit atsiorneqassaaq. Qinnuteqartoq angajoqqaatut oqartussaassusilinnit oqartussaaffigineqarpat qinnuteqaat aamma angajoqqaatut oqartussaassusilinnit atsiorneqassaaq.

§ 5.  Ilinniartunngornissamik qinnuteqaat Piareersarfimmut qinnuteqartup kommunimi angerlarsimaffianiittumut nassiunneqassaaq.
Imm. 2.  Qinnuteqartut piffissami qinnuteqarfimmi Kalaallit Nunaata avataani aalajangersimasumik najugaqartut, ilinniartunngornermut tunngatillugu kommunimi ilaqutaqariinnermi annertunerpaamik atassuteqarfigisaat angerlarsimaffiattut isigineqassaaq.
Imm. 3.  Qinnuteqartut angajoqqaatut oqartussaassuseqartunit oqartussaaffigineqartut ilaqutariinnikkut attuumassuteqarfiat nalinginnaasumik tassaassaaq angajoqqaatut oqartussaassusillit aalajangersimasumik angerlarsimaffigisaat.
Imm.4.  Qinnuteqartut angajoqqaatut oqartussaassusilinnit oqartussaaffigineqanngitsut ilaqutariinnikkut attuumassuteqarfiat nalinginnaasumik tassaassaaq Kalaallit Nunaanni kingullermik aalajangersimasumik najugaqarfiat.

§ 6.  Qinnuteqartup kommuni angerlarsimaffianni Piareersarfiup qinnuteqaat ilinniarnertuun-ngorniarfimmi qinnuteqartup ilinniartunngornissamik salliutillugu qinnuteqarfigisaani rektorimut kingusinnerpaamik 15. marts nassiutissavaa. Kingusinnerpaamillu ulloq taanna paasissutissat attuumassuteqartut tamaasa Piareersarfiup elektroniskiusumik database-mut IT-reg-imut immiutissavai.

§ 7.  Ilinniarnertuunngorniarfimmi qinnuteqartut ilinniartunngornissamik salliutillugu qinnuteqarfigisaanni rektorip ilinniartunngornissamik misilitsinneq aamma napparsi-mareernerup kingorna misilitsinneq qaqugu ingerlanneqassanersut misilitsinnikkut ilinniartunngornissamik qinnuteqartut kingusinnerpaamik 22. marts nalunaarfigissavai, misilitsinneq sumi ingerlanneqassanersoq misilitsinnissamullu paasissutissat allat pillugit. Allakkallu assilineqarneri tamatuma ilutigisaanik qinnuteqartup angerlarsimaffigisaani Piareersarfimmut nassiutissavai.

§ 8.  Ilinniarnertuunngorniarfimmi qinnuteqartut ilinniartunngornissamik salliutillugu qinnuteqarfigisaanni rektorip qinnuteqartut ilinniartunngortinneqarnersut kingusinnerpaamik 1. maj nalunaarfigissavai, tassunga ilanngullugu § 9 malillugu ilinniartunngortinneqarneq piumasaqaatitaqarnersoq imaluunniit § 10 malillugu naammattunik inissaqarnissaa apeqqutaatillugu nalunaaruteqartoqarnersoq.
Imm. 2. Qinnuteqartut ilinniarnertuunngornissamut misilitsittut misilitsinnerup inerneranik misilitsinnermilu angusisoqarsimanersoq ilanngullugu nalunaarfigineqassapput.

§ 9.  Qinnuteqartut piffissami qinnuteqarfiusumi suli meeqqat atuarfianni naammassinngitsut imaluunniit meeqqat atuarfianni nalinginnaasumik piumasaqaatit assinginik ilinniarnermik naammassinngitsut inaarutaasumik misilitsinnerni killiffinnilu karakterini minnerpaamik karakterissatut aalajangersakkat anguneqarnissaat piumasaqaatigulugu ilinniartunngorsinnaaneranik nalunaarfigineqarsinnaapput.

§ 10.  Qinnuteqartut ilinniartunngornissamut misilitsittut imaluunniit immikkut akuerineqarlutik ilinniartunngortinneqartut ilinniartunngortinneqarnermik nalunaaruteqarnermut peqatigitillugu nalunaarfigineqassapput naammattunik inissaqarnera apeqqutaatillugu ilinniartunngortinneqartut, kingusinnerusukkullu nalunaaruteqartoqassasoq inaarutaasumik ilinniartunngortinneqarnersut taamaattoqarpallu ilinniarnertuunngorniarfimmi sorlermi.

