Matumuuna nalunaarutigineqarpoq allagaateqarfeqarneq pillugu Inatsisartut inatsisaat nr. 5, 3. juni 2015-imeersoq, allannguuteqarluni Inatsisartut inatsisaat nr. 34, 28. november 2019-imeersup malitsigisaanik.

Kapitali 1
Inatsisartut inatsisaata atuuffissaa

  § 1.  Inatsisartut inatsisaat Namminersorlutik Oqartussani Kalaallit Nunaannilu kommunini ingerlatsivinnut tamanut atuuppoq.
  Imm. 2.  Naalakkersuisut maleruagassatigut aalajangersarsinnaavaat Inatsisartut inatsisaat tamakkiisumik ilaannakortumilluunniit atortuussasoq ingerlatseqatigiiffinnut, suliffeqarfinnut il.il. erseqqinnerusumik taaneqartunut pisortat ingerlatsinerannut naatsorsuunneqarsinnaanngitsunut. Aatsaalli taamaattoqartassaaq sulinerminni aningaasartuutaat tamarmik amerlanersaalluunniit pisortanit akilerneqartarpata imaluunniit Inatsisartut inatsisaat imaluunniit peqqussut naapertorlugu pisortat sinnerlugit aalajangiinissaminnut pisinnaatitaaffilerneqarsimappata.
  Imm. 3.  Oqartussaqarfiit, sullissiveqarfiit, ingerlatseqatigiiffiit, peqatigiiffiit il.il. imm. 1-2-lu ilaatinneqartut tulliuttuni pisortat sullissiveqarfiisut taagorneqassapput. 
  Imm. 4.  Pissutsit Inatsisartut aamma oqartussaaffeqarfiit suliffeqarfiillu tassunga atasut allagaateqarfiinut tunngasut pillugit maleruagassat Inatsisartut siulittaasoqarfiannit aalajangersarneqassapput Naalakkersuisut isumaqatiginiareerlugit. 
  Imm. 5.  Inatsisartut inatsisaanni kapitali 6, inunnit ataasiakkaanit aamma sullissiveqarfinnit, ingerlatseqatigiiffinnit, peqatigiiffinnit il.il. toqqortanut imm. 1-2-mi ilaanngitsunut (namminerisamik toqqortat) atuuppoq.

  § 2.  Naalakkersuisut inatsit malillugu suliassat suliarineqartarnerat pillugu naalagaaffimmi oqartussanut, naalagaaffimmi oqartussaasut sullissiveqarfiinut Kalaallit Nunaanniittunut tun­ngatillugu isumaqatigiissuteqarsinnaapput.

Kapitali 2
Nunatta Katersugaasivia Allagaateqarfialu

  § 3.  Nunatta Katersugaasivia Allagaateqarfialu toqqortat oqaluttuarisaanermi nalillit imaluunniit innuttaasunut oqartussaasunullu allaffissornikkut inatsisitigulluunniit pissutsinut uppernarsaatissat atuuttut toqqortarineqarnissaasa qularnaarneqarnissaat pisortat sullissiveqarfiutaasa toqqorsiviiniittut aammalu kapitali 6-imi aalajangersakkat naapertorlugit inuit namminerisamik toqqortaataasa katersorneqarnissaannut, aaqqissuunneqarnissaannut, toqqortarineqarnissaannut nalunaarsorneqarnissaannullu akisussaavoq.
  Imm. 2.  Nunatta Katersugaasivia Allagaateqarfialu toqqortat pissarsiarineqartut aallaavigalugit ilisimatusarnermik ingerlatsissaaq kiisalu Kalaallit Nunaanni piorsarsimassutsikkut inuiaqatigiillu oqaluttuarisaanikkut ineriartornerannik ilisimanninneq siaruartissallugu.
  Imm. 3.  Nunatta Katersugaasivia Allagaateqarfialu toqqorsiveqarnermut tunngasutigut piorsarsimassutsikkut sullissiveqarfinnik allanik Nunatsinniittunik avataaniittunillu siunnersuisassaaq suleqateqartassallunilu.

