§ 1

Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi kingullermik Inatsisartut inatsisaatigut nr. 38, 28. november 2019-imeersukkut allanngortinneqartumi ima allannguisoqassaaq:

1. § 9-mi ”§ 29” uunga: ”§§ 50-54” allanngortinneqassaaq.

2.  § 9-p kingorna ilanngunneqassaaq:
”  § 9 a.  Paasissutissanut § 69 b, nr. 1 naapertorlugu nalunaarutigineqartunut tunngatillugu, akileraartarnermullu ingerlatsiviup aningaasanik peqquserlunnikkut malunnarunnaarsaasarnermut oqartussanit pissarsiaanut, § 9 naapertorlugu nipangiussisussaatitaaneq aamma inummut imaluunniit inatsisit malillugit inuttut isigineqartumut, paasissutissani pineqartumut atuuppoq, tamatumani pineqartumut paasissutissat ingerlateqqinnissaat pillugu sulianik ingerlatsinermi paasissutissanillu inummut tunngasunut inatsisit naapertorlugit inatsisitigut pisussaaffeqarneq apeqqutaatinnagu atuuppoq.”

3. § 27 ima oqaasilerneqassaaq:
”  § 27.  Ingerlatseqatigiiffinnut peqatigiiffinnullu il. il., tamakkiisumik killilimmilluunniit akileraartussaasunut, akileraarutinit akiliutaagallartut pillugit Inatsisartut inatsisaanni § 85 a naapertorlugu akileraarutinit akiliutaagallartunit akileraarutissat annertuneruppata, akileraaruseriffimmit akileraarutit 6 procentimik tapiissutitut akiliutinik ilallugit akiliisitsiniutigineqassapput. Tamannali taamaallaat atuutissaaq akileraarutissat 99 kr.-nit annertuneruppata.
  Imm. 2.  Akileraarutissat tapiissutitut akiliutinik ilallit imm. 1 naapertorlugu ukiumi akileraarusiiffimmi ulloq 1. novembari akilerneqartussaapput, piffissaagallartillugu akiliiffissaq kingulleq tassaalluni ulloq 20. novembari. Piffissaagallartillugu akiliiffissaq kingulleq sapaataappat, nalliuttuuppat imaluunniit arfininngorneruppat piffissaatitaasoq ulluinnaq tullermut sivitsorneqassaaq.
  Imm. 3.  Akileraarutinit akiliutaagallartut akileraarummit annertuneruppata, imm. 1 takuuk, akileraarummit annertunerussutaasut kingusinnerpaamik ulloq 20. novembari utertinneqassapput. Piffissaagallartillugu akiliiffissaq kingulleq sapaataappat, nalliuttuuppat imaluunniit arfininngorneruppat piffissaatitaasoq ulluinnaq tullermut sivitsorneqassaaq. Akileraarummut akiliut akileraarummit 99 kr.-t ataallugit annertuneruppat, akileraarummut akiliutaavallaartoq utertillugu akilerneqassanngilaq. Akileraarutissaviit qaangerlugit akiliutigineqarsimasunut taartisiaqartitsinertaqanngilaq imaluunniit tapiissutitut akiliutinik ilassutissiisoqarnani.
  Imm. 4.  Kingorna aalajangiisoqarpat, akileraarutinik qaffaasoqarnissaanut kinguneqartumik, imm. 1-i naapertorlugu akileraarutit akilernikippallaarneqarnikut tapiissutitut akiliutinik ilallugit qaammatip aalajangiinermit qaammatit pingasut qaangiunneranni tulliuttup aallaqqaataani akiligassanngussapput, qaammatillu akiligassanngorfiup ulluisa 20-at tassaalluni piffissaatillugu akiliiffissaq kingullerpaajussalluni. Piffissaagallartillugu akiliiffissaq kingulleq sapaataappat, nalliuttuuppat imaluunniit arfininngorneruppat piffissaatitaasoq ulluinnaq tullermut sivitsorneqassaaq. Oqaaseqatigiit siullerniittut akileraarutit qaffanneqartut imm. 1 naapertorlugu tapiissutitut akiliutinik ilallit, ukiumi akileraarusiiffimmi ulloq 1. novembarimit aallartittumik qaammatit aallartinneri tamaasa 0,5 procentimik aalajangiinermik nalunaarummi ulloq tikillugu erniaqartinneqassapput.
  Imm. 5. Kingorna aalajangiisoqarpat, akileraarutinik appaasoqarnissaanut kinguneqartumik akileraarutit aningaasartaat akiliutaavallaarsimasut aalajangiinerup kingorna qaammatip ataatsip qaangiutinnginnerani 6 procentimik tapiissutitut akiliutinik ilallugit utertinneqassapput. Akileraartussaatitaq aningaasat utertinneqartut pillugit ukiumi akileraarusiiffimmi 1. novembarimit aallartittumik qaammatit tamaasa 0,5 procentimik aalajangiinermik nalunaarummi ulloq tikillugu erniaqartinneqassaaq. Utertitassat Imm. 4 naapertorlugu aningaasanut akiliisitsiniutigineqarsimasunut tunngasut erniaat aatsaat naatsorsorneqalissapput ullormit akiligassanngorfigisimasamit.
  Imm. 6.  Aningaasat Imm. 2-5 taaneqartut kr.-t ilivitsunut ammut akunnaallineqassapput.
  Imm. 7.  Akileraaruseriffiup malittarisassat Naalakkersuisunit aalajangerneqarsimasut naapertorlugit pissutsini immikkut ittuni, ingerlatseqatigiiffinnut peqatigiiffinnullu il. il. akileraarutinik akiliisitsiniarnermi imm. 1-imi aamma imm 4-5-imi tapiissutitut akiliutinik ilasisoqannginnissaa, akuerisinnaavaa.”