§ 11.  Qinnuteqartut Ilinniarnertuunngorniartarneq pillugu Inatsisartut inatsisaanni nr. 13, 22. november 2011-meersumi § 8, imm. 1-imi piumasaqaatit eqqortinnerisigut ilinniartunngortinneqartut, ilinniartunngortinneqarnermik nalunaaruteqarnermut peqatigitillugu nalunaarfigineqassapput, ilinniarnertuunngorniarfimmi qinnuteqateqarfigisami ilinniartunngortin-neqartut,
1) piffissami qinnuteqarfigisaminni kommunimi aalajangersimasumik najugaqarfigisaminni ilinniarnertuunngorniarfimmi imaluunniit ilinniarnertuunngorniarfimmi teknikimik imaluunniit niuernermik ilinniakkanik sammiveqartunik neqerooruteqartunut ilinniartunngortinneqarnissamik qinnuteqarsimappata aamma
2) qinnuteqartup ilinniarnertuunngorniarfimmi ilinniartunngortinneqarnissamik qinnuteqarneranut akerliusumik Ilinniartitaanermut Naalakkersuisoqarfik inissat pillugit najoqqutassanik aalajangiisimanngippat.
Imm. 2.  Qinnuteqartut ilinniartunngortinneqartut allat Inatsisartut inatsisaanni nr. 13, 22. november 2011-meersumi § 8, imm. 1-imi piumasaqaatinik eqqortitsisut nalunaarfigineqassapput ilinniarnertuunngorniarfimmi sorlermi ilinniartunngortinneqarnerannik kingusinnerusukkut nalunaaruteqartoqassasoq.

§ 12.  Ilinniarnertuunngorniarfimmi qinnuteqartut ilinniartunngornissamik salliutillugu qinnuteqarfigisaanni rektorip qinnuteqartut piumasaqaateqarluni ilinniartunngorsinnaanermik imaluunniit naammattumik inissaqarnersoq apeqqutaatillugu ilinniartunngorsinnaanermik siusinnerusukkut nalunaarfigineqarnikut inaarutaasumik ilinniartunngortinneqarnersut kingusinnerpaamik 1. juli inaarutaasumik nalunaarfigissavai.
Imm. 2.  Qinnuteqartut naammattunik inissaqarnissaq apeqqutaatillugu ilinniartunngortinneqarnissamik siusinnerusukkut nalunaarfigineqarnikut, inaarutaasumillu ilinniartunngortinneqanngitsut nalunaarfigineqassapput, tulleriiaarilluni utaqqisut allattorsimaffiannut ilanngunneqartut.
Imm. 3.  Qinnuteqartut utaqqisunik tulleriiaarilluni allattuiffimmiittut ilinniartunngortin-neqartunik ilinniartunngortinneqarnissamik kissaateqarnermik taamaatitsiinnartoqarpat imaluunniit ilinniarnerup aallartinnerani ilinniarnermi aallartittoqanngippat tulleriiaarineq malillugu ilinniartunngortinneqarnissamik neqeroorfigineqassapput, takuuk § 14.

§ 13.  Inaarutaasumik ilinniartunngortinneqartut ilinniartunngortinneqarnermik nalunaaruteqarnermut peqatigitillugu nalunaarfigineqassapput, ilinniarnertuunngorniarfimmi qinnuteqateqarfigisami ilinniartunngortinneqartut:
1) piffissami qinnuteqarfigisaminni kommunimi aalajangersimasumik najugaqarfigisaminni ilinniarnertuunngorniarfimmi imaluunniit ilinniarnertuunngorniarfimmi teknikimik imaluunniit niuernermik ilinniakkanik sammiveqartunik neqerooruteqartunut ilinniartunngortinneqarnissamik qinnuteqarsimappata aamma
2) Ilinniartitaanermut Naalakkersuisoqarfik inissat pillugit najoqqutassanik ilinniarnertuunngorniarfimmut qinnuteqarfiusumut isernissamut akornutaasunik aalajangiisimanngippat.
Imm. 2.  Inaarutaasumik ilinniartunngortinneqartut allat nalunaarfigineqassapput ilinniarnertuunngorniarfimmi sorlermi ilinniartunngortinneqarnerannik kingusinnerusukkut nalunaaruteqartoqassasoq.

§ 14.  Qinnuteqartut ilinniartunngortinneqarnermik nalunaarfigineqarnikut ilinniarnerup aallartinnerani ilinniarneq aallartissavaat.
Imm. 2.  Qinnuteqartoq ilinniarnerup aallartinnerani ilinniarnermik aallartitsinissamik kissaateqanngikkuni ilinniartunngornissamik nutaamik qinnuteqassaaq.
Imm. 3.  Pissutsit immikkut ittut tamassuminnga tunngavissaqartitsippata ilinniarnerup aallartinnerata kinguninngua ilinniarnerup aallartinneqarnissaa rektorip akuersissutigisinnaavaa.