  § 4.  Nunatta Katersugaasivia Allagaateqarfialu pisortat sullissiveqarfiinut toqqorsiveqarnermut tunngasutigut siunnersuisassaaq.
  Imm. 2.  Nunatta Katersugaasivia Allagaateqarfialu pisortat sullissiveqarfiutaasa toqqortaataasa suliarineqartarnerannik toqqortarineqartarnerannillu nakkutilliisuussaaq.

Kapitali 3
Pisortat sullissiveqarfiutaasa toqqorsiveqarnerannut tunngasut

Toqqortaqarneq

  § 5.  Suulluuniit paasissutissartallit pisortat sullissiveqarfiini sulinikkut pilersinneqartut taakkuluuniit aqqutigalugit pilersinneqartut toqqorneqassapput.

  § 6.  Pisortat sullissiveqarfiutaasa, toqqortaatimik qaqugukkulluunniit isumannaatsumik suliarineqarnissaat toqqortarineqarnissaallu isumagissavaat. Elektroniskimik toqqortat suliarineqassapput toqqorneqarlutillu Nunatta Katersugaasiviata Allagaateqarfiatalu atortulersuummi akuerisaani, taakkulu qarasaasiamut toqqorsiviusumut millisillugit nuunneqarsinnaassapput. 
  Imm. 2.  Pisortat sullissiveqarfiutaasa toqqortatik pisortat sullissiveqarfiisa allat toqqortaataannit immikkoortissavaat, taamaattoq tak. imm. 3.  
  Imm. 3.  Naalakkersuisut aalajangersinnaavaat, Inatsisartut inatsisaat atsiukkat siullerpaat, Inatsisartut peqqussutaat, Namminersornerullutik Oqartussat aamma Namminersorlutik Oqartussat peqqussutaat kiisalu kommunit ileqqoreqqusaat, toqqorsiveqarfiup toqqagaani toqqorsivimmi toqqortaatigineqassasut.

  § 7.  Pisortat sullissiveqarfiata suliassaqarfiisa pisortat sullissiveqarfiannut allamut nuunneqarneranni, toqqortat sulianut inaarneqanngitsunut tunngassuteqartut pisortat sullissiveqarfiutaannut suliassaqarfimmik tigusisumut nuunneqartassapput.
  Imm. 2.  Toqqortat allat Nunatta Katersugaasivianut Allagaateqarfianullu nuunneqarnissamik tungaanut pisortat sullissiveqarfiutaanni nuussisumiiginnartassapput, tak. § 12. Toqqortat taamaattut pisortat sullissiveqarfiutaannut tigusisumut nuunneqartarnissaat Nunatta Katersugaasiviata Allagaateqarfiatalu pisuni immikkut ittuni akuerisinnaavaa.
  Imm. 3.  § 6, imm. 2-imi aalajangersagaq aamma atuutissaaq imm. 1 aamma 2 naapertorlugit toqqortaatinik nuussisoqarnerani.

  § 8.  Naalakkersuisut pisortat sullissiveqarfiutaasa toqqortaatinik suliarinnittarnerat toqqortarinnittarnerallu pillugit erseqqinnerusunik maleruagassiussapput. Kommunini ingerlatsiviit toqqortaatinik suliarinnittarnerat toqqortaqartarnerallu pillugit maleruagassat aamma kommuninut isumaqatiginninniareernikkut aalajangersarneqassapput.

  § 8 a.  Nunatta Katersugaasiviata Allagaateqarfiatalu pigisanik, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasunik, toqqortarinnittarnera pillugu ersarinnerusunik maleruagassanik, Datatilsyn-imit oqaaseqaammik pissarsinerup kingorna, Naalakkersuisut aalajangersaasinnaapput.