4. § 29-mi ”§ 27, Imm. 2 aamma 3” ima: ”§ 27, Imm. 2 aamma 4” allanngortinneqassapput.

5.  § 66-ip kingorna, ilanngunneqassaaq:
”  § 66 a. Akunnermiliuttut akileraartartullu susassaqartut killeqarfiit akimorlugit aaqqissuussinerit ilisimasatik, tigummisatik nakkutilliiffigisatilluunniit pillugit paasissutissanik akileraaruseriffimmut nalunaaruteqartarnissaat pillugu malittarisassanik Naalakkersuisut aalajangersaasinnaapput. Tamatuma saniatigut akunnermiliuttoq oqaaseqatigiit siulliit malillugit malittarisassat atuutsinneqartut malillugit nalunaaruteqartussaatitaaniarnani qinnuteqartoq tamanna pillugu akunnermiliuttunut akileraartartunulluunniit attuumassuteqartunut allanut nalunaaruteqartassasoq pillugu malittarisassanik Naalakkersuisut aalajangersaasinnaapput.
  Imm. 2.  Akileraartarnermut ingerlatsivik killeqarfiit akimorlugit aaqqissuussinermi, malittarisassat imm. 1 malillugu atulersinneqartut naapertorlugit nalunaarutigineqartumut qisuarianngippat, imaluunniit akileraartarnermut ingerlatsivik qallunaanit, savalimmiormiormiut imaluunniit nunani allani oqartussanit paasissutissanik pissarsisimaguni, tamanna aaqqissuussinerup atortussaaneranik imaluunniit aaqqissuussinerup taassuma akileraartarnikkut suliarineqarsimaneranik akuersinermik tamanna nassataqanngilaq.”

6. § 69-ip kingorna immikkoortoq V-mi ilanngunneqassaaq:
”  § 69 a.  Akileraaruseriffik qinnuteqartoqareerneratigut meeqqanut katissimallugulu aapparisamut akiliutit aalajangersarneqarnissaat allanngortinneqarnissaalluunniit pillugu suliat suliarineqarnissaanni atugassatut akileraartartoq pillugu aningaasaqarnikkut paasissutissanik nunani avannarlerni oqartussaasunut ingerlatitseqqissinnaavoq.”

Nunani allani oqartussanik il. il. suleqateqarneq

  § 69 b.  Akileraaruseriffik, Savalimmiuni, Danmarkimi aamma nunani allani inatsisinut susassaqartitaaffiusuni, aalajangersakkat tulliuttut naapertorlugit paasissutissanik oqartussanut piginnaasunut tunniussisarlunilu pissarsisarpoq:
1)  aningaasanik malunnarunnaarsaasarnermik aamma peqqarniisaarnianik aningaasalersuinermik pinaveersaartitsiniarnermut pineqaatissiissutinut (aningaasanik malunnarunnaarsaasarnermut malittarisassat) Kalaallit Nunaanni atuuttut pillugit kiisalu, aningaasanik malunnarunnaarsaasarnermut malittarisassat Kalaallit Nunaanni atuuttut naapertorlugit paasissutissat nalunaarutigineqarsimasunut akileraartarnermik oqartussat paasissutissanik atorsinnaanerat pillugit nunani tamani isumaqatigiissutit aamma isumaqatigiinnikkut atortuusussatut aalajangiussat attuumassuteqartunut inatsisiliorneq,
2)  akileraarutitigut suliassanik aqutsinikkut ikioqatigiinnissaq pillugu Kalaallit Nunaat Savalimmiut Danmarkillu imaluunniit nunani allani inatsisinut susassaqartitaaffiusut akornanni suleqatigiinnissamut isumaqatigiissuteqarneq, aamma
3)  akileraarutitigut suliassanik aqutsinikkut ikioqatigiinnissaq pillugu nunani allani isumaqatigiissutinut aalajangiussat imaluunniit aalajangersagaq alla Kalaallit Nunaannut atuuttoq.”

§ 2

Inatsisartut inatsisaat 1. januar 2022-mi atuutilissaaq.
  Imm. 2. Akileraaruserinermik ingerlatsineq pillugu inatsimmi § 66 a naapertorlugu aalajangersakkat atuutsinneqalersut, inatsimmi matumani § 1, nr. 5-imi oqaasertai malillugit killeqarfiit akimorlugit aaqqissuussinernut sunniuteqarsinnaapput, tamatumani iliuuseq siulleq ulloq 29. oktober 2014-imi kingusinnerusukkulluunniit ingerlanneqareerluni.

Namminersorlutik Oqartussat, ulloq 1. december 2021

Múte Bourup Egede
Naalakkersuisut Siulittaasuat