Qinersisoqarnissaanik suaaruteqarneq

1. Inatsisartunut immikkut ittumik qinersinissaq pillugu Inatsisartut inatsisaat nr. 1, 18. februar 2021-meersoq naapertorlugu ulloq 6. april 2021-mi Inatsisartunut qinersisoqassaaq.

1.1. Malittarisassat uku Inatsisartunit Naalakkersuisunik nutaanik qinersinissamut atorneqassapput.

Naalakkersuisuugallartut sulinerat

2. Naalakkersuisut suliatik ingerlatiinnarsinnaavaat 2021-mut aningaasanut inatsit naapertorlugu piginnaatinneqarnertik tunngavigalugu taamaaliornikkullu suleriaatsit akornuserneqannginnissaat qulakkeerneqassalluni.

2.1. Naalakkersuisut immikkut piginnaatitaanerat Inatsisartunut immikkut ittumik qinersinissamut atatillugu tunniunneqarsimasoq inatsimmi tassannga aalajangersakkat nassuiaatillu malillugit ingerlanneqassapput.

3. Naalakkersuisuugallartut pissutsit politikkikkut aalajangiiffigisinnaanngilaat, soorlu atorfilittat allaffissornikkut aalajangiiffigisassanik annertuunik tunngaviatigut aalajangiussaqarsinnaanngitsut.

3.1. Naalakkersuisut angalasinnaanngillat, nunatta soqutigisai sinnerlugit taamaaliussanngippata.

4. Imm. 2 aamma 3 naapertorlugit piginnaatitaanerit nalornissutigineqarpata suliaq Naalakkersuisut Siulittaasuata Naalakkersuisoqarfianut nalilersorneqartussanngorlugu saqqummiunneqarsinnaavoq.

4.1. Naalakkersuisut Siulittaasuata Naalakkersuisoqarfianut nalornissut saqqummiunneqarpat saqqummiussami ilaatinneqassapput isummerfissamut nassuiaat kiisalu naalakkersuisoqarfiup aaqqiissutissatut siunnersuutaa.

Ataatsimiigiarnernut peqataasarnissaq

5. Naalagaaffimmi oqartussanik, nunanik allanik, kattuffinnik nunanit tamalaaneersunit il.il. peqataalluni ataatsimeeqatiginissaat tunuarsimaarfigineqassaaq.

5.1. Ataatsimiinnernut peqataaneq atorfilittanit isumagineqassaaq, ataatsimiinnerup sulialluunniit ilusaata politikerinit peqataaffigineqarnissaa pisariaqartilinngippassuk, taamaattoq takuuk imm. 3.

5.2. Ataatsimiinnerni peqataanermi tunuarsimaartoqassaaq qinersinissamik suaaruteqarsimaneq innersuussutigalugu.

Pilersaarutinik aallartereersunik ingerlatseqqinneq

6. Naalakkersuisut pilersaarutinik aallartereersimasunik sulinertik teknikikkut ingerlatiinnassavaat, matumani pilersaarutit aallartereersimasut nr. 5-imi eqqaaneqartunik suleqateqarnermi.

Tusagassiuutinit saaffiginnissutit tusagassiortunullu saaffiginninnerit

7. Tusagassiuutinit saaffiginnissutit naalakkersuisoqarfimmi pisortamut innersuunneqartassapput.

7.1. Pissutsit piviusut imaluunniit paasissutissat qinersinissamik suaaruteqannginnermi tamanut saqqummiunneqarsimasut pillugit paasissutissat taamaallaat tusagassiorfinnut ingerlateqqinneqarsinnaapput.

7.2. Tusagassiorfinnut nalunaarutit naalakkersuisoqarfinnit pisortanit taamaallaat nassiunneqarsinnaapput naalakkersuinermullu tunngasuussanatik.

Atorfinitsitsineq soraarsitsinerlu

8. Naalakkersuisut allaffissornermi qullersanik atorfinitsitsisinnaanngillat soraarsitsisinnaanatilluunniit, ataatsimiititaliorsinnaanatik, isumalioqatigiissitaliorsinnaanatik il.il.

§ 37 naapertorlugu apeqqutit

9. Inatsisartunut ilaasortanit Inatsisartut suleriaasianni § 37 naapertorlugu apeqquteqaatit akissuteqarfigineqassanngillat.

9.1. § 37 naapertorlugu apeqquteqartoq naalakkersuisoqarfimmi akisussaasunit ilisimatinneqartassaaq apeqqutigineqartut pillugit akissuteqartoqarsinnaanngimmat.

Avammut attaveqaqatigiinneq

10. Suliffeqarfinnik, kattuffinnik, innuttaasunik il.il. attaveqaqatigiinnerit pisarnertut nalinginnaasumik akineqartassapput.

10.1. Akissuteqaatit allaffissornikkut atorfilittanit suliarineqartassapput immikkoortuni akisussaasunit qinersisoqarnissaanik suaaruteqarneq innersuussutigalugu.

10.2. Akissuteqaatit aallaaviatigut pissutsinut piviusunut taamaallaat imaqartassapput.

Tamanut ammasumik tusarniaanerit

11. Inatsisartut inatsisissaannut, nalunaarutinut, nassuiaatinut il.il. siunnersuutinik tamanut nutaanik tusarniaasoqassanngilaq.

11.1. Tusarniaassutit nassiunneqareersut piffissaliussap iluani naammassineqassapput.

11.2. Inatsisit pitsaassusaannik qulakkeerinninnissaq Inatsisilerivimmit pisarnertut ingerlanneqassaaq.

Naalakkersuisut Siulittaasuata Naalakkersuisoqarfia, 18. februar 2021

Hans-Peder Barlach Christensen (atsior.)