Allanut tunniussineq

  § 9.  Pisortat sullissiveqarfiutaasa toqqortaataat allanut tunniunneqassanngillat aammalu eqqartuussiviit aqqutigalugit piginnittussaajunnaarsitsinikkut piginnittussaasulluuniit akuersissutigineqarneratigut pissarsiarineqarsinnaanngillat.
  Imm. 2.  Pisortat sullissiveqarfiutaasa toqqortaataat inunnit ataasiakkaanit pigineqalersimappata akiliutitaqanngitsumik Nunatta Katersugaasivianut Allagaateqarfianullu utertinneqartassapput.

Toqqorsiveqarnermut allakkanillu nalunaarsuiffeqarnermut pilersaarutit

  § 10.  Naalakkersuisut toqqorsiveqarnermut allakkanillu nalunaarsuiffeqarnermut pilersaarutit pillugit maleruagassat erseqqinnerusut, Nunatta Katersugaasiviata Allagaateqarfiatalu tamatuminnga inassuteqarneratigut aalajangersassavaat. Kommunini ingerlatsiviit toqqorsiveqarnermut allakkanillu nalunaarsuiffeqarnermut pilersaarutinik suliaqartarnissaat pillugu maleruagassat aamma kommuninut isumaqatiginninniareernikkut aalajangersarneqassapput.

Atortussaajunnaarsitsineq

  § 11.  Naalakkersuisut toqqortat toqqortarineqartussaanngitsut, atortussaajunnaarsitsisarneq pillugu maleruagassaliorsinnaapput, Nunatta Katersugaasiviata Allagaateqarfiatalu tamatuminnga inassuteqareerneratigut.
  Imm. 2.  Toqqortat atortussaajunnaarsitassanngortinneqaraangata toqqortat susassaqanngitsunit takuneqarsinnaajunnaarlugit aserorterneqarnissaat pisortat sullissiveqarfiutaata isumagisassaraa.

Kapitali 4
Toqqortaatinik tunniussineq

  § 12.  Toqqortaatit ukiunit 15-init pisoqaanerusut pisortallu sullissiveqarfiutaata sulinerani atortussaajunnaartut, kinguarsarnertaqanngitsumik Nunatta Katersugaasivianut Allagaateqarfianullu tunniunneqassapput. Pisuni immikkut ittuni aamma Nunatta Katersugaasivianut Allagaateqarfianullu isumaqatigiissuteqarnikkut tunniussineq piffissami allami pisinnaavoq. Piffissami allami tunniussisoqassappat tamanna Nunatta Katersugaasivianit Allagaateqarfianiillu qinnuiginninneq malillugu pissaaq.
  Imm. 2.  Tunniussinissap tungaanut pisortat sullissiveqarfiutaat toqqortaatiminik toqqortarinninnissaminut pisussaapput.
  Imm. 3.  Pisortat sullissiveqarfiutaat atortussaajunnaarsinneqarpat taassuma toqqortaataasa pisoqaassusaat apeqqutaatinnagu tunniunneqartassapput, pisortat sullissiveqarfiutaannit allamit suliassaqarfimmik tigusisussamit atorneqassanngikkunik, tak. § 7.

  § 13.  Toqqortat tunniunneqarnerminni torersarneqarsimassapput, poortorneqarsimallutik, nalunaaqutserneqarlutik qulequtsersorneqarsimassallutillu aammalu suliat ataasiakkaat pisariaqanngitsortaat peerneqarsimassallutik.
  Imm. 2.  Nunatta Katersugaasiviata Allagaateqarfiatalu inassuteqarnerata aamma Datatilsyn-imit oqaaseqaammik pissarsinerup kingorna, matumani elektroniskimik toqqortat ilanngullugit, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasunik toqqorneqartussanillu, toqqorneqartussanik tigusisarneq pillugu ersarinnerusunik maleruagassanik Naalakkersuisut aalajangersaasinnaapput.
  Imm. 3.  Pisortat sullissiveqarfiutaat tunniussisoq tunniussinermi aningaasartuutinik tamanik akiliissaaq.

