§ 1.  Ulloq 6. april 2021 Inatsisartunut qinersisoqassaaq.

  § 2.  § 1-mi allannguutaasoq eqqaassanngikkaanni Kalaalit Nunaanni qinersisarneq pillugu Inatsisartut inatsisaanni nr. 14. 24. november 2020-meersumi malittarisassat allatigut malinneqarput.

  § 3.  2021-mut aningasaanut inatsimmi konto pingaarnermi 10.03.03 Partiit qineqqusaarnissaanut tapiissutit (tapiissutinik aningaasaliissutit) aningaasaliissutit immikkoortinneqartut kr. 3.754.000 qaffanneqarput.
  Imm. 2.  2021-mut aningaasanut inatsimmi konto pingaarnermi 10.03.05 Qinersinermut aningaasartuutit (Tapiissutitut aningaasaliissutit) aningaasaliissutit immikkoortinneqartut kr. 1.000.000 qaffanneqarput.

Coronap atuunnera pillugu suliniutissat

  § 4.  Inatsisartut aamma Naalakkersuisut pillugit Inatsisartut inatsisaanni § 29-imi killissaliussat iluanni, partiini siulittaasut, Inatsisartuni ilaasortaatitat minnerpaamik 2/3-iinik tunuliaqutaqartut akuersinerisigut Naalakkersuisut piginnaatinneqarput:
1)  Nappaatit tunillaassortut akiorniarlugit iliuutsit pillugit Inatsisartut peqqussutaat malillugu nalunaarutinik aalajangersaanissamut.
2)  Aningaasaqarnermut Akileraartarnermullu Ataatsimiititaliap akuersissuteqarneratigut 2021-mut aningaasanut inatsimmi kontumi pingaarnermi 20.10.34-imi aningaasaliissutit immikkoortinneqartut aammalu aningaasaliissutinut atasut piginnaatitsissutit iluanni inuussutissarsiortunut namminersortunut sammitinneqartunik ikiorsiissutissanik aallartitsinissamut imaluunniit sivitsuinissamut. Ikiorsiissutissat qinersereernerup kingorna Naalakkersuisut nutaat toqqarneqareernerisa kingorna kingusinnerpaamik qaammatip ataatsip qaangiunnerani atorunnaassapput.

Suliniutissat sanaartugassat pillugit neqeroortitsinermut isumaqatigiissutillu isumaqatigiissutigineqarnissaannut tunngasut

  § 5.  Sanaartugassat sanaartornissamut pilersaarusiornerat naammassereersut aammalu 2021-mut aningaasanut inatsimmi aningaasaliissutit pisariaqartut immikkoortitsivigineqareersimasut pillugit neqeroortitsinerup ingerlannissaanut isumaqatigiissuteqarfiginissaanullu, taamaaliunnginneq inuiaqatigiinnut ajoqusiisumik sunniuteqartussaappat, ilanngullugu nunap karsianut imaluunniit suleqatigisanut namminersortunut aningaasaqarnikkut annaasaqarnermik malitseqassappat, suliffissaaleqisunik amerlisitseqataassappat imaluunniit sanaartugassanik kinguaattoortitsissappat, Inatsisartut aamma Naalakkersuisut pillugit Inatsisartut inatsisaanni § 29-imut killissaliussat iluanni partiini gruppini siulittaasut, Inatsisartuni ilaasortaatitat minnerpaamik 2/3-iinik tunuliaqutaqartut akuersinerisigut Naalakkersuisut piginnaatinneqarput.

  § 6.  Inatsisartut Naalakkersuisullu pillugit Inatsisartut inatsisaanni § 29-mi killiliussat iluanni Naalakkersuisut piginnaatinneqarput, pisariaqartumik aningaasaliissuteqartoqarsimatillugu partigruppini siulittaasut, Inatsisartunut ilaasortaatitat minnerpaamik 2/3-iinik tunuliaquteqartut akuersinerisigut, inuiaqatigiinnut pingaaruteqartunik aammalu kinguartinneqassappata inuiaqatigiinnut ajoqutaasinnaasunik allanik aalajangiinissamut.

  § 7.  Inatsisartut inatsisaat una tamanut saqqummiunneqarnerata aqaguani atuutilissaaq.

Namminersorlutik oqartussat ulloq 18. februar 2021

Kim Kielsen