Kapitali 3
Ilinniarnertuunngorniarluni misilitsinneq

§ 15.  Ilinniartunngorniarluni misilitsinneq, tassunga ilanngullugu napparsimareernermi misilitsinneq, takuuk § 18, imm. 2, Ilinniartitaanermut Naalakkersuisoqarfimmit aaqqissuunneqassaaq nalilersorneqarlunilu.
Imm. 2.  Misilitsinnermi angusat misilitsereernerup kingorna kingusinnerpaamik sapaatit akunneri marluk qaangiunneranni nalilersorneqareersimassapput ilinniarnertuunngor-niarfinnullu nalunaarutigineqareersimassallutik.

§ 16.  Ilinniartunngorniarluni misilitsinneq imaqarpoq allattarissamik misitsilitsinnermik ataatsimik ataatsimoortumik, meeqqat atuarfianni angajulliit ilinniagaanni qinnuteqartup pisinnaasaanik misiliinerusoq.
Imm. 2.  Ilinniartunngorniarluni misilitsinneq ilinniakkani tamani suliassanik imaqassaaq, pingaarnerutinneqassallutilli ilinniakkani kalaallisut, qallunaatut, tuluttut aamma matematikkimi suliassat.
Imm. 3.  Ilinniartitaanermut Naalakkersuisoqarfik suliassat pillugit ataatsimiititaliamik pilersitsissaaq taassumalu ilinniartunngorniarnermi misiliutissat suliarissavai.
Imm. 4.  Ilinniartitaanermut Naalakkersuisoqarfik ataatsimiititaliamut allattoqarfeqar-titsissaaq. 

§ 17.  Ilinniartitaanermut Naalakkersuisoqarfiup ilinniarnertuunngorniarluni misilitsinnerit aaqqissuutissavai nakkutigalugillu.
Imm. 2.  Misilitsinneq qinnuteqartup kommunimi angerlarsimaffiani Piareersarfimmi ingerlanneqassaaq, kisiannili imm. 3 aamma 4 takukkit.
Imm. 3.  Ilinniartitaanermut Naalakkersuisoqarfiup aalajangersinnaavaa misilitsinneq qinnuteqartup aalajangersimasumik najugaqarfiani meeqqat atuarfianni ingerlanneqassasoq.
Imm. 4.  Ilinniartitaanermut Ilisimatusarnermullu Naalakkersuisup aalajangersinnaavaa misilitsinneq sulisoqarfimmi naalakkersuisoqarfimmit tassunga atorneqarsinnaasutut akuerineqartumi ingerlanneqassasoq.

§ 18.   Ilinniarnertuunngorniarluni misilitsinneq ukiut tamaasa Ilinniartitaanermut Naalakkersuisoqarfiup ullormi aalajangigaani, tamanullu takusassiarineqartumi ingerlanneqartassaaq, nalinginnaasumik piffissami 1. – 14. april-imi. Ulloq misilitsiffiusussaq aalajangerneqassaaq tamanullu takusassiarineqarluni kingusinnerpaamik 1. november misilitsinnissaq sioqqullugu.
Imm. 2.  Qinnuteqartunut napparsimaneq pissutigalugu allamilluunniit utoqqatsissutaasinnaasumik misilitissinnaannginnermut peqquteqartut eqqarsaatigalugit nutaamik misilitsittoqassaaq (napparsimasunut ilinniarnertuunngorniarluni misilitsinneq). Napparsimaneq uppernarsaaserneqassaaq nakorsamit allagartakkut, ullormi misilitsiffiusumi suliarineqarsimasukkut. Ilinniarfimmi siullertut misilitsiffiusussami qinnuteqarfigineqarsimasumi rektorip aalajangissavaa qinnuteqartup napparsimasunut ilinniarnertuunngorniarluni misilitsinnissamut piumasaqaatit naammassisimanerai.
Imm. 3.  Napparsimasunut ilinniarnertuunngorniarluni misilitsinneq ukiut tamaasa ullormi Ilinniartitaanermut Naalakkersuisoqarfiup aalajangigaani tamanullu takusassiarisimasaani ingerlanneqartassaaq, nalinginaasumik piffissami 15.-26. april. Ulloq misilitsiffiusussaq aalajangerneqassaaq tamanullu takusassiarineqarluni kingusinnerpaamik 1. november misilitsinnissaq sioqqullugu.