  § 14.  Pisortat suliffeqarfiutaata attartorlugit angerlaakkallarsinnaavai nammineq allagaatit toqqortaatigineqalersut, sulianut atatillugu atorumallugit, tak. taamaattoq § 21 c.

  § 14 a.  Pisortatut oqartussaasoq kinaluunniit siusinnerusukkut maannakkulluunniit pisortatut oqartussaasunit toqqortaatigineqarsimasunik tigusaqaruni pissarsiaqaruniluunniit, tamanna pillugu Nunatta Katersugaasivianut Allagaateqarfianullu ingerlaannartumik nalunaaruteqassaaq. Toqqortaatinik taama ittunik oqartussaasut neqeroorfigineqarunik imaluunniit toqqortaatip piunera pillugu arlaatigut ilisimasaqalerunik taamatuttaaq Nunatta Katersugaasivianut Allagaateqarfianullu tamanna pillugu ingerlaannartumik nalunaaruteqassapput.

Kapitali 5
Pissarsiarineqarsinnaanerat atorneqarnerallu

Tamanit pissarsiarineqarsinnaanerat

  § 15.  Toqqortat Nunatta Katersugaasivianut Allagaateqarfianullu tunniunneqartut ukiunik 25-inik pisoqaassuseqaleraangamik tamanit pissarsiarineqarsinnaalersarput, taamaattoq tak. §§ 16-17.

  § 16.  Toqqortat inuit ataasiakkaat pillugit paasissutissartallit, tassunga ilanngullugit aningaasaqarnerannut tunngasut, pissarsiarineqarsinnaanerat ukiunut 80-inut killilerneqarpoq.

  § 17.  Pisortat inuilluunniit ataasiakkaat soqutigisaat pingaarutilitsigut eqqarsaatigineqartariaqarpata pisortat sullissiveqarfiutaat tunniussisuusoq, Nunatta Katersugaasivianik Allagaateqarfianillu oqaloqateqareernermigut §-ini 15-imi 16-imilu pissarsiarineqarsinnaanerannut killiliunneqartumit sivisunerusumik killiliisinnaavoq.
  Imm. 2.  Imm. 1 naapertorlugu pissarsiarineqarsinnaassusianut killiliussaq tunniussinermi aalajangerneqartassaaq toqqortaatinullu sorlernut imaluunniit toqqortaatinut ataatsimoortunut sorlernut killiliussap tunnganeranik erseqqinnerusunik imaqassalluni.

  § 18.  Toqqortaatit naalagaaffimmi oqartussaneersut immikkut isumaqatigiissuteqarluni, tak. § 2, Nunatta Katersugaasivianut Allagaateqarfianullu tunniunneqartut pissarsiarineqarsinnaanerannut killissarititaasut isumaqatigiissummi aalajangiunneqartut atuupput.

  § 19.  §§-it 15-imiit 18-imut naapertorlugit pissarsiarineqarsinnaanerannut killissarititat toqqortaatigineqartup ukiumi toqqorneqarfianit naatsorsorneqassapput.

  § 19 a.  Toqqortaatit tamanit pissarsiarineqarsinnaanngitsut, pissarsiarineqarsinnaanerat pillugu ersarinnerusunik maleruagassanik Naalakkersuisut aalajangersaasinnaapput

Immikkut akuersissuteqartarneq

  § 20.  Toqqortat ilisimatusarnermut atorneqassappata Nunatta Katersugaasivia Allagaateqarfialu §§-ini 15-imiit 17-imut aalajangersakkat atortinneqannginnissaannik immikkut akuersissuteqarsinnaavoq, taamaattoq tak. imm. 2.
  Imm. 2.  Toqqortat § 17, imm. 1-imi aalajangersakkamit pissarsiarineqarsinnaanerat sivisunerusumik killilerlugu isumaqatigiissutit atorneqarnissaannut immikkut akuersissuteqartoqartinnagu pisortat sullissiveqarfiutaannit tunniussisumit akuersissummik pissarseqqaartoqartassaaq.
  Imm. 3.  Immikkut akuersissuteqarneq inuit ataasiakkaat ataqqisariaqarnerata unioqqutinneqannginnissaanik piumasaqaatitaqartassaaq.

