Atuuffia

1. Naalakkersuisut nutaat Inatsisartunit qinerneqarnissaasa tungaannut matumani najoqqutassat Naalakkersuisuugallartunut, tak. imm. 2, atuupput.

Naalakkersuisunik atuukkunnaarsitsineq il.il.

2. Inatsisartut Naalakkersuisullu pillugit Inatsisartut inatsisaanni kapitali 6 naapertorlugu Naalakkersuisuugallartut Naalakkersuisuugallartutut isigineqartarput piffissamit ima pisoqaraangat:

a) Inatsisartunut nutaamik qinersinissaq nalunaarutigineqarpat,

b) Naalakkersuisut soraarnissaq qinnutigippassuk imaluunniit

c) Naalakkersuisut tamarmiusut Inatsisartunit atuukkunnaarsinneqarpata.

Naalakkersuisuugallartut sulinerat

3. Naalakkersuisuugallartut atorfimmi suliassat ingerlaannarnissaannut pisariaqartunik taamaallaat suliaqarsinnaapput. Atorfimmi suliassat ingerlanneqarnissaat atorfilittanit isumagineqassasut naatsorsuutigineqarmat, Naalakkersuisuugallartoq suliat ataasiakkaat suliarineqar­nerini peqataaneq ajorpoq.

4. Naalakkersuisut polikkikkut aalajangiisinnaanngillat, soorluttaaq suliani annertuuni allaffissornikkut aalajangiisoqarsinnaanngitsoq.

5. Atorfimmi suliassat ingerlanneqarnissaat qulakkeerumallugu, Naalakkersuisut pisinnaatitsissutit aningaasaliissutillu atuuttut tunngavigalugit allaffissornermi suliatik ingerlatiinnassavaat.

Angalanerni peqataaneq

6. Pisuni kinguartinneqarsinnaanngitsuni nunap soqutigisai sinniisuuffigineqarnissaat pineqanngippat, Naalakkersuisut angalaqqusaanngillat.

7. Ataatsimiinnissaq suliarluunniit politikkikkut peqataaffigineqartariaqanngippat, atorfilittat ataatsimeeqataassapput, taamaattoq tak. imm. 4.

Ataatsimiinnerni peqataaneq

8. Naalagaaffimmi oqartussanik, nunanik allanikkiisalu maani nunami aamma nunanit tamalaani il.il. kattuffinni ataatsimiinnerni peqataanissat tunuarsimaarfigineqassapput.

9. Ataatsimiinnissaq suliarluunniit politikkikkut peqataaffigineqartariaqanngippat, atorfilittat angalaqataassapput, taamaattoq tak. imm. 4.

Suliniutinik aallarteriikkanik suliaqaannarneq

10. Naalakkersuisut suliniutinik aallarteriikkanik sulinertik teknikikkut ingerlatiinnassavaat, matumani suleqatit nr. 8-mi taaneqartut peqatigalugit suliniutit aallartereersut ilanngullugit.

Tusagassiorfinnut aamma tusagassiorfinnit saaffiginnissutit

11. Tusagassiorfinnit saaffiginnissutit pissutsinik piviusunik taamaallaat imaqartillugit akineqarssapput.

12. Tusagassiorfinnut nalunaarutit naalakkersuisoqarfinni pisortanit taamaallaat nassiunneqaqqusaapput, politikkimullu tunngasunik imaqaqqusaanatik.

Atorfinitsitsineq soraarsitsinerlu

13. Allaffissornermi qulliunerusumi atorfinni Naalakkersuisut atorfinitsitsisinnaanngillat imaluunniit soraarsitsisinnaanngillat imaluunniit ataatsimiititalianik aamma ataatsimiititalarsuarnik il.il. pilersitsisinnaanngillat.

§ 37 naapertorlugu apeqqutit

14. Inatsisartut suleriaasianni § 37 naapertorlugu Inatsisartunut ilaasortanit apeqquteqaatit akineqassanngillat.

15. § 37 naapertorlugu apeqquteqaateqartoq naalakkersuisoqarfimmit akisussaasumit ilisimatinneqassaaq apeqqutigineqartoq akineqassanngitsoq, akissuteqassagaanni atorfimmi suliassat ingerlanneqarnissaat pisariaqartut avataaniissammat.

Suliffeqarfiup avataanut allaffigeqatigiinneq

16. Suliamik suliaqarnermut atatillugu innuttaasunik, suliffeqarfinnik il.il. allaffigeqatigiinneq nalinginnaasumik akineqassapput.

17. Soqutigisaqaqatigiiffinnut il.il. allaffigeqatigiinnerit aallaavittut paasissutissanik piviusunik taamaallaat imaqassapput.

Tamanut tusarniaanerit

18. Inatsisartut inatsisissaattut, nalunaarutissaattullu siunnersuutit, nassuiaatit il.il. nutaat tamanut tusarniutigineqqusaanngillat.

19. Tusarniutitut nassiunneqareersut tusarniaanermi piffissarititaasut naapertorlugit suliaralugit naammassineqassapput, tusarniulli pillugu suliffeqarfiup iluani allakkiortoqareertillugu suliarinninneq unitsikkallarneqassalluni.

20. Inatsisilerinermut immikkoortortaqarfiup inatsisiliornermi pitsaassutsimik qulakkeerinninniarnera nalinginnaasumik ingerlanneqassaaq, siunnersuutilli akuerisassanngortinneqassanngillat.

21. Kommunini ileqqoreqqusaattut siunnersuutit kommunalbestyrelsimit akueritikkusutat, kommunimi ileqqoreqqusanut malittarisassat atuuttut naapertorlugit naalakkersuisoqarfimmi susassaqartumi nalinginnaasumik misissuiffigineqassapput.

Nalorninermi apeqqutit

22. Pisuni aalajangersimasuni malittarisassat qanoq atorneqarnissaannik nalornissuteqarnermi, suliaq Naalakkersuisut Siulittaasuata Naalakkersuisoqarfianit naliligassanngorlugu saqqummiunneqarsinnaavoq.

23. Nalornineq Naalakkersuisut Siulittaasuata Naalakkersuisoqarfianut saqqummiunneqarpat ajornartorsiutaasoq, matumani nalornissuteqarnermi patsisaasoq ilanngullugu kiisalu naalakkersuisoqarfiup aaqqiissutissatut siunnersuutaa saqqummiussami ilaatinneqassapput.

Atuutsilersitsineq

24. Inatsisartunut nutaamik qinersinissaq nalunaarutigineqarpat najoqqutassat ukua erngertumik atuutilissapput, Naalakkersuisuugallartut sulinerat pillugu siornatigut najoqqutaasut tamaasa, matumani Naalakkersuisuugallartut sulinerat pillugu najoqqutassat 18. februar 2021-meersut ilanngullugit taarsissavai..

Naalakkersuisut Siulittaasuata Naalakkersuisoqarfia, ulloq 5. decembari 2024

Hans-Peder Barlach Christensen

Naalakkersuisoqarfimmi pisortaq