Kapitali 4
Inissaqartitsineq aamma agguaasarneq

§ 19.  Ilinniarnertuunngorniarfiit ataasiakkaat tamassumunnga aningaasaliissutini sinaakkutit aammalu init ilinniartitsiviusut inissaqartitsinermullu periarfissat eqqarsaatigalugit ilinniarfiit inissaqartitsinerannut naleqquttunik amerlassusilinnik ilinniartunngortitsisinnaapput, takuulli imm. 2.
Imm. 2.  Inissat sulisussaqarnerlu periarfissaqartitsippata, killilimmik amerlanerusut ilinniartunngortinneqarnissaannik Ilinniartitaanermut Naalakkersuisoqarfimmit akuersissuteqarsinnaavoq.

§ 20.  Ilinniarnertuunngorniarfiit ataasiakkaat ilinniarnertuunngorniarfinni klassinut holdinullu ilinniartitsineq aaqqissuutissavaat.
Imm. 2.  Klassi imatut paasineqassaaq ilinniartinneqartut (ilinniartoqatigiit), tunngaviusumik ilinniarnerup aallartinnerani aammalu ilinniakkap sammivianik ilinniarnerup aallartinnerani pilersinneqartut, tassanilu ilinniartut ataatsimut ilinniakkanik ataatsimut ilinniartinneqarlutik. Klassi aamma pilersinneqarsinnaavoq klassit pioreersut katinnerisigut.
Imm. 3.  Holdi imatut paasineqassaaq ilinniartinneqartut, ilinniarnertuunngorniarfimmi qaqugukkulluunniit pilersinneqartut, tassanilu ilinniartut ilinniakkami ataatsimi ataatsimut ilinniartinneqarlutik. Holdit tassaasinnaapput klassimi ataatsimi ilinniartut, klasseqatigiit arlariinneersut arlallit aamma klasseqatigiinnit arlariinneersunit assigiinngitsuneersut.

§ 21.  Klassimi ataatsimi holdimilu ataatsimi ilinniartut amerlanerpaamik 24-ussapput, takuulli § 22.
Imm. 2.  Ilinniartut ikinnerpaamik 16-iuppata ilinniarnertuunngorniarfiit klassimik ataatsimik pilersitsisinnaapput, takuulli § 22, imm. 2
Imm. 3.  Ilinniartut ikinnerpaamik arfineq pingasuuppata ilinniarnertuunngorniarfiit holdimik ataatsimik pilersitsisinnaapput, takuulli § 22, imm. 2.

§ 22.  Inissat aningaasaliissutit iluanni periarfissaqartitsippata Ilinniartitaanermut Naalakkersuisoqarfiup sinaakkutit iluanni § 21, imm. 1 sanioqqussinnaavaa, avatangiisinut sulisoqarnermullu tunngasut tamanna periarfissaqartippassuk.
Imm. 2.  Tamassuminnga rektorip qinnuteqaateqareerneratigut § 21, imm. 2-mi 3-milu ikinnerpaaffissanik piumasaqaatit sanioqqunnissaannik pissutsit immikkut ittut tamatumunnga pissutissaqartitsigaangata Ilinniartitaanermut Naalakkersuisoqarfik akuersisinnaavoq.

§ 23.  Agguaasarnermut ataatsimiititaliamik Ilinniartitaanermut Naalakkersuisoqarfik pilersitsissaaq, taannalu qinnuteqartut ataasiakkaat ilinniarnertuunngorniarfimmi sorlermi ilinniartunngortinneqassanersut naalakkersuisoqarfimmut inassuteqaateqartassaaq, takukkilli § 11, imm. 1 aamma § 13, imm. 1.
Imm. 2.  Agguaasarnermut ataatsimiititaliaq ilinniarnertuunngorniarfinni ataasiakkaani rektorimit imaluunniit rektorimit taamatut pisinnaatinneqartumit ilaasortalerneqassaaq.
Imm. 3.  Agguaasarnermut ataatsimiititaliaq siulittaasuminik nammineq toqqaassaaq.
Imm. 4.  Agguaasarnermut ataatsimiititaliap suleriaasissani suliarissavaa, taannalu Ilinniartitaanermut Naalakkersuisoqarfimmut akuerisassanngorlugu nassiunneqassaaq.