Atorneqartarnerat

  § 21.  Toqqortat §§-ini 15-imiit 18-imut maleruagassat naapertorlugit pissarsiarineqarsinnaasut Nunatta Katersugaasiviani Allagaateqarfianilu atorneqarsinnaapput, taanna atuinermut ikiorsiullugu.
  Imm. 2.  Ilisimatusarnermut atugassaatillugit Nunatta Katersugaasiviata Allagaateqarfiatalu toqqortat atuagaateqarfinnut, katersugaasivinnut akuerisanut aamma sullissiveqarfinnut tamakku assinginut atukkiunneqarsinnaanerat akuersissutigisinnaavaa. Nunatta Katersugaasivia Allagaateqarfialu atukkiussinermut atasumik piumasaqaateqarsinnaavoq.

  § 21 a.  Nunatta Katersugaasiviata Allagaateqarfiatalu pisuni aalajangersimasuni allagaatinik, allagaatinik toqqorsivinniittunik ataatsimoortunik imaluunniit allagaatinik ataatsimoortunik toqqorsivinnik arlaqartunik ataatsimoortunik imaqartunik Nunatta Katersugaasivianut Allagaateqarfianullu tunniunneqareersimasunik atuinissamut akuersissut nalunaarutigisinnaavaa, atuisinnaanermut piffissaliussaasup naannginnerani, tak. taamaattoq  § 21 b aamma c.

  §  21 b.  § 21 a malillugu akuersissut, oqartussaasup tunniussisup akuersineranik piumasaqaateqarpoq, imaassimappat 
1)  allagaatigineqartup imaluunniit toqqortaatigineqartup pissarsiarineqarsinnaaneranut piffissaliussaq § 17 malillugu aalajangersarneqartumit sivisuneruppat, 
2)  toqqortaatigineqartoq imaluunniit allagaatigineqartoq ukiunik 25-nik nutaaneruppat imaluunniit 
3)  toqqortaatigineqartoq naalagaaffimmi oqartussaasumit pissarsiarineqarsimappat, tak. § 18.

  § 21 c.  § 21 a malillugu akuersissut Datatilsyn-imiit akuersissummik pisariaqartitsivoq, toqqortaatigineqartoq pisortat ingerlatsiviisa akornanni oqartussaasumit tunniunneqarsimappat aamma inunnut ataasiakkaanut inuttut atugaannut tunngasunik paasissutissanik imaqarsimappat aamma 
1)  paasissutissat siusinnerusukkut suliarineqarsimasut Inunnik paasissutissanik suliarinnittarneq pillugu inatsisip Kalaallit Nunaanni atuutilersinneqarnera pillugu peqqussummut ilaasimappata imaluunniit 
2)  paasissutissat qarasaasiakkut-nalunaarsuiffimmit pissarsiarineqarsimappata, pisortat ingerlatsineranni suliarineqarsimasut.

  § 22.  Toqqortaatinik tamanit takuneqarsinnaanngitsunik atuinissaminut akuerineqartoq, taamaaliornermigullu paasissutissanik isertuussanik ilisimasaqalersoq akuerineqartinnani paasissutissanik isertuussanik tamanut saqqummiussissanngilaq, ingerlatitseqqissanani atuissananiluunniit.

  § 22 a.  Paasissutissanik, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasunik, atornerinut piumasaqaatit pillugit maleruagassanik, Datatilsyn-imit oqaaseqaammik pissarsinerup kingorna, Naalakkersuisut aalajangersaasinnaapput.

  § 23.  Nunatta Katersugaasiviata Allagaateqarfiatalu toqqortat atorneqarnissaat itigartitsissutigisinnaavaa toqqortaatip toqqortarineqarnermini pissusia eqqarsaatigineqartariaqartillugu. Toqqortaatip toqqortarineqarnermini pissusia ajoqusernagu pissappat atuisussamut atugassanngorlugu assiliissummik assilillugu nuussisoqassaaq.

  § 24.  Nunatta Katersugaasivia Allagaateqarfialu allagaatiminik ilisimatusarnermut aamma tamanut saqqummiussassatut akeqanngitsumik atugassanngortitsissaaq. Taamaattorli sullissinerit annertunerusut nukissanillu atuiffiusut akileqquneqarsinnaapput.

Kapitali 6
Inuit namminerisamik toqqortaataat

  § 25.  Nunatta Katersugaasivia Allagaateqarfialu inunnit ataasiakkaanit, sullissiveqarfinnit, ingerlatseqatigiiffinnit, peqatigiiffinnit il.il., § 1, imm. 1-miit 2-mut ilaatinneqanngitsunit toqqortaatinik ilisimatusarnermut annertuumik imaluunniit nalinginnaasumik piorsarsimassusermut pingaaruteqartunik, katersisinnaavoq, tigusisinnaalluni isumannaarisinnaallunilu.
  Imm. 2.  Imm. 1 naapertorlugu toqqortaatinik tunniussisoq toqqortaatip pissarsiarineqarsinnaaneranut killiliisimatinnagu, toqqortaatit §§-ini 15-imiit 16-imut aammalu §§-ini 19-imiit 20-mut maleruagassat naapertorlugit pissarsiarineqarsinnaapput.
  Imm. 3.  Imm. 1-imi pineqartut atorneqarsinnaanerannik aalajangersaasoqarsimanngippat toqqortat §§-ini 21-miit 24-mut maleruagassat naapertorlugit atorneqarsinnaapput.

  § 26.  Toqqortaatinik ilisimatusarnermut annertuumik imaluunniit nalinginnaasumik piorsarsimassusermut pingaarutilinnik namminerisaminik pigisaqartoq, toqqortat nunamit anninneqartinnagit toqqortaatit Nunatta Katersugaasivianit Allagaateqarfianillu assilineqarnissaannut periarfissiissaaq.
  Imm. 2.  Naalakkersuisut Nunatta Katersugaasivia Allagaateqarfialu inassuteqartereerlugu toqqortaatit namminerisamik pigineqartut annertuumillu ilisimatusarnermut imaluunniit nalinginnaasumik piorsarsimassusermut pingaaruteqartut killilersornissaat pillugit malittarisassaliorsinnaapput.

Kapitali 6 a

Paasissutissanik paasitinneqarnissamik qinnuteqaat, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasoq

  § 26 a.  Paasissutissat Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasut, Nunatta Katersugaasiviani Allagaateqarfianilu toqqortaatigineqartussatut nuunneqarsimasut, pillugit paasissutissanik pissarsitinneqarnissaq pillugu inuk kinaluunniit Nunatta Katersugaasivianut Allagaateqarfianullu qinnuteqaammik saqqummiussisinnaavoq. 
  Imm. 2.  Imm. 1 malillugu qinnuteqaatip, paasissutissanik taakkuninnga suliarinneqqaartuusimasoq, oqartussaasoq nalunaassavaa. 
  Imm. 3.  Paasitinneqarnissaq pillugu qinnuteqaat tamanna pillugu Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummi aalajangersakkat malillugit oqartussaasumut pineqartumut aalajangiisussamut, Nunatta Katersugaasiviata Allagaateqarfiatalu ingerlateqqissavaa. 
  Imm. 4.  Nunatta Katersugaasivianut Allagaateqarfianullu tunniunneqarsimasunik inuit namminneerlutik toqqortaataannik paasitinneqarnissaq pillugu qinnuteqartoqartillugu, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasunik, peqqussummi aalajangersakkat malillugit tamanna pillugu toqqortaasivik aalajangiissaaq. Qinnuteqaatip paasissutissanut akisussaasuusoq, paasissutissanik pineqartunik suliarinneqqaartuusoq, nalunaassavaa.