§ 24.  Agguaasarnermut ataatsimiititaliap ilinniarnertuunngorniartarneq pillugu inatsimmi agguaasarneq pillugu malittarissat inassuteqaateqarnermini aallaavigissavai.
Imm. 2.  Ataatsimiititaliap maluginiassavaa qinnuteqartut ilinniartunngortinneqartut illoqarfimmi ilinniarnertuunngorniarfiup inissisimaffigisaata avataani najugaqartut ilinniartut inaanni assigisaanniluunniit ineqarnissamik neqeroorfigineqassasut.
Imm. 3.  Qinnuteqartut piffissap qinnuteqarfiusup nalaani Kalaallit Nunaata avataani najugaqartut ilinniartut inaanni najugaqarnissamik neqerooruteqarnermut tunngatillugu Kalaallit Nunaanni ki-ngullermik aalajangersimasumik najugaqarfimminni najugaqartutut isigineqassapput.
Imm. 4.  Inissat pillugit najoqqutassat Ilinniartitaanermut Naalakkersuisoqarfiup aalajangersagarisinnaasai ataatsimiititaliap aammattaaq malissavai.
Imm. 5.  Tunngaviusumik ilinniarnerup kingorna qinnuteqartut ilinniartunngortinneqartut ilinniakkap sammivianik pituttuutaanngitsumik siumut nalunaarutaat ataatsimiititaliap aammattaaq pingaartissavai, takuuk § 4, imm. 5.
Imm. 6.  Qinnuteqartut tulleriiaarinermik nalunaarutaat aamma ilinniarnertuunngorniartarneq pillugu Inatsisartut inatsisaat nr. 13, 22. november 2011-meersumi agguaasarneq pillugu malittarisassat sanioqqunneqarnissaannik immikkut tunngavilersuutigisinnaasaat ataatsimiititaliap aammattaaq pingaartissavai.
Imm. 7.  Qinnuteqartut ilinniartunngortinneqartut agguarneranni inissat tamarmiusut pitsaanerpaamik atorluarneqarnissaat ataatsimiititaliap aammattaaq anguniassavaa.

§ 25.  Agguaasarnermut ataatsimiititaliap inassuteqaataa kingusinnerpaamik 7. juli Ilinniartitaanermut Naalakkersuisoqarfimmut nassiunneqassaaq.
Imm. 2.  Ilinniartut ilinniartunngortinneqartut agguaasarnermut ataatsimiititaliap inassuteqaataani ilaasut agguarneqarnissaat pillugu Ilinniartitaanermut Naalakkersuisoqarfik kingusinnerpaamik 14. juli aalajangiissaaq. Ilinniarnertuunngorniarfimmi ilinniartut ilinniartunngortinneqarfianni rektorip ilinniartut sumi ilinniartunngortinneqarnerannik tamassuma kinguninngua allaganngorlugu nalunaarfigissavai.

Kapitali 5
Maalaaruteqartarneq

§ 26.  Ilinniarnertuunngorniarfimmi ilinniartunngornissaq ilinniartunngoqqinnissarlu pillugit qinnuteqaatit pillugit rektorip aalajangiineri ilinniarnertuunngorniarfimmut qinnuteqartut Ilinniartitaanermut Naalakkersuisoqarfimmut maalaarutigisinnaavaat.
Imm. 2.  Qinnuteqartoq angajoqqaatut oqartussaassuseqartunit oqartussaaffigineqarpat angajoqqaatut oqartussaassuseqartut malaaruteqarsinnaapput.

§ 27.  Maalaarut rektorimut nassiunneqassaaq, aalajangiinerullu qinnuteqartumut nalunaarutigineqarnerata kingorna kingusinnerpaamik sapaatit akunneri marluk qaangiuppata rektorip tigusimassavaa.
Imm. 2.  Suliami oqaaseqaat rektorip suliarissavaa, maalaaruteqartorlu oqaaseqaatip sapaatip akunnerata ataatsip iluani oqaaseqaateqarfiginissaanut periarfissinneqassaaq. Oqaaseqaat maalaaruteqartullu oqaaseqaatigisinnaasai ilanngullugit rektorip suliaq Ilinniartitaanermut Naalakkersuisoqarfimmut tamassuma kingorna ingerlateqqissavaa.
Imm. 3.  Rektorip aalajangiinerata allanngortinneqannginnissaa pillugu imm. 1-imi piumasaqaatit eqqortinneqanngippata maalaarutip itigartinneqarnissaanik, maalaaruteqartoq ilalerlugu aalajangiinerup allanngortinneqarnissaanik imaluunniit aalajangiineq suliareqqitassanngorlugu rektorimut uterteqqinnissaanik Ilinniartitaanermut Naalakkersuisoqarfik aalajangiisinnaavoq.

Kapitali 6
Atuutilersitsinermut ikaarsaariarnermullu malittarisassat

Namminersorlutik Oqartussat, ulloq 31. januar 2013

f/ Palle Christiansen

/

Mikael Kristensen

Ilanngussaq