Kapitali 7
Pineqaatissiinissamut aalajangersakkat

  § 27.  § 5-imik, § 6, imm. 1-imik aamma 2-mik, § 7-imik, § 9, imm. 2-mik, § 11, imm. 2-mik, § 12-imik, § 13, imm. 1-imik, § 14 a-mik, § 22-mik aamma § 26-mik aamma § 21, imm. 2 naapertorlugu piumasaqaatinik aalajangersarneqarsimasunik unioqqutitsineq, Kalaallit Nunaanni pinerluttulerinermut inatsimmi maleruagassat malillugit akiliisitsinermik kinguneqaateqartinneqarsinnaavoq.
  Imm. 2.  Aalajangersakkanik unioqqutitsisoqartillugu akiliisitsisarnissaq pillugu maleruagassat maleruaqqusani Inatsisartut inatsisaat naapertorlugu atuutilersinneqartuni aalajangersarneqarsinnaapput.
  Imm. 3.  Akiliisitsinissaq Inatsisartut inatsisaatigut maleruaqqusaniluunniit Inatsisartut inatsisaat naapertorlugu atuutilersinneqartutigut tunngavissaqarpat, inatsisit naapertorlugit inatsisitigut pisussaatitaasoq Kalaallit Nunaanni pinerluttulerinermik inatsimmi maleruagassat naapertorlugit akiliisitsissummik akileeqquneqarsinnaavoq.
  Imm. 4.  Inatsisartut inatsisaat manna atorlugu akiliisitsinerit nunatta karsiata pisassaraa.

Kapitali 8
Atuutilerfia ikaarsaariarnermilu aalajangersakkat

  § 28.  Inatsisartut inatsisaat januaarip aallaqqaataani 2016-imi atuutilerpoq, taamaattoq § 8, § 10, § 11, imm. 1, § 13, imm. 2 aamma § 26, imm. 2 aggustip aallaqqaataani 2015-imi atuutilissapput.
  Imm. 2.  Tamatuma peqatigisaanik Allagaateqarfeqarneq pillugu Inatsisartut inatsisaat nr. 22, 30. oktober 1998-imeersoq atorunnaarpoq.
  Imm. 3.  Maleruagassat allaffissornikkulluunniit maleruaqqusat Allagaateqarfeqarneq pillugu Inatsisartut inatsisaat nr. 22, 30. oktober 1998-imeersoq naapertorlugu aalajangersagaasut atuutsiinnarneqartulluunniit, Inatsisartut inatsisaat manna inatsisilluunniit allat naapertorlugit maleruagassanik allaffissornikkulluunniit maleruaqqusanik taarserneqarnissartik tikillugu atuutiinnassapput.

Allagaateqarfeqarneq pillugu Inatsisartut inatsisaata allanngortinneqarnera pillugu Inatsisartut inatsisaat nr. 34, 28. november 2019-imeersoq (Toqqorsiveqarfiup toqqortaataani toqqartukkani allaaserineqaqqaartut maleruagassat allaaserineqarsimasut toqqortarineqarnissaannut aamma toqqortat inuk pillugu paasissutissanik ilaqartut il.il. toqqortarineqartarnerannut, tunniunneqartarnerannut atorneqartarnerannullu tunngaviusussaq)[1] imannak atuutilersitsinermut aalajangersakkamik imaqarpoq:

§ 2

Inatsisartut inatsisaat manna ulloq 1. januar 2020-mi atuutilerpoq. 

  Imm. 2.  Inatsisartut inatsisaat toqqortaatinut, Inatsisartut inatsisaata atuutilernera sioqqullugu oqartussaasup naammassisimasaanut imaluunniit pissarsiarisimasaanut aamma atuuppoq. 

Ilinniartitaanermut, Kultureqarnermut Ilageeqarnermullu Naalakkersuisoqarfik, ulloq 4. februar 2020

Lone Nukaaraq Møller

/

Claus Kleemann